IBhayibhile Iyabutshintsha Ubomi Babantu
Kwakutheni ukuze indoda eyayikade iphilela izithuthuthu, iziyobisi nemidlalo ize itshintshe ishumayele iindaba ezilungileyo ngokusisigxina? Yintoni eyabangela ukuba indoda eyayiphila ngokungcakaza ikuyeke ize ifune omnye umsebenzi? Kanti yona intombazana eyayikhuliswe ngamaNgqina kaYehova kodwa ke yalushiya ukholo lwayo, yintoni eyayenza yaphinda yaphila ngemigaqo yeBhayibhile? Makhe sive kubo.
INGXELO YOBOMI
IGAMA: TERRENCE J. O’BRIEN
IMINYAKA YOBUDALA: 57
ILIZWE: OSTRELIYA
UBOMI BANGAPHAMBILI: WAYESEBENZISA IZIYOBISI ETHANDA NEZITHUTHUTHU
INDLELA ENDANDIPHILA NGAYO NGAPHAMBILI: Ndisengumntwana ndandihlala eBrisbane, isixeko esiphithizelayo esilikomkhulu laseQueensland. Ekhaya sasingamaKatolika, kodwa xa ndandineminyaka esibhozo ubudala, sayeka ukuya ecaweni yaye asizange siphinde sithethe ngonqulo. Kwathi ke xa ndineminyaka elishumi safudukela kwiGold Coast yaseOstreliya. Sasihlala ngaselwandle, ngoko xa ndandikwishumi elivisayo ndandichitha ixesha lam elininzi ndiqubha elwandle.
Kuyo yonke loo nto ndandingonwabanga. Utata wasishiya xa ndandineminyaka esibhozo. Umama waphinda watshata, yaye ekhaya kwakuhlala kuselwa utywala yaye kusiliwa. Ngobunye ubusuku emva kokubukela abazali bam besilwa, ndahlala phezu kwebhedi yam ndaza ndathi ukuba ndingaze nditshate, andinakuze ndixambulisane nomfazi wam. Kodwa ke nangona sasineengxaki, intsapho yakowethu eyayinabantwana abathandathu, umama, notata owangena umama yahlala isondelelene.
Ekukhuleni kwam iintanga zam ezininzi zazinemvukelo. Zazitshaya intsangu, icuba nezinye iziyobisi yaye zinxila, nam ke ndazeka mzekweni. Ndandikuthanda ukukhwela isithuthuthu. Nangona ndandisiba kwiingozi ezimanyumnyezi, andizange ndiyeke ukusithanda ibe ndagqiba kwelokuba khe ndinqumle iOstreliya ngaso.
Nangona ndandiphila kwamlebese, ndandidandatheka xa ndicinga ngemeko elikuyo ihlabathi nendlela abantu abangakukhathalelanga ngayo ukuhlupheka kwabanye. Ndandikulangazelela ukwazi inyaniso ngoThixo, unqulo, nemeko yehlabathi. Kodwa xa ndabuza abefundisi ababini bamaKatolika, ndadana yindlela abandiphendula ngayo. Ndabuza nabefundisi bamaProtestanti kwaloo mbuzo mnye kodwa andizange ndaneliseke. Kodwa ke, omnye umhlobo wam wandidibanisa noEddie owayeliNgqina likaYehova. Sathetha amatyeli amane noEddie, yaye sihlandlo ngasinye wayendiphendula ngeBhayibhile. Zisuka nje ndabona ukuba ndandifumene into ebalulekileyo. Noko ke, ngelo xesha andizange ndibone sizathu sakutshintsha.
INDLELA EBUTSHINTSHE NGAYO UBOMI BAM IBHAYIBHILE: Kolwaa hambo lwam lokunqumla iOstreliya, ndathetha nelinye iNgqina likaYehova endandidibene nalo endleleni. Kodwa ke ukubuyela kwam eQueensland, kwadlula iinyanga ezintandathu ndingakhange ndithethe naNgqina.
Kwandula ke ngenye imini xa ndandibuya emsebenzini, ndadibana namadoda amabini awayenxibe kakuhle ephethe iibhegi, ndaza ndaqonda ukuba ayengamaNgqina kaYehova. Ndaya kuwo ndaza ndathi ndisakuva ukuba ayengamaNgqina ndawacela ukuba andifundise iBhayibhile. Ngoko nangoko ndaqalisa ukuya kwiintlanganiso zamaNgqina, de ndaya nakwindibano yawo enkulu eyayiseSydney ngowe-1973. Noko ke, intsapho yakowethu, ingakumbi umama wakhathazeka kakhulu esakuva loo nto. Ngenxa yesi sizathu nezinye ndahlukana namaNgqina. Emva koko, ndachitha unyaka kwenye into endandiyithanda, iqakamba.
