Ubutyebi Esibunikwa NguThixo
NGABA uThixo ukwenza isityebi xa umkhonza ngokuthembeka? Usenokukunika ubutyebi, kodwa kungekhona uhlobo lobutyebi ocinga ngabo. Khawucinge ngoMariya unina kaYesu. Ingelosi uGabriyeli yamxelela ukuba ‘wayebabalwe kakhulu’ nguThixo yaye wayeza kuzala uNyana kaThixo. (Luka 1:28, 30-32) Kuyo yonke loo nto, wayengesiso isinhanha. Xa wayesenza umbingelelo emva kokuba ezele uYesu, wanikela ‘ngamahobe amabini asendle okanye amantshontsho amavukuthu amabini,’ umnikelo owawudla ngokwenziwa ngabantu abangathathi ntweni.—Luka 2:24; Levitikus 12:8.
Ngaba ukuba lihlwempu kwakhe kuthetha ukuba wayengasikelelwanga nguThixo? Akunakuba njalo kuba xa wayetyelele uElizabhete isalamane sakhe, “uElizabhete wazaliswa ngumoya oyingcwele, waza wadanduluka kakhulu wathi: ‘Usikelelwe wena [Mariya] phakathi kwabafazi, sisikelelwe nesiqhamo sesibeleko sakho!’” (Luka 1:41, 42) UMariya wawelwa ngumq’ esandleni ngokuzala uNyana kaThixo oyintanda.
Naye uYesu wayengathathi ntweni. Wazalwa ngamahlwempu yaye wada waya kufa eyimpula kaLujaca. Kwenye indoda eyayifuna ukuba ngumfundi wakhe wathi: “Iimpungutye zinemingxuma neentaka zezulu zineendlwana, kodwa yena uNyana womntu akanayo nendawo le yokufaka intloko.” (Luka 9:57, 58) Kuyo yonke loo nto ngokuza kwakhe emhlabeni uYesu Kristu wanceda abafundi bakhe bazuza ubutyebi obungathethekiyo. Umpostile uPawulos wathi: “Waba lihlwempu ngenxa yenu, ukuze nibe zizityebi ngobuhlwempu bakhe.” (2 Korinte 8:9) Luhlobo olunjani lobutyebi uYesu awalunika abafundi bakhe? Thina, luhlobo luni lobutyebi asinike bona?
Sinikwa Ubutyebi Obunjani?
Izinhanha zidla ngokungabi nalo ukholo, kuba zithembela kwimali kunokuba zikholose ngoThixo. UYesu wathi: “Hayi indlela ekuya kuba nzima ngayo ngabo banemali ukungena ebukumkanini bukaThixo!” (Marko 10:23) Kuyacaca ke ngoko ukuba uYesu akazange abanike imali eninzi abalandeli bakhe.
Enyanisweni, inkoliso yamaKristu enkulungwane yokuqala ayengathathi ntweni. Xa enye indoda eyazalwa isisiqhwala yayicela imali, uPetros wathi kuyo: “Isilivere negolide andinayo, kodwa oko ndinako ndikunika kona: Egameni likaYesu Kristu umNazarete, hamba!”—IZenzo 3:6.
Nawo amazwi omfundi uYakobi abonisa ukuba abantu abaninzi bebandla lamaKristu babengamahlwempu. Wathi: “Phulaphulani, bazalwana bam abaziintanda. UThixo wanyula amahlwempu eli hlabathi ukuba abe zizityebi elukholweni neendlalifa zobukumkani, awabuthembisayo kwabo bamthandayo, akunjalo?” (Yakobi 2:5) Nompostile uPawulos walek’ umsundulu wathi, babengebaninzi ababizwa “bezizilumko ngokwenyama” okanye ‘benamandla okanye bezizidwangube’ ukuze babe ngamaKristu.—1 Korinte 1:26.
