Ngaba Ubusazi?

Yaphelela phi ityeya yomnqophiso?

Ityeya yomnqophiso yayifuzisela ubukho bukaThixo kwaSirayeli. (Eksodus 25:22) Le yayiyibhokisi yamaplanga eyalekwe ngegolide uMoses awayefake kuyo amacwecwe amabini oMthetho. Ngoxa amaSirayeli ayesesentlango, le Tyeya yayigcinwe kweYona Ngcwele yentente yokuhlangana. (Eksodus 26:33) Ekugqibeleni yafakwa kweYona Ngcwele yetempile eyayakhiwe nguSolomon.—1 Kumkani 6:19.

Isihlandlo sokugqibela iBhayibhile ekhankanya ngaso iTyeya kukweyesi-2 yeziKronike 35:3 ngowama-642 B.C.E. xa uKumkani uYosiya wayeyibuyisela etempileni. Kusenokwenzeka ukuba apho yayisuswe nguManase, umwexuki owayelawula ngaphambi koYosiya, nowafaka isithixo etempileni. Xa kungenjalo imele ukuba yayiye kugcinwa kwenye indawo ngoxa kwakusalungiswa isakhiwo setempile. (2 Kronike 33:1, 2, 7; 34:1, 8-11) Asazi ukuba kwenzeka ntoni kwiTyeya emva koko, kuba iBhayibhile ayiyikhankanyi phakathi kwezinto ezathinjwa ngamaBhabhiloni etempileni xa oyisa iYerusalem ngowama-607 B.C.E.—2 Kumkani 25:13-17.

IZibhalo azitsho ukuba iTyeya yabuyiselwa kweYona Ngcwele yetempile eyakhiwa nguZerubhabheli kusini na, zingatsho kwanokuba kukho enye entsha eyenziwayo.—Ezra 1:7-11.

Ngoobani OoYakobi Ekuthethwa Ngabo KwiZibhalo ZamaKristu ZesiGrike?

Aba Yakobi bahlanu xa bebonke, yaye kulula ukubabhidanisa. Owokuqala nguYakobi ozala uYosefu indoda kaMariya. (Mateyu 1:16) Owesibini nguyise wompostile uYudas (kungekhona uSkariyoti), yaye akukho nto ingako yaziwayo ngaye.—Luka 6:16; IZenzo 1:13.

Kuphinda kubekho ongunyana kaZebhedi. Lo yena ngumntakwaboYohane, ibe yena nomntakwabo babengabapostile bakaYesu. (Mateyu 10:2) Kubonakala ukuba unina yayinguSalome, udadeboMariya unina kaYesu. (Thelekisa uMateyu 27:55, 56; uMarko 15:40, 41; noYohane 19:25.) Loo nto ithetha ukuba lo uYakobi wayengukanina kaYesu. Yena nomntakwabo babengabalobi beentlanzi, besebenza kunye noPetros noAndreya.—Marko 1:16-19; Luka 5:7-10.

Omnye uYakobi ngunyana ka-Alfeyu ibe naye wayengumpostile kaYesu. (Marko 3:16-18) KuMarko 15:40 kubhekiselwa kuye ngokuthi ‘nguYakobi omNcinane.’ Kusenokwenzeka ukuba wayebizwa ngolu hlobo ngenxa yomzinjana wakhe omncinane okanye kuba uYakobi unyana kaZebhedi wayemdala kunaye.

Owokugqibela ngunyana kaYosefu noMariya yena ongumntakwaboYude noYesu. (Marko 6:3; Galati 1:19) Xa uYesu wayeselapha emhlabeni lo uYakobi wayengengomfundi wakhe. (Mateyu 12:46-50; Yohane 7:5) Noko ke, ngaphambi kwePentekoste yowama-33 C.E., wayethandaza ndawonye nonina nabantakwabo kunye nabapostile kwigumbi eliphezulu elaliseYerusalem. (IZenzo 1:13, 14) Kamva waba lilungu elibalaseleyo lebandla laseYerusalem ibe wabhala incwadi yeBhayibhile ebizwa ngegama lakhe.—IZenzo 12:17; Yakobi 1:1.