Ileta Evela EIreland

Ukukhangela Ngokucokisekileyo

IZULU lalimathumb’ antaka. Ngenxa yemvula eyayisina ndandingaboni kakuhle ngaphandle njengoko ndandiqhuba. Emva kokuqhuba iikhilomitha ezili-16, ndafika encotsheni yenduli evelele iWestport, idolophu encinane ekunxweme lwentshona Ireland. Ekugqibeleni, inkungu yagabuka zatsho zavela kakuhle ezo ziqithana zihle ezithe saa elunxwemeni. Zimbalwa ezinabantu abahlala kuzo, kodwa abafuyi bayikhaphelela apho imfuyo yabo ngezikhitshana.

Kukho udederhu lweenduli olugudle unxweme olungasentshona. Ezi nduli zigqunywe lutyani olwahlukahlukeneyo zibonakala ngathi lubhedu olubengezelayo xa ilanga lisiya kunina. Eyona nduli iphakamileyo iCroagh Patrick ebizwa ngokuba nguReek ngabantu balapha, ibonakala kakuhle phaya elundini. Ndakhenketha ndidlula kwezo zitrato zaseWestport zixineneyo nezimxinwa, ndidlula uReek, ndaza ndaya kufika kwindawo angafane ashumayele kuyo amaNgqina kaYehova.

Indoda endandize kuyibona yayingazi ukuba ndandiza kufika ngaloo mini. Ndandifumene ileta eyayisithi yayifudukele kuloo ndawo yaye yayifuna ukuqhubeka ifunda iBhayibhile namaNgqina. Ndandizibuza ukuba: ‘Inokuba ineminyaka emingaphi bethu ubudala? Khona, itshatile okanye ayitshatanga? Ibe zintoni ezithandayo ebomini?’ Ndakrwaqula ibhegi yam ndifuna ukuqiniseka ukuba yayisekhona na iBhayibhile yam nezinye iincwadi zeBhayibhile endandiziphethe. Ndacinga ngendlela endandiza kuwuvuselela ngayo umdla wayo kwisigidimi soBukumkani.

Induli uReek ndandiyishiye ngasemva. Iindonga zamatye, ezazakhiwe ngexesha leNdlala Enkulu ngenkulungwane ye-19, zenza umlimandlela walo mathafa ahamba aye kuthi ngqu phezu kolwandle. Esibhakabhakeni kwakubhabha ingabangaba elinye, lithe chu. Elundini phaya kwakukho imithi egobileyo, oku kweenkonde ezikhokhobayo.

Izindlu zalapha azinanombolo nezitrato azinamagama. Idilesi yale ndoda yayibhalwe indlu nelali yayo.a Into yokuqala ekwakufuneka ndiyenzile yayikukufumana umntu endandiqinisekile ukuba ubazi bonke abantu balapha ukuba bahlala phi—ngunoposi ke lowo. Emva kwemizuzu engamashumi amathathu ndafika eposini, igumbi elaliyinxalenye yodederhu lweeflethi. Ndafika emnyango kuxhonywe umbhalo othi “Kuvaliwe.” Ndingaphelanga mandla, ndabuzisa kwenye ivenkile ndaza ndalathiswa embindini welali.

Emva kokuba ndiye ndaqhuba ezinye iikhilomitha ezisibhozo, ndayifumana indawo endandalathiswe ngayo—igophe elingasekunene nendledlana encinane yomhlaba ekhohlo. Ndankqonkqoza kwindlu yokuqala. Kwaphuma iqhaji lexhewukazi elathi belihlala apha ubomi balo bonke kodwa lalidanile kuba lalingamazi lo mntu ndandimfuna. Landingenisa ngaphakathi lisithi liza kufowuna.

Njengoko lalithetha lalimana lindikrwaqula, mhlawumbi lizibuza ukuba ndingubani kwaye ndifuna ntoni. Kwakukho umfanekiso oqingqiweyo kaMariya emnyango, eludongeni kukho omkhulu kaKristu. Phezu kwetafile ekhitshini kwakukho umnqamlezo ogaxw’ entanyeni. Ukuze ndilenze likhululeke ndathi kulo “Ndizise umyalezo obalulekileyo kuye ovela kubahlobo bakhe.”

Kwafika umyeni wakhe owandibalisela imbali yalo lali. Ngeloo xesha, inkosikazi yakhe yayingafuman’ into efowunini kodwa ke yathembisa ukuba yayiza kuqhubeka izama. Kwakungekho mntu wayeyazi loo ndoda okanye indlu yayo. Ndajonga ixesha yaye kwakusele kuhlwile. Ndaqonda ukuba kwakuza kufuneka ndizame ngelinye ixesha. Ndababulela bobabini ngokundinceda, ndaza ndabuyela emotweni ndabhekisa amabombo ekhaya.

Ndaphinda kwiveki elandelayo. Kweli tyeli ndamfumana unoposi waza wandalathisa ngokucacileyo. Emva kwemizuzu elishumi elinesihlanu, ndafika kwindlela awayendalathise ngayo. Ndajika ngasekhohlo ndaza ndaqhubeka ngaloo ndlela incinane ndikhangela ibhulorho eyenziwe ngamatye, awayethe ndiza kubona ngayo. Andizange ndiyifumane. Ekugqibeleni ndayifumana indawo yokugqibela awayendalathise ngayo, ndayibona loo ndlu endandisehla ndinyuka ndiyikhangela ithe ngcu endulini.

Ndakhe ndema ndicinga ngendlela endandiza kuyiqalisa ngayo incoko yam. Indoda ekwakubonakala ukuba sele kumzuzu isidla amazimba yandivulela emnyango. Yathi: “Le ndlu uyifunayo iphaya ngaphesheya.” Yandalathisa indlu esithwe yimithi. Ndonda ngayo ndafika ndankqonkqoza emnyango. Njengoko ndandilindile, ndaphosa amehlo kuLwandle lweAtlantiki olwalumalunga namakhulu nje ambalwa emitha. Umoya wawubhudla ngamandla, yaye amaza ayentlitheka kunxweme olucwengileyo. Kwakungabonakali mntu apho kwabe nakuloo ndlu kukhal’ ibhungane.

Kwafuneka ndiphinde ndibuye kabini ngaphambi kokuba ndifumane ityendyana lo mfana kuloo ndlu. Lathi kum: “Ufikile apho ubusiya, kodwa ke le ndoda uyifunayo ayisahlali apha ibe ke andiyazi ukuba ifudukele phi.” Ndalichazela ukuba ndandiyifunela ntoni ndaze ndafumanisa ukuba nalo lalingazange khe lithethe namaNgqina kaYehova ngaphambili. Lalikhe lakhuthuzwa ibe lalizibuza isizathu sokuba uThixo evumela izinto ezimbi zenzeke. Lazamkela ngovuyo IMboniselo noVukani! ezazithetha ngaloo nto.

IZibhalo zisiyalela ukuba sifunisise abantu abanjengezimvu. Ndilusizi kuba ndingazange ndiyifumane indoda endandiyifuna. Nakuba kunjalo andizange ndidlale ngexesha. EIreland, baninzi abantu abafuna ukufunda ngesigidimi soBukumkani, ibe ngentsikelelo kaYehova, mhlawumbi imbewu encinane eyatyalwa kuloo mfana iya kuvelisa isiqhamo ngenye imini.

[Umbhalo osemazantsi]