Ngaba UAdam NoEva—Babengabantu Bokwenene?

KUBANTU abaninzi, ibali lika-Adam noEva elikwiGenesis yinto nje ebangel’ umdla. Ileta eyayisiya kumhleli wephephancwadi iTime yathi: “Amarhamente amaninzi ebesoloko ecingela ukuba amabali akwiGenesis njengelika-Adam noEva akayombali yokwenene kunoko ayafuzisela.” Abaphengululi abaninzi bamaKatolika, abamaprotestanti nabamaYuda nabo bayavuma. Bathi izinto ezininzi ekuthethwa ngazo kwiGenesis ziyaphikisana nembali okanye inzululwazi.

Uthini wena? Uyakholelwa na ukuba uAdam noEva babengabantu bokwenene? Ngaba bukho ubungqina bokuba bakhe baphila? Kwelinye icala, ziziphi iingxaki ezinokubangelwa kukuyijonga njengentsomi iGenesis?

Ngaba Ibali ElikwiGenesis—Liyaxhaswa Yinzululwazi?

Okokuqala, makhe sehle amahlongwane iinkalo ezibalulekileyo eziphathelele ukudalwa komntu wokuqala. IBhayibhile ithi ngoAdam: “Wandula ke uYehova uThixo wabumba umntu ngothuli lomhlaba waza wavuthela impefumlo yobomi emathatheni akhe, umntu ke waba ngumphefumlo ophilayo.” (Genesis 2:7) Ngaba le ngxelo iyavisisana nenzululwazi?

Incwadi ethi Nanomedicine ithi umzimba womntu wenziwe ngemichiza engama-41. Yonke le michiza—ikharbhon, intsimbi, ioksijini neminye iyafumaneka “ethulini” lomhlaba. Kanye njengokuba iGenesis isitsho, ngokwenene abantu benziwe “ngothuli lomhlaba.”

Le michiza ingenabo ubomi yakwazi njani ukwenza umntu ophilayo? Ukuze uyiqonde indlela okulucelomngeni ngayo oku cinga ngesiphekepheke sasemajukujukwini seNASA, omnye wabona matshini bantsonkothileyo bakha benziwa. Lo matshini untsonkothileyo unamacandelo azizigidi ezi-2.5. Kwawathatha iminyaka amaqela eenjineli ukuwenza nokuwudibanisa. Ngoku ke cinga ngomzimba womntu. Wenziwe ziiatom ezifikelela kwiiokthiliyon ezisi-7 neeseli ezili-100 leetriliyon namanye amalungu omzimba.a Wabakho njani lo matshini unobuxhakaxhaka nontsonkothileyo ungumzimba? Ngaba wabakho ngamabonandenzile okanye wenziwa nguMdali okrelekrele?

Ukongezelela koko, yintoni eyenza abantu baphile? Buvela phi ubomi? Izazinzulu ziyavuma ukuba azazi. Phofu azivumelani nangendlela yokuchaza eyona nto buyiyo ubomi. Kwezo zivumayo ukuba kukho uMdali, icacile yonke le nto. UMthombo wobomi nguThixo.b

Kuthekani ngenkcazelo ekwiGenesis yokuba uEva wenziwa ngobambo luka-Adam? (Genesis 2:21-23) Ngaphambi kokuba uthi yintsomi leyo, khawucinge ngesi siganeko: Zisebenzisa inkqubo yokuklowuna, ngoJanuwari 2008 izazinzulu zaseKhalifoniya, eUnited States zavelisa imbumba (embryo) yokuqala eyenziwe ngeeseli zolusu lomntu omdala. Zisebenzisa kwale nkqubo izazinzulu ziye zavelisa ubuncinane izilwanyana ezingama-20. Esona saziwayo yigusha ekuthiwa nguDolly eyenziwa ngedlala lenye igusha ngowe-1996.c

Asazi ukuba ziza kuphelela phi ezi mbumba. Kodwa ke nantsi ingongoma: Ukuba abantu bayakwazi ukuvelisa esinye isidalwa besebenzisa iiseli zesinye esifana naso, ngaba uMdali uSomandla wayengenakukwazi yena ukwenza umntu esebenzisa ilungu lomnye? Into ebangel’ umdla kukuba oogqirha badla ngokusebenzisa ubambo xa besakha okanye belungisa ithambo elithile elenzakeleyo.

