Yiba Nenzondelelo Ngendlu KaYehova!
“Ukuzondelela indlu yakho kuya kundidla.”—YOH. 2:17.
1, 2. Yintoni eyenziwa nguYesu etempileni ngowama-30 C.E., yaye kwakutheni?
KHAWUBE nalo mfanekiso-ngqondweni. KungePasika yowama-30 C.E. Kwiinyanga ezintandathu ngaphambilana, uYesu uqalise ubulungiseleli bakhe basemhlabeni. Ngoku uya eYerusalem. Xa efika kwiNtendelezo yabeeNtlanga, uYesu ufika kukho ‘abo bathengisa iinkomo nezimvu namahobe nabananisi bemali besezihlalweni zabo.’ Emva koko wenza iziniya ngentsontelo aze agxothe ezo zilwanyana baze nabathengisi balandele. UYesu ulahla neengqekembe zemali zabatshintshi bemali, abhukuqe neetafile zabo. Uxelela abo bathengisa amahobe ukuba mabathathe izinto zabo bemke nazo.—Yoh. 2:13-16.
2 Oku kwenziwa nguYesu kubonisa inkxalabo anayo ngetempile. UYesu uthi: “Musani ukuyenza indlu yokurhweba indlu kaBawo!” Njengoko abafundi bakaYesu bebukele oku, bakhumbula amazwi awabhalwa ngumdumisi uDavide kwiinkulungwane ezadlulayo, athi: “Ukuzondelela indlu yakho ngokupheleleyo kundidlile.”—Yoh. 2:16, 17; INdu. 69:9.
3. (a) Yintoni inzondelelo? (b) Nguwuphi umbuzo esinokuzibuza wona?
3 UYesu wenza ezi zinto ngenxa yenkxalabo nenzondelelo ngendlu kaThixo. Ukuba nenzondelelo kuthetha “ukutsha ziintambo nokuba nomdla wokwenene kwinto ethile.” Kule nkulungwane yama-21, amaKristu angaphezu kwezigidi ezisixhenxe anenzondelelo ngendlu kaThixo. Sisenokuzibuza, ‘Ndinokuyibonakalisa njani inzondelelo engakumbi ngendlu kaYehova?’ Ukuze sikwazi ukuphendula lo mbuzo, masiqale sihlolisise ukuba ifanekisela ntoni indlu kaThixo namhlanje. Size emva koko sihlolisise imizekelo yamadoda athembekileyo ekuthethwe ngawo eBhayibhileni awayenenzondelelo ngendlu kaThixo. Umzekelo wawo wabhalelwa “ukuyalela thina” yaye unokusikhuthaza sibe nenzondelelo engakumbi.—Roma 15:4.
Indlu KaThixo—Mandulo Nanamhlanje
4. Yayibaluleke ngantoni itempile eyakhiwa nguSolomon?
4 KuSirayeli wamandulo, indlu kaThixo yayiyitempile yaseYerusalem. Kakade ke, uYehova wayengahlali apho ngokoqobo. Wathi: “Amazulu ayitrone yam, umhlaba sisihlalo seenyawo zam. Ndluni ke leyo ningandakhela yona, yiyiphi loo ndawo ndingaphumla kuyo?” (Isa. 66:1) Sekunjalo, itempile eyayakhiwe ngexesha lokulawula kukaSolomon yayibalulekile kuba yayiyeyona ndawo kwakunqulelwa kuyo uYehova, nekwakuthandazelwa kuyo.—1 Kum. 8:27-30.
5. Kufuzisela ntoni namhlanje ukunqula kwitempile kaSolomon?
5 Namhlanje indlu kaYehova ayisosakhiwo esiseYerusalem okanye kwenye indawo. Kunoko, lilungiselelo lokumnqula ngokusekelwe kwidini lentlawulelo likaKristu. Bonke abakhonzi bakaThixo abathembekileyo abasemhlabeni banqula uYehova ngokumanyeneyo kule tempile yokomoya.—Isa. 60:4, 8, 13; IZe. 17:24; Heb. 8:5; 9:24.
