Ukuloba Kulwandle LwaseGalili

BABEPHILA njani abantu ababeloba kuLwandle lwaseGalili ngenkulungwane yokuqala? Impendulo yalo mbuzo iza kusinceda siziqonde bhetele iingxelo ezininzi zeVangeli njengaleyo ikwinqaku elandulela eli.

Enyanisweni “ulwandle” lwaseGalili lichibi nje lamanzi elimalunga neekhilomitha ezingama-21 ubude nezili-12 ububanzi. Bekulotywa kweli chibi ukususela kwamhla mnene. Kuyacaca ukuba iSango Leentlanzi laseYerusalem kulapho yayikhona imarike yeentlanzi. Ezinye zeentlanzi ezazithengiswa apho zazilotywa kuLwandle lwaseGalili.

Umpostile uPetros wayevela kwidolophu engakuLwandle lwaseGalili iBhethesayida, gama elo elisenokuba lithetha “Umzi Wabalobi.” Enye idolophu eyayigudle elo chibi yayiyiMagadan okanye iMagadala, leyo uYesu nabafundi bakhe abaya kuyo emva kokuba ehambe phezu kwamanzi. (Mateyu 15:39) Omnye umbhali uthi igama lesiGrike lale dolophu linokuguqulelwa ngokuthi “Idolophu Yeentlanzi.” Yayisaziwa ngemizi-mveliso yayo emikhulu yokuqwayita iintlanzi, okanye yokuyinqunqa ukuze kwenziwe isinongo esasigcinwa engqayini. Ezi zinto zazithunyelwa kulo lonke elakwaSirayeli nakwezinye iindawo.

Ukubambisa iintlanzi, ukuzihlinza, ukuzinonga nokuzithengisa kwakulishishini elikhulu kwiGalili yomhla kaYesu. Kungalula ukucinga ukuba eli shishini lalibenzela intyweka yemali abantu balapho. Kodwa ke kwakungenjalo. Omnye umphengululi uthi “umntu wayengasuki nje aqalise ishishini lokuloba njengokuba benokucinga njalo abantu abafunda iTestamente Entsha namhlanje.” Eli shishini lalilelinye lamashishini “awayelawulwa ngurhulumente ukuze kuxhamle igcuntswana leengcungcu.”

UHerode Antipas wabekwa yiRoma ukuze abe ngumlawuli wesithili saseGalili. Ngenxa yoko wayelawula iindlela, amazibuko nobunye ubuncwane obufana nemigodi, amahlathi, ezolimo kunye namashishini okuloba. UHerode wayeyifumana kobo buncwane eyona rhafu ininzi. Asazi nto ingako ngendlela nemithetho yokuqokelelwa kwerhafu ngenkulungwane yokuqala. Kodwa kuyabonakala ukuba uHerode wayesebenzisa indlela ebufana naleyo yayisetyenziswa ngabalawuli bamaGrike okanye ngamaRoma kwamanye amaphondo asempuma. Kusenokwenzeka ukuba ingeniso eninzi yaloo mashishini nobunye ubuncwane balapho yayiphelela kwizandla zeengcungcu kunokuba iye kubantu abaphantsi, ababesenza owona msebenzi mkhulu.

Uxanduva Lwerhafu

Xa uYesu wayesemhlabeni, eyona mihlaba mihle eGalili yayiyeyasebukhosini ibe yayahlulahlulwe yaba ziziza ezikhulu. UHerode Antipas wayephisa ngayo kwizihandiba nakuye nabani na amthandileyo. Abantu babethwele uxanduva lokuhlawulela ubunewunewu bukaHerode, amaphulo akhe okwakha izakhiwo ezingayiwayo, urhulumente wakhe omkhulu kunye nezinwe awayenazo kubahlobo bakhe nakwizixeko ezithile. Ukuhlawula zonke ezi ntlobo zerhafu kwakubacinezela abantu abaphantsi.

UHerode wayelawula kwanto inokuthanani namanzi aseGalili. Ngoko ke, ubukhulu becala ishishini lokuloba laliba sezandleni zakhe okanye kwabathile aye wabajizeka ngomhlaba. Kwezo ndawo ziphantsi korhulumente wakhe, abaqokeleli berhafu—abantu abemi kakuhle ababelithenga eli lungelo—yayingabo ababenegunya lokunika abalobi imvume yokuloba. Bambi abahlalutyi bacingela ukuba uMateyu wayesebenzela abo baqokeleli berhafu baziintloko, “enika abantu balapho imvume yokuloba,” ekubeni iofisi yakhe yayiseKapernahum—iziko eliphambili lokuloba kuLwandle lwaseGalili.a