Kodwa ke ekugqibeleni ndabona ukuba ndandisonwaba kuphela xa ndifunda iBhayibhile namaNgqina kaYehova. Ndaqhagamshelana nawo kwakhona ndaza ndaqalisa ukuya kwiintlanganiso. Ndohlukana nabahlobo bam ababetshaya iziyobisi.
Eyona nto eyandikhuthaza ukuba nditshintshe zizinto endazifunda eBhayibhileni ngoYobhi. IBhayibhile ndayifundiswa nguBill, iNgqina elikhulileyo elalinobubele kodwa lingafihli makhuba. Emva kokuba sifunde ibali likaYobhi, uBill wandibuza ukuba ngubani omnye owatyholwa nguSathana ngokungamkhonzi ngentliziyo yonke uThixo. (Yobhi 2:3-5) Ndachaza bonke abantu endibaziyo abaseBhayibhileni, yaye sihlandlo ngasinye ndibiza igama lomntu uBill wayesithi “Ewe naye lowo.” Emva koko wandijonga emehlweni waza wathi, “USathana uyakutyhola nawe!” Ndaphantse ndawa kweso situlo ndandihleli kuso. Kwanangaphambi kwaloo mini ndandisazi ukuba izinto endandizifunda zaziyinyaniso. Kodwa ke ngaloo mini ndaqonda isizathu sokuba ndizenze izinto endandizifunda. Emva kweenyanga ezine ndabhaptizwa, ngaloo ndlela ndisiba liNgqina likaYehova.
INDLELA ENDINGENELWE NGAYO: Ndiye ndoyike xa ndicinga ukuba ngendiphi ngoku ukuba ndandingafundanga ukuphila ngemilinganiselo yeBhayibhile. Mhlawumbi ngesele ndamnabel’ uqaqaqa. Abahlobo bam abaninzi babulawa ziziyobisi okanye butywala. Neentsapho zabo zazingonwabanga. Ndicinga ukuba ngekwaba njalo nakum.
Ngoku nditshatile, yaye mna nomfazi wam uMargaret sikhonza kwiofisi yesebe yamaNgqina kaYehova aseOstreliya yaye sonwabile. Akukho namnye kubantu bentsapho yakowethu okhonza uYehova. Kodwa ke, mna noMargaret siye safundisa abantu abaliqela iBhayibhile saza sababona betshintsha ubomi babo njengam. Ngenxa yoko siye saba nabahlobo abaninzi. Ukongezelela koko, uMargaret owakhuliswa ngamaNgqina uye wandinceda ndagcina isifungo endasenza kwiminyaka engama-40 eyadlulayo. Sineminyaka engaphezu kwama-25 sitshatile yaye sonwabile. Asisoloko sibona ngasonye kodwa ke asizange khe sixambulisane. Sobabini sicinga ukuba sincedwe yiBhayibhile.
INGXELO YOBOMI
IGAMA: MASAHIRO OKABAYASHI
IMINYAKA YOBUDALA: 39
ILIZWE: JAPAN
UBOMI BANGAPHAMBILI: WAYENGCAKAZA
INDLELA ENDANDIPHILA NGAYO NGAPHAMBILI: Ndakhulela eIwakura, idolophana ekufutshane neNagoya. Abazali bam babengabantu abanobubele. Kodwa ke, kamva ndafumanisa ukuba utata wayelilungu leqela lemigulukudu yaye wayesondla ngemali awayeyifumana ngondlela mnyama. Wayezinkcinkca ngotywala yonke imihla, yaye xa ndandineminyaka engama-20 wabulawa sisifo sesibindi.
Utata wayengumKorea, ngenxa yoko sasisoloko sicalulwa. Oku kucalulwa nezinye iingxaki zandenza ndakhula kabuhlungu. Ndafika kwisikolo samabanga aphakamileyo, kodwa ke ndandisiya manqaphanqapha ndaza ndayeka emva konyaka. Ndandikhe ndabanjwa, yaye loo nto kunye nokuzalwa ngumKorea zenza kwaba nzima ukufumana umsebenzi. Ekugqibeleni ndada ndawufumana kodwa ke ndenzakala emadolweni nto leyo eyandenza andakwazi ukwenza umsebenzi ofuna amandla.
