“Ndandinemibuzo Emininzi”

UBOMI BAM

Ndazalelwa kwidolophu yaseLa Ceiba, eHonduras. Ndiligqibelo kubantwana abahlanu ekhaya, ndim ndedwa umfana. Enye into, yayindim ndedwa owayengeva ngeendlebe ekhaya. Sasihlala kwindawo enobungozi sisokola kakhulu. Izinto zaba mbi nakakhulu xa utata wenzakala waza wasweleka emsebenzini. Ndandineminyaka emine ngelo xesha.

Umama wenza konke awayenako ukuze ahoye mna nabantwana basekhaya kodwa wayengasoloko enayo imali yokundithengela iimpahla. Xa kunetha, ndandigodola kuba ndandingenayo impahla eshushu.

Ukukhula kwam ndafunda intetho yezandla yesiHounduras (LESHO) loo nto yandinceda ndakwazi ukuncokola nabanye abantu abangevayo. Umama nabantwana basekhaya babengakwazi kakuhle ukuthetha ngezandla. Babede baqwebe ezinye iindlela zokuthetha nam. Nangona kunjalo, umama wayendithanda, endikhusela kwizinto eziyingozi. Kwakungekho lula ukuba athethe nam kodwa wandifundisa ukuba ndingatshayi okanye ndinxile. Ndiyambulela kakhulu ngaloo nto kuba zange ndibe likhoboka lezo zinto.

Xa ndandisemncinci umama wayehamba nam xa esiya kwicawa yamaKatolika kodwa ndandingayiva into ethethwayo kaloku kwakungekho mntu uguqulela kwintetho yezandla. Ndandingakuthandi ukuya ecaweni ibe xa ndandineminyaka elishumi ndayeka ukuya. Kodwa ndandisafuna ukumazi uThixo.

Ngo-1999 xa ndandineminyaka eyi-23 ndadibana nebhinqa elisuka eMerika. Lalikhonza kwenye icawa. Landifundisa ngeBhayibhile laza landifundisa nentetho yezandla yaseMerika (ASL). Ndayithanda into endayifunda eBhayibhileni de ndazixelela ukuba ndiza kuba ngumfundisi. Ndafudukela ePuerto Rico ukuze ndiye kwindawo ekuqeqeshwa kuyo amaKristu angevayo. Ukubuyela kwam eLa Ceiba ngo-2002, ndavula icawa yabantu abangevayo ndincediswa ngabanye abahlobo bam. Emva kwexesha, ndatshata nomnye wabo bahlobo bam, uPatricia.

Njengomfundisi ndandishumayela, ndibonise abantu imifanekiso yamabali aseBhayibhileni, ndide ndiwalinganise ukuze abantu abangevayo bawaqonde kakuhle. Ndandimema nabanye abantu abangevayo abakwiidolophu ezikufutshane ukuze ndibakhuthaze ndize ndibancede kwiingxaki abanazo. Ndandisiya eMerika naseZambia ndishumayela. Kodwa xa ndithetha inyani, kwakungekho nto ingako ndiyaziyo ngeBhayibhile. Abantu ndandibaxelela izinto endandizifundisiwe nendandizibona kula mifanekiso yeBhayibhile. Phofu ndandinemibuzo emininzi.

Ngenye imini amanye amabhinqa amathathu asasaza ubuxoki ngam. Athi ndilinxila ibe ndiye ndalala nomnye umntu ongenguye umfazi wam. Ndandiphoxekile, ndinomsindo. Emva koko mna noPatricia semka kulo cawa.

INDLELA IBHAYIBHILE EYABUTSHINTSHA NGAYO UBOMI BAM

AmaNgqina KaYehova ayesoloko esiza kuthi kodwa sasingawamameli. Emva kokuba simkile ecaweni, uPatricia wavuma ukufundelwa iBhayibhile nguLiccy nomyeni wakhe uThomas. Ndothuka xa ndafumanisa ukuba nangona bona bekwazi ukuthetha kodwa bayayazi intetho yezandla. Loo nto yandenza nam ndahlala xa kufundwa noPatricia.

