Iphulo Lokukhangela Iimpazamo Lakhokelela Kwinyaniso

Kubalisa uR. uStuart Marshall

“Asithethi namaNgqina kaYehova kuba asebenzisa iBhayibhile,” watsho njalo umfundisi wamaKatolika. Yandothusa impendulo yakhe, ekubeni ndandimcele ukuba ancede umfazi wam abone ukungangqinelani kweemfundiso zamaNgqina kaYehova. Ndagqiba kwelokuba ndimele ndifunde iBhayibhile namaNgqina ndize ndimbonise umfazi wam ukungachani kweemfundiso zawo.

XA NDANDINEMINYAKA engama-43, ndandizimisele ukusebenzisa ulwazi lwam lwemfundo yonqulo ukuphikisa iimfundiso zamaNgqina kaYehova. Ndifunde kwizikolo zamaKatolika ukususela kumabanga aphantsi ukuya kutsho ekholejini. Nakuba ndandithweswe isidanga kwimfundo yezoqoqosho ngowe-1969, ndaye ndaquka imfundo yentanda-bulumko nezifundo zonqulo, kuyo yonke le mfundo yamaKatolika andizange ndiyifundiswe iBhayibhile.

Emva kokugqiba imfundo yasekholejini, ndaye ndatshata noPatricia McGinn, owayengumKatolika naye. Saqhubeka nemfundo yethu saza sathweswa izidanga kwiYunivesithi yaseStanford. Ngowe-1977, unyana wethu uStuart wazalwa saza sayokuhlala eSacramento, eCalifornia, eUnited States. Kangangeminyaka engama-23, ndandisebenza eLegislative Analyst’ s Office (LAO) ndihlalutya uqingqo-mali lwezemfundo. Ndandisebenza nzima yaye ndonwabile. Ndandikuvuyela ukuba nonyana, yaye umfazi wam endixhasa ngokuthembeka, nam ndisenza okufanayo kuye.

Impendulo Ngeesenti Ezingama-25

Xa unyana wam wayeneminyaka emibini ezelwe, umfazi wam wanikwa iBhayibhile ngamaNgqina kaYehova waza waqalisa ukufunda kunye nawo. Wabhaptizwa emva kweminyaka emithathu. Nangona ndandeyisekile kwezinye iimfundiso zawo, kodwa ndandingangqinelani nembono yawo ngeeholide notofelo-gazi. Ndothuswa kukuba ngenye imini ngowe-1987 ndazazisa esidlangalaleni iimvakalelo zam, xa ndandicebisa iqumrhu lowiso-mthetho.

IYunivesithi yaseCalifornia yayifuna imali yokukhuphisana nezinye izixeko ekwenzeni isixhobo sokuphanda ngamasuntswana eathom. Lo msebenzi wawufuna amawaka amathandathu ezigidi zeedola. Ndandingakucebisi ukuchitha imali engako kulo msebenzi, ndisithi oku kwakungayi kuba luncedo kangako kwimeko yezoqoqosho yeli. Iyunivesithi yandiphendula ngokuthumela iindwalutho ezimbini ezathweswa iimbasa zikaNobel kwezemvelo, ezaziza kunikela ubungqina phambi kwequmrhu lowiso-mthetho. Nganye kuzo yachaza ngolwazi ezaziya kulufumana kulo msebenzi. Enye yachaza ngendlela lo msebenzi owawuya kuyiphendula ngayo imibuzo ephathelele ukuqalisa kwendalo. Enye kubo yabonisa ukuba oku kwakuya kunceda kuqondwe indlela obaqala ngayo ubomi emhlabeni.

Usihlalo wekomiti wabuza.

“Ucinga ukuba amawaka amathandathu ezigidi zeedola yimali eninzi yokusinceda sifumane iimpendulo kule mibuzo?”

Ndaphendula ndathi, “Ndiyavuma ukuba le mibuzo ibalulekile, kodwa amaNgqina kaYehova andityelela rhoqo ngemiGqibelo, aze andinike iphephancwadi elinikela iimpendulo kule mibuzo ngomnikelo weesenti ezingama-25. Andiqiniseki ukuba ezi mpendulo zama-25 eesenti zilunge ngakumbi kunezi zamawaka amathandathu ezigidi zeedola ebesinokuzifumana.”

Indlu yonke yahlokoma yintsini yabo babekho, kuquka iindwalutho ezazikhona. Nakuba eli qumrhu lowiso-mthetho lanikela ngale mali ukuze kwenziwe esi sixhobo, akukho nokuba abe mnye kulo owandiphikisayo.

