Inkqubo Yemfundo Ephum’ Izandla
“Ngabantu abafundileyo kuphela abakhululekileyo.”—UEpictetus, malunga nowe-100 C.E.
OWAYEKUMELE ngeenyawo ukupheliswa kobukhoboka kwinkulungwane ye-19 uWilliam H. Seward wayevakalelwa kukuba “lonke ithemba lenkqubela yabantu lixhomekeke kwimpembelelo engakumbi yeBhayibhile.”
NamaNgqina kaYehova ayihlonela ngokunzulu iBhayibhile. Aqinisekile ukuba abo basebenzisa imigaqo yayo baba ngabayeni ababhetele, abafazi ababhetele, abantwana ababhetele—ewe abona bantu babhetele ehlabathini. Ngoko athobela lo myalelo kaYesu Kristu: “Hambani ke ngoko niye kubenza abafundi abantu beentlanga zonke, . . . nibafundisa.”—Mateyu 28:19, 20.
Ezama ukufikelela olu sukelo lokufundisa abantu iBhayibhile, amaNgqina kaYehova aye azibhokoxa kwelona phulo lokufundisa lisasazeke ngokubanzi kwimbali yabantu. Liphum’ izandla kangakanani?
Umsebenzi Wokuvakalisa Owenziwa Ehlabathini Lonke
Kubulungiseleli bawo basesidlangalaleni, amaNgqina asebenzisa iinguqulelo zeBhayibhile ezikho ngamakhulukhulu eelwimi. Kodwa aye avelisa neNguqulelo Yehlabathi Elitsha YeZibhalo Ezingcwele ngeelwimi ezingama-21 neNguqulelo Yehlabathi Elitsha YeZibhalo ZamaKristu ZesiGrike (ebizwa ngokuba yiTestamente Entsha) ngeelwimi ezongezelelekileyo ezili-16. Kwakhona, ayaqhubeka eguqulela le Bhayibhile ngeelwimi ezili-11 ezingakumbi. Kwakhona amaNgqina avelisa uncwadi olukhulisa uxabiso ngeBhayibhile luze lubangele abantu bayiqonde ngakumbi.
Ngokomzekelo, lo lindixesha, uVukani! upapashwa ngeelwimi ezingama-82, yaye kushicilelwa umlinganiselo wemibhalo engaphezu kwama-20 380 000 kwinkupho nganye. Iphephancwadi eliliqabane lakhe, IMboniselo, lishicilelwa ngomlinganiselo wemibhalo engama-22 398 000 kwinkupho nganye ngeelwimi ezili-137. Loo nto ithetha ukuba kushicilelwa imibhalo engaphezu kwewaka lezigidi yala maphephancwadi nyaka ngamnye! Ngaphezu koko, IMboniselo ishicilelwa ngeelwimi ezili-124 kwezi ngaxeshanye, aze ke uVukani! ashicilelwe ngeelwimi ezingama-58. Ngoko, ehlabathini lonke inkcazelo ekwaba lindixesha ifundwa ngabantu beelwimi ezahlukeneyo ngaxeshanye ngolwimi lwabo.
Ukongezelela, kumashumi eminyaka akutshanje amaNgqina kaYehova aye avelisa amakhulu ezigidi emibhalo yeencwadi zokufundisisa iBhayibhile. Kwashicilelwa imibhalo engaphezu kwe-107 lezigidi yencwadi ethi Inyaniso Ekhokelela Kubomi Obungunaphakade. Kamva, incwadi ethi Unokuphila Ngonaphakade Kwiparadisi Esemhlabeni yathi kratya kwimibhalo engama-81 ezigidi, yaye kutshanje incwadi ethi Ulwazi Olukhokelela Kubomi Obungunaphakade iye yathi kratya kwimibhalo engama-75 ezigidi ngeelwimi ezili-146. Kwakhona, kuye kwashicilelwa imibhalo engaphezu kwe-113 lezigidi yencwadana enemifanekiso enamaphepha engama-32 ethi Yintoni UThixo Ayifunayo Kuthi? ngeelwimi ezingama-240.