Safundelwa iinyanga eziliqela ngeevidiyo zentetho yezandla yaseMerika. Kodwa xa amanye amabhinqa amabini awayengabahlobo bethu asixelela ukuba amaNgqina KaYehova angabalandeli babantu, sayeka ukufunda. Nangona uThomas wandinika ubungqina obubonisa ukuba amaNgqina KaYehova awalandeli bantu, ndandingamkholelwa.

Emva kweenyanga ezithile uPatricia waba nesigulo esimenza ahlale ekhathazekile. Wacela uThixo ukuba abuyise amaNgqina KaYehova. Emva koko, ummelwane wethu owayeliNgqina weza kubona uPatricia waza wathi uza kuxelela uLiccy ukuba azokubona uPatricia. Wafika nyhani uLiccy waza waqhubeka efika qho ngeveki. ULiccy wamkhuthaza uPatricia baza baqhubeka befunda. Kwelam icala, ndandingekawathembi ncam amaNgqina.

Ngo-2012 amaNgqina KaYehova ayenephulo lokubukelisa abantu ividiyo ethi Ngaba Ungathanda Ukwazi Inyani? ngentetho yezandla yesiLESHO. ULiccy wasiphathela nathi le vidiyo. Ukuyibukela kwam ndothuka xa ndafumanisa ukuba izinto endandizifundisa zazingekho eBhayibhileni, njengesihogo nokuba umphefumlo awufi.

Kwiveki elandelayo ndaya kwiHolo YoBukumkani YamaNgqina KaYehova ndiyokuthetha noThomas. Ndamxelela ukuba ndifuna ukufundisa abantu abangevayo inyani ngeBhayibhile kodwa andifuni ukuba liNgqina LikaYehova. Eyona nto ndandiyifuna yayikukuvula enye icawa entsha yabantu abangevayo. UThomas wandincoma ngokuba nomdla kodwa wandibonisa amaEfese 4:5 athetha ngendlela ekubaluleke ngayo ukuba ibandla lamaKristu limanyane.

UThomas wandinika ividiyo ethi, Jehovah’s Witnesses—Faith in Action, Part 1: Out of Darkness yentetho yezandla. Le vidiyo ibonisa iqela lamadoda afundisisa iBhayibhile ukuze aqonde inyani ngemithetho ethile. Xa ndandiyibukele le vidiyo, ndandizibona ndifana kanye nala madoda. Nam ndandifuna inyani njengawo. Le vidiyo yandenza ndabona ukuba amaNgqina afundisa inyani kuba izinto awazifundisayo zisuka eBhayibhileni qha. Ndaphinda ndafundelwa iBhayibhile ibe ngo-2014, mna noPatricia sabhaptizwa saba ngamaNgqina KaYehova.

INDLELA ENDACEDAKALA NGAYO

Ndiyalithanda ibandla lamaNgqina KaYehova kuba alizenzi izinto ezimdaka kuba uThixo ucocekile. Abantu abakhonza kulo abakho krwada ibe baziphatha kakuhle. Ngabantu abanoxolo ibe bayakhuthazana. AmaNgqina amanyene ibe onke afundisa into enye noba akweliphi ilizwe okanye athetha oluphi ulwimi.

Bekumnandi nyhani ukufunda eyona nto efundiswa yiBhayibhile. Ngokomzekelo, ndifunde ukuba uYehova nguThixo uSomandla, onguMongami phezu komhlaba wonke. Uthanda abantu abangevayo nabevayo. Ndikuxabisa kakhulu ukuthandwa nguye. Ndifunde nokuba umhlaba uza kuba yiparadesi entle nokuba abantu baza kuphila kamnandi ubomi obungapheliyo besempilweni. Ingathi ayisafiki loo mini!

Mna noPatricia siyakuthanda ukuncokola nabantu abangevayo ngeBhayibhile. Ngoku sifunda iBhayibhile kunye nabanye abantu abakhonza kulaa cawa sasikuyo. Kodwa ngoku andisenayo laa mibuzo ndandinayo ngela xesha ndandingumfundisi. Ukufunda kwam iBhayibhile namaNgqina KaYehova kwaphendula yonke loo mibuzo.