Indlela Yokuqonda IBhayibhile

3. Vuma Abanye Bakuncede

Xa uEdward John Eyre wayekhenketha kuMathafa aseNullarbor, abahlali balapho bamfundisa indlela yokufumana amanzi. Ukuvuma ukuncedwa ngabantu ababewazi kakuhle umhlaba walapho kwabusindisa ubomi bakhe.

NJENGOKUBA lo mzekelo ubonisa, ukuze uwenze kakuhle umsebenzi onzima kufuneka ucele uncedo kubantu abawazi kakuhle. Kunjalo naxa uqala ukufunda iBhayibhile.

UYesu wayengalindelanga ukuba abalandeli bakhe baza kusuka bayazi iBhayibhile bengakhange bancedwe ngabanye. Ngesinye isihlandlo, “wazivula ngokupheleleyo iingqondo zabo ukuba zicacelwe yintsingiselo yeZibhalo.” (Luka 24:45) Wayeqonda ukuba abantu abafunda iBhayibhile kufuneka bancedwe ukuze baziqonde iimfundiso zeZibhalo.

Ngubani Onokubanceda?

UYesu wathuma abafundi bakhe ukuba bancede abanye. Ngaphambi kokuba aye ezulwini, wathi kubo: “Hambani ke ngoko niye kubenza abafundi abantu beentlanga zonke, . . . nibafundisa ukuba bazigcine zonke izinto endiniyalele zona.” (Mateyu 28:19, 20) Owona msebenzi uphambili wamaKristu kukufundisa, okuquka ukucacisa indlela imigaqo yeBhayibhile esebenza ngayo kubomi bemihla ngemihla. AmaKristu okwenene anceda abanye ukuba bafunde iBhayibhile.

Kungekudala nje emva kokuba uYesu enike abalandeli bakhe loo myalelo kwenzeka into eyayibangel’ umdla. IBhayibhile ibalisa ngegosa elithile laseTiyopiya elalifunda isiprofeto sikaIsaya. Lafika kwindawo elalingayiqondi kakuhle. IBhayibhile ithi indinyana elalingayiqondi kakuhle yayisithi: “Njengemvu wasiwa ekuxhelweni, nanjengemvana engenalizwi phambi komchebi wayo, wenjenjalo ukungawuvuli umlomo wakhe. Ebudeni bokuthotywa kwakhe umgwebo wasuswa kuye. Ngubani na oya kuxela iinkcukacha zesizukulwana sakhe? Ngenxa yokuba ubomi bakhe bususiwe emhlabeni.”—IZenzo 8:32, 33; Isaya 53:7, 8.

Elo gosa labuza uFilipu, umKristu onamava nowayezazi kakuhle iZibhalo lathi: “Umprofeti ukutsho malunga nabani na oku? Malunga naye okanye malunga namntu wumbi?” (IZenzo 8:34) Lo mTiyopiya unyanisekileyo wayevela kunqula eYerusalem yaye kungenzeka ukuba wayethandazele nokhokelo. Kucacile ukuba wayefunda ngehlombe yaye ethobekile. Sekunjalo wayengakuqondi oko wayekufunda. Wathobeka waza wacela uFilipu ukuba amcacisele. Ingcaciso kaFilipu yamvuyisa kangangokuba waguquka waba ngumKristu.—IZenzo 8:35-39.

AmaNgqina kaYehova nawo namhlanje enza umsebenzi owawusenziwa nguFilipu nangamanye amaKristu enkulungwane yokuqala. Kumazwe angaphezu kwama-235, amaNgqina anceda abantu baqonde oko kufundiswa yiBhayibhile. Oku akwenza ngokusebenzisa imixholo yeZibhalo. Le ndlela yokufundisa iBhayibhile iquka ukuhlalutya izinto ezithethwa yiBhayibhile ngaloo mxholo, okanye umbandela.a—Funda ibhokisi ethi “Iimpendulo Ezicacileyo Ngemibuzo Onayo NgeBhayibhile.”

“Yaphendulwa Yonke Imibuzo Yam”

USteven, uValvanera noJo-Anne abacatshulwe kwinqaku lokuqala baqalisa ukufunda iBhayibhile namaNgqina kaYehova. USteven uthi: “Kwandothusa ukufumanisa ukuba ukuthelekisa nje imigaqo okanye izicatshulwa zeZibhalo kukwenza uyifumane inyaniso. Akakho umntu owakhe wandibonisa loo nto ngaphambi kokuba ndifunde iBhayibhile namaNgqina kaYehova. Kwathi xibilili ndisakufumanisa ukuba iBhayibhile asingomsina ndozele nje wempikiswano engasi ndawo.”

NoValvanera uyavuma: “Yonke into eyayithethwa ngamaNgqina yayiyondelelene yaye icacile. Izinto awayezifundisa zaziyinyaniso, kungekhona ngenxa yokuba ‘iCawa’ isitsho njalo kodwa yonke into yayichazwa kakuhle.” UJo-Anne uthi: “Ukuphendulwa kwemibuzo yam kusetyenziswa iBhayibhile kwandenza ndamhlonela ngakumbi uMbhali wayo—kuba wabona kwangaphambili ukuba abantu babeza kuba neengxaki waze wabalungiselela iimpendulo zazo.”

Ngaba likhona iNgqina likaYehova olaziyo? Kutheni ungaliceli likubonise indlela yokufunda iBhayibhile. Ukuba alikho olaziyo, sicela ubhalele kwenye yeeadresi ezidweliswe kwiphepha lesi-4. Xa unokufumana umoya oyingcwele kaThixo, ube unengqondo ephangaleleyo yaye uncedwe ngumntu okwaziyo ukufundisa unako ukuliqonda iLizwi likaThixo.

[Umbhalo osemazantsi]

[Ibhokisi/Umfanekiso okwiphepha 8]

Iimpendulo Ezanelisayo Kwimibuzo NgeBhayibhile

Nantsi eminye imixholo athetha ngayo amaNgqina kaYehova kwizifundo zeBhayibhile:

• Yintoni injongo kaThixo ngomhlaba?

• Baphi abafileyo?

• Ngaba siphila ‘kwimihla yokugqibela’?

• Kutheni uThixo evumela ukubandezeleka?

• Ndifanele ndenze ntoni ukuze yonwabe intsapho yam?

[Imifanekiso ekwiphepha 7]

Ukuze uyiqonde iBhayibhile . . . thandazela umoya kaThixo, funda ngengqondo evulekileyo uze uvumele abanye bakuncede