Imibuzo Evela Kubafundi
Ziziphi iimeko elifanele ibhinqa elingumKristu lithwale entloko ngenxa yezizathu ezingokomoya?
Umpostile uPawulos wabhala: “Wonke umfazi othandaza okanye oprofeta intloko yakhe ingenasigqubuthelo uhlazisa intloko yakhe.” Ngoba? Ngenxa yomgaqo weBhayibhile wobuntloko: “Intloko yomfazi yindoda.” Ukuthandaza okanye ukushumayela kwibandla lamaKristu ngokuqhelekileyo kuyimbopheleleko yendoda. Ngenxa yoko, xa ibhinqa elingumKristu lisingatha imibandela enokuthanani nonqulo ngokuqhelekileyo ebiya kwenziwa yindoda yakhe okanye indoda ebhaptiziweyo, lifanele lithwale entloko.—1 Korinte 11:3-10.
Kusenokuvela iimeko apho umfazi ongumKristu kunokufuneka ngenxa yokuba etshatile athwale. Ngokomzekelo, xa intsapho ihlanganisana kwisifundo seBhayibhile okanye kwisidlo, ngokuqhelekileyo indoda iyakhokela ekufundiseni intsapho nasekuyithandazeleni kuThixo. Noko ke, ukuba ayikholwa, ngumfazi wayo ofanele enze ezo zinto. Ngoko ke, xa ezithandazela yena nabanye ngokuvakalayo okanye xa eqhuba isifundo seBhayibhile kunye nabantwana bakhe kukho indoda yakhe, udade ongumKristu ufanele athwale entloko. Ukuba indoda yakhe ayikho, akuyomfuneko ukuba umfazi athwale entloko, ekubeni egunyaziswe nguThixo ukufundisa abantwana bakhe.—IMizekeliso 1:8; 6:20.
Noko ke, kuthekani ukuba unyana oselula entsatsheni ungumkhonzi ozahluleleyo nobhaptiziweyo kaYehova uThixo? Ekubeni lo nyana elilungu lebandla lamaKristu, ufanele afundiswe ngamalungu alo angamadoda. (1 Timoti 2:12) Ukuba uyise ulikholwa, unyana ufanele afundiswe nguye. Noko ke, ukuba uyise akakho, unina ufanele athwale entloko ukuba uqhubela unyana oselula obhaptiziweyo nabanye abantwana isifundo seBhayibhile. Enoba ucela unyana obhaptiziweyo ukuba athandaze kweso sifundo okanye xa kuza kutyiwa oko kushiyelwa kuye. Usenokuvakalelwa kukuba akakafaneleki ngokwaneleyo yaye usenokukhetha ukuthandaza ngokwakhe. Ukuba kwizihlandlo ezinjalo ukhetha ukuthandaza ngokwakhe, ufanele athwale entloko.
Ngoxa esenza izinto ezithile zebandla, amabhinqa angamaKristu kusenokufuneka ukuba athwale entloko. Ngokomzekelo, kwintlanganiso yasentsimi yaphakathi evekini, kusenokubakho oodade abangamaKristu kuphela, kungekho mzalwana ubhaptiziweyo. Kusenokubakho ezinye izihlandlo xa kungekho madoda abhaptiziweyo kwintlanganiso yebandla. Ukuba kufuneka udade asingathe izabelo ngokuqhelekileyo ezenziwa ngabazalwana kwiintlanganiso zebandla okanye kwintlanganiso yasentsimini, ufanele athwale entloko.
Ngaba ibhinqa elingumKristu lifanele lithwale entloko xa liguqulela iintetho zeBhayibhile lizisa kwintetho eqhelekileyo okanye kwintetho yezandla okanye xa lifunda esidlangalaleni iziqendu zempapasho yeBhayibhile esetyenziswa kwiintlanganiso zebandla? Akunjalo. Oodade abasingatha ezi zabelo abakhokeli okanye abafundisi. Ngokufanayo, akuyomfuneko ukuba oodade bathwale entloko xa besenza imiboniso, bebalisa amava, okanye benikela iintetho zabafundi kwiSikolo Sobulungiseleli Sobuthixo.
Ngoxa ingamadoda abhaptiziweyo afundisayo ebandleni, amadoda namabhinqa anembopheleleko yokushumayela nokufundisa ngaphandle ebandleni. (Mateyu 24:14; 28:19, 20) Ngoko xa ibhinqa elingumKristu lithetha nabantu bangaphandle ngeLizwi likaThixo kukho indoda eliNgqina likaYehova, akuyomfuneko ukuba lithwale entloko.
Noko ke, imeko yahlukile xa kuqhutywa isifundo seBhayibhile esithe rhoqo nesicwangcisiweyo ekhayeni lothile yaye kukho indoda ezahluleleyo nebhaptiziweyo. Esi sisihlandlo esicwangcisiweyo sokufundisa apho lowo uqhuba isifundo esongamela. Phantsi kwezi meko, isifundo siba yinxalenye yokufundisa kwasebandleni. Ukuba ibhinqa eliliNgqina elibhaptiziweyo liqhuba isifundo esinjalo kukho indoda eliNgqina elibhaptiziweyo, kufanelekile ukuba lithwale entloko. Noko ke, umzalwana ozahluleleyo ufanele athandaze. Udade akanakuthandaza kukho umzalwana ozahluleleyo ngaphandle kokuba kukwiimeko ezikhethekileyo, njengomzalwana ongakwazi ukuthetha.
Ngamathuba athile udade ongumKristu usenokuhamba nendoda engumvakalisi woBukumkani engabhaptizwanga xa esiya kuqhuba isifundo seBhayibhile. Ukuba uyathanda, usenokuyicela ukuba isiqhube ngokwayo isifundo. Kodwa ekubeni loo ndoda ingafanelekanga ukumela udade obhaptiziweyo kuYehova ngomthandazo, udade ufanele athandaze ngokwakhe kweso sifundo. Xa udade eqhuba isifundo okanye ethandaza phantsi kwezi meko, ufanele athwale entloko. Nangona loo mvakalisi oyindoda engekabhaptizwa, abantu bangaphandle bamjonga njengelungu lebandla ngenxa yomsebenzi wakhe wokushumayela.
Umpostile uPawulos wabhala: ‘Umfazi ufanele abe nomqondiso wegunya phezu kwentloko yakhe ngenxa yeengelosi.’ Ewe, oodade abangamaKristu banelungelo lokuba yimizekelo emihle kwizigidi zeengelosi eziqhubeka zizithoba ngokuthembeka kuYehova. Hayi indlela ekufaneleke ngayo ukuba amabhinqa ahlonel’ uThixo aqiniseke ukuba ayathwala entloko xa kuyimfuneko!
[Imifanekiso ekwiphepha 26]
Ukuthwala entloko ngumqondiso wokubonakalisa intlonelo yobuntloko