Sondela KuThixo
“Uya Kumfumana”
NGABA UYAMAZI UThixo? Akululanga njengokuba ucinga ukuphendula lo mbuzo. Ukumazi ngokwenene uThixo kuquka ukuyazi kakuhle intando yakhe kunye neendlela zakhe. Loo nto isenza sisondele kuye ize ibutshintshe kakhulu nobomi bethu. Ngaba sinako ukusondela ngolo hlobo kuThixo? Ukuba sinako, sinokuyenza njani loo nto? Iimpendulo zale mibuzo zifumaneka kwicebiso uKumkani uDavide awalinika uSolomon unyana wakhe, njengoko lifumaneka kweyoku-1 yeziKronike 28:9.
Khawube nomfanekiso ngqondweni wento eyenzekayo. UDavide ebelawula kwaSirayeli kangangeminyaka engama-40 yaye uhlanga luye lwaphumelela ngenxa yolawulo lwakhe. USolomon oza kungena ezihlangwini zakhe uselula. (1 Kronike 29:1) Athini amazwi okugqibela uDavide ayala ngawo unyana wakhe?
Ecaphula kumava akhe okukhonza uThixo, uDavide umyala ngala mazwi: “Solomon nyana wam, uze umazi uThixo kayihlo.” UDavide uthetha ngokungakumbi kunolwazi nje kuphela. USolomon sele emnqula kakade uThixo kaDavide uYehova. Sele kubhalwe inxalenye eninzi yeZibhalo zesiHebhere yaye ngokuqinisekileyo uSolomon uyayazi into ethethwa ngoThixo kule mibhalo engcwele. Omnye umphengululi uthi igama lesiHebhere elithi “ulwazi” linokubhekisela “ekumazini ngokusondeleyo umntu.” Ngoko uDavide ufuna unyana wakhe abe nobuhlobo obusondeleyo noThixo, kanye njengokuba naye uDavide enzayo.
Ubomi bukaSolomon bufanele bulawulwe bobo buhlobo. UDavide ubongoza unyana wakhe esithi: “Mkhonze [uThixo] ngentliziyo epheleleyo nangomphefumlo onoyolo.”a Phawula ukuba uthi ufanele akhonze uThixo emva kokuba ethe ufanele amazi. Ukumazi kakuhle uThixo kukwenza umkhonze. Kodwa ufanele umkhonze ngentliziyo epheleleyo ngaphandle kokuhanahanisa. (INdumiso 12:2; 119:113) UDavide uyalela unyana wakhe ukuba akhonze uThixo ngentliziyo epheleleyo nangokuzithandela.
Kutheni uDavide esithi unyana wakhe ufanele akhonze ngenjongo nangengcinga efanelekileyo? UDavide uchaza isizathu esithi: “Kuba uYehova uyazigocagoca zonke iintliziyo, akuqonde konke ukutyekela kweengcamango.” USolomon akafanele anqule uThixo kuba efuna ukukholisa uyise uDavide. UThixo ufuna abantu abaneentliziyo ezifuna ngokwenene ukumkhonza.
Ngaba uSolomon uza kuxelisa uyise aze naye asondele kuYehova? Hayi ke, loo nto ixhomekeke kuSolomon. UDavide uthi kunyana wakhe: “Ukuba uthe wamfuna, uya kumfumana; kodwa ukuba uthe wamshiya, uya kukulahla ngonaphakade.” Ukuze asondele kuThixo, uSolomon kufuneka enze umgudu wokwazi uYehova.b
Icebiso likaDavide lisiqinisekisa ukuba uYehova ufuna sisondele kuye. Kodwa ukuze sisondele kuye, kufuneka ‘simfune’ ngokufundisisa iZibhalo ukuze simazi kakuhle. Ukumazi kufanele kusenze simkhonze ngentliziyo yonke nangokuzithandela. UYehova ufuna simnqule ngale ndlela yaye abakhonzi bakhe bafanele benjenjalo.—Mateyu 22:37.
[Imibhalo esemazantsi]
a Ezinye iinguqulelo zithi kule vesi: “Mkhonze ngentliziyo epheleleyo nangengqondo evumayo.”
b Okubuhlungu kukuba uSolomon akazange anyaniseke de aye kufa nangona wakhonza uYehova ngentliziyo yakhe yonke ekuqaleni.—1 Kumkani 11:4.