Imibuzo Evela Kubafundi

◼ Kutheni unyaka wama-29 C.E. ugqalwa njengobalulekileyo kwimbali yeBhayibhile kunokuba ibe ngunyaka we-14 C.E., ukuqalisa kokulawula kukaTibheriyo Kesare, okhankanywe kuLuka 3:1?

Ixesha lokuqalisa kukaTibheriyo ukulawula alikhankanywanga eBhayibhileni, kodwa kuthethwe ngesiganeko esenzeka ngasekupheleni komnyaka we-15 wokulawula kwakhe. Oku kubangela ukuba abafundi beBhayibhile bagqibe ngelokuba eso siganeko senzeka ngowama-29 C.E., nyaka lowo onokugqalwa njengobalulekileyo ngokwembono yeBhayibhile.

Ulawulo lokumkani wesibini waseRoma, uTibheriyo Kesare, lwamkelwa ngaphandle kobunzima embalini. IThe New Encyclopædia Britannica ithi: “NgoAD 14, ngoAgasti 19, uAwugusto [ukumkani wokuqala] wafa. UTibheriyo, ngoku owayekwisikhundla esiphakamileyo, ngobuqhophololo wabangela ukuba iBhunga likarhulumente linyule yena waza akalivumela ukuba limbize njengomlawuli phantse kangangenyanga, kodwa ngoSeptemba 17 wangena esihlalweni sokulawula.”a

Eli xesha lokuqalisa kolawulo lukaTibheriyo libalulekile ngokwembali yeBhayibhile kuba uLuka 3:1-3 uthi ngobulungiseleli bukaYohane uMbhaptizi: “Ngomnyaka weshumi elinantlanu wokulawula kukaTibheriyo Kesare, inguPontiyo Pilato irhuluneli kwelakwaYuda, . . . lafika ilizwi likaThixo kuYohane, unyana kaZekariya, entlango. Weza kuwo wonke ummandla waseYordan, evakalisa ubhaptizo lwenguquko ukuze kuxolelwe izono.”

UYohane akazange aqalise ukushumayela nokubhaptiza ngexesha lokuqalisa kukaTibheriyo ukuba ngukumkani kodwa wenjenjalo “ngomnyaka weshumi elinantlanu wokulawula kukaTibheriyo Kesare.” Loo nyaka we-15 waqalisa ngokwindla lowama-28 C.E. ukuya kutsho kukwindla lowama-29 C.E. Noko ke, ukwazi oku akumenzi ubani aqonde ngokuchanileyo ukuba baqalisa nini ubulungiseleli bukaYohane kuloo nyaka okanye akwazi ukubala amaxesha eziganeko ezihlobene noko.

Kodwa iBhayibhile isinika enye inkcazelo ebalulekileyo yokuxhasa oku. Ngokomzekelo, isiprofeto sikaDaniyeli ‘seeveki ezingamashumi asixhenxe’ salatha kowama-29 C.E. njengexesha lokubonakala kukaMesiya. Kwakhona sabonisa ukuba ubulungiseleli bukaYesu babuya kuthabatha iminyaka emithathu enesiqingatha ubude. (Daniyeli 9:24-27) Ukongezelela koku kukho ezi nkcukacha zeBhayibhile: UYesu wazalwa kwisithuba seenyanga ezintandathu ngemva kukaYohane; xa uYesu wabhaptizwayo, waye “eminyaka ngathi imashumi mathathu ezelwe”; yaye uYesu wafa ngentwasahlobo yowama-33 C.E. (ixesha lePasika), xa wayeneminyaka engama-33 anesiqingatha ubudala.—Luka 1:24-38; 3:23; 22:14-16, 54.b

Ekubeni benenkcazelo echane ngolo hlobo yeBhayibhile, kunye nomnyaka owaziwa ngokubanzi wokulawula kukaTibheriyo, abafundi beBhayibhile banokubala ukuba ubulungiseleli bukaYohane baqalisa ngentwasahlobo yowama-29 C.E. yaye kwiinyanga ezintandathu kamva, ngokwindla lowama-29 C.E., uYohane wabhaptiza uYesu. Ngenxa yoko, asingowe-14 C.E. kodwa ngowama-29 C.E. ogqalwa njengonyaka obalulekileyo ngokwembono yeBhayibhile.

[Imibhalo esemazantsi]