Ubungqina ObuseBhayibhileni

Abanye abantu bayamangaliswa kukufumanisa ukuba kuyo yonke iBhayibhile kuyathethwa ngoAdam noEva. Oko kubungqina njani ubunyaniso bembali ekwiGenesis?

Ngokomzekelo, khawucinge ngomlibo wokuzalwa kwamaYuda okweyoku-1 YeziKronike isahluko 1 ukuya kwese-9 nalowo ukwincwadi yeVangeli kaLuka isahluko 3. Ezi ngxelo zemilibo yokuzalwa zineenkcukacha ezigubungela izizukulwana ezingama-48 nezingama-75. ULuka uchaza umnombo kaYesu Kristu ngoxa yona incwadi yeziKronike ithetha ngomnombo wookumkani nowababingeleli bakwaSirayeli. Yomibini le milibo inamagama abantu abaziwayo njengoSolomon, uDavide, uYakobi, uIsake,uAbraham,uNowa noAdam. Kuyo kukho amagama abantu bokwenene ibe noAdam udweliswe apho njengomntu wokwenene wokuqala kumlibo ngamnye.

Ukongezelela koko, iBhayibhile isoloko ithetha ngoAdam noEva njengabantu bokwenene. Nantsi imizekelo embalwa yoko:

• “[UThixo] wazenza ngokuphuma kumntu omnye zonke iintlanga zabantu.”—IZENZO 17:26.

• “Isono sangena ngamntu mnye ehlabathini nokufa ngaso isono, ngaloo ndlela . . . ukufa kwalawula njengokumkani ukususela kuAdam de kwasa kuMoses.”—ROMA 5:12, 14.

• “Umntu wokuqala uAdam waba ngumphefumlo ophilayo.”—1 KORINTE 15:45.

• “Kwayilwa uAdam kuqala, kwaza kwalandela uEva.”—1 TIMOTI 2:13.

• “UEnoki, ongowesixhenxe ukususela kuAdam, waprofeta ngabo [abangendawo].”—YUDE 14.

Okubaluleke ngakumbi kukuba, uYesu Kristu elona ngqina lithembekileyo eBhayibhileni, wavuma ukuba uAdam noEva bakha baphila. Xa wayebuzwa ngoqhawulo mtshato, waphendula wathi: “Ukususela ekuqaleni kwendalo ‘[uThixo] wabenza baba yindoda nebhinqa. Ngenxa yoku indoda iya kumshiya uyise nonina, yaye aba babini baya kuba nyama-nye’ . . . Ngoko ke, oko uThixo akubophelele ngedyokhwe ndawonye makungahlukaniswa mntu.” (Marko 10:6-9) Ngaba uYesu wayenokusebenzisa ibali elingumfuziselo ukuze amisele umthetho owawuza kuhlala uhleli? Nakanye! UYesu wacaphula ibali elikwiGenesis njengento yokwenene.

IThe New Bible Dictionary iqukumbela ngokushwankathela ubungqina beZibhalo isithi: “ITestamente Entsha iqinisekisa ukuba imbali echazwe kwizahluko zokuqala zeGenesis yenzeka ngokwenene.”

Ukuba Imbali YeGenesis Bubuxoki Yonke iBhayibhile Bubuxoki

Amakholwa amaninzi acinga ukuba ukukholelwa kwibali lika-Adam noEva akuyonto ibalulekileyo kubuKristu. Le nto isenokubonakala injalo xa uyikha phezulu. Kodwa ke makhe siyilandele le ndlela yokuqiqa sibone ukuba iza kusisa phi.

