Umthi “Onamahlamvu Angabuniyo”

NGABA wakha wawabona amaphandle anemithi eluhlaza yaka? Ukuba kunjalo uya kuvuma ukuba yinto entle ngokwenene leyo. Ukuba ubona imithi emikhulu emininzi enamagqabi amahle, ngaba ungacinga ukuba kukho imbalela kuloo ndawo? Nakanye, kuba ubuza kuqonda ukuba loo ndawo inamanzi amaninzi ankcenkceshela loo mithi.

Ngendlela efanayo iBhayibhile ifanisa abantu abanokholo nale mithi mihle. Ngokomzekelo khawuve okuthethwa zezi ndinyana zintathu zokuqala zencwadi yeeNdumiso:

“Unoyolo umntu ongahambanga ngecebo labangendawo, ongemanga endleleni yaboni, nongahlalanga esihlalweni sabagculeli. Kodwa oyoliswa ngumthetho kaYehova, efunda emthethweni wakhe ngesandi esiphantsi imini nobusuku. Ngokuqinisekileyo uya kuba njengomthi otyalwe ngakwimisinga yamanzi, onika isiqhamo sawo ngexesha lawo nonamahlamvu angabuniyo, yaye konke akwenzayo kuya kuphumelela.”

NoYeremiya 17:7, 8, uthi: “Isikelelwe indoda eyomeleleyo ekholosa ngoYehova, naleyo ithembele ngoYehova. Ngokuqinisekileyo iya kuba njengomthi otyalwe ngasemanzini, othumela iingcambu zawo ngasemfuleni; kwaye ayiyi kukubona ukufika kobushushu, kodwa okunene amahlamvu ayo aya kunaba. Nangonyaka wembalela ayiyi kuba nexhala, ingayeki nokuvelisa isiqhamo.”

Kuzo zozibini ezi zicatshulwa kusetyenziswa imithi ukuze kuboniswe into aba yiyo umntu owenza izinto ezilungileyo, ovuyiswa kukwenza umthetho kaThixo aze akholose ngokupheleleyo ngaye. Ngoko ke umbuzo esifanele sizibuze wona ngulo; umntu onokholo ufana njani nomthi omhle? Masikhe sizihlalutye ezi ndinyana.

“Otyalwe Ngakwimisinga Yamanzi”

Le mithi kuthiwa ayityalwanga nje ngakumsinga omnye wamanzi, kodwa ityalwe “ngakwimisinga yamanzi” okanye “ngasemanzini amaninzi.” Nencwadi kaIsaya 44:3, 4, isebenzisa amazwi afanayo xa ichaza indlela uYehova uThixo awayeza kunyamekela ngayo amaYuda aguqukileyo awayebuya ekuthinjweni eBhabhiloni. UYehova waphefumlela umprofeti uIsaya ukuba athi: “Kuba ndiya kugalela amanzi konxaniweyo, nemisinga ethontsizayo kwindawo eyomileyo. . . . Kwaye ngokuqinisekileyo baya kuntshula phakathi kwengca eluhlaza, njengemingcunube ngasemijelweni yamanzi.” Apha kuthiwa “imisinga” ‘nemijelo yamanzi’ ibenza abantu abasikelelweyo bakhule babe njengemithi emide.

Nanamhlanje kwezinye iindawo ekulinywa kuzo kubakho imijelo yamanzi nemisinga evela edamini, emlanjeni okanye echibini. Le mijelo kudla ngokunkcenkceshelwa ngayo. Maxa wambi iye idlule phakathi kwemithi yeziqhamo. Ngamanye amaxesha le mijelo idla ngokudlula phakathi okanye ide yenze umda phakathi kwamasimi kunye nemithi yeziqhamo, ngaloo ndlela kunkcenkceshelwa ngayo amasimi kweli cala ize kwelinye icala inkcenkceshele imithi.

