Ingqibelelo Yakho Iyayivuyisa Intliziyo KaYehova
“Yiba nobulumko, nyana wam, uze uyenze ibe nemihlali intliziyo yam, ukuze ndimphendule ondingcikivayo.”—IMIZE. 27:11.
1, 2. (a) Incwadi kaYobhi ithetha ngasiphi isityholo esenziwa nguSathana? (b) Yintoni ebonisa ukuba uSathana waqhubeka engcikiva uYehova emva kwemihla kaYobhi?
UYEHOVA wavumela uSathana ukuba avavanye ingqibelelo yomkhonzi wakhe onyanisekileyo uYobhi. Ngenxa yoko, uYobhi waphulukana nemfuyo, abantwana nempilo yakhe. Kodwa xa uSathana wayecel’ umngeni ingqibelelo kaYobhi, wayengacingi nje ngoYobhi kuphela. USathana wathi: “Ulusu ngenxa yolusu, yaye yonke into anayo umntu uya kuyinikela ngenxa yomphefumlo wakhe.” Olu celomngeni lwaphakamisa imbambano eyadlulela ngaphaya koYobhi neqhubekileyo kangangethuba elide emva kokufa kwakhe.—Yobhi 2:4.
2 Malunga neminyaka engama-600 emva kweemvavanyo zikaYobhi, uSolomon waphefumlelwa ukuba abhale athi: “Yiba nobulumko, nyana wam, uze uyenze ibe nemihlali intliziyo yam, ukuze ndimphendule ondingcikivayo.” (IMize. 27:11) Kuyabonakala ukuba, nangelo xesha uSathana wayesamcel’ umngeni uYehova. Ngaphezu koko, kumbono owanikwa umpostile uYohane, uSathana wabonwa etyhola abakhonzi bakaThixo emva kokugxothwa kwakhe ezulwini, sele kulithuba emva kokumiselwa koBukumkani bukaThixo ngowe-1914. Eneneni, nanamhlanje, phakathi kwimihla yokugqibela yale nkqubo ingendawo, uSathana usayicel’ umngeni ingqibelelo yabakhonzi bakaThixo!—ISityhi. 12:10.
3. Ziziphi izifundo ezibalulekileyo esinokuzifunda kwincwadi kaYobhi?
3 Makhe sihlolisise izifundo ezithathu ezibalulekileyo esizifunda kwincwadi kaYobhi. Okokuqala, iimvavanyo zikaYobhi zidiza olona tshaba loluntu noyena nobangela wokuchaswa kwabantu bakaThixo. Olo tshaba nguSathana uMtyholi. Okwesibini, enoba singajamelana naziphi na iimvavanyo, ukuba nolwalamano olusenyongweni noThixo kuya kusinceda sihlale sinengqibelelo. Okwesithathu, enoba sivavanywa ngayiphi na indlela, uThixo usinceda sinyamezele kanye ngendlela awenza ngayo kuYobhi. Namhlanje, uYehova usinceda ngeLizwi lakhe, intlangano yakhe nomoya wakhe oyingcwele.
Hlala Ulukhumbula Olona Tshaba
4. Ngubani omele abekwe ityala ngeemeko ezisehlabathini namhlanje?
4 Abantu abaninzi abakholelwa ukuba uSathana ukho. Ngaloo ndlela, nangona besenokothuswa ziimeko zehlabathi, abamqondi oyena nobangela wazo—uSathana uMtyholi. Liyinyaniso elokuba, uninzi lweengxaki olujamelene nazo uluntu lubangelwa kwangabantu. Abazali bethu bokuqala uAdam noEva, bakhetha ukuzimela geqe kuMdali wabo. Ukususela ngelo xesha, izizukulwana ezalandelayo ziye zenza ngobudenge. YayikwanguMtyholi owalahlekisa uEva ukuze avukele uThixo. Nguye owathi phakathi kwabantu abangafezekanga nabafayo wakha inkqubo yehlabathi elawulwa nguye. Ngenxa yokuba uSathana ‘enguthixo wale nkqubo yezinto,’ abantu babonisa iimpawu ezifana nezakhe—ikratshi, iimbambano, umona, ukubawa, inkohliso nemvukelo. (2 Kor. 4:4; 1 Tim. 2:14; 3:6; funda uYakobi 3:14, 15.) Ezo mpawu ziye zakhokelela kwimilo yezopolitiko neyonqulo, intiyo, ukuqhatha, iziphithiphithi, nto leyo engunobangela weshwangusha elambethe uluntu namhlanje.
