Sondela KuThixo
Uyazazi Iintsilelo Zethu
“NDENZE yonke into ebendinokuyenza, kodwa ndicinga ukuba ayanelanga.” Layichaza ngaloo ndlela elinye ibhinqa imigudu yalo yokukhonza uThixo. Ngaba imigudu enyanisekileyo yabakhonzi bakaYehova uThixo yokumnqula iyamkholisa? Ngaba uyaqonda ukuba ubuchule neemeko zabo zinegalelo kubungakanani bomsebenzi abamenzela wona? Ukuphendula le mibuzo, makhe sifunde okwathethwa kuMthetho kaMoses ngeminikelo ethile, njengaleyo kuthethwa ngayo kwiLevitikus 5:2-11.
Ngaphantsi koMthetho, uThixo wayefuna kwenziwe amadini awahlukahlukeneyo ukuze kucanyagushelwe izono. Umntu ekuthethwa ngaye kwesi sicatshulwa wayengonanga ngabom. (Indinyana 2-4) Xa wayechazelwa ngesono asenzileyo, kwakufuneka asivume ekuhleni aze enze umnikelo wetyala—“ithokazi lemvu okanye itakane lebhokhwe eliyimazi.” (Indinyana 5, 6) Kodwa kuthekani ukuba wayelihlwempu yaye engenalo itakane lemvu okanye lebhokhwe? Ngaba uMthetho wawumnyanzela ukuba aliboleke aze ngaloo ndlela angene ematyaleni? Ngaba kwakufuneka asebenze ade ayifumane imali yokulithenga, nto leyo eyayinokulibazisa ukucanyagushelwa kwezono zakhe?
UMthetho wawuluchaza kanje uvelwano analo uYehova: “Ukuba, ke, awunako okwanele imvu, mawuzise kuYehova amahobe amabini asendle okanye amantshontsho amabini amavukuthu abe ngumnikelo wawo wetyala ngenxa yesono osenzileyo.” (Indinyana 7) Ukuba umSirayeli wayelihlwempu kangangokuba wayengenakukwazi ukunikela ngemvu, uThixo wayesamkela loo nto awayenokukwazi ukuyifikelela—amantshontsho amabini amavukuthu okanye amahobe amabini.
Kuthekani ukuba loo mntu wayengenakukwazi ukunikela nangezo ntaka zimbini? UMthetho wawusithi: “Ngoko umele uzise umnikelo wesono osisahlulo seshumi se-efa [iikomityi ezisibhozo ukuya kwezilithoba] yomgubo ocolekileyo, ibe ngumnikelo wawo lowo ngenxa yesono osenzileyo.” (Indinyana 11) UYehova wayezivumela impula zikaluJaca ukuba zenze umnikelo wesono ekwakungazukuphalazwa gazi kuwo.a KwaSirayeli kwakungekho mntu owayethintelwa bubuhlwempu ukuba afumane intsikelelo yokucamagushela izono okanye ilungelo lokwenza uxolo noThixo.
Sifunda ntoni ngoYehova kumthetho ophathelele iminikelo yesono? Sifunda ukuba unguThixo onemfesane nozicingelayo iimeko zabanquli bakhe. (INdumiso 103:14) Ufuna sisondele kuye size sibe nobuhlobo kunye naye nokuba sele sikhulile ngeminyaka okanye sinempilo enkenenkene, iimbopheleleko zentsapho nezinye. Kuya kusithuthuzela ukwazi ukuba uYehova uThixo uyakholiswa sithi xa sisenza oko esinokukwazi ukukwenza.
[Umbhalo osemazantsi]
a Ixabiso lokucamagushela lesilwanyana esinikelwayo lalisegazini laso,yaye uThixo wayelijonga njengelingcwele. (Levitikus 17:11) Ngaba ke loo nto ithetha ukuba umgubo awayenikela ngawo amahlwempu wawungenaxabiso? Akunjalo. Ngokuqinisekileyo uYehova wayewuxabisa umoya wokuthobeka owawuboniswa ngaloo minikelo. Ngaphezu koko, izono zaso sonke isizwe—kuquka namahlwempu—zazicanyagushelwa ngegazi lezilwanyana ekwakunikelwa ngazo kuThixo ngoMhla woCamagushelo owawubakho kanye ngonyaka.—Levitikus 16:29, 30.