6. Ngabaphi ookumkani bakwaYuda ababenenzondelelo ngonqulo lwenyaniso?
6 Emva kokwahlulwa kukaSirayeli ngowama-997 B.C.E., ookumkani aba-4 kwabali-19 ababelawula kwaYuda, kummandla ongasezantsi babenenzondelelo ngonqulo lwenyaniso. Aba kumkani nguAsa, uYehoshafati, uHezekiya noYosiya. Yintoni ebalulekileyo esinokuyifunda kubo?
Inkonzo Yomphefumlo Uphela Izisa Iintsikelelo
7, 8. (a) UYehova usikelela inkonzo enjani? (b) Yintoni esinokuyifunda kumzekelo kaKumkani uAsa?
7 Ebudeni bolawulo lukaKumkani uAsa, uYehova wathumela abaprofeti bokukhokela uhlanga lwakhe ukuze lumkhonze ngokuthembeka. Ngokomzekelo, iBhayibhile ithi uAsa waphulaphula umprofeti uAzariya, unyana kaOdedi. (Funda eyesi-2 yeziKronike 15:1-8.) Emva kokuba uAsa enze iinguqulelo, abantu bakwaYuda nabanye abaninzi ababevela kubukumkani bakwaSirayeli ababeze kwindibano enkulu eyayiseYerusalem bamanyana. Bonke abo bantu bathi baya kunqula uYehova ngokunyaniseka. Siyafunda: “Bafunga kuYehova ngelizwi elikhulu nangemikhwazo yemivuyo nangamaxilongo nangezigodlo. Wonke uYuda waba nemihlali ngenxa yesifungo eso; kuba wayefunge ngentliziyo yakhe yonke yaye wakholiswa ngokupheleleyo kukumfuna, ngokokude abe nokufunyanwa nguye; yaye uYehova waqhubeka emnika ukuphumla macala onke.” (2 Kron. 15:9-15) Ngokuqinisekileyo uYehova uya kusisikelela nathi xa simkhonza ngomphefumlo uphela.—Marko 12:30.
8 Okubuhlungu kukuba, kamva uAsa akazange aphulaphule xa wayelungiswa nguHanani, imboni. (2 Kron. 16:7-10) Sisabela njani xa uYehova esiluleka okanye esalathisa esebenzisa abadala abangamaKristu? Ngaba sisamkela ngokukhawuleza eso siluleko sisekelwe eZibhalweni size siphephe ukuba ngoontamo-lukhuni?
9. Yiyiphi ingxaki ababejamelene nayo uYehoshafati nabemi bakwaYuda, yaye benza ntoni?
9 UYehoshafati wayengukumkani wakwaYuda ngenkulungwane yeshumi ngaphambi kweXesha Eliqhelekileyo. Yena nabo bonke abemi bakwaYuda bahlaselwa yimikhosi emanyeneyo yamaAmoni, amaMowabhi nabantu ababehlala kummandla weentaba waseSehire. Nangona lo kumkani wayesoyika, yintoni awayenzayo? Yena namadoda akhe, amakhosikazi awo nabantwana bawo, bahlanganisana endlwini kaYehova bathandaza. (Funda eyesi-2 yeziKronike 20:3-6.) Esebenzisa amazwi awathethwa nguSolomon xa kwakunikezelwa itempile, uYehoshafati wenza umthandazo ochukumisayo kuYehova, wathi: “Owu Thixo wethu, akuyi kuphumeza umgwebo na phezu kwabo? Kuba asinamandla phambi kwesi sihlwele sikhulu esiza nxamnye nathi; yaye thina asikwazi oko simele sikwenze, kodwa amehlo ethu akhangele kuwe.” (2 Kron. 20:12, 13) Akugqiba ukuthandaza uYehoshafati, “phakathi kwebandla elo,” umoya kaYehova washukumisa uYahaziyeli, umLevi ukuba abathuthuzele aze abanike isibindi.—Funda eyesi-2 yeziKronike 20:14-17.