5. Sifuna ukwenza ntoni ngolwazi oluxabisekileyo esinalo?
5 Thina bakhonzi bakaYehova sinolwazi olubaluleke ngokwenene! Eneneni, siyamazi umntu obekek’ ityala ngeemeko zehlabathi ezimandundu. Ngaba oko akusenzi sizive sinembopheleleko yokuya entsimini size sixelele abantu ngalo mntu uphambili ekubangeleni iinkathazo? Yaye ngaba akusivuyisi ukumela uThixo oyinyaniso uYehova, size sichazele abanye ngendlela aya kumtshabalalisa ngayo uSathana kwakunye neengxaki ezambethe uluntu?
6, 7. (a) Ngubani obekek’ ityala ngokutshutshiswa kwabanquli bokwenyaniso? (b) Sinokuwuxelisa njani umzekelo kaElihu wamandulo?
6 USathana akaneli nje ukubekek’ ityala ngeenkathazo ezisehlabathini kodwa ukwabekek’ ityala nangokuchaswa kwabantu bakaThixo. Uzimisele ukusivavanya. UYesu Kristu wathi kumpostile uPetros: “Simon, Simon, khangela! uSathana ubenibanga ukuze anihluze njengengqolowa.” (Luka 22:31) Ngokufanayo, nabani na kuthi olandela emanyathelweni kaYesu uya kuvavanywa ngandlel’ ithile. UPetros wafanisa uMtyholi ‘nengonyama egqumayo, efuna ubani engamqwengayo.’ Kanti yena uPawulos wathi: “Bonke abo banqwenela ukuphila ngozinikelo lobuthixo ngokunxulumene noKristu Yesu, nabo baya kutshutshiswa.”—1 Pet. 5:8; 2 Tim. 3:12.
7 Sinokubonisa njani ukuba sihlala silukhumbula olona tshaba xa omnye umKristu esehlelwa lishwangusha? Kunokuba simele kude kuloo mzalwana siya kwenza kanye njengoElihu wamandulo, owathetha noYobhi njengomhlobo wokwenene. Siya kumncedisa umzalwana wethu xa esilwa notshaba lwethu, uSathana. (IMize. 3:27; 1 Tes. 5:25) Usukelo lwethu kukumnceda ahlale enengqibelelo enoba sekumnyam’ emntla, aze ngaloo ndlela avuyise intliziyo kaYehova.
8. Kutheni uSathana engazange akwazi ukuyekisa uYobhi ukuzukisa uYehova?
8 Into yokuqala exabisekileyo uSathana awamhlutha yona uYobhi yimfuyo yakhe. Ezo zilwanyana zazixabisekile, yaye kusenokwenzeka ukuba wayephila ngazo. Kodwa uYobhi wayezisebenzisa naxa enqula. Emva kokuba uYobhi ebangcwalisile abantwana bakhe, “wayevuka ekuseni aze anikele imibingelelo etshiswayo ngokwenani labo bonke; kuba, wayesithi uYobhi, ‘mhlawumbi oonyana bam bonile baza bamqalekisa uThixo entliziyweni yabo.’ Leyo yindlela awayesoloko esenza ngayo uYobhi.” (Yobhi 1:4, 5) Ngaloo ndlela, uYobhi wayewanikela rhoqo amadini ezilwanyana kuYehova. Zathi zakuqala iimvavanyo, akabi sakwazi ukwenjenjalo. UYobhi wayengasenazo ‘izinto zexabiso’ awayenokumzukisa ngazo uYehova. (IMize. 3:9) Kodwa wayenako ukumzukisa uYehova ngemilebe yakhe, ibe wakwenza oko!
