Ngaba Ubusazi?
Ngaba UPontiyo Pilato wayenesizathu sokoyika uKesare?
Ziphembelela iRhuluneli yamaRoma uPontiyo Pilato ukuba abulale uYesu, iinkokeli zamaYuda zathi: “Ukuba uyamkhulula lo mntu, akungomhlobo kaKesare.” (Yohane 19:12) Lo ‘Kesare’ kuthethwa ngaye apha nguMlawuli waseRoma uTibheriyo. Ngaba uPilato wayenesizathu sokumoyika lo Kesare?
Wayengumntu onjani uTibheriyo Kesare? iThe New Encyclopædia Britannica ithi kwiminyaka ethile ngaphambi kokuchotshelwa kwetyala likaYesu, uTibheriyo “wayebonakala engumntu ongenaxesha lamntu nowayezifumana ngeendlela ezigqwethekileyo izinto azifunayo.” Ekubeni wayengabathembi abanye abantu, wayethuthumbisa aze abulale nabani na acinga ukuba ngumngcatshi. Le Encyclopædia ithi, “ukuba banyanisile ababhali mbali bexesha lakhe wayesonwatyiswa zizenzo zenkohlakalo namanyala. Wayebulala nanini na yaye nabani na athanda ukumbulala.”
Ngoko ke, kusenokwenzeka ukuba zezi mpawu wayedume ngazo uTibheriyo ezabangela ukuba uPilato anikezele kwiinkokeli zamaYuda aze akhuphe umyalelo wokuba uYesu abulawe.—Yohane 19:13-16.
Sasiyintoni isizathu sokuba uYesu ahlambe iinyawo zabapostile bakhe?
KuSirayeli wamandulo, abantu abaninzi abaqhelekileyo babesenza imisebenzi yabo benganxibanga zihlangu. Abanye babenxiba iimbadada, izihlangu ezivulekileyo. Ekubeni iindlela namasimi alapho zazizele luthuli nodaka, iinyawo zabantu zaziba mdaka.
Ngoko yayilisiko lalapho ukuba umntu akhulule iimbadada ngaphambi kokuba angene endlwini. Ngoko olo ndwendwe lwalusamkelwa ngokuhlanjwa iinyawo, ngumninimzi okanye sisicaka sakhe. Oku kuyathethwa ngako kwiindinyana ezininzi zeBhayibhile. Ngokomzekelo, ethetha neendwendwe ezazisententeni yakhe, uAbraham wathi: “Makhe kuthatyathwe intwana yamanzi, kuhlanjwe iinyawo zenu. Nize ningqendeve phantsi komthi. Yaye mandiniphathele iqhekeza lesonka, ukuze zihlaziyeke iintliziyo zenu.”—Genesis 18:4, 5; 24:32; 1 Samuweli 25:41; Luka 7:37, 38, 44.
Le nkcazelo iyasinceda siqonde isizathu sokuba uYesu ahlambe iinyawo zabafundi bakhe ngoxa wayesitya nabo iPasika yokugqibela. Ngeso sihlandlo, kwakungekho mninimzi okanye isicaka esasiza kubahlamba iinyawo, yaye ngokuqinisekileyo akukho mfundi owaba litsha-ntliziyo lokwenza lo msebenzi. Ngoko xa wayethatha isitya samanzi netawuli ukuze ahlambe aze omise iinyawo zabapostile bakhe, uYesu wayebafundisa isifundo sokuba nothando nokuthobeka.—Yohane 13:5-17.