Imbono YeBhayibhile
Ngaba UThixo Usisikelela Ngobutyebi?
“Intsikelelo kaYehova—yiyo etyebisayo, yaye akongezi ntlungu kuyo.”—IMIZEKELISO 10:22.
NGABA esi sibhalo seBhayibhile sicatshulwe ngasentla sithetha ukuba uThixo ubasikelela ngobutyebi abakhonzi bakhe? Abanye bakholelwa oko. Khawuqwalasele eli bango lomnye umbhali ongumfundisi wecawa yamaPentekoste yaseOstreliya: “Kwincwadi [yam] ndiza kukuxelela isizathu sokuba kufuneka ufumane imali engakumbi yaye okwesibini nendlela onokuyifumana ngayo . . . Ukuba unokutshintsha indlela yokucinga uze ube nesimo sengqondo esifanelekileyo ngemali, ndikholelwa ukuba uya kufumana iintsikelelo nempumelelo evela kuThixo yaye akunakuze uphinde ube nengxaki yemali.”
Noko ke, ibango elinjalo libonisa ukuba amahlwempu akathandwa nguThixo. Ngaba ukuphumelela ngezinto eziphathekayo bubungqina bokuba umntu usikelelwa nguThixo?
Abantu Abasikelelwa Ngenjongo
Ingxelo yeBhayibhile isichazela ngezihlandlo uThixo awasikelela ngazo bakhonzi bakhe abathembekileyo ngobutyebi. Ngokomzekelo, uYakobi wemka kowabo enomsimelelo kuphela kodwa emva kweminyaka engama-20 wabuya sele eqhuba iigusha, iinkomo namaesile anokwanela kwiinkampu ezimbini. Ngokutsho kweBhayibhile, impumelelo kaYakobi yayivela kuThixo. (Genesis 32:10) Omnye umzekelo ngulo: uYobhi waphulukana nazo zonke izinto zakhe, ukanti kamva uYehova wamsikelela ‘ngeegusha ezilishumi elinesine lamawaka neenkamela ezingamawaka amathandathu nezipani zeenkomo eziliwaka neemazi zamaesile eziliwaka.’ (Yobhi 42:12) UYehova wanika uKumkani uSolomon ubutyebi obuninzi kangangokuba kusathethwa ngabo nanamhlanje.—1 Kumkani 3:13.
Kwelinye icala, iBhayibhile ineengxelo ezininzi eziphathelele abanquli bakaThixo abathembekileyo, nabathobekileyo ababengamahlwempu. Ngokuqinisekileyo, uThixo wayengohlwayi abanye ngobuhlwempu ngoxa ebasikelela ngobutyebi abanye. Ngoko ke, yayiyintoni injongo kaThixo ngokunika abanye ubutyebi kwiimeko ezithile?
Impendulo iyahluka kwimeko nganye. Ukusikelelwa kukaYakobi ngobutyebi kwakusisiseko sokwakha uhlanga, kulungiselelwa ukuza kweMbewu ethenjisiweyo. (Genesis 22:17, 18) Ukuphumelela kukaYobhi kwabonisa ngokucacileyo ukuba ngubani owamzisela intlekele, ngaloo ndlela kungcwalisa igama likaYehova. (Yakobi 5:11) Yena uSolomon wasebenzisa inkoliso yobo butyebi wayebunikwe nguThixo ukuze akhe itempile ebalaseleyo. (1 Kumkani 7:47-51) Okubangel’ umdla kukuba, uYehova waphinda wasebenzisa uSolomon ukuba abhale ngokusuka kumava akhe obuqu ngokuphathelele ukungabaluleki kangako kobutyebi.—INtshumayeli 2:3-11; 5:10; 7:12.