10. (a) UYehoshafati nabantu bakwaYuda balufumana njani ulwalathiso? (b) Sinokubonisa njani ukuba sinoxabiso ngolwalathiso esilunikwa nguYehova namhlanje?
10 UYehoshafati nabantu bakwaYuda bafumana ulwalathiso lukaYehova ngoYahaziyeli. Namhlanje, usebenzisa udidi lwekhoboka elithembekileyo neliyingqondi ukuze lusithuthuzele yaye lusalathise. Ngokuqinisekileyo, sifanele sisebenzisane nabadala abamiselweyo size sibahlonele kuba basebenza nzima besalusa yaye besinika ulwalathiso oluvela ‘kwikhoboka elithembekileyo neliyingqondi.’—Mat. 24:45; 1 Tes. 5:12, 13.
11, 12. Yintoni esinokuyifunda koko kwenzeka kuYehoshafati nabantu bakwaYuda?
11 Kanye njengokuba uYehoshafati nabantu bakhe bahlanganisana ndawonye ukuze bafune ulwalathiso lukaYehova, nathi sifanele sihlanganisane rhoqo nabazalwana noodadewethu kwiintlanganiso zebandla. Xa sisengxakini, singayazi into emasiyenze, masixelise umzekelo omhle kaYehoshafati nabantu bakwaYuda, sithandaze kuYehova sinentembelo epheleleyo kuye. (IMize. 3:5, 6; Fil. 4:6, 7) Enoba sisodwa, ukuthandaza kuYehova kusimanyanisa ‘nabazalwana bethu bonke abasehlabathini.’—1 Pet. 5:9.
12 UYehoshafati nabantu bakhe baluphulaphula ulwalathiso lukaThixo abalunikwa nguYahaziyeli. Waba yintoni umphumo? Boyisa kwelo dabi baza babuyela eYerusalem ‘benemihlali, benemirhubhe neehadi namaxilongo endlwini kaYehova.’ (2 Kron. 20:27, 28) Nathi siyalwamkela ulwalathiso lukaYehova aludlulisela ngabakhonzi bakhe size simdumise.
Ukunyamekela Iindawo Esihlanganisana Kuzo
13. Nguwuphi umsebenzi owenziwa nguHezekiya ekuqaliseni kolawulo lwakhe?
13 Ngenyanga yokuqala yolawulo lwakhe, uHezekiya wabonisa inzondelelo ngonqulo lukaYehova ngokuhlaziya itempile. Wayalela ababingeleli nabaLevi ukuba bahlambulule indlu kaThixo. Lo msebenzi bawenza bawugqiba ngeentsuku ezili-16. (Funda eyesi-2 yeziKronike 29:16-18.) Xa sinyamekela iindawo esihlanganisana kuzo sibonisa ukuba sinenzondelelo ngonqulo lukaYehova. Ngaba akukhe uve ngabantu abachukunyiswa yinzondelelo yabazalwana noodade abenza lo msebenzi? Ukuzibhokoxa kwaba bazalwana kuzukisa uYehova.
14, 15. Nguwuphi umsebenzi owenziwayo namhlanje ozukisa uYehova? Chaza imizekelo.
14 Kwesinye isixeko esikumntla weNgilani, kukho indoda eyayingafuni ukuba kulungiswe iHolo yoBukumkani eyayikufuphi nomzi wayo. Abazalwana bathetha nayo ngobubele. Kuba udonga olwahlukanisa iHolo yoBukumkani nomzi wale ndoda lwalufuna ukulungiswa, bathembisa ukuba baza kululungisa ngaphandle kwentlawulo. Benza umsebenzi omninzi xa babelungisa olo donga. Oku kwabangela ukuba isimo sengqondo salo mmelwane sitshintshe. Ngoku usoloko eliliso kule Holo yoBukumkani.
