Iindaba Ezilungileyo Ngeelwimi Ezingama-500

XA kwakusiliwa imfazwe eRwanda, abaguquleli abathile basaba kumakhaya abo, beshiya iimpahla zabo. Noko ke, bakwazi ukuthabatha iikhompyutha zabo, baza baya nazo kwiinkampu zeembacu. Babezithathela ntoni? Babefuna ukuqhubeka beguqulela iincwadi ezisekelwe eBhayibhileni kulwimi lwesiKinyarwanda.

Ibhinqa eliselula kuMzantsi mpuma Asiya lichwetheza kwikhompyutha kude kube sezinzulwini zobusuku, lidiniwe, kushushu nombane umana uhamba nto leyo ephazamisana nomsebenzi walo. Kutheni? Lifuna ukuwugqiba ngexesha elimiselweyo umsebenzi walo.

Aba baguquleli bayinxalenye yamatsha-ntliziyo angama-2 300 asebenza kwiindawo ezili-190 ehlabathini jikelele. Iminyaka yabo yobudala iphakathi kwama-20 nama-90 yaye bayazibhokoxa ukuze abantu bathuthuzelwe sisigidimi seBhayibhile esifumaneka ngeelwimi ezingaphezu kwama-500.—ISityhilelo 7:9.

Ukufikelela Abantu Abathetha Iilwimi Ngelwimi

Kutshanje, umsebenzi wokuguqulela wamaNgqina kaYehova uye wakhula ngendlela engazange ibonwe ngaphambili. Ngokomzekelo, ngowe-1985 IMboniselo yayiveliswa ngaxeshanye ngeelwimi ezingama-23, lowo yayingumsebenzi oncomekayo ngelo xesha. Kodwa ke, sithethanje IMboniselo ifumaneka ngeelwimi ezili-176, yaye zikhutshwa ngaxeshanye ukuze abafundi beli phephancwadi abasehlabathini bafunde into efanayo.

Kwiilwimi ezimalunga nama-50, yiMboniselo kuphela iphephancwadi elipapashwa rhoqo. Kutheni? Iinkampani zezorhwebo ezishicilelayo azikuthandi ukupapasha uncwadi ngeelwimi ezithethwa ekuhlaleni. Kodwa amaNgqina kaYehova ehlabathini lonke ayanikela ukuze iLizwi likaThixo noncwadi oluthetha ngeBhayibhile lufumaneke kubo bonke abalufunayo.—2 Korinte 8:14.

Abantu bayakuxabisa ukufunda isigidimi seBhayibhile ngolwimi lwabo. Ngokomzekelo, kutshanje uncwadi lweBhayibhile luye lwenziwa ngesiMiskito, ulwimi oluthethwa ngabantu abangaphezu kwama-200 000 eNicaragua. Elinye ibhinqa lacela ukuphathelwa incwadi ethi Incwadi Yam Yamabali EBhayibhilea ngeMiskito yaye kwakukho nomfundisi wasekuhlaleni ukuziswa kwayo. Wathi esakuyibona le ncwadi umfundisi, wayicela. Eli bhinqa alizange livume ukumnika yona, naxa umfundisi wayesele ethembisa ukulinika iimbotyi zokwenza ikofu ezilingana neekhilogram ezingama-20.

Kule minyaka ilishumi idluleyo, uncwadi olusekelwe eBhayibhileni luye lwaguqulelwa kwiilwimi eziliqela ezithethwa eMexico eziquka isiMaya, isiNahuatl nesiTzotzil. Kwiminyaka nje engaphantsi kwelishumi, amabandla amaNgqina kaYehova eelwimi zomthonyama nawentetho yezandla aye anda kwelo lizwe, esusela kwangama-72 ukusa kwangaphezu kwali-1 200. AmaNgqina kaYehova atyala isigidimi seBhayibhile ezintliziyweni, kodwa nguThixo ohlumisa imbewu yenyaniso.—1 Korinte 3:5-7.

Ukuguqulelwa KweBhayibhile Ngeelwimi Zale Mihla Ezingaphezu Kwama-80

Kwiminyaka yakutshanje amaNgqina kaYehova aye azibhokoxa ukuze avelise INguqulelo Yehlabathi Elitsha YeZibhalo Ezingcwele. Bathini abantu ngayo? Elinye iNgqina likaYehova laseMzantsi Afrika lathi ngeBhayibhile yesiTswana: “Le Bhayibhile sisixhobo esifanelekileyo. Iza kundenza ndiliqonde bhetele iLizwi likaThixo. Ulwimi ebhalwe ngalo lufundeka lula.” Kanti yena umzalwana waseMozambiki wathi: “Nangona ndandinazo zonke ezinye iincwadi ezisekelwe eBhayibhileni, ukungabi naBhayibhile kwakufana nokuba kugqekreze iindudumo nemibane, kube kungekho mvula. Kodwa iimvula zagaleleka mhla kwakhutshwa INguqulelo Yehlabathi Elitsha ngesiTsonga.”

Abantu abaguqulela baze basasaze iBhayibhile bazalisekisa isiprofeto samandulo. Kaloku uYesu ngokwakhe wathi: “Ezi ndaba zilungileyo zobukumkani ziya kushunyayelwa kuwo wonke umhlaba omiweyo kube bubungqina kuzo zonke iintlanga; kwandule ke kufike ukuphela.”—Mateyu 24:14.

[Umbhalo osemazantsi]

[Igrafu ekwiphepha 25]

(Ukuba ufuna inkcazelo ehlahlelwe kakuhle, yiya kwimpapasho)

INGUQULELO YEHLABATHI ELITSHA

Ifumaneka ngenxalenye okanye iphelele

1950 1*

1970 7*

1990 13*

2000 36*

2010 80*

EZINYE IIMPAPASHO

1950 88*

1960 125*

1970 165*

1980 190*

1990 200*

2010 500*

IINANI LEELWIMI

[Imifanekiso ekwiphepha 24, 25]

Amatsha-ntliziyo angama-2 300 aguqulela iBhayibhile ngeelwimi ezingama-500

BENIN

SLOVENIA

ETHIOPIA

BRITAIN