Umoya Oyingcwele—Amandla Ekufuneka Ube Nawo

“MUSA ukundilahla phambi kobuso bakho; nomoya wakho oyingcwele musa ukuwususa kum.” (INdumiso 51:11) Wathandaza watsho uKumkani uDavide emva kokuba onile.

UDavide wayesele enethuba elide encedwa ngumoya oyingcwele. Xa wayeselula, lo moya wamnceda woyisa uGoliyati—ijoni elalisoyikeka. (1 Samuweli 17:45-50) Kwakhona wamnceda wabhala ezinye zezona ndumiso zimnandi kwezakha zaqanjwa. UDavide wathi: “Ngumoya kaYehova owathethayo ngam, nelizwi lakhe laliselulwimini lwam.”—2 Samuweli 23:2

UYesu Kristu wayiqinisekisa indima yomoya oyingcwele kubomi bukaDavide. Ngenye imini uYesu wathi kubantu awayethetha nabo: “Ngomoya oyingcwele uDavide ngokwakhe wathi, ‘UYehova wathi eNkosini yam: “Hlala ngasekunene kwam ndide ndizibeke iintshaba zakho ngaphantsi kweenyawo zakho.”’” (Marko 12:36; INdumiso 110:1) UYesu wayesazi ukuba uDavide wayeqhutywa ngumoya oyingcwele xa wayebhala iindumiso zakhe. Ngaba umoya oyingcwele unokusinceda nathi?

“Qhubekani Nicela, Niya Kunikwa”

Kungenzeka ukuba ungaze ubhale indumiso. Kodwa usenokudibana neengxaki ezinkulu njengoGoliyati. Ngokomzekelo khawucinge ngoIsabel.a Washiywa ngumyeni wakhe kuba ethe phithi libhinqa eliselula. Wamshiya edada ematyaleni, ibe akazange amncede nangesenti le emdaka ukuze akhulise iintombi zabo ezimbini eziselula. Uthi: “Ndaziva ndingcatshiwe ndingento yanto. Nakuba kunjalo, okoko emkayo ndivakalelwa kukuba umoya oyingcwele kaThixo uye wandinceda.”

Ngaba uIsabel wayelindele ukusuka nje afumane umoya oyingcwele kungekho nto ayenzayo? Akunjalo, wayethandaza kuThixo yonke imihla ecela umoya oyingcwele. Wayesazi ukuba kufuneka omelezwe nguThixo ukuze akwazi ukujamelana nekamva ngesibindi, anyamekele abantwana bakhe aze naye aphinde akwazi ukuzithemba. Wathobela amazwi kaYesu athi: “Qhubekani nicela, niya kunikwa; qhubekani nifuna, niya kufumana; qhubekani ninkqonkqoza, niya kuvulelwa.”—Mateyu 7:7.

NoRoberto wayevakalelwa kukuba umele afumane umoya oyingcwele nakuba wayewufunela into eyahlukileyo. Wayeyingendle nekhoboka leziyobisi. Kwaphela iminyaka emibini esiwa evuka kwimizamo yokwahlukana nale mikhwa. Uthi: “Xa uyeka ukusebenzisa iziyobisi uye uqale phantsi ukudandatheka. Unqanqatheka yonke imihla.”

URoberto uhlabela mgama esithi: “Ndandizimisele ukwahlukana nale mikhwa khon’ ukuze ndikwazi ukukhonza uThixo. Ndandizama ukucinga ngezinto ezakhayo ezithethwa yiBhayibhile. Ndandithandaza yonke imihla, ndicela amandla kuThixo ukuze ndiphile ngokuvisisana nemilinganiselo yakhe. Ndandisazi ukuba andinakuze ndiphumelele ngaphandle kwakhe. Ndayibona indlela awayiphendula ngayo imithandazo yam uYehova ngokukodwa xa ndiye ndavukwa likakade. Ndikholelwa ukuba ngumoya oyingcwele kaThixo owandomelezayo kungenjalo ngendingekahlukani nayo nangoku loo mikhwa.”—Filipi 4:6-8.

‘Ukubhabha Njengeenkozi’

NjengoIsabel noRoberto, izigidi zamaNgqina kaYehova ziye zomelezwa ngamandla omoya oyingcwele. Nawe xa uwafuna unokuwafumana amandla asebenzayo kaYehova—la mandla awawasebenzisayo xa wayedala. UThixo ukulungele yaye uyafuna ukukunika umoya wakhe xa uwucela ngokunyaniseka. Kodwa ke, ukuze uwufumane loo moya, kufuneka ufunde inyaniso ngoThixo uze uzame ukwenza ukuthanda kwakhe.—Isaya 55:6; Hebhere 11:6.