Ndaqalisa ukuziphilisa ngokungcakaza. Ngelo xesha ndandihlalisana nenye intombazana eyayifuna ukuba ndifumane umsebenzi obhadlileyo ndize ndiyitshate. Kodwa ke ndandisenza imali engayiwayo ngokungcakaza yaye ndandingafuni ukuyeka.
INDLELA EBUTSHINTSHE NGAYO UBOMI BAM IBHAYIBHILE: Ngenye imini kwafika iNgqina likaYehova apho ndandihlala khona laza landinika incwadi ethi Life—How Did It Get Here? By Evolution or by Creation? Ndandingazange ndikhe ndizibuze lo mbuzo. Noko ke, emva kokufunda le ncwadi ndavuma ukufunda okungakumbi ngeBhayibhile. Ndandisoloko ndizibuza ukuba kwenzeka ntoni xa sisifa. Iimpendulo ezicacileyo endazifumana eBhayibhileni ngalo mxholo neminye zandenza ndaziva ngathi kususwe amaxolo ebendenza ndingaboni.
Ndakubona ukubaluleka kokuzenza izinto endandizifunda eBhayibhileni. Ngoko ndawubhalisa umtshato wam, ndayeka ukutshaya ndaza ndacheba neenwele. Nokungcakaza ndakuyeka.
Kwakungekho lula ukutshintsha. Ngokomzekelo, ndandingakwazi ukuliyeka ngokwam icuba. Kodwa ndancedwa kukuthandaza nokuthembela kuYehova uThixo. Nomsebenzi wokuqala endawufumanayo emva kokuba ndiyekile ukungcakaza wawulucelomngeni. Wawunzima kodwa imali endandihlawulwa yona yayisisiqingatha nje semali endandiyenza ngokungcakaza. Ivesi yeBhayibhile eyandinceda ngeloo xesha lobunzima yayiyeyabaseFilipi 4:6, 7. Ithi: “Musani ukuxhalela nantoni na, kodwa ezintweni zonke zaziseni izibongozo zenu kuThixo ngomthandazo nesikhungo nombulelo; yaye uxolo lukaThixo olungaphaya kokuqonda luya kuzilinda iintliziyo zenu namandla enu engqondo ngoKristu Yesu.” Izihlandlo ezininzi esi sithembiso siye saba yinyaniso kum.
INDLELA ENDINGENELWE NGAYO: Umfazi wam akazange akuthande ukuqalisa kwam ukufunda iBhayibhile namaNgqina kaYehova. Kodwa wathi akubona iinguqu endandizenza wafunda naye waza waqalisa ukuya kwiintlanganiso zamaNgqina kaYehova. Namhlanje sobabini singamaNgqina kaYehova. Kuyintsikelelo ukukhonza uThixo kunye!
Ndandicinga ukuba ndonwabile ngaphambi kokuba ndifunde iBhayibhile. Kodwa ke ngoku ndikwazi kakuhle ukuba kuyintoni ukonwaba. Ukuphila ngemigaqo yeBhayibhile akuyo ndlwan’ iyanetha kodwa ke ndiqinisekile ukuba yeyona ndlela ifanelekileyo yokuphila.
INGXELO YOBOMI
IGAMA: ELIZABETH JANE SCHOFIELD
IMINYAKA YOBUDALA: 35
ILIZWE: UNITED KINGDOM
UBOMI BANGAPHAMBILI: WAYEPHILELA UKUZONWABISA
INDLELA ENDANDIPHILA NGAYO NGAPHAMBILI Ndakhulela eHardgate, idolophu encinane engaseGlasgow, eScotland. Xa ndandineminyaka esixhenxe, umama waba liNgqina likaYehova, waza waqalisa ukundifundisa iBhayibhile. Xa ndandineminyaka eli-17 ubudala ndandithanda ukubutha neetshomi zam zasesikolweni—ndisiya emidanisweni, ndiphulaphula umculo ongxolayo yaye ndisela. Ndandingacingi nokucinga ngoThixo neBhayibhile. Ndandiphilela ukozonwabisa ngeempelaveki. Noko ke, yatshintsha yonke loo nto xa ndandineminyaka engama-21 ubudala.
Ndatyelela izalamane zam ezazihlala eMantla eIreland. Xa ndandilapho ndabona umngcelele wamaProtestanti. Intiyo endayibona phakathi kwamaProtestanti namaKatolika kuloo mngcelele yandothusa kakhulu, ibe yandenza ndacingisisa. Ndakhumbula izinto endandizifundiswe ngumama eBhayibhileni yaye ndandisazi ukuba uThixo akasoze abamkele abantu abophula imithetho yakhe. Kwatsho kwacaca kum ukuba nam bendiphilela isiqu sam ndingenamsebenzi nendlela afuna ndiphile ngayo uThixo. Ndagqiba ekubeni xa ndibuyela eScotland, ndiyiphande kakuhle into efundiswa yiBhayibhile.
