Ngaba Uyaboyika Abafi?

XA BEPHENDULA lo mbuzo abantu abaninzi bathi, “Hayi. Ndiboyika ntoni?” Bakholelwa ukuba bafile ngokwenene. Noko ke, izigidi zabantu zikholelwa ukuba abafileyo baqhubeka bephila benemizimba yomoya.

Kwilizwe laseBenin, eNtshona Afrika, abaninzi bakholelwa ukuba abafileyo banokubuya baze babulale amalungu eentsapho zabo. Abantu bathengisa izinto abanazo okanye bangene baphelele ematyaleni ukuze bathenge izilwanyana zokwenza amadini nemisitho yokuxolisa abafi. Abanye abasebenzelana nemimoya banembono yokuba umoya womntu awufi, ngoko abafi banokunxibelelana nabaphilayo. Abanye abehlelwa zizinto ezibuhlungu bacinga ukuba zibangelwa yimimoya yabafileyo.

Enye indoda enamava anjalo nguAgboola, ohlala kufuphi nomda ophakathi kweBenin neNigeria. Uthi: “Ukusebenzelana nemimoya yinto yemihla ngemihla kummandla wethu. Isiko lalapha kukuhlamba isidumbu kuba silungiselelwa ukuya kwelemimoya. Ndisoloko ndiqokelela iisepha ebezisetyenziswa ndize ndizixube namagqabi athile. Emva koko lo mxube ndiwuqaba kumpu wam wokuzingela, ndize ndikhwaze ndithi sisiphi isilwanyana endifuna ukusidubula. Izinto ezifana nale ziqhelekile yaye zibonakala ziphumelela. Noko ke ezinye iindlela zokusebenzelana nemimoya ziyoyikisa.

“Xa ndafelwa ngoonyana ababini ngendlela engaqondakaliyo, ndarhanela ukuba bathakathiwe. Ndaya kwelinye igqirha elaziwayo. Nalo lavumelana nam. Okona kwakubuhlungu kakhulu kukuba lathi oonyana bam balinde kwelemimoya ukuze babe zizicaka zaloo mntu ubabuleleyo xa efile. Lathi nonyana wam wesithathu uza kufa. Emva kweentsuku ezingephi unyana wam wafa.”

Emva koko uAgboola wadibana noJohn, iNgqina likaYehova elalivela eNigeria. UJohn wamxelela oko kuthethwa yiBhayibhile ngemeko yabafi. Loo nkcazelo yabutshintsha ubomi buka-Agboola. Inokubutshintsha nobakho.

Ngaba Abafi Bayaphila?

Ngubani onokuwuphendula ngokuchanileyo lo mbuzo? Kwanendoda edume ngokusebenzelana nemimoya ayinakuwuphendula. Unokuphendulwa nguYehova, uMdali wazo zonke izinto eziphila “emazulwini nasemhlabeni, izinto ezibonakalayo nezinto ezingabonakaliyo.” (Kolose 1:16) Wadala iingelosi ukuze ziphile kummandla womoya, wadala abantu nezilwanyana ukuba baphile emhlabeni. (INdumiso 104:4, 23, 24) Zonke izinto eziphilayo zixhomekeke kuye. (ISityhilelo 4:11) Khawuve oko kuthethwa liLizwi likaThixo iBhayibhile ngokufa.

Umntu wokuqala owathetha ngokufa nguYehova. Walumkisa uAdam noEva esithi ukuba abamthobeli, baza kufa. (Genesis 2:17) Kwakuthetha ntoni oko? UYehova wathi: “Uluthuli, uya kubuyela kwaseluthulini.” (Genesis 3:19) Xa ufile umzimba uyabola. Umntu uyayeka ukuphila, okanye ubomi bubuyela kuMdali, uMthombo wabo. (INtshumayeli 12:7) Ngoko INdumiso 104:29, 30 ithi: “Ukuba uyawususa umoya wazo, ziyabhubha, zibuyele eluthulini lwazo.”

UAdam noEva abazange bathobele ngabom, ngenxa yoko bagwetyelwa ukufa. Noko ke, babengengabokuqala ukufa. Kwaqala unyana wabo, uAbheli. Wabulawa ngumkhuluwa wakhe uKayin. (Genesis 4:8) UKayin akazange acinge ukuba umninawa wakhe wayeza kuziphindezela. Kunoko wayesoyika impindezelo yabo baphilayo.—Genesis 4:10-16.

