Ingxaki Yomhlaba Wonke, Efuna Isicombululo Somhlaba Wonke
UKUBANDEZELEKA kukho kuyo yonke indawo, yaye baninzi abantu abazama ukunceda abanye. Ngokomzekelo, abezonyango basebenza iiyure ezininzi esibhedlele benceda abagulayo nabenzakeleyo. Izicima-mlilo, amapolisa, abezomthetho nabezohlangulo bazama ukunciphisa okanye ukuthintela ukubandezeleka kwabanye. Imigudu elolo hlobo iyabanceda kakhulu abanye abantu, kodwa akukho mntu okanye mbutho unokukwazi ukunceda wonke umntu. Ngokwahlukileyo koko, uThixo uza kuphelisa ukuhlupheka emhlabeni wonke.
Isiqinisekiso sifumaneka kwincwadi yokugqibela yeBhayibhile: “[UThixo] uya kuzisula zonke iinyembezi emehlweni abo, kungabi sabakho kufa, kungabi sabakho kuzila nakukhala nantlungu kwakhona. Izinto zangaphambili zidlule.” (ISityhilelo 21:4) Cinga ngendlela abaninzi ngayo abantu abaza kuncedwa seso sithembiso. Sishwankathela injongo kaThixo yokuphelisa konke ukuhlupheka. Uza kukwenza oko ngokuphelisa imfazwe, indlala, ukugula, okungekho sikweni nabo bonke abantu abangendawo. Akakho umntu onokukwazi ukuyenza loo nto.
Into Eza Kwenziwa BuBukumkani BukaThixo
UThixo uza kuzizalisekisa izithembiso zakhe esebenzisa uYesu Kristu—umntu wesibini ukuba namandla kwindalo iphela. Liyeza ixesha laxa uYesu eza kuba nguKumkani olawula phezu komhlaba wonke. Ngelo xesha uluntu luza kube lungalawulwa ngookumkani, oomongameli okanye amaqela ezopolitiko. Kunoko luza kulawulwa nguKumkani omnye, urhulumente omnye—uBukumkani bukaThixo.
Obo Bukumkani buza kubatshayela bonke oorhulumente babantu. IBhayibhile yatsho kwamhlamnene ukuba: “UThixo wezulu uya kumisa ubukumkani obungenakuze bonakaliswe. Yaye obo bukumkani abuyi kudluliselwa kubo nabaphi na abanye abantu. Buya kuzityumza buziphelise zonke ezi zikumkani, buze bona bume ukusa kwixesha elingenammiselo.” (Daniyeli 2:44) Bonke abantu baya kumanyana phantsi kolawulo lorhulumente omnye olungileyo—uBukumkani bukaThixo.
Xa wayesemhlabeni, uYesu wathetha izihlandlo ezininzi ngobo Bukumkani. Wathetha ngabo kumthandazo wakhe ongumzekelo, eyalela abafundi bakhe ukuba bathandaze bathi: “Mabufike ubukumkani bakho. Makwenzeke ukuthanda kwakho nasemhlabeni, njengasezulwini.” (Mateyu 6:10) Phawula ukuba uYesu wabonisa ukuba uBukumkani bunxulumene nokwenzeka kokuthanda kukaThixo emhlabeni, nokuba ukuthanda kukaThixo kukuba aphelise ukuhlupheka emhlabeni wonke.
Urhulumente kaThixo wobulungisa uya kuzisa iintsikelelo ekungekho namnye urhulumente wabantu onako ukuzizisa. Khumbula ukuba uYehova wanikela ngoNyana wakhe njengentlawulelo ukuze abantu bafumane ubomi obungunaphakade. Xa kulawula obo Bukumkani abantu baya kwenziwa bafezeke. Ekugqibeleni, uYehova uya “kuginya ukufa ngonaphakade, yaye iNkosi enguMongami uYehova ngokuqinisekileyo iya kosula iinyembezi ebusweni bonke.”—Isaya 25:8.