Iba njani imithi etyalwe ecaleni kwaloo mijelo? INdumiso 1:3 ithetha ngomthi “onika isiqhamo sawo ngexesha lawo.” Kumazwe eyabhalelwa kuwo iBhayibhile kukho imithi yamakhiwane, irharnathi, ama-apile, amasundu kunye nomnquma. Nangona umkhiwane unokukhula ube ziimitha ezilithoba ubude yaye ube namasebe abanzi, eminye imithi ayibikho mide kakhulu. Sekunjalo iba luhlaza yaka, ibe mihle ize ivelise iziqhamo ezininzi ngexesha layo.

Mandulo phaya, kwakukhula imithi emide emikhulu ngakwimilambo nemithombo yaseSiriya nasePalestina. EBhayibhileni imithi emikhulu idla ngokunxulunyaniswa nemijelo yamanzi okanye “iintlambo.” (Levitikus 23:40) Kwakukhula nemingcunube ngakwiindawo ezibaleka amanzi. (Hezekile 17:5) Le mithi mikhulu nemihle iyichaza kakuhle ingongoma ababefuna ukuyibethelela umdumisi kunye noYeremiya, eyile: Abantu abaphila ngemithetho kaThixo nabakholose ngaye ngokupheleleyo baya kuhlala benokholo olomeleleyo ibe ‘konke abakwenzayo kuya kuphumelela’. Akuvumi na ukuba yiloo nto kanye esiyifunayo ebomini—impumelelo?

Ukuyoliswa Ngumthetho KaYehova

Namhlanje abantu bazama ngandlela zonke ukuphumelela. Bazibhokoxa ngamandla befuna udumo nobutyebi, nangona ixesha elininzi bedla ngokuphoxeka. Yintoni eya kusenza sifumane ulwaneliseko lokwenene size sihlale sonwabile ebomini? Impendulo siyifumana kumazwi awathethwa nguYesu kwiNtshumayelo yaseNtabeni. Wathi: “Banoyolo abo bayiphapheleyo intswelo yabo yokomoya, kuba ubukumkani bamazulu bobabo.” (Mateyu 5:3) Yinyaniso, ulonwabo lokwenene alubangelwa zizinto esinazo kodwa lubangelwa kukuvuma ukuba kufuneka sisondele kuThixo yaye ukwenza kanjalo kusenza sibe nokholo olusenza sibe njengemithi emihle enika isiqhamo sayo ngexesha layo. Sinokulomeleza njani ukholo lwethu?

Umdumisi uthi kukho izinto ekufuneka sizikhwebule kuzo kuqala. Ubala ‘icebo labangendawo,’ ‘indlela yaboni’ kunye ‘nesihlalo sabagculeli.’ Ukuze sonwabe kufuneka sahlukane nabantu abahlekisa ngemithetho kaThixo okanye abangaphili ngayo.

Enye into esifanele siyenze kukuyoliswa ngumthetho kaYehova. Akuvumi na ukuba siyakuthanda ukwenza into esiyolisayo? Ngoko ke ukuyoliswa ngumthetho kaThixo kuthetha ukulixabisa iLizwi likaThixo, ukuba nomnqweno wokulifunda nokuliqonda ngakumbi.

Okokugqibela kufuneka silifunde “ngesandi esiphantsi imini nobusuku.” Loo nto ithetha ukuba kufuneka sifunde iBhayibhile rhoqo size siziphe ixesha lokucinga nzulu ngaloo nto besiyifunda. ILizwi likaThixo sifanele silithande njengomdumisi owathi: “Hayi indlela endiwuthanda ngayo umthetho wakho! Imini le yonke ndiwuxhalabele.”—INdumiso 119:97.

Kunjalo kanye, xa simazi ngokuchanileyo yaye simqonda uYehova sibe sikholose ngaye nangezithembiso zakhe ngokupheleyo, nakanjani siya kuba nokholo. Ukuba senza kanjalo siya kuba njengendoda enoyolo athi umdumisi ngayo—“konke akwenzayo kuya kuphumelela.”