Ezinye iincwadi ziye zaveliswa ukuze zanelise iimfuno ezithile. Incwadi Yam Yamabali EBhayibhile, eyenzelwe abantwana, iye yashicilelwa kangangemibhalo engama-51 ezigidi. Iincwadi ezimbini eziye zenziwa kucingwa kakhulu ngabo bakwishumi elivisayo, ethi Ubutsha Bakho—Ukufumana Okona Kulungileyo Kubo nethi Imibuzo Yabantu Abaselula—Iimpendulo Eziluncedo, zidibene kuye kwashicilelwa imibhalo yazo engaphezu kwama-53 ezigidi. Nencwadi ethi Imfihlelo Yolonwabo Lwentsapho, eye yanceda izigidi zeentsapho ukuze zihlangabezane neengxaki zazo, iye yashicilelwa ngeelwimi ezili-115.
Ezinye iimpapasho ezine eziye zakhululwa ukususela ngowe-1985 ezakha ukholo ubukhulu becala kuMdali, uNyana wakhe, neBhayibhile zidibene kushicilelwe imibhalo yazo engaphezu kwe-117 lezigidi. Yethi Life—How Did It Get Here? By Evolution or by Creation?, ethi Oyena Mntu Ubalaseleyo Wakha Waphila, ethi IBhayibhile—Ngaba Ililizwi LikaThixo Okanye Lomntu?, nethi Is There a Creator Who Cares About You?
Namhlanje iimpapasho ezisekelwe eBhayibhileni eziveliswa ngamaNgqina kaYehova zikho ngeelwimi ezingama-353, yaye ezinye zazo ziza kukhululwa kungekudala ngeelwimi ezingama-38. Enyanisweni, amaNgqina kaYehova aye ashicilela iincwadi, iincwadana, iincwadana ezinemifanekiso, namaphephancwadi angaphezu kwama-20 amawaka ezigidi ukususela ngowe-1970! Ngaphezu koko, abafundisi abamalunga nezigidi ezithandathu bame bume besasaza ulwazi lweBhayibhile kumazwe angaphezu kwama-230. Kodwa kuye kwenzeka njani konke oku, yaye abantu baye bachaphazeleka njani?
Isizathu Sokuba Ziveliswe Ngeelwimi Zabo
Njengoko unokucinga, kufuna umgudu ongakumbi ukuvelisa uncwadi olusemgangathweni ngaxeshanye ngamakhulukhulu eelwimi. Amaqela abaguquleli, abaye banikela ngexesha nobuchule babo, basebenzisa iinkqubo zekhompyutha ukuze bakhuphe umsebenzi osemagqabini, ukuchana nesantya. Ngenxa yoko, kwanakwiilwimi ezinabaguquleli abambalwa, iimpapasho ziveliswa ngokukhawuleza. Okwangoku, angaphezu kwe-1 950 amadoda namabhinqa abandakanyeke kulo msebenzi wokuguqulela wenziwa ehlabathini lonke, nongenzelwa ngeniso. Kodwa kutheni kude kwenziwe loo migudu? Ngaba ngokwenene kufanele kwenziwe ngolo hlobo, ekubeni abantu abaninzi abathetha iilwimi ezingaziwa kakhulu besazi nolwimi oluthethwa kakhulu?
AmaNgqina kaYehova aye afumanisa ukuba ufanele wenziwe loo mgudu ngenxa yesizathu esachazwa nguWilliam Tyndale, umguquleli weBhayibhile odumileyo wenkulungwane ye-16. Wabhala wathi: “Ngokusuka kumava ndiye ndafumanisa indlela ekungenakwenzeka ngayo ukuba sifundise amarhamente inyaniso, ngaphandle kokuba izibhalo zibekwe ngokucacileyo phambi kwamehlo awo ngolwimi lwawo, ukuze azibonele inkqubo, ulungelelwano nentsingiselo yombhalo.”
Liyinyaniso elokuba, bekungasoloko kulula ukuba abantu babe neempapasho zeBhayibhile ngolwimi lwabo lomthonyama. Kodwa xa zikho, inyaniso yeBhayibhile ichukumisa iintliziyo zabo ngokukhawuleza nangokunzulu. Oku kuye kwabonakala kwindawo eyayisakuba yiSoviet Union apho abantu bethetha intarhantarha yeelwimi zomthonyama. Kwinxalenye yokuqala yenkulungwane edluleyo, uninzi lwaba bantu basiwa kwiSoviet Union baza bafundiswa—kwaza kwafuneka basebenzise—ulwimi lwaseRashiya. Ngenxa yoko, bafunda baza babhala isiRashiya, baza kwangaxeshanye, bathetha ulwimi lwabo lomthonyama.