Yiba Nolwalamano Olusenyongweni NoYehova
9. Yintoni eyona nto ixabisekileyo esinayo?
9 Enoba sizizityebi okanye amahlwempu, siselula okanye sele sikhulile, sisempilweni okanye sikhathazwa yimpilo, sinokuba nolwalamano olusenyongweni noYehova. Enoba sijamelana naziphi na iimvavanyo, ukuba nolwalamano oluqinileyo noThixo kuya kusenza sihlale sinengqibelelo size sivuyise intliziyo kaYehova. Kwanabantu ababengenalwazi lungako ngenyaniso baba nenkalipho baza bayigcina ingqibelelo yabo.
10, 11. (a) Wasabela njani omnye udadewethu xa kwakuvavanywa ingqibelelo yakhe? (b) Yiyiphi impendulo enamandla eyanikelwa ngulo dade kuSathana?
10 Khawucinge nje ngoDade uValentina Garnovskaya, elinye lamaNgqina amaninzi aseRashiya awathi njengoYobhi othembekileyo, agcina ingqibelelo yawo phantsi kweemvavanyo eziqatha. Ngowe-1945, xa wayeneminyaka engama-20 ubudala, omnye umzalwana washumayela kuye. Lo mzalwana wabuyela kuye kabini ukuze ancokole naye ngeBhayibhile, kodwa emva koko akazange aphinde abuye. Sekunjalo, uValentina waqalisa ukushumayela kubamelwane bakhe. Ngenxa yoko, wabanjwa waza wagwetywa iminyaka esibhozo esenkampini. Ngowe-1953 wakhululwa waza emva koko waqala apho ebeyeke khona ukushumayela. Waphinda wabanjwa waza wavalelwa—iminyaka elishumi ke ngoku. Emva kokuchitha iminyaka eliqela kwinkampu enye, watshintshelwa kwenye. Kuloo nkampu, kwakukho oodade abathile ababeneBhayibhile. Ngenye imini omnye udade wabonisa uValentina le Bhayibhile. Kwambangela imincili ngokwenene oko! Cinga nje ukuba, uValentina wayeyibona okwesibini iBhayibhile emva kwaleyo yomzalwana owashumayela kuye ngowe-1945!
11 Ngowe-1967, uValentina wakhululwa ibe ekugqibeleni wabonisa ukuzahlulela kwakhe kuYehova ngokubhaptizwa emanzini. Inkululeko yakhe wayisebenzisela ukushumayela ngenzondelelo de kwangowe-1969. Noko ke, ngaloo nyaka waphinda wabanjwa, waza wagwetywa iminyaka emithathu entolongweni. UValentina akazange ayeke ukushumayela. Ngaphambi kokufa kwakhe ngowama-2001, wayesele encede abantu abangama-44 ukuba bafunde inyaniso. Wachitha iminyaka engama-21 ezintolongweni nasezinkampini. Wakulungela ukuncama yonke into, kuquka inkululeko yakhe, ukuze alondoloze ingqibelelo yakhe. Xa wayesele eza kufa, uValentina wathi: “Andizange khe ndibe nendawo eyeyam yokuhlala. Izinto endandinazo zazingena kwisutikheyisi enye, kodwa ndandonwabile yaye ndanelisekile kukukhonza uYehova.” UValentina wanikela impendulo enamandla ngokwenene kuSathana owatyhola ngelithi, abantu abasayi kuze bahlale bethembekile kuThixo xa bevavanywa! (Yobhi 1:9-11) Sinokuqiniseka ukuba uValentina wayivuyisa intliziyo kaYehova, yaye uYehova ukhangele phambili kwixesha aya kuvusa ngalo uValentina nabo bonke abanye abafa bethembekile.—Yobhi 14:15.
