Ngaba Ubusazi?

Ngaba iYerusalem yajikelezwa ngezibonda ezibaziweyo, njengokuba uYesu wayexele kwangaphambili?

Kwisiprofeto sakhe esiphathelele ukutshatyalaliswa kweYerusalem, uYesu wathi ngeso sixeko: “Kuya kuza phezu kwakho imihla yaxa iintshaba zakho ziya kwakha inqaba zikujikeleze ngezibonda ezibaziweyo yaye ziya kukurhawula zize zikubandezele macala onke.” (Luka 19:43) Amazwi kaYesu azaliseka ngowama-70 C.E. xa amaRoma awayekhokelwa nguTitus angqinga iYerusalem. UTitus wayefuna ukuphumeza izinto ezintathu—ukuthintela amaYuda angasabi, ukuwenza anikezele nokubethisa abantu ababehlala kweso sixeko ngenxele likaKetsekile.

Ngokutsho kukaFlavius Josephus, umbhali-mbali wenkulungwane yokuqala, amabutho awahlukaneyo omkhosi wamaRoma akhuphisana efuna ukubona ukuba liliphi elaliza kukhawuleza ligqibe. Umkhosi wamaRoma wagawula yonke imithi eyayimalunga neekhilomitha ezili-16 eyayingqonge eso sixeko saseYerusalem, udonga olwalumalunga neekhilomitha ezisixhenxe ubude lwakhiwa ngeentsuku ezintathu kuphela. UJosephus uthi: “Naliphi na ithemba lokusaba amaYuda ayenalo laliphelile.” Ngenxa yokungqingwa kwesixeko, kwabakho indlala, abe namaYuda ngaphakathi esixekweni esilwa odwa, ngenxa yalo mbhodamo amaRoma asithimba isixeko emva kweenyanga ezintlanu.

Ngaba ngokwenene uKumkani uHezekiya wawakha umsele owawusiya eYerusalem?

UHezekiya wayengukumkani wakwaYuda ekupheleni kwengulungwane yesibhozo Ngaphambi Kwexesha Eliqhelekileyo, ngexesha ekwakusiliwa namaAsiriya anamandla. IBhayibhile ithi wakhusela iYerusalem waza waqiniseka ukuba yayinamanzi aneleyo. Phakathi kwezinto awazakhayo yayingumsele wamanzi oziimitha ezingama-533, ukuze uzise amanzi esixekweni.—2 Kumkani 20:20; 2 Kronike 32:1-7, 30.

Lo msele uye wafunyanwa ngenkulungwane ye-19. Waye wabizwa ngokuba nguMsele kaHezekiya okanye iChibi laseSilowa. Phakathi kulo msele kwaye kwafunyanwa umbhalo owawuchaza ngokugqityezelwa kwawo. Abaphengululi abaninzi baye bathi xa bebona indlela ababhalwe ngayo oonobumba bagqiba kwelokuba lo mbhalo wabhalwa ngexesha likaHezekiya. Noko ke, kwiminyaka elishumi edlulileyo abanye baye bathi lo msele wakhiwa malunga neminyaka engama-500 emva kwexesha likaHezekiya. Ngowama-2003, iqela lezazinzulu zakwaSirayeli lapapasha imiphumo yophando lwalo eyayijoliswe ekwazini elona xesha owakhiwa ngawo lo msele. Sisiphi isigqibo alafikelela kuso?

UGqr. Amos Frumkin weHebrew University of Jerusalem uthi: “Ubungqina esibufumene kwimiphumo yovavanyo lweChibi lwaseSilowa bubonisa ukuba lakhiwa ngexesha likaHezekiya.” Inqaku elapapashwa kulindixesha wenzululwazi iNature longezelela lisithi: “Ubungqina obuvela kwimithombo emithathu eyahlukeneyo bonke bukhomba kunyaka we-700 BC nto leyo eyenza iChibi laseSilowa libe sesona sakhiwo sidala samaxesha okubhalwa kweBhayibhile esaziwayo.”