Ingakumbi ukususela ekuweni kweSoviet Union ngowe-1991, uninzi lwaba bantu lufuna ukusebenzisa ulwimi lwalo lomthonyama. Yaye abafuna oko ngabo ulwimi lwabo lomthonyama lusisiAdyghe, isiAltai, isiBelorussia, isiGeorgia, isiKirghiz, isiKomi, isiOsset, isiTuvinia, okanye ezinye eziliqela. Nangona uninzi lunokuncokola ngesiRashiya, uncwadi lweBhayibhile lwesiRashiya alukhawulezi ukushukumisa iintliziyo zabo. Kwelinye icala, uncwadi olubhalwe ngolwimi lwasekuhlaleni baluthanda gqitha. Omnye owafumana iphecana leBhayibhile ngesiAltai wathi: “Siyayithanda into yokuba nivelise uncwadi ngolwimi lwethu.”
Omnye umzekelo woku, yiGreenland, esisiqithi saseArctic esinabemi abamalunga nama-60 000 kuphela. IMboniselo noVukani! zishicilelwa ngolwimi lwaseGreenland, yaye la maphephancwadi athandwa gqitha—njengamanye amaphephancwadi ashicilelwa ngamaNgqina kaYehova ngolwimi lwaseGreeenland. Enyanisweni, olo ncwadi lufumaneka kumakhaya amaninzi kwezona ndawo zithe qelele kweso siqithi.
KuMzantsi Pasifiki, bamalunga nama-7 000 abantu abathetha isiNauru, bangama-4 500 abathetha isiTokelau yaye bali-12 000 abathetha isiRotuma. Ngoku amaNgqina avelisa amaphecana eBhayibhile neencwadana ezinemifanekiso ngezo lwimi kwakunye neenkupho zakanye ngenyanga zeMboniselo ngesiNiue, esithethwa ngabantu abamalunga nama-8 000, nesiTuvalu, esithethwa ngabantu abali-11 000. Enyanisweni, amaNgqina kaYehova aphakathi kwabona bapapashi baninzi boncwadi olushicilelweyo ngeelwimi ezingathethwa kakhulu, evelisa uncwadi lweBhayibhile ngeelwimi ezifana nesiBislama, isiHiri Motu, isiPapiamento, isiCreole saseMauritius, isiPigdin saseNew Guinea, isiCreole saseSeychelles, isiPigdin saseSolomon Islands, nentarhantarha yezinye iilwimi.
Ngokuqhelekileyo okukhona bembalwa abemi abathetha ulwimi oluthile, kokukhona loo ndawo iqelelana yaye abantu balapho bengamahlwempu. Kodwa basenokuba baninzi abantu abafundileyo kuloo mimandla. Yaye iBhayibhile yolwimi lwalapho isoloko iphakathi kweempapasho ezimbalwa abanazo abemi basekuhlaleni. Enyanisweni, akukho nephephandaba ngezinye zezi lwimi, ekubeni ukulivelisa kungelula ngenxa yezoqoqosho.
Isizathu Sokuba Umsebenzi Wawo Uxatyiswe
Ngenxa yokuba amaNgqina kaYehova elungiselela uncwadi oluphucula umgangatho wobomi babantu, abantu abaninzi baye bayincoma imigudu ayenzayo ekuguquleleni. ULinda Crowl, osebenza kwi-Institute for Pacific Studies, ekwiUniversity of the South Pacific eSuva, eFiji, wathi umsebenzi wokuguqulela wamaNgqina “uyeyona nto ichwayitisayo kwezenzeka kwiPasifiki.” Uyazincoma iimpapasho zawo ngenxa yokuba semgangathweni kwazo.
Xa kwaqalisa ukuphuma uhlelo lukaVukani! emva kweenyanga ezintathu ngolwimi lwesiSamoa, amaphephandaba asekuhlaleni kwakunye neziko likamabonwakude lelo lizwe azisasaza ezo ndaba. Ebudeni bolo sasazo kwaboniswa iqweqwe likaVukani!, yaye kwavulwa inqaku ngalinye leli phephancwadi. Kwabalaseliswa inqaku elinye ngexesha.
