Sondela KuThixo
UYehova Uyabathanda Abalulamileyo
IKRATSHI, umona namabhongo. Ezo mpawu zixhaphakile kubantu abenza inkqubela kweli hlabathi. Kodwa ngaba iimpawu ezinjalo zisenza sithandwe nguYehova uThixo? Unotshe, kaloku uYehova uthanda abanquli bakhe abalulamileyo. Loo nto siyibona xa sifunda iNumeri isahluko 12. Ibali ekuthethwa ngalo apha lenzeka kwintlango yeSinayi emva kokuba amaSirayeli ekhululwe eYiputa.
UMiriyam noAron, “bathetha nxamnye noMoses” umntakwabo omncinane. (Indinyana 1) Kunokuba bathethe noMoses, bahamba bethetha ngaye, mhlawumbi bekhalaza ngaye kwabanye enkampini. Kubonakala ngathi uMiriyam okhankanywa kuqala nguye owayephambili kule nto. Into yokuqala ababeyikhalazela kukutshata kukaMoses nomfazi womKushe. Akungebi bethu uMiriyam wayenobukhwele bokuba lo mfazi womKushe wayeza kuduma ngaphezu kwakhe ngoxa engenguye nomSirayeli?
Zaya zisanda izinto ababezikhalazela. UMiriyam noAron bema ngelithi: “UYehova uthethe ngoMoses yedwa na? Akathethanga nangathi na?” (Indinyana 2) Ngaba esona sizathu sokukhalaza kwabo yayingumnqweno wokufumana igunya elingakumbi nodumo?
UMoses akazange aziphendule izikhalazo zabo. Kuyabonakala ukuba wakhetha ukubanyamezela. Ukubanyamezela kwakhe kuqinisekisa indlela emchaza ngayo iBhayibhile xa isithi ‘wayeyeyona ndoda ilulamileyo kubantu bonke’ emhlabeni.a (Indinyana 3) Zange kube yimfuneko ukuba uMoses aziphendulele. Kaloku uYehova wayephulaphule ibe wamphendulela.
UYehova wazithatha ngokuba zazijoliswe kuye ezo zikhalazo. Kaloku nguye owayemisele uMoses. Xa wayekhalimela abo baqhankqalazi, uThixo wabakhumbuza ngobuhlobo bakhe obukhethekileyo noMoses esithi: “Ndithetha naye umlomo ngomlomo.” Emva koko uYehova wabuza uMiriyam noAron esithi: “Yini na, ke, ukuba ningoyiki ukuthetha . . . nxamnye noMoses?” (Indinyana 8) Xa babethetha kakubi ngoMoses, babethetha kakubi ngoThixo. Ngenxa yokudelela okunjalo babeza kuba zizisulu zomsindo kaYehova.
UMiriyam ekubonakala ukuba yaqalwa nguye le mvukelo wabethwa ngeqhenqa. UAron wacenga uMoses ukuba acelele udadewabo uxolo kuYehova. Khawufane ucinge nje—ubomi bukaMiriyam ngoku babuxhomekeke kuMoses, lo wayethethe kakubi ngaye! UMoses olulamileyo wenza njengoko wayecelwa. Emva kokuthula ixesha elide, uMoses kwaba kukhona avula umlomo xa wayecelela udade wabo uxolo kuYehova. UMiriyam waphiliswa kodwa ke wahlazeka kuba wahlala yedwa ngaphandle kwenkampu iintsuku ezisixhenxe.
Eli bali lisinceda sibone iimpawu azithandayo nazithiyileyo uYehova. Ukuba sifuna ukusondela kuThixo kufuneka sizisiphule neengcambu iimpawu ezimbi njengekratshi, umona kunye namabhongo. UYehova uthanda abantu abalulamileyo. Ubathembisa oku: “Abalulamileyo baya kuwudla ilifa umhlaba, baziyolise ngokugqibeleleyo ngobuninzi boxolo.”—INdumiso 37:11; Yakobi 4:6.
[Umbhalo osemazantsi]
a Ukululama luphawu oluhle olwenza umntu abe namandla okunyamezela ukuphathwa kakubi yaye angazami ukuziphindezela.