Abanye basenokuthi: ‘Kutheni ke uThixo engakhange azilungise ezi ngxaki kude kube ngoku? Ulinde ntoni?’ UYehova ngewayekuphelisile okanye akuthintele kwakude kudala konke oku kubandezeleka. Kodwa ke uye wakuvumela ukuba kuqhubeke kukho ukuze balungelwe ngonaphakade abantwana bakhe abasemhlabeni. Abazali bayamvumela umntwana wabo abandezeleke ngoxa bemthanda, xa besazi ukuba loo nto iza kumnceda. NoYehova unezizathu ezivakalayo ezimenze wavumela abantu ukuba babandezeleke okomzuzwana ibe zichaziwe eBhayibhileni. Zibandakanya izinto ezinjengenkululeko yokuzikhethela, isono kunye nelungelo likaYehova lokulawula. IBhayibhile iphinda ichaze ukuba kuye kwavunyelwa isidalwa esithile somoya esikhohlakeleyo ukuba silawule ihlabathi.a
Nangona singenakuzichaza zonke ezi zizathu, kukho izibakala ezibini ezinokusinika ithemba zize zisikhuthaze. Nasi esokuqala: UYehova uza kusisikelela ngaphezu kwako nakuphi na ukubandezeleka esiye sakuva. Ukongezelela koko uThixo usiqinisekisa esithi: “Izinto zangaphambili aziyi kukhunjulwa, zinganyuki zithi qatha entliziyweni.” (Isaya 65:17) UThixo uza kukuphelisa konke ukubandezeleka esiye sakuva ngenxa yokuvumela kwakhe ubungendawo.
Esesibini sithi: UThixo ubeke ixesha elingenakutshintshwa lokuba aphelise ukubandezeleka. Khumbula ukuba umprofeti uHabhakuki wabuza uYehova ukuba wayeza kuluvumela kude kube nini ugonyamelo neengxwabangxwaba. UYehova wathi xa emphendula: “Kuba umbono usengowexesha elimisiweyo . . . Awuyi kufika emva kwexesha.” (Habhakuki 2:3) Elo ‘xesha limisiweyo’ likufuphi, njengoko siza kubona kwinqaku elilandelayo.
[Umbhalo osemazantsi]
a Ukuze ufumane izizathu ezingakumbi zokuba uThixo evumele ukubandezeleka funda isahluko 11 sencwadi ethi Yintoni Ngokwenene Efundiswa YiBhayibhile? epapashwe ngamaNgqina kaYehova.
[Ibhokisi ekwiphepha 7]
IZibhalo Ezalatha Kwikamva Eliqaqambileyo
IIMFAZWE AZISEKHO:
“Yizani, nibone imisebenzi kaYehova, Indlela amise iziganeko ezikhwankqisayo ngayo emhlabeni. Uphelisa iimfazwe kuse esiphelweni somhlaba. Waphula isaphetha nomkhonto; Iinqwelo uzitshisa emlilweni.”—INdumiso 46:8, 9.
UKUVUSWA KWABANTU ABAFILEYO:
“Kuza kubakho uvuko lwamalungisa nabangengomalungisa.”—IZenzo 24:15.
BONKE ABANTU BAZA KUFUMANA UKUTYA:
“Kuya kubakho ukudla okuziinkozo okuninzi emhlabeni; Encotsheni yeentaba kuya kubakho ukuphuphuma.”—INdumiso 72:16.
KUZA KUPHELA UKUGULA:
“Akakho ummi wakhona oya kuthi: ‘Ndiyagula.’”—Isaya 33:24.
ABANTU ABANGENDAWO BAZA KUTSHABALALA:
“Bona ke abangendawo, baya kunqunyulwa emhlabeni; ke wona amaqhophololo, aya kuncothulwa kuwo.”—IMizekeliso 2:22.
KUYA KUBAKHO UBULUNGISA:
“Khangela! Ukumkani [uYesu Kristu] uya kulawula ngobulungisa; zona iinkosana, ziya kulawula njengeenkosana zokusesikweni.”—Isaya 32:1.
[Imifanekiso ekwiphepha 7]
UBukumkani bukaThixo buya kulungisa nakuphi na ukubandezeleka esisenokuba siye sakuva