15 Abantu bakaYehova baxakeke ngumsebenzi wokwakha emhlabeni wonke. Amatsha-ntliziyo asekuhlaleni ancedisana nabakhonzi bexesha elizeleyo abavela kumazwe ngamazwe ekwakheni iiHolo zoBukumkani, iiHolo zeNdibano namakhaya aseBheteli. USam ungunonjineli yaye unobuchule bokufaka izinto zokufudumeza nokupholisa umoya. Yena nenkosikazi yakhe uRuth, baye baya kumazwe amaninzi aseYurophu naseAfrika bencedisa kumsebenzi wokwakha. Kumazwe abaya kuwo, bashumayela namabandla abakhonza kuwo. Echaza into eyamkhuthazayo ukuba enze lo msebenzi, uSam uthi: “Ndakhuthazwa ngabazalwana abakhonza eBheteli kumazwe awahlukahlukeneyo. Ukubona indlela ababesebenza ngayo ngenzondelelo kwandenza ndanomdla wokwenza lo msebenzi.”
Thobela Imiyalelo KaThixo
16, 17. Nguwuphi umsebenzi abantu bakaThixo abaye bawenza ngenzondelelo, yaye ube yintoni umphumo?
16 Ukongezelela kumsebenzi wokulungisa itempile, uHezekiya wavuselela umbhiyozo wePasika owawusenziwa minyaka le ngokomyalelo kaYehova. (Funda eyesi-2 yeziKronike 30:1, 4, 5.) UHezekiya nabemi baseYerusalem bamema uhlanga lonke, kuquka abemi bobukumkani obungasentla. Iimbaleki zasasaza iincwadi zesimemo kulo lonke elo.—2 Kron. 30:6-9.
17 Kwiminyaka yakutshanje, siye senza umsebenzi ofanayo. Siye sasebenzisa izimemo ezihle ukumemela abantu abakwintsimi yethu kwiSidlo seNkosi Sangokuhlwa, njengoko uYesu wayalela ukuba sihlale sisikhumbula. (Luka 22:19, 20) KwiNtlanganiso Yenkonzo sifumana imiyalelo yokwenza lo msebenzi, size siwenze ngenzondelelo. UYehova uye wayisikelela ngokwenene imigudu yethu! Kunyaka ophelileyo, bamalunga nezigidi ezisixhenxe abantu abaye basasaza ezi zimemo, yaye kuye kweza abantu abali-17 790 631!
18. Kutheni ukuzondelela unqulo lwenyaniso kubaluleke kangaka kuwe?
18 Kwathiwa ngoHezekiya: “Wayekholose ngoYehova uThixo kaSirayeli; yaye emva kwakhe akuzange kubekho unjengaye kubo bonke ookumkani bakwaYuda, kwanabo babephambi kwakhe. Waqhubeka enamathele kuYehova. Akazange aphambuke ekumlandeleni, kodwa waqhubeka eyigcina imiyalelo uYehova awayeyiyalele uMoses.” (2 Kum. 18:5, 6) Ngamana nathi singalandela umzekelo wakhe. Ukuzondelela indlu kaThixo kuya kusinceda ‘siqhubeke sinamathele kuYehova’ size sifumane ubomi obungunaphakade.—Dut. 30:16.
Thobela Ulwalathiso Ngaphandle Kokulibazisa
19. Yiyiphi imigudu eyenziwayo ngexesha leSikhumbuzo?
19 Xa uYosiya wayengukumkani, naye wazibhokoxa ekwenzeni amalungiselelo ombhiyozo wePasika. (2 Kum. 23:21-23; 2 Kron. 35:1-19) Nathi siye sizibhokoxe ekwenzeni amalungiselelo eendibano zesithili, zesiphaluka, ezosuku olunye neSikhumbuzo. Kwamanye amazwe abazalwana bade babeke nobomi babo esichengeni ukuze bakhumbule ukufa kukaKristu. Abadala abanenzondelelo baye baqiniseke ukuba onke amalungu ebandla ayeza eSikhumbuzweni. Kuye kulandwe abalupheleyo nabaneziphene ukuze nabo babekho.
