Ngaba Ababandezelekileyo

Baya Kuze Babe Noxolo?

NGABA ungakuvuyela ukubona iinkxwaleko zipheliswa, zingapheliswa kuwe kuphela kodwa kuluntu luphela? Khawuqwalasele le mizekelo:

USonia wayebandezeleke ngendlela engaginyisi mathe.a Okokuqala, wafumanisa ukuba indoda yakhe ibikrexeza kangangeminyaka elishumi. Esajonge leyo unyana wakhe oligqibelo wasulelwa yintsholongwane iHIV waza wabulawa nguGawulayo. Kwiminyaka emibini kamva omnye unyana wakhe wagula, yaye kungentsuku zatywala naye waya kulala kobandayo ngenxa kaGawulayo. USonia ukhumbula oku: “Ngeentsuku zokugqibela eso sifo samlalisa ngandletyana nye ithuba elide. Wayedandatheke ngolona hlobo, waxhwitheka iinwele, yaye kwakusekunzima nokubona oku. Yayibuhlungu gqitha loo nto.”

UFabiana, ongumfundi kwiyunivesithi yaseBrazil, wayexhalatyiswe kukungabikho kokusesikweni kwezentlalo ehlabathini. Kusenjalo wehlelwa yintlekele kubomi bakhe. Umntakwabo, owayekhathazwa kukudandatheka, wazibulala. Xa uFabiana waphulukana nomsebenzi, umhlobo wakhe wamcebisa ukuba aye kubuzisa kwipai-de-santo (igqirha), ecinga ukuba uFabiana enamashwa kangaka nje uyathakathwa! Kodwa nepai-de-santo ayizange imncede. Kunoko, uFabiana wayeziva ethuthunjiswa, kunzima nokulala ngenxa yeenzingo ezimphetheyo.

UAna waqala eselula kakhulu ukubandezeleka. Usibalisela oku: “Xa ndandinonyaka ubudala umama wandilahla, ndaza ndanyanyekelwa ngumakhulu.” Kwaza ke, xa uAna wayeneminyaka emithathu kuphela ubudala, uninakhulu wafa. UAna wasiwa kwikhaya leenkedama eRio de Janeiro, waza wahlala apho wada waneminyaka eli-13 ubudala. Uthi: “Impatho yayingentle kwaphela apho, ibe ndaba ngumvukeli. Njengokuba ndandikhula, ndandingunkom’ iyahlaba.”

Kubonakala ukuba ukubandezeleka kuchaphazela ubomi bomntu ngamnye ngeendlela ezahlukeneyo. Eneneni, mihla le siva ngamabali abantu abathwaxwa ziintlekele—nanini na sibukela, sifunda, okanye siphulaphula iindaba. UGqr. Mary Sykes Wylie ubhala athi: “Kweli xesha lethu . . . losasazo-ndaba jikelele akunakwenzeka ukuba siphoswe ziindaba ezimbi. Iimfazwe, iintlekele zokwemvelo, izigigaba kwezorhwebo, iingozi zendlela, ulwaphulo-mthetho, ubugrogrisi, ukuxhaphaza ngokwesini, ukudlwengula, ugonyamelo lwasekhaya—sixhinxwa ngezo zinto zimasikizi umhla nezolo kule nkulungwane yama-20.” Umpostile uPawulos ongumKristu wayichaza kakuhle imeko yabantu esithi: “Yonke indalo ihleli igcuma kunye kwaye isentlungwini.”—Roma 8:22.

Kuthekani ngawe? Ngaba nawe ubandezelekile? Luluphi uncedo onokululindela? Ngaba uya kuze ulufumane uxolo lokwenyaniso? USonia, uFabiana noAna bayifumana intuthuzelo yokwenene nomlinganiselo othile woxolo! Khawuzifundele oko kwinqaku elilandelayo.

[Imibhalo esemazantsi]