Ubomi Namaxesha AmaKristu Enkulungwane Yokuqala

“Umchweli”

“Asingonyana womchweli na lo?”—Mateyu 13:55.

UYESU wayengaziwa ‘njengonyana womchweli’ nje kuphela kodwa naye kwakusithiwa “ngumchweli.” (Marko 6:3) Kusenokwenzeka ukuba wafunda ukuchwela kuyise uYosefu.

Ziziphi izixhobo ekwakufuneka uYesu akwazi ukuzisebenzisa kakuhle xa echwela? Ziziphi izinto ekufanele ukuba wayezenzela abantu baseNazarete? Uqeqesho awalufumana xa wayeselula lusenokuba lwamnceda njani ebudaleni bakhe?

Ishishini Lentsapho Umfanekiso ongezantsi ubonisa uyise efundisa unyana wakhe omdala indlela yokusebenzisa isixhobo esithile. Unyana oselula yena wondele.

Amakhwenkwe ayedla ngokuqala ukusebenza xa eneminyaka eli-12 ukuya kweli-15 ubudala. Ayedla ngokufundiswa ngooyise. Ayeqeqeshwa iminyaka emininzi yaye kwakufuneka azibhokoxe ukuba ayefuna ukuba ngabachweli abaphum’ izandla. Khawucinge ngeeyure ezininzi ekusenokwenzeka ukuba uYosefu wazichitha noYesu njengoko wayemfundisa umsebenzi yaye bencokola. UYosefu ufanele ukuba waba nebhongo xa wabona uYesu esiba yincutshe emsebenzini.

Ulwazi, Amandla Nobuchule Obabufuneka Umchweli kwakufuneka ayazi kakuhle imithi awayeyisebenzisa. Wayenokukhetha phakathi kwemithi eyayikhula ekuhlaleni njengomsipres, umsedare, umthombe, umnquma neminye. Noko ke, ngaloo maxesha zazingekho iindawo ezithengisa amaplanga. Ngenxa yoko kwakufuneka umchweli aziyele ehlathini, akhethe aze agawule imithi aze ayise kwindawo awayesebenzela kuyo.

Umchweli wayesenza ntoni ngemithi awayeyigawule? Eminye wayesakha ngayo izindlu. Kwakufuneka enze imiqadi yokwenza uphahla, izinyuko, iingcango nemigubasi yeefestile.

Umchweli wayesenza nefanitshala. Imifanekiso ekweli phepha ibonisa enye yayo—njengeekhabhathi neengcango (1), Isitulo esincinane (2), isitulo (3) iitafile (4) ezahlukahlukeneyo; neebhedi zokulalisa iintsana. Enye ifanitshala awayeyenza wayeyihombisa. Wayeyaleka ngomthwebeba, ivanishi okanye ioli ukuze ayikhusele ihlale intle.

Umchweli wayesenzela amafama izixhobo zokusebenza njengeedyokhwe (5) iifolokhwe zokusebenza egadini, iiharika kunye nemihlakulo (6). Amakhuba (7) awayewenza kwakufuneka omelele kuba kwakulinywa kumhlaba olurhexe. Wayesenza iinqwelo (8) namavili azo. Kwakusenokufuneka alungise ifanitshala eyophukileyo, izixhobo neenqwelo awayezenza.

Ngaba unako ukuyithelekelela indlela awayekhangeleka ngayo uYesu njengoko wayechwela? Khawube nomfanekiso ngqondweni wakhe etshiswe lilanga loMbindi Mpuma, umzimba wakhe ungwanzilili ngenxa yokusebenza nzima nezandla zakhe zomile ngenxa yokusebenza ngemithi eyomeleleyo, amazembe, izando kunye neesarha.

Wafumana Imizekeliso Kulo Msebenzi UYesu wayekwazi ukusebenzisa imizekeliso elula neyezinto eziqhelekileyo ukuze afundise iinyaniso ezintsonkothileyo. Ngaba eminye yaloo mizekeliso wayifumana xa wayengumchweli? Kusenokwenzeka ukuba wayifumana apho, ingakumbi xa sihlola eminye yayo. Wathi kwisihlwele: “Kutheni, ngoko, ukhangela udiza olukwiliso lomzalwana wakho, kodwa ungawuqwalaseli umqadi okwelakho iliso?” Umchweli wayesazi ukuba wawuba ngakanani umqadi. (Mateyu 7:3) Kamva uYesu wathi kwelinye iqela labantu: “Akukho mntu ubeke isandla sakhe ekhubeni aze akhangele kwizinto ezisemva ubufanelekele kakuhle ubukumkani bukaThixo.” Kumele ukuba wenza amakhuba amaninzi. (Luka 9:62) Esinye sezona zimemo zikaYesu zikhuthazayo sisekelwe kwisixhobo esenziwa ngumchweli. UYesu wathi: “Thabathani idyokhwe yam nize nifunde kum. Idyokhwe yam yeyobubele nomthwalo wam ukhaphukhaphu.” (Mateyu 11:29, 30) Sinokuqiniseka ukuba uYesu wayekwazi ukwenza idyokhwe engatyabuliyo.

Abachasi bakaYesu bamdelela besithi ‘wayengunyana womchweli.’ Nakuba kunjalo, amaKristu anamhlanje axelisa awenkulungwane yokuqala ngokukugqala kuliwonga ukulandela le ndoda ethobekileyo eyayikhe yaba ngumchweli.

[Ibhokisi/Imifanekiso ekwiphepha 26]

Ibhokisi Yezixhobo Zomchweli

Umchweli wenkulungwane yokuqala onjengoYesu kwakufuneka akwazi ukusebenzisa ezi zixhobo zidweliswe ngezantsi. Isarha yakhe (1) yayinesiphatho esenziwe ngomthi. Xa esebenza wayelinganisa (2) ngesikwere (3) nangentsontela yokulinganisa. Kule bhokisi yakhe kwakuphinda kubekho (4) irula yokulinganisa (5), isichwelo (6), kunye nezembe (7) lokugawula imithi.

Umchweli wayenawo nomnye umatshini (8) awayewusebenzisa nesixhobo sokukrolonqa (9). Kwisiciko sebhokisi yakhe yezixhobo kukho ihamile yomthi (10) awayebethelela ngayo izikhonkwane ezingenantloko okanye xa etshweza imithi. Kukwakho nesarha encinane (11), nenye imela (12) awayetshweza ngayo kunye nezikhonkwane (13). Ngaphambi kwebhokisi kukho ihamile yentsimbi (14) nezembe (15) lokuxoza imithi. Esicikweni kukho imela (16) nezixhobo zokutshweza (17) ezahlukahlukeneyo. Isixhobo sokubhola sona (18) sibekwe ecaleni kwebhokisi yezixhobo.