Ukuba uYesu akazange abanike ubutyebi bezinto eziphathekayo abalandeli bakhe, luhlobo olunjani lobutyebi awabanika bona? Kwileta awayibhalela ibandla laseSmirna, uYesu wathi: “Ndiyayazi imbandezelo nobuhlwempu bakho—kodwa usisityebi.” (ISityhilelo 2:8, 9) Nakuba ayengamahlwempu, amaKristu aseSmirna ayenobutyebi obuxabiseke ngaphezulu lee kunesilivere negolide. Ayezizityebi ngenxa yokholo nengqibelelo yawo kuThixo. Ukholo yinto exabisekileyo kuba “asinto banayo bonke abantu.” (2 Tesalonika 3:2) Abantu abangenalo ukholo bangamahlwempu emehlweni kaThixo.—ISityhilelo 3:17, 18.
Ubutyebi Esibuzuza Ngenxa Yokholo
Ziziphi izinto ezilwenza luxabiseke ukholo? Abantu abakholwa kuThixo bazuza “ubutyebi bobubele nonyamezelo nokuzeka kade umsindo kwakhe.” (Roma 2:4) ‘Nezigqitho zabo ziyaxolelwa’ ngenxa yokholo abanalo kwidini lentlawulelo likaYesu. (Efese 1:7) Enye into abayifumanayo bubulumko “ilizwi likaKristu” elibunika abo banokholo. (Kolose 3:16) Njengoko bethandaza kuThixo benokholo “uxolo lukaThixo olungaphaya kokuqonda” luyazilinda iintliziyo neengqondo zabo, baze ke baneliseke yaye bonwabe.—Filipi 4:7.
Ukongezelela kuzo zonke ezi zinto bazifumanayo, abo banokholo kuThixo ngenxa yoNyana wakhe uYesu Kristu, banethemba lokuphila ngonaphakade. Abantu abaninzi bayawazi amazwi kaYesu Kristu athi: “UThixo walithanda kakhulu ihlabathi kangangokuba wanikela ngoNyana wakhe okuphela kwamzeleyo, ukuze wonk’ ubani obonisa ukholo kuye angatshabalali kodwa abe nobomi obungunaphakade.” (Yohane 3:16) Elo themba lixabisekileyo lomelela ngakumbi xa ubani ezuza ulwazi oluchanileyo ngoYise noNyana, kuba uYesu wathi: “Oku kuthetha ubomi obungunaphakade, ukungenisa kwabo ulwazi ngawe, wena ukuphela koThixo oyinyaniso, nangalowo umthumileyo, uYesu Kristu.”—Yohane 17:3.
Nangona uThixo esisikelela ngokomoya, uyasisikelela ngokoqobo nangokweemvakalelo. Ngokomzekelo cinga ngoDalídio waseBrazil. Ngaphambi kokuba afumane ulwazi oluchanileyo ngenjongo kaThixo, wayenxila. Oku kunxila kwakhe kwayenza ayonwaba intsapho yakhe. Nemali wayengakwazi ukuyisebenzisa kakuhle. Waqalisa ukufunda iBhayibhile namaNgqina kaYehova yaza yatshintsha indlela awayephila ngayo.
Izinto awazifunda eBhayibhileni uDalídio zamnceda wahlukana nemikhwa yakhe emibi. Wenza inkqubela ekuphileni ngemigaqo yeBhayibhile kangangokuba wathi, “ndandidla ngokungena kwibhari ngebhari; kodwa ngoku ndingena kwindlu ngendlu.” Waba ngumshumayeli weLizwi likaThixo ngokusisigxina. Olo tshintsho aluzange luphucule nje impilo yakhe kodwa lwamnceda wakwazi nokonga imali. Wathi, “imali endandidla ngokuyinxila ngoku ndinceda ngayo abanye abasweleyo okanye ndizithengele izinto endizifunayo.” Wazenzela nabahlobo abaninzi bokwenene ngenxa yokunxulumana kwakhe nabantu abaneenjongo ezifanayo nezakhe. Ngoku unoxolo lwengqondo nolwaneliseko olungaphaya kwayo nantoni awayenokuyicingela ngaphambi kokuba azi uThixo.
