Ngaba Inokuqondwa IBhayibhile?
“Kowethu kwakufundwa iBhayibhile qho ngeCawa. Kodwa ke ndandingenamdla kangako kuyo. Ewe kona ndandikholelwa ukuba iBhayibhile iliLizwi likaThixo kodwa ke kwakunzima ukuqonda inkoliso yezinto endandizifunda kuyo.”—USteven waseBritani.
“Ndakha ndazama ukuyifunda iBhayibhile xa ndandineminyaka eli-17. Kodwa ke ndayeka ngenxa yokuba kwakunzima ukuyiqonda.”—UValvanera waseSpeyin.
“Ndakha ndayifunda iBhayibhile kuba ndandicinga ukuba ndifanele ndiyifunde kuba ndingumKatolika. Ndayigqiba emva kweminyaka emithathu! Kodwa ke ndandingaqondi nowathwethwa.”—UJo-Anne waseOstreliya.
IBHAYIBHILE iseyeyona ncwadi idumileyo ehlabathini. Ithengwa ngaphezu kwayo nayiphi na enye incwadi ekhoyo, abantu abaninzi banayo, ifumaneka ngeelwimi ezininzi ngakumbi yaye ngoku ifumaneka nakwiikhasethi, iiCD kunye neeDVD. Nakuba kunjalo, abantu abaninzi abaneBhayibhile bakufumanisa kunzima ukuyiqonda. Ngaba nawe unaloo ngxaki?
Ngaba Umbhali Walo Uyafuna Siliqonde ILizwi Lakhe?
IBhayibhile ithi: “Sonke iSibhalo siphefumlelwe nguThixo.” (2 Timoti 3:16) NguYehova uThixo uMbhali weBhayibhile. Ngaba ke uThixo uyafuna siliqonde iLizwi lakhe? Okanye ngaba bethu wayenza ayaqondakala ngabom, kuba efuna iqondwe kuphela liqaqobana elikhethekileyo njengabefundisi okanye abaphengululi?
Khawucinge nje ngezi ndinyana zilandelayo zeBhayibhile:
“Lo myalelo ndikuyalela wona namhlanje awunzima kuwe, yaye awukude.”—Duteronomi 30:11.
“Kona kanye ukutyhila kwamazwi akho kunika ukukhanya, kuqondisa abangenamava.”—INdumiso 119:130.
‘Ngalo kanye elo lixa uYesu waba novuyo olugqithiseleyo ngomoya oyingcwele waza wathi: “Ndikudumisa esidlangalaleni, Bawo, Nkosi yezulu nomhlaba, ngenxa yokuba uzifihle ngenyameko ezi zinto kwizilumko nakwabo baziingqondi, wazityhilela iintsana.”’—Luka 10:21.
UMbhali weBhayibhile ufuna uliqonde iLizwi lakhe! Kodwa nakuba kunjalo, inyaniso ikukuba bakhona abantu abanyanisekileyo abangayiqondiyo le ncwadi. Yintoni enokubanceda? Amanqaku alandelayo anamacebiso amathathu anokukunceda uqonde iBhayibhile.