Ngaba Ubusazi?

UYehova wayekujonga njani ukuvumisa ngeenkwenkwezi phakathi kwamaSirayeli?

Esinye isichazi magama sithi ukuvumisa ngeenkwenkwezi “kukufunda indlela ezihamba ngayo izijikelezi langa, ilanga, inyanga kunye neenkwenkwezi nenkolelo yokuba ziphembelela ubomi babantu.” Njengokuba umhlaba ujikeleza ilanga nyaka ngamnye, amakroza eenkwenkwezi nawo abonakala ngathi ayahamba. Ukususela kumaxesha amandulo abantu bebezondela ngeliso elibukhali ezi nguqu besithi zinentsingiselo ethile.

Kusenokwenzeka ukuba ukuvumisa ngeenkwenkwezi kwaqalwa ngamaBhabhiloni amandulo awayenqula iinkwenkwezi kunye namakroza. NamaSirayeli anqula ngolu hlobo emva kokuba eye anxaxha kunqulo lokwenyaniso, yaye ngexesha likaKumkani uYosiya wakwaYuda ukuvumisa ngeenkwenkwezi kwakuxhaphakile. Imbono kaThixo ngalo mba yayicacile. Kwiinkulungwane ngaphambili uMthetho kaMoses wakwalela ukunqulwa kweenkwenkwezi yaye ukwaphula loo mthetho kwakuhamba nesigwebo sokufa.—Duteronomi 17:2-5.

Enye yezinto ezenziwa nguKumkani uYosiya xa wayehlaziya unqulo lwakwaYuda yayikukuphelisa ukubingelela “elangeni nasenyangeni nakumakroza ezulu nakuwo wonke umkhosi wamazulu.” IBhayibhile ithi ukumkani wenza le nto kuba wayefuna ‘ukulandela uYehova nokugcina imiyalelo yakhe.’ (2 Kumkani 23:3-5) Nabantu abafuna ukunqula uThixo “ngomoya nangenyaniso” namhlanje bafanele benjenjalo.—Yohane 4:24.

Babengoobani “Oonyana BakaZeyus” ekuthethwa ngabo kwiZenzo 28:11?

Incwadi yeZenzo ithi xa uPawulos wayesiya eRoma, inqanawa awayekhwele kuyo ukusuka eMalta ukuya ePuteyoli yayibhalwe “Oonyana BakaZeyus.” (IZenzo 28:11) Ukusebenzisa imifanekiso enjalo kwakuxhaphakile phakathi koomatiloshe nabakhenkethi bamandulo.

Iintsomi zamaGrike namaRoma zithi uZeyus (okwabizwa ngokuba nguJupiter) noLeda babenoonyana ababini abangamawele, uCastor noPollux. Kwakukho inkolelo yokuba “Oonyana bakaZeyus” babeziinkunkqele zoomatiloshe ezazinamandla okulawula imimoya namaza. Yiloo nto ke eyabenza banqulwa njengoothixo abakhusela oomatiloshe. Oomatiloshe babebingelela kubo bebacela ukuba babakhusele kwiinkqwithela. Kwakukho inkolelo yokuba ukukhuselwa zezi zithixo zibini kwakubonakala ngokuvela komlilo ka St. Elmo enqanaweni xa kukho uqhwithela.

Ukunqulwa kukaCastor noPollux kwakuxhaphakile phakathi kwamaGrike namaRoma, yaye enye imbekiselo yamandulo ibonisa ukuba babenqulwa nangaseKirene kuMntla Afrika. Inqanawa ekuthethwa ngayo kwiZenzo yayisuka eAleksandriya eYiputa, kufutshane naseKirene.

[Umfanekiso okwiphepha 9]

Ustela waseBhabhiloni ebonisa uKumkani Nazimaruttash namakroza

[Umfanekiso okwiphepha 9]

Ingqekembe yedenariyo enomfanekiso ‘wOonyana bakaZeyus’ 114-113 B.C.E.

[Inkcazelo Ngemifanekiso ekwiphepha 9]

Stela: Réunion des Musées Nationaux/Art Resource, NY; coin: Courtesy Classical Numismatic Group, Inc./cngcoins.com