Kwiinkulungwane kamva, uKumkani uHerode wacaphuka emva kokuba izazi zimxelele ngokuzalwa ‘kokumkani wamaYuda’ kummandla wakhe. Ekubeni wayezimisele ukubulala lo mntwana wayeza kuba ngukumkani, uHerode wayalela ukuba bonke abantwana baseBhetelehem abangamakhwenkwe abaneminyaka emibini nangaphantsi babulawe. Kodwa ingelosi yayalela uYosefu ukuba athabathe uYesu noMariya ‘basabele eYiputa.’—Mateyu 2:1-14.

Emva kokufa kukaHerode, ingelosi yayalela uYosefu ukuba abuyele kwaSirayeli, “kuba abo babefuna umphefumlo womntwana oselula bafile.” (Mateyu 2:19, 20) Ekubeni ingelosi yayisisidalwa somoya, yayisazi ukuba uHerode akanakukwazi ukumenzakalisa uYesu. UYosefu wayengamoyiki uKumkani uHerode ofileyo. Kunoko, wayesoyika unyana kaHerode okhohlakeleyo, uArkelawo. Ngoko uYosefu nentsapho yakhe bahlala eGalili, eyayingaphandle kommandla ka-Arkelawo.—Mateyu 2:22.

Ezi ngxelo ziyasinceda sibone ukuba abantu abafileyo abanamandla. Ngoko ke, zinokuchazwa njani izinto ezehlela uAgboola nabanye?

“Iidemoni,” okanye Imimoya Engahlambulukanga

Ebudaleni bakhe, uYesu wadibana nezidalwa zomoya ezingendawo. Zazimazi yaye zimbiza ngokuba ‘nguNyana kaThixo.’ NoYesu wayesazi ukuba zazingeyiyo imimoya yabantu abafileyo. Kunoko wathi ‘ziidemon,’ okanye imimoya engahlambulukanga.—Mateyu 8:29-31; 10:8; Marko 5:8.

IBhayibhile ithetha ngemimoya eyayinyanisekile kuThixo naleyo yamvukelayo. Incwadi yeGenesis ithi xa uYehova wagxotha uAdam noEva abangazange bamthobele emyezweni wase-Eden, wathumela iikherubhi, okanye iingelosi, kwicala elingasempuma lomyezo ukuze zithintele nabani na ofuna ukungena. (Genesis 3:24) Kuyabonakala ukuba esi yayisisihlandlo sokuqala ukuba izidalwa zokomoya zibonakale ebantwini.

Kamva, kweza iingelosi ezininzi emhlabeni zaza zaba kwimo yabantu. Zazingathunywanga nguYehova ukuba zize emhlabeni. Kunoko, “zasuka zayishiya indawo yazo efanelekileyo yokuhlala” ezulwini. (Yude 6) Zazineenjongo ezimbi. Zatshata abafazi, zaza zazala abantwana abangamabhastile ababebizwa ngokuba ngamaNefili. Loo maNefili kunye nooyise abangabavukeli bazalisa umhlaba ngogonyamelo nangezinye izinto ezimbi. (Genesis 6:1-5) UYehova wabuphelisa obo bubi ngokuzisa uNogumbe ehlabathini lonke ngomhla kaNowa. Loo Mkhukula watshabalalisa onke amadoda nabafazi abangendawo, kuquka nabo bantwana bangamabhastile. Kwenzeka ntoni kwezi ngelosi?

Zabuyela kummandla womoya. Sekunjalo, uYehova wazithintela ekubeni zibuyele “kwisigxina sazo santlandlolo.” (Yude 6) IBhayibhile ithi: “UThixo akazange ayeke ukohlwaya iingelosi ezonayo, kodwa, wazinikela kwimihadi yentsunguzi yobumnyama, ngokuthi aziphose eTartaro, ukuze zibekelwe umgwebo.”—2 Petros 2:4.

ITartaro asiyondawo ithile; yindawo efana nentolongo, imo ethotyiweyo, apho zingenakukwazi ukwenza yonke into ezi zidalwa zinemvukelo. Iidemon azinakuphinda zikwazi ukuzambathisa imizimba yenyama, kodwa zisenamandla nempembelelo enkulu ezingqondweni nakubomi babantu. Zinokubalawula abantu nezilwanyana. (Mateyu 12:43-45; Luka 8:27-33) Kwakhona zikhohlisa abantu ngokuzenza imimoya yabantu abafileyo. Zikwenzelani oku? Zifuna abantu bangamnquli uYehova ngendlela ayifunayo yaye ziyabadida ukuze bangayiqondi imeko yabafileyo.