Kuyabonakala ukuba kwamanye amazwe abaguquleli beempapasho zamaNgqina badla ngokukrwecwa ngamaziko olwimi asekuhlaleni ngokuphathelele umgaqo-ntetho, umgaqo wokubhalwa kwamagama, ukuthiywa kwamabinzana amatsha, njalo njalo. Licacile elokuba, umsebenzi wokufundisa wasimahla owenziwa ngamaNgqina kaYehova uye wachaphazela ubomi babantu abangakumbi kunabo bangamalungu azimiseleyo amabandla awo.
Kodwa, njengoko kuchaziwe kwinqaku elingaphambilana, abantu abakhulileyo abamalunga newaka lezigidi—malunga nomntu omnye kwabathandathu kubemi behlabathi—abafundanga. Kuye kwenziwa ntoni ukunceda aba bangenelwe kwinkcazelo ebalulekileyo efumaneka ngokulesa nokufundisisa?
Ukuzalisekisa Iimfuno Ezisisiseko Zemfundo
Kumazwe amaninzi amaNgqina aye alungiselela iinkqubo zokufunda zasimahla, efundisa abantu indlela yokulesa nokubhala. Aye azenzela incwadi yokufundisa, njengempapasho ethi Zibhokoxe Ekuleseni Nasekubhaleni, eye yaveliswa ngeelwimi ezingama-28. Amawakawaka abantu, kuquka amabhinqa nabasele bekhulile, aye ancedwa ukuba afunde ngezi klasi.
EBurundi, amaNgqina kaYehova aye aqhuba iiklasi zokufundisa eziye zanceda amakhulukhulu abantu bakwazi ukulesa nokubhala. Emva kokuhlolisisa iziphumo ezihle zale nkqubo, iNational Office of Adult Literacy yelo lizwe yawonga abalathisi abane abangamaNgqina ngebhaso ngeInternational Literacy Day, ngoSeptemba 8, 1999.
Kwafunyanwa le ngxelo ngokuphathelele iiklasi zokufundisa kumabandla angama-700 amaNgqina kaYehova eMozambique: “Ngaphezu kweminyaka emine edluleyo, abafundi abangama-5 089 baye baphumelela, yaye kungokunje siye sabhalisa abangama-4 000.” Omnye umfundi wabhala wathi: “Ndithanda ukuvakalisa uxabiso olunzulu ngesi sikolo . . . Ndandingazi nowathwethwa. Maz’ enethole kwesi sikolo, ndiyakwazi ukulesa, yaye nangona kusafuneka ndiqhelisele, ndiyakwazi ukubhala.”
Ukususela ngowe-1946, ukuqalisa kokugcinwa kweengxelo eMexico, abantu abangaphezu kwe-143 000 baye bafundiswa ukulesa nokubhala kwizikolo ezikhethekileyo eziye zasekwa ukuze zifundise obu buchule. Ibhinqa elineminyaka engama-63 ubudala labhala lathi: “Ndibulela kakhulu kumaNgqina kaYehova, andifundise ukulesa nokubhala. Bekumnyama tu kum. Noko ke, ngoku ndiyakwazi ukukhangela icebiso eBhayibhileni, yaye ndiye ndafumana ulonwabo kwisigidimi sayo.”
Kwilizwe loMzantsi Merika laseBrazil, nalapho amaNgqina aye afundisa amawakawaka ukulesa nokubhala. Omnye oneminyaka engama-64 ubudala wathi: “Ukufunda ukulesa kwakufana nokukhululwa amatyathanga abekubophelele kangangeminyaka. Ngoku ndiyakwazi ukufunda nayiphi na inkcazelo. Okona kubalulekileyo, ukulesa nokufundisisa iBhayibhile kuye kwandikhulula kwiimfundiso zobuxoki.”
Ngokufuthi abafundisi beBhayibhile abangamaNgqina kaYehova baye banceda abafundi babo ukuba bazifundele. KwiPhilippines, uMartina wayesele ekwiminyaka engama-80 ubudala ukutyelelwa kwakhe liNgqina. UMartina wafuna ukufundisisa rhoqo iBhayibhile, kodwa wayengakwazi ukulesa. Ngoncedo lomfundisi wakhe weBhayibhile, uMartina wenza inkqubela, yaye ngoqeqesho olongezelelekileyo awalufumana kwibandla lasekuhlaleni, wakufanelekela ukusebenzisa iBhayibhile ekufundiseni abanye. Namhlanje ungumfundisi weBhayibhile ofundisiweyo nosebenza ixesha elizeleyo.