INDLELA EBUTSHINTSHE NGAYO UBOMI BAM IBHAYIBHILE: Ukuqala kwam ukuya kwintlanganiso yamaNgqina kaYehova emva kokuba ndibuyele ekhaya, ndandingakhululekanga. Noko ke, wonke umntu owayelapho wandenza ndaziva ndisekhaya. Elinye iNgqina elalinobubele laba nomdla kakhulu kum njengoko ndandiqalisa ukuphila ngokuvisisana neemfundiso zeBhayibhile. Landenza ndaziva ndisekhaya nam ebandleni. Iitshomi zam endandikade ndiphila nazo zaqhubeka zindimemela eziyolweni, kodwa ndazixelela ukuba ndandizimisele ukuphila ngemilinganiselo yeBhayibhile. Ekugqibeleni zancama.
Ndandikade ndicinga ukuba iBhayibhile yincwadi nje yemithetho. Kodwa ke ndatshintsha. Ndaqalisa ukubabona abantu ekuthethwa ngabo eBhayibhileni njengabantu bokoqobo ababeneemvakalelo nababebuthathaka njengam. Nabo babezenza iimpazamo, kodwa uYehova uThixo wayebaxolela xa beguquka. Ndaye ndaqiniseka ukuba nangona ndaye ndamshiya uThixo xa ndandisemncinane, uza kundixolela aze azilibale izono zam ukuba ndizama kangangoko ukwenza intando yakhe.
Indlela awayeziphethe ngayo umama nayo yandichukumisa kakhulu. Nangona ndaye ndamlahla uThixo, yena akazange amlahle. Umzekelo wakhe wokunyaniseka wandenza ndaqonda ukuba ukukhonza uYehova kwakuwufanele umgudu. Xa ndandiselula ndimana ndisiya kushumayela nomama, ndandingawuthandi lo msebenzi yaye ndandingaziboni ndichitha ubom bam ndishumayela. Kodwa ngoku ndiye ndagqiba kwelokuba ndizibonele ubunyaniso besithembiso samazwi kaYesu abhalwe kuMateyu 6:31-33. Wathi: “Musani ke ukuxhala nisithi, ‘Siza kudla ntoni na?’ okanye, ‘Siza kusela ntoni na?’ okanye, ‘Siza kunxiba ntoni na?’ . . . UYihlo osemazulwini uyazi ukuba ziyimfuneko kuni zonke ezi zinto. “Qhubekani, ke ngoko, nifuna kuqala ubukumkani nobulungisa bakhe, yaye zonke ezinye izinto ziya kongezelelwa kuni.” Kungekudala emva kokuba ndibhaptiziwe ndawulahla umsebenzi wam ndaza ndafumana umsebenzi wesingxungxo, ukuze ndibe ngumshumayeli osisigxina.
INDLELA ENDINGENELWE NGAYO: Xa ndandiselula ndiphilela ukuzonwabisa ngeempela-veki, ndandinganelisekanga. Ubomi bam babungenamva namphambili. Ngoku ukukhonza uYehova kundenze ndaneliseka, yaye ubomi bam bunenjongo. Nditshatile, ibe mna nomyeni wam sityelela amabandla ahlukahlukeneyo amaNgqina kaYehova veki nganye, ukuze siwakhuthaze. Kum lo msebenzi lelona lungelo ligqwesileyo ndakha ndanalo. Ndiyambulela uYehova ngokundinika elinye ithuba!
[Amagama acatshulweyo akwiphepha 27]
“Zisuka nje ndabona ukuba ndandifumene into ebalulekileyo. Noko ke, ngeloo xesha andizange ndibone sizathu sakutshintsha”
[Amagama acatshulweyo akwiphepha 29]
“Ndandingakwazi ukuliyeka ngokwam icuba. Kodwa ndancedwa kukuthandaza nokuthembela kuYehova uThixo”
[Amagama acatshulweyo akwiphepha 30]
“Ndandikade ndicinga ukuba iBhayibhile yincwadi nje yemithetho. Kodwa ke ndatshintsha. Ndaqalisa ukubabona abantu ekuthethwa ngabo eBhayibhileni njengabantu bokoqobo ababeneemvakalelo nababebuthathaka njengam”