Umoya oyingcwele ungakwenza ube namandla okukhonza uThixo uze umelane nazo naziphi iingxaki ezinokukuvelela. IBhayibhile isiqinisekisa isithi: “[UYehova] unika odiniweyo amandla; nalowo ungenamandla makhulu umenza aphuphume ukomelela okupheleleyo. . . . Abo bathembela kuYehova baya kufumana amandla kwakhona. Baya kunyuka ngamaphiko njengeenkozi. Baya kubaleka baze bangatyhafi; baya kuhamba bangadinwa.”—Isaya 40:28-31.

[Umbhalo osemazantsi]

[Amagama acatshulweyo akwiphepha 8]

‘Ndandithandaza yonke imihla, ndicela amandla kuThixo ukuze ndiphile ngokuvisisana nemilinganiselo yakhe. Ndandisazi ukuba andinakuze ndiphumelele ngaphandle kwakhe. Ndayibona indlela awayiphendula ngayo imithandazo yam’

[Ibhokisi/Imifanekiso ekwiphepha 7]

INDLELA OSEBENZA NGAYO UMOYA OYINGCWELE

UThixo wasebenzisa umoya oyingcwele xa wayedala umhlaba nayo yonke indalo. Umdumisi wathi: “Hayi indlela emininzi ngayo imisebenzi yakho, Yehova! Yonke uyenze ngobulumko. Uzele umhlaba yimveliso yakho, Ukuba uthumela umoya wakho, ziyadalwa.”—INdumiso 104:24, 30; Genesis 1:2; Yobhi 33:4.

Amadoda ahlonela uThixo aphefumlelwa ngomoya oyingcwele ukuba abhale iBhayibhile. Umpostile uPawulos wathi: “Sonke iSibhalo siphefumlelwe nguThixo kwaye siyingenelo.” (2 Timoti 3:16) Igama lesiGrike eliguqulelwe ngokuthi “siphefumlelwe” ngokoqobo sithetha ukuthi “uThixo uphefumlele umoya wakhe kuso.” Umoya kaYehova walathisa ababhali beBhayibhile ukuze babhale “ilizwi likaThixo.”—1 Tesalonika 2:13.

Umoya oyingcwele kaThixo wenza abakhonzi bakhe baxela ikamva kwangaphambili. Umpostile uPetros wathi: “Akukho siprofeto seSibhalo siphuma nakuyiphi na inkcazelo yobuqu. Kuba isiprofeto asizange nangaliphi na ixesha siziswe ngokuthanda komntu, kodwa abantu bathetha ngokuphuma kuThixo njengoko babeqhutywa ngumoya oyingcwele.”—2 Petros 1:20, 21; Yoweli 2:28.

Umoya oyingcwele wanceda uYesu namanye amadoda awayenokholo ukuba ashumayele iindaba ezilungileyo zoBukumkani bukaThixo aze enze nemimangaliso. UYesu wathi: “Umoya kaYehova uphezu kwam, ngenxa yokuba undithambisele ukuvakalisa iindaba ezilungileyo kumahlwempu, undithumele ukushumayela inkululo kubathinjwa nokubuyiselwa kokubona kwiimfama.”—Luka 4:18; Mateyu 12:28.

[Ibhokisi/Imifanekiso ekwiphepha 9]

IINDLELA ONOKUSINCEDA NGAZO UMOYA OYINGCWELE

Umoya oyingcwele unokukunceda ulwe nezilingo uze woyise imikhwa eyingozi. Umpostile uPawulos wathi: “UThixo uthembekile, yaye akayi kuniyekela nihendwe ngaphaya koko ninokukuthwala, kodwa kunye nesihendo eso uya kwenza nendlela yokuphuma ukuze nikwazi ukusinyamezela.”—1 Korinte 10:13.

Umoya oyingcwele unokukunceda uhlakulele iimpawu ezithandwa nguThixo. “Isiqhamo somoya luthando, uvuyo, uxolo, ukuzeka kade umsindo, ububele, ukulunga, ukholo, ubulali, ukuzeyisa.”—Galati 5:22, 23.

Umoya oyingcwele unokukunika amandla okumelana nezilingo uze unyamezele neemvavanyo. “Ezintweni zonke ndinamandla ngenxa yalowo undomelezayo.”—Filipi 4:13.