Indlela Yokuphelisa Ukoyika

UAgboola wabona ukuba indlela iBhayibhile eyicacisa ngayo imeko yabafi neyemimoya inengqiqo. Waqonda ukuba kufuneka afunde okungakumbi. Waqalisa ukufunda iBhayibhile neempapasho ezisekelwe eBhayibhileni noJohn. Wathuthuzeleka akuva ukuba oonyana bakhe balele emangcwabeni, abalindanga kwelemimoya ukuze babe zizicaka zalowo wababulalayo.—Yohane 11:11-13.

Kwakhona uAgboola waqonda ukuba kufuneka ayeke ngokupheleleyo ukusebenzelana nemimoya. Watshisa zonke izinto zakhe zobugqi. (IZenzo 19:19) Abanye abantu basekuhlaleni bamlumkisa ngelithi imimoya iza kumenzakalisa. Kodwa wayengoyiki. Wathobela isiluleko esikweyabase-Efese 6:11, 12 esithi: “Yambathani sonke isikrweqe sikaThixo . . . kuba sizamazamana. . . nemikhosi yoomoya abangendawo.” Esi sikrweqe somoya siquka inyaniso, ubulungisa, iindaba ezilungileyo zoxolo, ukholo, nekrele lomoya, eliliLizwi likaThixo. Esi sikrweqe sesikaThixo yaye sinamandla.

UAgboola wacekiswa zezinye izihlobo nezalamane zakhe esakuyeka ukusebenzelana nemimoya. Noko ke, kwiHolo yoBukumkani yamaNgqina kaYehova esekuhlaleni, wafumana abahlobo abatsha, abakholelwa izinto ezifundiswa yiBhayibhile.

Ngoku uAgboola uyazi ukuba kungekudala uYehova uza kubasusa abangendawo emhlabeni aze aphelise nempembelelo yeedemon. Ekugqibeleni uza kuzitshabalalisa. (ISityhilelo 20:1, 2, 10) Uza kubavusa “bonke abo bakumangcwaba enkumbulo.” (Yohane 5:28, 29) Abo bantu baquka uAbheli, abantwana ababulawa nguKumkani uHerode bengenatyala, kunye nezigidi zabanye abantu. UAgboola ukholelwa ukuba noonyana bakhe abathathu baya kuvuswa. Nezihlobo zakho ezithandekayo ezifileyo zinokuvuswa. Bonke abo bavusiweyo baya kuchaza ukuba ngoxa babefile babengekho zingqondweni ngokupheleleyo—babengazi nemisitho ababeyenzelwa.

Awunasizathu sokoyika abafi. Kunoko, unokukhangela phambili ekuboneni abantu abafileyo obathandayo. Okwangoku, kutheni ungafundi iBhayibhile ukuze womeleze ukholo lwakho? Nxulumana nabantu abakholelwa oko kufundiswa yiBhayibhile. Ukuba kukho nantoni na ekudibanisa nemimoya, yahlukana nayo ngokukhawuleza. Zikhusele kwiidemon ngokwambatha “sonke isikrweqe sikaThixo.” (Efese 6:11) AmaNgqina kaYehova aya kukuvuyela ukukunceda. Afundisa abantu iBhayibhile ngesisa esebenzisa incwadi ethi Yintoni Ngokwenene Efundiswa YiBhayibhile?a

UAgboola akasaboyiki abafi, yaye ufunde indlela yokuzikhusela kwiidemon. Uthi: “Andimazi umntu owabulala oonyana bam abathathu. Kodwa ukususela oko ndakhonza uYehova ndiye ndanabantwana abasixhenxe. Akakho okwelemimoya oye wabenzakalisa.”

[Umbhalo osemazantsi]

[Amagama acatshulweyo akwiphepha 13]

UAgboola akasaboyiki abafi, yaye ufunde indlela yokuzikhusela kwiidemon

[Umfanekiso okwiphepha 12]

UKayin wayengoyiki ukuba umntakwabo ofileyo wayeza kuziphindezela