Ekuhambeni kwexesha, kwafuneka ukuba ndinikele ingqalelo koko kwakusenzeka ekhayeni lam. Kwakudlule iminyaka emithandathu sisiba neengxubusho noPatricia namaNgqina kaYehova ngeBhayibhile, ndadana xa endixelela ukuba ufuna ukuchitha ixesha elingakumbi kumsebenzi wokushumayela. Oku kwakuya kucutha ixesha awayelichitha emsebenzini eyunivesithi. Kwakundikhathaza ukubona umntu okrelekrele ezibekela usukelo olunjalo, yaye kubonakala ukuba kwakungekho nto ndinokuyithetha okanye ndinokuyenza ukutshintsha isigqibo sakhe.

Ndazama ukufuna uncedo lwengcali, umntu owayeyazi kakuhle iBhayibhile kunam, ndiqonda ukuba kwakuya kuba lula ngaye ukumbonisa ukungangqinelani kweemfundiso zamaNgqina kaYehova nezo zifumaneka eBhayibhileni. Ukufumanisa imfundiso nokuba inye nje engachananga kwakuya kumenza athandabuze nezinye. Kwakufuneka ndenze oko kuphela ukuze ndeyisele umfazi wam okrelekrele. Ndacela umfundisi wecawa yamaKatolika esasikhonza kuyo noPatricia. Le ngxubusho yaphela ngala mazwi asekuqaleni kweli nqaku. Xa lo mfundisi wala ukuthetha noPatricia, ndaqonda ukuba, nakuba oko kwakuya kuthabatha ixesha elide, mandiziphandele ngokwam ezi mfundiso ndize ndimbonise ukungachani kwazo.

Iphulo Lam Lokufuna Iimpazamo

Isiprofeto seBhayibhile sandichukumisa kakhulu njengoko ndandiqhubeka ndifundelwa ngamaNgqina. Ndafunda kwisiprofeto sikaIsaya ngeenkcukacha zokuwa kweBhabhiloni ezabhalwa kangangeminyaka engama-200 kusengaphambili. Esi siprofeto sachaza negama likaKoreshi owoyisayo, saza sachaza nangendlela yobuchule awayisebenzisayo yokujika amanzi omlambo umEfrate ukuze abhukuqe iBhabhiloni. (Isaya 44:27–45:4) Kwiminyaka yangaphambili ndandikhe ndafunda ngokuwa kweBhabhiloni kwiklasi yomkhosi. Kwakhona ndafunda ngomprofeti uDaniyeli; owasichazela kwiminyaka engama-200 phambi kokuba kwenzeke, ngokumkani owayenamandla kakhulu waseGrisi ekwathi emva kokufa kwakhe ubukumkani bakhe bohlulwa baba ziinxalenye ezine ezingaphantsi ngokwamandla. (Daniyeli 8:21, 22) Ndakhumbula ukuba ndandikhe ndafunda ngembali ka-Aleksandire Omkhulu. Emva kophando endazenzela lona ndafumanisa ukuba, ngokwenene ezi ncwadi zeBhayibhile zazibhalwe ngaphambi kokuba iziganeko ezichazwe kuzo zizaliseke.

Njengoko ndandiqhubeka ndifunda namaNgqina, ndaye ndaqonda ukuba iBhayibhile iliLizwi likaThixo, nto leyo imfundo yonqulo lwamaKatolika eyasilelayo ukundifundisa. Ndandimele ndenze ntoni ngolu lwazi? Ndagqiba kwelokuba ndahlulele ubomi bam kuYehova ndibe ngomnye wamaNgqina akhe. (Isaya 43:10) Ndabhaptizwa ngonyaka we-1991, kwiminyaka emibini emva kwalaa ngxubusho nala mfundisi wamaKatolika. Unyana wethu wabhaptizwa kunyaka olandelayo.

Sinembono entsha, saye satshintsha usukelo lwethu njengentsapho. Enye yezinto zokuqala endazenzayo emva kokuba ndibhaptiziwe yaba licebo leminyaka emihlanu lokuba unkosikazi awuyeke umsebenzi wokufundisa eyunivesithi ngaphambi kokuba afike kwiminyaka engama-50. Wayefuna ukuba nguvulindlela, ngelo xesha kwakufuneka ukuba ubani achithe iiyure ezili-1000 ngonyaka okanye malunga nama-83 eeyure nyanga nganye, enceda abantu bafunde inyaniso ephuma eBhayibhileni. Ngonyaka we-1994, wayesele ezinciphisile iiyure zempangelo waza wabhalisa njengovulindlela. Usukelo lwam lokuqala yayikukuphucula ubulungiseleli bam, ndincede apho ndinokunceda khona ebandleni, yaye ndacela ukugcina iiakhawunti zemali yolwakhiwo lweeHolo zoBukumkani engingqini yethu.

