Umbhalo-ngqangi “Wengoma Yaselwandle”—Uvala Umsantsa
NGOMEYI 22, 2007, umsongo wesiHebhere owawukho malunga nenkulungwane yesixhenxe okanye yesibhozo yeXesha Eliqhelekileyo, waboniswa kwiMyuziyam yakwaSirayeli eYerusalem. Lo ngumbhalo-ngqangi we-Eksodus 13:19–16:1. Uquka oko kubizwa ngokuba “Yingoma Yaselwandle”—ingoma yoloyiso eyaculwa ngamaSirayeli emva kokuba ehlangulwe ngokungummangaliso kuLwandle Olubomvu. Kutheni ukuboniswa kwalo msongo kubalulekile?
Oko kubangelwa lixesha owabhalwa ngalo lo mbhalo-ngqangi. ImiSongo Yolwandle Olufileyo yabhalwa phakathi kwenkulungwane yesithathu Ngaphambi kweXesha Eliqhelekileyo nenkulungwane yokuqala yeXesha Eliqhelekileyo. Ngaphambi kokuba ifunyanwe kwiminyaka emalunga nama-60 eyadlulayo, kwakusele kukho iAleppo Codex, engumbhalo-ngqangi wokuqala wesiHebhere owabhalwa ngowama-930 C.E. Ngaphandle kwembalwa kuyo, ayikho eminye imibhalo-ngqangi yesiHebhere eye yafunyanwa ebhalwe kwiminyaka engamakhulu aliqela eyalandelayo.
UJames S. Snyder, ongumalathisi weMyuziyam yakwaSirayeli, uthi: “Umbhalo-ngqangi Wengoma Yaselwandle uvala umsantsa phakathi kwexesha lemiSongo yoLwandle Olufileyo . . . neleAleppo Codex.” Uthi, lo mbhalo-ngqangi neminye imibhalo yeBhayibhile yamandulo “ibubungqina bokuba le mibhalo ayizange itshintshwe.”
Kucingelwa ukuba lo msongo ungomnye wemibhalo-ngqangi emininzi eyafunyanwa ngasekupheleni kwenkulungwane ye-19 kwindlu yesikhungo yaseCairo, eYiputa. Noko ke, umntu owayeziqokelelela imibhalo-ngqangi yesiHebhere wayengazi ukuba ubalulekile de waya kubuza kwenye ingcungela ngasekupheleni kweminyaka yee-1970. Kwajongwa ixesha owabhalwa ngawo lo mbhalo-ngqangi waza wagcinwa de waya kuboniswa kwiMyuziyam yakwaSirayeli.
Ethetha ngokufaneleka kwalo msongo, uAdolfo Roitman, umphathi weMyuziyam yakwaSirayeli ebizwa ngokuba yiShrine of the Book, nokwajongene nemiSongo yoLwandle Olufileyo, uthi: “Umbhalo-ngqangi Wengoma Yaselwandle ubonisa ukuthembeka okumangalisayo eye yadluliselwa ngako inguqulelo yeBhayibhile yamaMasorete ukutyhubela iinkulungwane. Iyamangalisa into yokuba indlela iNgoma Yaselwandle ebhalwe ngayo namhlanje ifane twatse nendlela eyayibhalwe ngayo kwinkulungwane yesixhenxe ukuya kweyesibhozo.”
IBhayibhile iliLizwi eliphefumlelweyo likaThixo, yaye nguYehova oqinisekisayo ukuba iyalondolozwa. Ngaphezu koko, iZibhalo zakhutshelwa ngendlela echanileyo ngababhali. Ngenxa yoko, asiyithandabuzi into yokuba iBhayibhile esiyisebenzisayo namhlanje inokuthenjwa.
[Inkcazelo Ngomfanekiso okwiphepha 32]
Courtesy of Israel Museum, Jerusalem