Imisongo YoLwandle Olufileyo—Okuxabisekileyo Okwafunyanwayo

KWIIKHILOMITHA ezimalunga nama-24 ngakumzantsi-mpuma weYerusalem, yiWadi En-Nar, umfula owomileyo osinga ngasempuma ukuya kuLwandle Olufileyo. Iingxingongo zamawa zinabele ngemva kwethafa eliselunxwemeni. Kweli thafa, ngeemini zaxa ilanga lishushu ngokwahlukileyo kubusuku obubandayo basekwindla, amaBedou aseTa‘amireh (abantu abahlala entlango) alusa imihlambi yawo yeegusha neebhokhwe.

Ngonyaka we-1947, ngoxa wayesalusa imihlambi, umalusi oselula ongumBedou wagibisela ilitye kumgxuma omncinane kwicala elinemigongxo leliwa. Wothuswa yingxolo elayibangelayo, ekubonakala ukuba yabangelwa kukwaphulwa kwengqayi yodongwe. Wasaba esoyika, kodwa kwiintsuku ezimbini kamva wabuya waza wanyuka iimitha ezimalunga ne-100 ukuya kungena kumngxuma omkhulu, osendaweni ephakamileyo. Njengoko amehlo akhe ayeqhelana nobumnyama, wabona iingqayi zodongwe ezinde ezilishumi zidwelile ngaseludongeni lomqolomba, nemfumba yeengceba zengqayi eyaphukileyo phakathi kwamatye zisasazeke emgangathweni.

Iingqayi ezininzi zazingenanto, kodwa enye yayinemisongo emithathu, emibini yayo yayisongelwe ngelaphu. Le mibhalo-ngqangi wayibuyisela kwinkampu yamaBedou waza wayishiya apho ithuba elingangenyanga, isengxoweni eyayixhonywe kwintsika yentente. Ekugqibeleni, amaBedou athile ayithabatha le misongo ayisa eBhetelehem ukuya kubona ukuba ayenokuzuza imali engakanani na ngayo. La maBedou agxothwa ngokukrwada kwelinye iziko elihlala iimonki noonongendi, exelelwa ukuba le misongo yayingenaxabiso kwaphela. Omnye umrhwebi wathi loo mibhalo-ngqangi yayingenanto yakwenza nokumbiwa kwezinto zakudala, yaye wayecingela ukuba yayibiwe kwindlu yesikhungo yamaYuda. Hayi indlela awayengachananga ngayo! Ekugqibeleni, ngoncedo lomthungi wezihlangu waseSiriya owayesebenza njengomrhwebi, laziwa ngokuchanileyo ixabiso layo. Kungekudala kwamiselwa, nexabiso leminye imibhalo-ngqangi.

Eminye yale mibhalo yamandulo yavelisa indlela entsha ngokupheleleyo yokuqondwa kwendlela ezazisebenza ngayo iimvaba zonqulo zamaYuda malunga nexesha lokuphila kukaKristu. Kodwa yayingumbhalo-ngqangi weBhayibhile wesiprofeto sikaIsaya owabangela umdla ehlabathini. Ngoba?

Ixabiso Elikhulu

Lo msongo kaIsaya owawusandul’ ukufunyanwa ekuqaleni wawumalunga neemitha ezili-7,5 ubude. Wawunamaphepha ali-17 enziwe ngesikhumba sesilwanyana esisukwe kakuhle, aphantse abe acokiswe njengezintsu. Wenziwe wanemihlathi engama-54 ngokomlinganiselo enemigca engama-30 umnye, yayikrwelwe ngenyameko. Kule migca umbhali onobuchule wayebhale oonobumba bombhalo, ababhalwe ngokweziqendu.—Bona umfanekiso.

Lo msongo wawungasongelwanga kwizinti, yaye wawumnyama ngakumbi phakathi kwindawo owawuphathwa kuyo zizandla zabantu abaninzi ababewufunda. Wawusetyenziswe kakhulu, uneendawo ezilungiswe ngobuchule yaye kubonakala ukuba wawubekelwe kwiindawo ezithile. Wawulondolozwe kakuhle ngenxa yokuvalelwa kwawo ngenyameko engqayini. Uxabiseke kangakanani kumphengululi weBhayibhile, yaye, ngokungakumbi, kuthi sonke?

Lo mbhalo-ngqangi womprofeti uIsaya, umdala kangangeminyaka emalunga newaka kunawo nawuphi na omnye umbhalo osekhoyo, ukanti umongo wawo awahlukanga kangako. UNjingalwazi uMillar Burrows, umhleli wombhalo owapapashwa ngowe-1950, wathi: “Umbhalo kaIsaya okulo mbhalo-ngqangi, onokwahluka okuphawulekayo kupelo lwamagama nakwimigaqo-ntetho nokwahluka okuninzi kwindlela ofundeka ngayo kwiindawo ezithile ezingabangeli mdla nezingabalulekanga kangako, ngulowo ubukhulu becala ubhalwe kamva kwiMT [uMbhalo wesiHebhere weMasore].”a Kwakhona okuphawulekayo kukusebenzisa kwawo ngokuthe rhoqo iTetragrammaton, יהוה, igama likaThixo elingcwele, uYehova, ngesiHebhere.

Eminye Imibhalo-ngqangi Exabisekileyo

Igama likaThixo likwavela nakomnye umbhalo-ngqangi owafunyanwa kwakulo mqolomba, ngoku owaziwa ngokuba nguMqolomba 1. Kwingxelo yeziganeko ekwincwadi kaHabhakuki, iTetragrammaton ibonakala kangangezihlandlo ezine ngoonobumba besiHebhere samandulo, uhlobo oludala olwahlukileyo koonobumba abaqheleke ngakumbi abalinganayo besiHebhere.—Bona umbhalo osemazantsi kuHabhakuki 1:9, kwiReference Bible.

Kulo mqolomba kwavela iinxalenye zomsongo kaIsaya, ndawonye neziqwenga zesikhumba zencwadi yeBhayibhile kaDaniyeli. Enye yezi nxalenye ibonisa indlela eyaguquka ngayo ekaDaniyeli 2:4 isuka kwisiHebhere isiya kwisiAram njengoko oku kufunyanwa kwimibhalo-ngqangi yeminyaka eliwaka kamva.

Iinxalenye ezincinane zale misongo ezigcinwe kakuhle ngoku kuboniswa ngazo eYerusalem, kwimyuziyam ebizwa ngokuba yiShrine of the Book (iTempile Yencwadi Enkulu). Le myuziyam ingaphantsi komhlaba, ngoko njengoko utyelela apho, uba ngathi ungena emqolombeni. Umphezulu wale myuziyam umile ngokwesiciko sengqayi eyenziwe ngodongwe owafunyanwa kuyo umSongo kaIsaya woLwandle Olufileyo. Ukanti, ubona kuphela umbhalo wombhalo-ngqangi kaIsaya. Oxabisekileyo wantlandlolo ugcinwe ngokukhuselekileyo kwigumbi lokugcina izinto elikufutshane.

[Umbhalo osemazantsi]

[Inkcazelo Ngemifanekiso ekwiphepha 10]

Pictorial Archive (Near Eastern History) Est.

Courtesy of The British Museum

[Inkcazelo Ngomfanekiso okwiphepha 11]

Israel Antiquities Authority; The Shrine of the Book, Israel Museum; D. Samuel and Jeanne H. Gottesman Center for Biblical Manuscripts