Kukho ubungqina obubonisa ukuba ngenkulungwane yokuqala nangeyesibini ngaphambi kweXesha Eliqhelekileyo, irhafu yayingahlawulwa ngemali kwelo lasePalestina kodwa kutshintshiselwana ngezinto ezithile. Ngoko ke, abanye abalobi babehlawula irhafu yabo yokuloba ngenxalenye ethile yezinto abazibambisileyo. Amaxwebhu amandulo abonisa ukuba kwezinye iindawo ezaziphantsi korhulumente waseRoma, ishishini lokuloba lalilawulwa ngurhulumente yaye lisonganyelwa ngabahloli bakhe. EPisidiya, kwakukho amagosa athile awayeqinisekisa ukuba akukho mntu wayeloba ngaphandle kwemvume, nokuba iintlanzi zazithengiselwa kuphela abantu abanemvume yokuzithenga, nabo ababejongwe ngeliso elibukhali ngurhulumente yaye berhafiswa.

Omnye umhlalutyi uthi, yonke le nto yayisenza ukuba “ukumkani okanye umnini mhlaba enze ingeniso eninzi ngoxa yena umlobi efumana nje ubugcwabalalana.” Nabanye abantu ababesebenza kwamanye amashishini babengenzi mali ingako ngenxa yokucinezelwa yirhafu. Kudal’ irhafu inuk’ umzondo ebantwini. Noko ke, kuyabonakala ukuba ukuthiywa kwabaqokeleli berhafu esifunda ngabo kwiincwadi zeVangeli kwabangelwa kukungathembeki nokunyoluka kwamadoda awaba zizityebi ngenxa yokubiza imali eninzi ebantwini.—Luka 3:13; 19:2, 8.

Abalobi Ekuthethwa Ngabo Kwiincwadi ZeVangeli

Incwadi zeVangeli zibonisa ukuba uSimon Petros wadibanisa izandla nabantu abathile baza bavula ishishini lokuloba. Abantu abeza kuncedisa uPetros xa wayebambise inkitha yeentlanzi ngendlela engummangaliso ‘ngamaqabane akhe awayekwesinye isikhephe.’ (Luka 5:3-7) Abaphengululi bathi “abalobi babenokuseka ‘amaqumrhu’ . . . ukuze bakwazi ukufumana imvume yokuloba.” Kusenokwenzeka ukuba bayifumana ngale ndlela ke imvume yokuloba oonyana bakaZebhedi, uPetros, uAndreya namanye amaqabane abo.

IZibhalo azitsho enoba yayizezawo kusini na izikhephe nezinye izinto zokuloba ezazisetyenziswa ngala madoda aseGalili. Abanye bacinga ukuba yayizezawo. Phofu noYesu kuthiwa wakhwela kwisikhephe ‘sikaSimon.’ (Luka 5:3) Noko ke, elinye inqaku elithetha ngalo mbandela lithi, “kusenokwenzeka ukuba izikhephe yayizezabaqokeleli berhafu kodwa beqeshisa ngazo kuloo maqumrhu okuloba.” Enoba kwakuyintoni na, iZibhalo zithi uYakobi noYohane babelungisa iminatha yabo. Kucingelwa ukuba nabo abalobi babethethathethana nabathengi ngamaxabiso, beqesha nabanye abantu bokubancedisa xa kuyimfuneko.

Zazininzi izinto ezazifuneka kwishishini lokuloba laseGalili lenkulungwane yokuqala. Ishishini labo laliyinxalenye yorhwebo oluntsonkothileyo. Ukwazi yonke le nto kusenza siziqonde bhetele iingxelo zeeVangeli kunye nezinto ezathethwa nguYesu ngokuloba nangabalobi. Ngaphezu koko, le nkcazelo iyasinceda siqonde ukholo awayenalo uPetros, uAndreya, uYakobi noYohane. Babephila ngokuloba. Enoba yayinjani na imeko yabo yezimali xa uYesu wababizayo bashiya yonke into ababeyazi—ishishini labo—ukuze babe ‘ngabalobi babantu.’—Mateyu 4:19.

[Umbhalo osemazantsi]

[Imaphu ekwiphepha 25]

(Ukuba ufuna inkcazelo ehlahlelwe kakuhle, yiya kwimpapasho)

IChibi laseHula

Bhethesayida

Kapernahum

Magadan

ULwandle LwaseGalili

Yerusalem

ULwandle Olufileyo

[Inkcazelo]

Todd Bolen/Bible Places.com

[Inkcazelo Ngomfanekiso okwiphepha 26]

Todd Bolen/Bible Places.com