Imibuzo Evela Kubafundi

Ngaba kufanelekile ukuba udade athwale xa eguqulela intetho yeBhayibhile kwintetho yezandla kwiintlanganiso zamaKristu, kwiindibano ezincinane nezinkulu?

Ngokuqhelekileyo, umfazi ongumKristu ufanele athwale xa esenza izinto ezifanele zenziwe ngumyeni wakhe okanye umzalwana ebandleni. Oku kuvisisana nomgaqo owachazwa ngumpostile uPawulos wokuba “wonke umfazi othandaza okanye oprofeta intloko yakhe ingenasigqubuthelo uhlazisa intloko yakhe” kuba “intloko yomfazi yindoda.” (1 Kor. 11:3-10) Xa udade ethwala kwimeko elolo hlobo, ubonisa ukuba uyazithoba kwilungiselelo lobuthixo ebandleni lamaKristu.—1 Tim. 2:11, 12.a

Noko ke, kuthekani ukuba udade uguqulela intetho enikelwa ngumzalwana kwintetho yezandla? Liyinyaniso elokuba, lo dade udlulisela nje kubaphulaphuli inkcazelo esuka kwisithethi. Loo nto ithetha ukuba, asinguye ofundisayo kodwa ngumzalwana amtolikelayo. Kodwa ke, ukuguqulela kwintetho yezandla kwahluke kakhulu ekuguquleleni kulwimi oluthethwayo. Xa kuguqulelwa kulwimi oluthethwayo, abaphulaphuli banokunikel’ ingqalelo kwisithethi baze kwangaxeshanye baphulaphule lowo utolikayo. Ngokungafaniyo noodade abaguqulela kwintetho yezandla, oodade abaguqulela kulwimi oluthethwayo badla ngokungabikho kwindawo ethimb’ ingqalelo yabaphulaphuli. Maxa wambi, basenokude bakhethe ukuhlala phantsi ngoxa betolika, okanye ukuba bemi ngeenyawo bajonge isithethi kunokujonga abaphulaphuli. Ngoko akuyi kuba yimfuneko ukuba bathwale.

Ngapha koko, ngenxa yokuhambela phambili kwezinto zobugcisa ezisetyenziswayo xa kuguqulelwa iintetho kwintetho yezandla, kuye kunikelwe ingqalelo kulowo utolikayo. Umntu otolikayo udla ngokubonakala kwiscreen esikhulu, ngoxa isithethi sona sisenokungabonwa nokubonwa ngabaphulaphuli. Ngoko ke, kuya kuba kuhle ukuba udade otolikayo ayiqonde indima yakhe njengetoliki ngokuthi athwale.

Olu lwalathiso luhlaziyiweyo, lukuchaphazela njani ukuguqulela kwintetho yezandla iinxalenye ezikwiSikolo Sobulungiseleli Sobuthixo, imiboniso namagqabaza enziwa kwiSifundo SeBhayibhile Sebandla, kwiNtlanganiso Yenkonzo nakwiSifundo SeMboniselo? Ngaba udade oguqulela kwintetho yezandla ngezo zihlandlo naye ufanele athwale? Kubonakala ukuba kwezinye iimeko kusenokungabi yimfuneko ukuba enjenjalo, ekubeni bonke abaphulaphuli beqonda ukuba enyanisweni asinguye oqhuba loo ntlanganiso. Ngokomzekelo, usenokungathwali xa etolika amagqabaza abaphulaphuli, iintetho ezinikelwa ngoodade okanye imiboniso. Noko ke, xa etolika eguqulela iintetho zabazalwana kwiintlanganiso, etolikela umqhubi weSifundo SeMboniselo okanye umqhubi weSifundo SeBhayibhile Sebandla naxa eculisa ngentetho yezandla, ufanele athwale. Ebudeni beentlanganiso, udade kusenokufuneka atolikele abazalwana, oodade, abantwana nabadala. Ngenxa yoko, kusenokuba kuhle ukuba athwale de iintlanganiso ziphele.

[Umbhalo osemazantsi]