Ngaba Ubusazi?

Njengomchweli, yiyiphi imisebenzi eyayisenziwa nguYesu?

Utata kaYesu wayengumchweli, yaye naye wawufunda lo msebenzi. Xa wayeqalisa ubulungiseleli bakhe ‘emalunga namashumi amathathu’ ubudala, wayengaziwa ‘njengonyana womchweli’ kuphela, kunoko wayengumchweli ovunyiweyo.—Luka 3:23; Mateyu 13:55; Marko 6:3.

Kwidolophu awayehlala kuyo, izixhobo zokulima ezenziwe ngamaplanga ezifana namakhuba needyokhwe, zazifuneka kakhulu. Phakathi kwezinto ezazisenziwa ngumchweli yayiyifanitshala—iitafile, izitulo neetyesi—kuquka iminyango, iifestile, izitshixo zamaplanga nophahla. Umsebenzi womchweli wawuquka ukwakha.

Komnye umzekeliso uYohane umBhaptizi wakhankanya izembe, esinye sezixhobo ezazisetyenziswa nguYesu nangabanye abachweli xa begawula imithi. Wayeyicanda kwalapho ehlathini le mithi ibe ngamaplanga okanye ayise kwindawo asebenzela kuyo. Lo yayingumsebenzi ofuna amandla. (Mateyu 3:10) UIsaya usinika uluhlu lwezixhobo ezazisetyenziswa ngabachweli bexesha lakhe: “Yena ke umkroli womthi, wolule ulutya lokulinganisa; wenza esazobe ngechitywa; usisebenza ngesixhobo sokuchwela; yaye wenza isazobe ngekhampasi.” (Isaya 44:13) Abembi bezinto zakudala bayavuma ukuba kwakusetyenziswa iisarha, iihamile nezikhonkwane ngamaxesha okubhalwa kweBhayibhile (Eksodus 21:6; Isaya 10:15; Yeremiya 10:4) Kusengqiqweni ukugqiba kwelokuba naye uYesu wayezisebenzisa ezi zixhobo.

Yayingoobani “oonobhanki” uYesu awayethetha ngabo kumzekeliso wakhe, yaye babesebenza njani?

UYesu wathetha ngenkosi eyakhalimela ikhoboka layo elidangeleyo, isithi: “Ubufanele ukuba ubeke imali yam yesilivere koonobhanki, ndize ekufikeni kwam ndamkele oko kukokwam nenzala.”—Mateyu 25:27.

Iibhanki ezinkulu ezikhoyo ngoku zazingekho ngexesha likaYesu. Kodwa ababoleki-mali babehlawula inzala ngemali abayigcinisiweyo baze babolekise ngenzala engaphezulu. IThe Anchor Bible Dictionary ibonisa ukuba ukubolekisa ngemali ezalayo kwakuyinto eqhelekileyo eGreece ngenkulungwane yesi-4 B.C.E. Ngexesha loxolo olwasekwa buBukhosi baseRoma inzala yonyaka yokubolekisa ngemali yayiphakathi kwesi-4 nesi-6 ekhulwini.

UMthetho kaMoses wawukwalela ukubolekisa ngemali ezalayo kumaSirayeli axhwalekileyo. (Eksodus 22:25) Lo mthetho wawubhekisela ngokukhethekileyo kwabo bahlwempuzekileyo. Noko ke, kulo mzekeliso kaYesu kuyacaca ukuba kwakuyinto eqhelekileyo ukufumana inzala kwimali egciniswe “koonobhanki.” Ngoko, uYesu wenza umzekeliso ngento ababeqhelene nayo abaphulaphuli bakhe.