Licacile elokuba, wonke umntu unomlinganiselo othile wokukwazi ukufunda. Kodwa sisenokubuza sithi, Ngaba ulwazi oluseBhayibhileni ngokuphathelele uThixo neenjongo zakhe lunokubenza bangenelwe abantu? Inqaku lokugqibela kolu ngcelele liza kuwuphendula lo mbuzo.
[Ibhokisi/Umfanekiso okwiphepha 27]
“Andazi Nokuba Ndiqale Ngaphi Na Ukuchaza . . . ”
Amagunya aseburhulumenteni, izifundiswa nabantu abaqhelekileyo, xa bebonke baye bayiphawula imigudu yamaNgqina kaYehova yokukhuthaza ukufunda kwabantu ehlabathini lonke. Nanku umzekelo wamagqabaza abo:
“Sinorhulumente wam sonwabe gqitha kuba le ncwadi [Unokuphila Ngonaphakade Kwiparadisi Esemhlabeni, ngesiTuvalu] isesinye isixhobo esitsha nesibalulekileyo ukongezelela ‘kubutyebi’ obubalaseleyo ngesiTuvalu. Ifanele inivuyise indima eniye nanayo—indima esemagqabini ekwakheni imeko yokomoya yabantu beli lizwe. Ndicinga ukuba lo msebenzi niwenzileyo uya kubhalwa kwimbali yamaTuvalu ngokuphathelele ukushicilelwa kweencwadi ezinemfundiso.”—UGqr. T. Puapua, owayesakuba yinkulumbuso eTuvalu, kuMzantsi Pasifiki.
“AmaNgqina kaYehova anenkqubo entle gqitha yokupapasha, esebenzisa ubugcisa obusexesheni kuMzantsi Pasifiki. . . . Lo msebenzi wokupapasha uphawuleka ngendlela emangalisayo ingakumbi xa ucinga ngokuba buthathaka kwenkqubo yezonxibelelwano . . . kwiZiqithi zePasifiki.”—ULinda Crowl, weUniversity of the South Pacific, eSuva, eFiji.
“Hayi indlela emangalisa nenamandla ngayo incwadi ethi Imfihlelo Yolonwabo Lwentsapho ngolwimi lwesi-Isoko! Sibamba ngazibini kumatsha-ntliziyo asebenza kwisebe lokuguqulela lesi-Isoko ngokusinceda ukuba siyiqonde kakuhle le ncwadi.”—UC.O.A., eNigeria.
“Andazi nokuba ndiqale ngaphi na ukuchaza indlela endiyibulela ngayo le nguqulelo yeBhayibhile [INguqulelo Yehlabathi Elitsha ngesiSerbia], eqondakala lula. Ngaphambili, ndiye ndazama ukuyifunda yonke iBhayibhile, kodwa bendisoloko ndikhawuleza ndoyisakale kuba bendingaluqondi kakuhle ulwimi. Ngoku ndiyakwazi ukufunda le nguqulelo isemagqabini, ndiyiqonda kananjalo!”—UJ. A., eYugoslavia.
“Sibamba ngazibini ngeempapasho ezintle, ezifundisayo nezakhayo eziguqulelwe ngolwimi lwesiTiv. Enyanisweni, ndiyaxakwa kukuchaza zonke iingenelo nokhuthazo endilufumana kwezi ncwadi neencwadana ezinemifanekiso. Ezi mpapasho ziye zafikelela amawakawaka.”—UP.T.S., eNigeria.
[Umfanekiso]
Imibhalo engama-36 ezigidi ngeelwimi ezili-115
[Imifanekiso ekwiphepha 22, 23]
Kuye kwaveliswa imibhalo engaphezu kwe-100 lezigidi “yeNguqulelo Yehlabathi Elitsha” ngeelwimi ezingama-37
[Imifanekiso ekwiphepha 25]
Ehlabathini lonke bamalunga nama-2 000 abanegalelo ekuguquleleni iimpapasho zamaNgqina kaYehova. (ngasekunene, iqela lesiZulu eMzantsi Afrika; nomguquleli wesiJapan, ngasezantsi)
[Umfanekiso okwiphepha 25]
Kushicilelwa ngaphezu kwewaka lezigidi zephephancwadi “IMboniselo” “noVukani!” nyaka ngamnye
[Imifanekiso ekwiphepha 26]
AmaNgqina kaYehova aneeklasi zokufundisa ehlabathini lonke. (ngasekunene eMexico; naseBurundi ngasezantsi)