Maxa wambi, ndandiba nethuba lokuxubusha ngeBhayibhile emsebenzini. Kwafumaniseka ukuba umhlalutyi woqingqo-mali omtsha eLAO wayeliNgqina elipholileyo. Amathandabuzo awayenawo ngeBhayibhile alwenza buthathaka ukholo lwakhe. Ndafumana uvuyo lokumnceda ngokomoya. Wabuyela kwidolophu yakowabo, waza waqalisa ubuvulindlela.

Ngowe-1995, ndaya kwenye indibano ekhethekileyo yekomiti yezemfundo nabaseki bomthetho eyayingophando lwaseburhulumenteni. Usihlalo wekomiti wabuza ummeli karhulumente ngala msebenzi wokwenza esa sixhobo sokuphanda ngeathom. Ikomiti yathi lo msebenzi wanikwa iTexas kodwa awuzange ugqitywe ngenxa yezizathu ezithathu. Okokuqala, iindleko zalo msebenzi zaye zenyuka zangamawaka alithoba ezigidi zeedola, ungekaqaliswa. Okwesibini, urhulumente wayefuna ukuba loo mali isetyenziswe kwenye into, kuyacaca ukuba yaya kwimfazwe yaseIraq ngowe-1991. Okwesithathu, kwafunyaniswa ukuba iimpendulo kwimibuzo engobomi zifunyanwa kumaNgqina kaYehova ngama-25 eesenti! Kuyacaca ukuba bawagcina amazwi am.

Ngoxa babehleka bonke, abanye bekomiti babendijongile. Ndathi kubo, “Ngoku ninako ukuzifumana ezi mpendulo ngaphandle kokubhatala imali xa nizifumanela ezi mpapasho.”

Ubomi Bokwenene Nobanelisayo

Emva kokuba umfazi wam ethabathe umhlala-phantsi, saceba ukuba ndizibekele ixesha leminyaka emihlanu. Ndandizama ukufumana isingxungxo ukuze ndibe nexesha elongezelelekileyo lokufundisa abanye inyaniso. Ndingalindelanga, iLAO yandinika ukhetho lokuba nocwangciso olundivumela ukuba ndisebenze iiyure ezinganeno. Ngoko ngowe-1998, nam ndaqalisa ubuvulindlela.

Ngenye intsasa xa sasilungiselela ukuya entsimini, ndatsalelwa umnxeba lisebe laseUnited States lamaNgqina kaYehova eBrooklyn, eNew York. Babekwiphulo lokufuna abazalwana abanobugcisa obukhethekileyo, ngoko bandibuza ukuba ndinawo na umdla wokunceda kumsebenzi owawusenziwa eBrooklyn. Ndavuma ngaphandle kwamathandabuzo. Oko kwakhokelela ekusebenzeni kwikomkhulu lehlabathi kangangethuba eliziinyanga ezili-18. Ukuze ndikwazi ukuwugqiba loo msebenzi, kwafuneka ukuba ndithathe umhlala-phantsi kumsebenzi waseburhulumenteni eCalifornia. Emva koko saya kuncedisa kulwakhiwo lweHolo yeNdibano yamaNgqina kaYehova eFairfield, eCalifornia. Sawuthengisa umzi wethu eSacramento sathuthela kwindlu encinci ePalo Alto. Ukuthatha kwam umhla-phantsi ngaphambi kwexesha, kwandivulela ithuba lokuzuza iintsikelelo ezingakumbi. Ukususela ngoko, siye sanceda amasebe amaNgqina kaYehova eNigeria, eMzantsi Afrika, eKhanada, eBritani naseJamani.

NjengamaNgqina awasincedayo nenkosikazi, siyakuvuyela ukunceda abanye bafunde inyaniso efumaneka eBhayibhileni. Ngokwenene imfundiso evela kuYehova inenzuzo kunayo nayiphi enye imfundo ephezulu endiyifumeneyo. Le mfundo iphangalele yaye izigqwesa zonke ezinye iimfundiso ezifumaneka ehlabathini lonke. UYehova uye wawaqeqesha amaNgqina akhe ukuze akwazi ukufundisa inyaniso yeBhayibhile ngendlela echukumisa iingcamango nentliziyo. Yiloo nto eyandikhuthaza ukuba ndiqhubeke ndifunda. Sinombulelo ongazenzisiyo ngobomi esibunandiphayo ngoku nangamalungelo okusebenzisa imfundo esinayo ekukhonzeni uMongami wendalo iphela, uYehova uThixo.

[Amagama acatshulweyo akwiphepha 27]

Isiprofeto seBhayibhile sandichukumisa kakhulu njengoko ndandiqhubeka ndifunda namaNgqina

[Umfanekiso okwiphepha 27]

Ndikunye NoPatricia ngosuku lomtshato wethu

[Umfanekiso okwiphepha 29]

Siyakunandipha ukunceda abanye bafunde inyaniso yeBhayibhile