Omnye umntu ongumzekelo wokuncedwa kukuba nokholo kuYehova uThixo nguRenato. Xa umbona onwabile namhlanje, esitsho ngoncumo oluhle ngekhe ukholelwe ukuba imeko yakhe yayinganiki themba kwaphela ebomini. Unina wamlahla eseyimveku. Wamfaka ebhegini waza wamshiya phantsi kwesitulo egruzukile, engekanqunyulwa nenkaba le. Amabhinqa amabini awayedlula ngendlela abona loo bhegi igushuza. Ekuqaleni ayecinga ukuba kukho umntu oshiye ikati yakhe apho. Athi ke esakubona ukuba lusana, alusa kwisibhedlele esikufutshane.
Elinye laloo mabhinqa laliliNgqina likaYehova, ibe laxelela uRita, naye oliNgqina. URita wayenengxaki yokufumana iimfambilini, ngoko enomntwana omnye nje kuphela oyintombazana. Wayekulangazelela gqitha ukuba nonyana, ngoko wamthabatha uRenato wazikhulisela yena.
URita wamxelela esemncinane uRenato ngokuzalwa kwakhe. Kodwa wamkhulisa kakuhle waza wamfundisa neBhayibhile. Njengoko wayekhula, uRenato waba nomdla eBhayibhileni. Waba nombulelo gqitha ngendlela awahlangulwa ngayo ekufeni. Ziyehla iinyembezi rhoqo efunda amazwi omdumisi uDavide athi: “Nokuba ubawo noma bangandishiya, ke yena uYehova uya kundithabatha.”—INdumiso 27:10.
URenato wabonisa umbulelo wakhe kuYehova ngenxa yazo zonke izinto awamenzela zona ngokuthi abhaptizwe ngowama-2002 waza kunyaka olandelayo waqalisa umsebenzi wamaKristu wokushumayela ngokusisigxina. Akakabazi nangoku abazali bakhe yaye akukho themba lokuba uya kuze abazi. Sekunjalo, uRenato uvakalelwa kukuba esona sipho sixabisekileyo aye wasifumana kukumazi uYehova nokuba nokholo lokuba unguYise omthandayo nomkhathaleleyo.
Mhlawumbi nawe uyafuna ukuba nolwalamano olusenyongweni noThixo, ibe oko kunokukwenza wonwabe. Wonke umntu, enoba ulihlwempu okanye sisityebi unokuba nalo ulwalamano olunjalo noYehova uThixo kunye noNyana wakhe, uYesu Kristu. Lusenokungakwenzi ube sisinhanha kodwa luya kukwenza ube noxolo nolwaneliseko olungenakuthengwa ngemali. Achan’ ucwethe amazwi akwiMizekeliso 10:22 athi: “Intsikelelo kaYehova—yiyo etyebisayo, yaye akongezi ntlungu kuyo.”
UYehova uThixo unomdla gqitha kubantu abasondela kuye kangangokuba uthi: “Owu ukuba nje kuphela okunene ubunganikela ingqalelo kwimiyalelo yam! Ngoko uxolo lwakho beluya kuba njengomlambo, nobulungisa bakho njengamaza olwandle.” (Isaya 48:18) Ubathembisa lo mvuzo abo basondela kuye benentsusa nesimo sengqondo esifanelekileyo: “Umphumo wentobeko nokoyika uYehova bubutyebi, uzuko nobomi.”—IMizekeliso 22:4.
[Amagama acatshulweyo akwiphepha 6]
Ukukholwa kuThixo kwenza umntu abe noxolo, ulwaneliseko nolonwabo
[Umfanekiso okwiphepha 5]
Nakuba yayingathathi ntweni, intsapho yakuloYesu yasikelelwa gqitha nguThixo