Ngaba Imali Inokukwenza Wonwabe Ngokwenene?
USONIA wazalelwa eSpeyin. Esengumntwana wayedla ngokuya nonina kwiintlanganiso zamaNgqina kaYehova. Kodwa wathi akuba mdala wafudukela eNgilani waza wafumana umsebenzi wokuthengisa izindlu.
USonia wayewuthanda gqitha umsebenzi wakhe. Wayesamkela izithonga yaye wayesebenza ngeemali ezinamagama. Eli shishini laliqhuba kakuhle zabe izinto zimhambela kakuhle naye. Wayedla ngokusebenza iiyure ezili-18 ngosuku maxa wambi elala nje iiyure ezimbini nezintathu kuphela. Wayephilela umsebenzi wakhe. Kwathi kusemnandi kunjalo wehlelwa yintlekele. Wahlaselwa sistroke, ekusenokwenzeka ukuba sasibangelwe bobo bomi wayebuphila. Wayeseneminyaka engama-30 kuphela ubudala.
USonia waf’ icala babe noogqirha bengenalo ithemba lokuba uya kuze aphinde akwazi ukuthetha. Unina waya kuye eNgilani ukuze amnyamekele. Njengoko uSonia wayeqalisa ukuchacha, unina wathi kuye, “ndiza kuya kwiintlanganiso zebandla namhlanje, bendicinga ukuba sihambe sobabini kuba andinakukushiya apha wedwa.” NoSonia wavuma ukuhamba. Waba yintoni umphumo?
Uthi: “Yonke into endayiva apho yayiyinyaniso ibe ndayithanda. Ndavuma ukufundiswa iBhayibhile ngomnye wabantu abandibulisayo ukufika kwam kwiHolo yoBukumkani. Iitshomi zam zazindishiye kwesinomhlwa, kodwa ndafumana abahlobo abatsha abanothando nenyameko.”
USonia wade wakwazi ukuthetha, yaye wenza inkqubela nakufundisiso lwakhe lweBhayibhile. Wakhawuleza wabhaptizwa kungekapheli nonyaka. Abaninzi kubahlobo bakhe abatsha babeshumayela ngokusisigxina wabe eyibona indlela ababonwabe ngayo. USonia wathi: ‘Nam ndifuna ukuba njengabo. Ndifuna ukunika uYehova uThixo inkonzo esemagqabini!’ Naye ngoku uSonia ushumayela ngokusisigxina.
Yintoni ayifundileyo ebomini? Uthi: “Nangona ndandisamkela imali eninzi, uxinezeleko nokungaqiniseki ngekamva lomsebenzi wam kwakundenza ndingonwabi. Ngoku ndiyaqonda ukuba eyona nto ibalulekileyo ebomini kukuba nolwalamano noBawo wethu wasezulwini uYehova. Ngoku ndonwabe ngokwenene.”
Umpostile uPawulos wathi: “Ukuthanda imali yingcambu yazo zonke iintlobo zobubi, yaye ngenxa yokusukelana nolo thando bambi baye balahlekana nokholo, bezingxwelerha ngeentlungu ezininzi.” (1 Timoti 6:10) Ngenxa yezinto eziye zamehlela uSonia uyabungqina ubunyaniso bala mazwi.