Ngokomzekelo khawucinge ngedini lentlawulelo, imfundiso ethandwayo ngabantu abaninzi abahamba icawa. Ngokwale mfundiso, uYesu Kristu wanikela ngobomi bakhe obufezekileyo njengentlawulelo ukuze ahlangule abantu ezonweni. (Mateyu 20:28; Yohane 3:16) Njengoko sisazi intlawulelo lixabiso elilingana twatse naloo nto ihlawulelwayo. Seso sizathu esibangela ukuba iBhayibhile ithi uYesu “yintlawulelo.” (1 Timoti 2:6) Sisenokuzibuza ukuba yintlawulelo yantoni? IBhayibhile ithi: “Njengoko kuAdam bonke besifa, ngokunjalo nakuKristu bonke baya kwenziwa baphile.” (1 Korinte 15:22) Ubomi obufezekileyo anikela ngabo uYesu ukuze ahlawulele abantu abathobelayo buyalingana nobomi obufezekileyo obalahlwa nguAdam ngenxa yesono sakhe e-Eden. (Roma 5:12) Ngoko ke, ukuba uAdam akazange aphile, kucacile ukuba idini likaYesu Kristu beliya kuba lilize.

Ukuyigatya okanye ukuyisingela phantsi ingxelo engoAdam noEva kwiGenesis kuyenza ithandabuzeke yonke into efundiswa yiBhayibhile!d Ukucinga ngaloo ndlela kubangela uthotho lwemibuzo engenampendulo kunye nokholo olungenasiseko.—Hebhere 11:1.

Ngaba Ubomi Bunenjongo okanye Abunayo?

Umbuzo esifanele sizibuze wona ekugqibeleni ngulo: Ngaba ukugatywa kwembali ekwiGenesis kuye kwabenza abantu bayifumana injongo yobomi? URichard Dawkins, okholelwa kwindaleko nothi akukho Thixo uthi: Indalo “ayizange iyilwe, ayinanjongo, akukho nto ibubungendawo kungekho nokulunga, kodwa ngamampunge nje nosizi lodwa.” Le yimbono etenxileyo ebonisa ukungabuxabisi ubomi, engavisisaniyo ngokupheleleyo nendlela abadalwe ngayo abantu.

Ngokwahlukileyo koko, iBhayibhile iyiphendula ngokucacileyo le mibuzo ibalulekileyo: Sivela phi? Iyintoni injongo yobomi? Kutheni kukho ubungendawo nokubandezeleka okungaka ehlabathini? Ngaba ubungendawo buya kuze buphele? Neminye imibuzo emininzi. Ukongezelela koko, ukuba nokholo kwidini lentlawulelo likaKristu kusenza sibe nethemba lokuphila kwiParadesi efana neyase-Eden, apho uThixo wabeka khona abantu bokuqala uAdam noEva. (INdumiso 37:29; ISityhilelo 21:3-5) Elo lithemba elizuke ngokwenene!e

Nangona ibali lika-Adam noEva liphikisana nenkolelo yendaleko, liyavumelana nenzululwazi. Ngaphezu koko, livisisana ngokupheleleyo nalo lonke iLizwi likaThixo eliphefumlelweyo, iBhayibhile, eyichaza ngokucacileyo injongo yobomi.

Kutheni ungazifundeli ngokwakho iBhayibhile? AmaNgqina kaYehova ahlala ekulungele ukukunceda uqonde iBhayibhile.

[Imibhalo esemazantsi]

[Amagama acatshulweyo akwiphepha 14]

Ukuba uAdam akazange aphile, kucacile ukuba idini likaYesu Kristu beliya kuba lilize.

[Imifanekiso ekwiphepha 12, 13]

Njengokuba isiphekepheke sokuya emajukujukwini senziwe ngocoselelo, unjalo nomzimba womntu

[Umfanekiso okwiphepha 15]

UYesu wavuma ukuba uAdam noEva babekhe baphila