Indlela Asisikelela Ngayo UThixo
UYesu wafundisa abalandeli bakhe ukuba babe nembono efanelekileyo ngemali xa wabaxelela ukuba ‘bayeke ukuxhalela’ izinto eziphathekayo. Waqiqa nabo ngelithi kwanoSolomon kulo lonke uzuko lwakhe wayengavathiswanga njengeenyibiba zasendle. Ukanti, uYesu wathi: “Ukuba, ke, uThixo wenjenjalo ukwambesa utyani basendle, . . . akayi kugqithisa na ukunambesa, nina nilukholo luncinane?” UYesu waqinisekisa amaKristu ukuba xa abalandeli bakhe befuna kuqala uBukumkani nobulungisa bukaThixo, ngoko ukutya, impahla, nekhusi zaziya kongezelelwa kubo. (Mateyu 6:25, 28-33) Sizalisekiswa njani eso sithembiso?
Xa lisetyenziswa, icebiso leBhayibhile lizisa ngokukhethekileyo iintsikelelo zokomoya. (IMizekeliso 10:22) Noko ke, lizisa nezinye iingenelo. Ngokomzekelo, iLizwi likaThixo liyalela amaKristu oku: “Lowo ubayo makangabi seba, kunoko makasebenze nzima.” (Efese 4:28) Kwakhona lithi, “osebenza ngesandla esidangeleyo uya kuswela, kodwa isandla sokhutheleyo siya kumenza atyebe.” (IMizekeliso 10:4) AmaKristu anyanisekileyo, nazibhokoxayo emsebenzini elandela eli cebiso asoloko ethandwa emsebenzini. Oku kunokuba yintsikelelo.
Kwakhona iBhayibhile ifundisa amaKristu ukuba aphephe ukuzonwabisa ngeendlela zokubawa zokungcakaza, ukuzingcolisa ngokutshaya, nomkhwa wokuzikhoboza ngokunxila. (1 Korinte 6:9, 10; 2 Korinte 7:1; Efese 5:5) Abo balisebenzisayo eli cebiso liyabanceda bangasafazi ngemali yaye liphucula impilo yabo.
Buxabiseke Ngakumbi Kunesilivere Okanye Igolide
Noko ke, ukuphumelela ngezinto eziphathekayo akunakugqalwa njengobungqina bokukholiswa nokusikelelwa nguThixo. Ngokomzekelo, uYesu wabhenca ubuhlwempu bokomoya bamaKristu athile aseLawodike wathi: “Uthi: ‘Ndisisityebi, ndizuze ubutyebi, andiswele nto,’ kodwa akwazi ukuba uludwayi nosizana nehlwempu nemfama kwaye uhamba ze.” (ISityhilelo 3:17) Ngokwahlukileyo, kumaKristu aseSmirna awayengamahlwempu ngezinto eziphathekayo kodwa ezizityebi ngokomoya uYesu wathi: “Ndiyayazi imbandezelo nobuhlwempu bakho—kodwa usisityebi.” (ISityhilelo 2:9) Kuyabonakala ukuba la maKristu ayengenamali kuba ayetshutshiswa ngenxa yokuthembeka, ukanti ayenobutyebi obuxabiseke ngakumbi kunesilivere okanye igolide.—IMizekeliso 22:1; Hebhere 10:34.
UYehova uThixo uyayisikelela imigudu yabo bazabalazela ukwenza ukuthanda kwakhe. (INdumiso 1:2, 3) Ubanika amandla nezinto eziyimfuneko ukuhlangabezana neemvavanyo, bakwazi ukulungiselela iintsapho zabo, baze bafune kuqala uBukumkani. (INdumiso 37:25; Mateyu 6:31-33; Filipi 4:12, 13) Ngoko ke, kunokuba ajonge izinto eziphathekayo njengeyona ntsikelelo kaThixo, amaKristu okwenyaniso azabalazela ‘ukutyeba emisebenzini emihle.’ Ngokwakha ulwalamano olusondeleyo noMdali, amaKristu “aziqwebela isiseko esihle nesikhuselekileyo sekamva.”—1 Timoti 6:17-19; Marko 12:42-44.