20. (a) Yintoni eyenzekayo ngexesha lokulawula kukaKumkani uYosiya, yaye wasabela njani? (b) Yintoni esiyifundayo kule ngxelo?
20 Xa kwakusenziwa umsebenzi wokuhlaziya owawulungiselelwe nguKumkani uYosiya, uHilekiya, owayenguMbingeleli Omkhulu “wafumana incwadi yomthetho kaYehova ngesandla sikaMoses.” Wayinika uShafan owayengunobhala, waza uShafan wayifundela uYosiya. (Funda eyesi-2 yeziKronike 34:14-18.) Waba yintoni umphumo? Ngoko nangoko ukumkani wazikrazula izambatho zakhe ebuhlungu waza wayalela amadoda ukuba abuzise kuYehova. Esebenzisa umprofetikazi uHulida, uThixo wazigxeka ezinye zezithethe zonqulo ezazisenziwa kwaYuda. UYehova wayiphawula imigudu eyenziwa nguYosiya yokushenxisa izithixo waza wakholiswa nguye nakuba olo hlanga lwaluza kwehlelwa yintlekele. (2 Kron. 34:19-28) Yintoni esiyifundayo kule ngxelo? Ngokuqinisekileyo nathi sinomnqweno ofana nokaYosiya. Sifanele siluthobele ngokukhawuleza ulwalathiso lukaYehova size sicinge ngoko kunokwenzeka xa sinokuvumela impembelelo yabawexuki nabantu abangathembekanga ukuba baphazamise unqulo lwethu. Sinokuqiniseka ukuba uYehova uya kukholiswa kukuzondelela kwethu unqulo lwenyaniso njengoko wenzayo kuYosiya.
21, 22. (a) Kutheni sifanele sibe nenzondelelo ngendlu kaYehova? (b) Yintoni esiza kuyixubusha kwinqaku elilandelayo?
21 Ookumkani abane bakwaYuda—uAsa, uYehoshafati, uHezekiya noYosiya—basimisela umzekelo omhle wokuzondelela indlu kaThixo nonqulo lwethu. Inzondelelo yethu ifanele isenze sikholose ngoYehova size sizibhokoxe ekumnquleni. Kububulumko ukuthobela imiyalelo kaThixo neziluleko ezivela kubadala bebandla abasinyamekela ngothando yaye konke oko kuya kusenza sonwabe.
22 Kwinqaku elilandelayo kuza kuxutyushwa ngokuzondelela ubulungiseleli yaye kuza kukhuthazwa ulutsha ukuba lukhonze uBawo onothando ngenzondelelo. Siza kuhlolisisa nendlela esinokuphepha ngayo enye yezona mpembelelo zikaSathana zonakalisayo. Xa sithobela zonke izikhumbuzo zikaYehova ngenzondelelo, siya kuba sixelisa uNyana wakhe, uYesu, ekwathiwa ngaye: “Ukuzondelela indlu yakho ngokupheleleyo kundidlile.”—INdu. 69:9; 119:111, 129; 1 Pet. 2:21.
Ngaba Uyakhumbula?
• UYehova usikelela inkonzo enjani, yaye ngoba?
• Sinokubonisa njani ukuba sikholose ngoYehova?
• Inzondelelo inokusinceda njani sithobele imiyalelo kaThixo?
[Imifanekiso ekwiphepha 9]
UAsa, uYehoshafati, uHezekiya noYosiya bayibonisa njani inzondelelo ngendlu kaYehova?