12. Uthando lunayiphi indima kulwalamano lwethu noYehova?
12 Ubuhlobo bethu noYehova busekelwe ekumthandeni. Siyazithanda iimpawu zikaThixo ibe senza konke esinokukwenza ukuze siphile ngokuvisisana neenjongo zakhe. Ngokwahlukileyo kwizityholo zikaMtyholi, uYehova simthanda ngokusuk’ entliziyweni nangokupheleleyo. Olu thando lusinceda sigcine ingqibelelo nakuba sivavanywa. Yena uYehova, “uya kuyigcina indlela yabanyanisekileyo bakhe.”—IMize. 2:8; INdu. 97:10.
13. UYehova ukujonga njani oko simenzela kona?
13 Uthando lusenza sizukise igama likaYehova, enoba sivakalelwa kukuba sisikelwe umda. Uyazibona iinjongo zethu ezintle yaye akasigwebi xa singakwazi ukwenza konke ebesingathanda ukukwenza. Okona kubalulekileyo asikuko oko sikwenzayo kuphela kodwa sisizathu sokukwenza kwethu. Kwanakuba uYobhi wayambethwe yintlungu yaye ehlelwe zizinto ezininzi, kodwa wayitsho kubagculeli bakhe into yokuba uyazithanda iindlela zikaYehova. (Funda uYobhi 10:12; 28:28.) Kwisahluko sokugqibela sencwadi kaYobhi, uThixo wachaza indlela uElifazi, uBhiledadi noTsofare ababemcaphukisa ngayo ngenxa yokungabi nanyani kwabo. Kwangaxeshanye, uYehova wabonisa ukuba uyakholiswa nguYobhi ngokumbiza kangangezihlandlo ezine ngokuthi “umkhonzi wam” nangokumyalela ukuba abathandazele abo bathuthuzeli bobuxoki. (Yobhi 42:7-9) Ngamana nathi singenza izinto ngendlela eya kwenza ukuba uYehova akholiswe sithi.
UYehova Uyabanceda Abakhonzi Bakhe Abathembekileyo
14. UYehova wamnceda njani uYobhi walungisa indlela awayecinga ngayo?
14 UYobhi wagcina ingqibelelo nangona wayengafezekanga. Maxa wambi, ngenxa yokuxinezeleka, wayekhe abone izinto ngendlela engeyiyo. Ngokomzekelo, wathi kuYehova: “Ndikhalela uncedo kuwe, kodwa akundiphenduli . . . Ngamandla esandla sakho ephela uba nenzondo kum.” Ngaphezu koko, uYobhi wazithethelela ngokugqithiseleyo wathi: “Andenzanga nto iphosakeleyo,” waphinda wathi ‘akukho lugonyamelo ezintendeni zezandla zam, nomthandazo wam umsulwa.’ (Yobhi 10:7; 16:17; 30:20, 21) Nakuba kunjalo, uYehova wamnceda ngobubele uYobhi ngokumbuza uthotho lwemibuzo olwasusa ingqalelo kaYobhi kuye. Le mibuzo yamnceda wabubona ngokucacileyo ubukhulu bukaThixo nobuncinane bomntu. UYobhi walwamkela olo lwalathiso waza walungisa.—Funda uYobhi 40:8; 42:2, 6.
15, 16. UYehova ubanceda njani abakhonzi bakhe namhlanje?
15 UYehova unikela ulwalathiso lobubele nolungqongqo kubakhonzi bakhe namhlanje. Ngaphezulu siyangenelwa kolu lwalathiso lubalulekileyo. Ngokomzekelo, uYesu Kristu wanikela idini lentlawulelo, elaba sisiseko sokuxolelwa kwezono. Ngenxa yelo dini sinokuba nolwalamano olusenyongweni noThixo nakuba singafezekanga. (Yak. 4:8; 1 Yoh. 2:1) Xa sivavanywa, siye sithandazele ukuxhaswa nokomelezwa ngumoya oyingcwele kaThixo. Ukongezelela, sineBhayibhile epheleleyo, yaye ukuba siyayifunda size sicamngce ngayo, oko kuya kusinceda simelane neemvavanyo zokholo. Ukufunda kusinceda siqonde imbambano yolongamo lwendalo yonke nengqibelelo.
16 Ngaphezu koko, singenelwa gqitha ngokuba yinxalenye yobuzalwana bomhlaba wonke esibulungiselelwe nguYehova kwakunye nokutya kokomoya okulungiselelwa “likhoboka elithembekileyo neliyingqondi.” (Mat. 24:45-47) Kwibandla ngalinye kwamalunga ne-100 000 amaNgqina kaYehova, kuqhutywa iintlanganiso ezisifundisayo zize zisomelezele ukujamelana neemvavanyo zokholo esinokuzifumana. Oku sinokukubona kumzekelo kaSheila, iNgqina elikwishumi elivisayo elihlala eJamani.
17. Yenza umzekelo wobulumko bokubambelela ngokusondeleyo kwimiyalelo yentlangano kaYehova namhlanje.
17 Ngenye imini, kwiklasi awayefunda kuyo uSheila kwakungekho titshala okwethutyana. Abanye abafundi bagqiba kwelokuba bazame ukusebenzisa ibhodi yeOuija. USheila wakhawuleza waphuma kuloo klasi, yaye iindaba awazivayo kamva zamenza wavuya kuba eye waphuma. Ngoxa babesebenzisa loo bhodi yeOuija, abanye abafundi babuva ubukho beedemon baza babaleka besoyika. Noko ke, yintoni eyabangela ukuba uSheila emke kuloo klasi ngokukhawuleza? USheila uthi: “Kwithutyana ngaphambi kweso siganeko, sasithethile ngeengozi zeebhodi zeOuija kwiHolo yoBukumkani. Ngoko ndandikwazi oko ndimele ndikwenze. Ndandifuna ukuvuyisa uYehova, njengoko isitsho iBhayibhile kwiMizekeliso 27:11.” Kwamnceda ngokwenene uSheila ukuya kule ntlanganiso aze aphulaphule ngenyameko!
18. Wena uzimisele ukwenza ntoni?
18 Sonke masizimisele ukubambelela kulwalathiso esilufumana kwintlangano kaThixo. Xa sisiya rhoqo kwiintlanganiso, sifunde iBhayibhile, sifunde iincwadi ezisekelwe eBhayibhileni, sithandaze size sinxulumane namaKristu aqolileyo, siya kufumana ulwalathiso nenkxaso efunekayo. UYehova ufuna siphumelele yaye usithembile ukuba siya kuqhubeka sinyanisekile. Sinelungelo elingathethekiyo lokudumisa igama likaYehova, elokugcina ingqibelelo nelokuvuyisa intliziyo kaYehova!
Ngaba Uyakhumbula?
• Ziziphi iimeko neemvavanyo ezibangelwa nguSathana?
• Yintoni eyona nto ixabisekileyo sinayo?
• Ubuhlobo bethu noYehova busekelwe entwenini?
• Ziziphi ezinye iindlela uYehova asixhasa ngazo namhlanje?
[Umfanekiso okwiphepha 8]
Ngaba uziva unembopheleleko yokusasaza ulwazi oluxabisekileyo onalo?
[Umfanekiso okwiphepha 9]
Sinokuwanceda amanye amaKristu ukuba agcine ingqibelelo
[Umfanekiso okwiphepha 10]
UValentina waxolela ukuncama yonke into ukuze agcine ingqibelelo