Ukuxakeka Nokuba Novuyo Enkonzweni KaThixo
UYEHOVA ufuna sihlale sivuya. (INdu. 100:2) Njengomnye wabakhonzi bakhe, kusenokwenzeka ukuba uxakekile. Mhlawumbi wawungaxakekanga ngolu hlobo xa wawuzinikela kuThixo, kodwa ngoku uxakekiswa ziimbopheleleko zokomoya nezempangelo. Usenokuziva unetyala xa ungakwazi ukwenza izinto obuzimisele ukuzenza. Unokuzenza njani zonke ezi zinto uze uqhubeke ‘unovuyo lukaYehova’?—Neh. 8:10.
Uphila kumaxesha anzima yaye kukho izinto ezininzi ezikuxhalabisayo, ngoko kufuneka uzicebe kakuhle izinto oza kuzenza. Ngokuphathelele oku, eli cebiso lanikelwa ngumpostile uPawulos linokuba luncedo: “Hlalani nikuphaphele ngokungqongqo ukuba indlela enihamba ngayo ingabi njengeyabantu abangezozilumko kodwa ibe njengeyezilumko, nizongele ixesha, ngenxa yokuba imihla ingendawo.”—Efe. 5:15, 16.
Ngokuvisisana neso siluleko, unokuzibekela njani usukelo olunokufikeleleka ukuze ukwazi ukwenza ufundisiso lobuqu, ukunyamekela intsapho, ukuya entsimini, emsebenzini nokwenza ezinye izinto?
Usayikhumbula indlela owavakalelwa ngayo xa wawuzinikela kuThixo waza wabhaptizwa? Uvuyo lwakho lwalubangelwa lulwazi onalo ngoYehova neenjongo zakhe. Kusenokwenzeka ukuba wafunda kangangeenyanga eziliqela ukuze ufumane olo lwazi nolo vuyo. Kodwa ngokuqinisekileyo akuzisoli. Oko kwakunceda wenza utshintsho ebomini bakho.
Ukuze uqhubeke uvuya, ufanele uhlale uzondla ngokomoya. Ukuba akulifumani ithuba lokufundisisa iBhayibhile, hlola indlela olisebenzisa ngayo ixesha lakho. Enoba unokufunda imizuzu nje embalwa ngosuku uze ucamngce ngoko usandul’ ukukufunda, oko kunokukunceda usondele ngakumbi kuYehova, yaye ngokuqinisekileyo kuya kukwenza uhlale uvuya.
Abakhonzi bakaThixo abaninzi baye bakwazi ukunciphisa ixesha abalichitha kwizinto ezingeyomfuneko ukuze benze izinto ezibalulekileyo. Zibuze, ‘Lingakanani ixesha endilichitha ndifunda amaphephancwadi okanye amaphephandaba, ndibukele umabonwakude, ndiphulaphule umculo okanye ndisenza ezinye izinto?’ Kunokuba mnandi ukwenza ezo zinto xa ungazenzi ngokugqithiseleyo. (1 Tim. 4:8) Xa uphawula ukuba unengxaki yokusebenzisa ixesha lakho, zama ukucwangcisa kakuhle izinto zakho.
UAdam otshatileyo, onabantwana abathathu nongumdala, uthi xa echaza into emncedayo: “Ndizama ukuphila ubomi obulula. Ndiyaziphepha iindlela zokuzonwabisa ezidla ixesha elininzi nokuba nezinto ezifuna ukunyanyekelwa ngalo lonke ixesha. Oku akuthethi kuthi ndizibandez’ ulonwabo kodwa ndikhetha iindlela zokuzonwabisa ezingafun’ ixesha elininzi.”
Ukucinga ngeengenelo zokwenza izigqibo zobulumko kunokukuvuyisa kuze kukwenze ube nesimo sengqondo esifanelekileyo. Ngokomzekelo uMariusz ongumdala nonabantwana abathathu, uthi: “Emva kokuba ndiqalise ukufunda iBhayibhile, ndaba nembono elungeleleneyo. Maxa wambi ndiba nazo iingxaki, ezininzi kuzo zaziwa nguYehova kuphela. Kodwa kuba endixhasa, ndiba novuyo xa ndicinga ngekamva.”
NjengoMariusz, ukuba nembono elungeleleneyo akukwenzi uyeke ukuxhalaba. Kodwa kunokukunceda uzive ubhetele yaye ukwazi ukujamelana neengxaki zobomi. Sifunda oku: “Yonke imihla yoxhwalekileyo mibi; kodwa onentliziyo echwayitileyo uba netheko rhoqo.” (IMize. 15:15) Kwakhona cinga ngendlela uThixo akuthanda ngayo. Loo nto inokukunceda nawe ukuba umthande uze uqhubeke uvuya.—Mat. 22:37.
Ukubeka uYehova nenkonzo yakhe kwindawo yokuqala ebomini kunokuyenza yonwabe ngakumbi intsapho yakho. Ukubonakalisa iimpawu zamaKristu kunciphisa iingxabano yaye kubangela ukuba amalungu entsapho aphathane kakuhle. Ngenxa yoko, intsapho yenu iya kuba noxolo nomanyano.—INdu. 133:1.
Xa nisenza izinto zokomoya njengentsapho ninokuvuya ngokwenene. UMariusz uthi: “Ixesha endilichitha nentsapho yam lixabisekile kum. Inkosikazi yam iyandixhasa. Xa inako, ihamba nam enkonzweni yasentsimini, xa ndiye kucoca amabala ezemidlalo ngaphambi kwendibano, naxa ndiye kunikela iintetho kwamanye amabandla. Kundikhuthaza ngokwenene oku.”
IZibhalo ziyalela amaKristu ukuba anyamekele iintsapho zawo ngezinto eziphathekayo. (1 Tim. 5:8) Kodwa ukuba umsebenzi wakho wempangelo ukutyela ixesha elininzi, loo nto inokubangela ukuba ungamkhonzi ngovuyo uThixo. Kuthandazele kuYehova oku. (INdu. 55:22) Abanye baye bafumanisa ukuba ukuze babeke uBukumkani bukaThixo kuqala, kufuneka batshintshe umsebenzi. Akakho umKristu ofanele azibhokoxe emsebenzini ade alibale ngezinto ezibalulekileyo zokomoya kuba nje lo msebenzi uhlawula imali eninzi.—IMize. 22:3.
Kunokuba luncedo ukubhala phantsi iingenelo neengxaki ezinokubangelwa ngumsebenzi owenzayo okanye ocinga ukuwenza. Kakade ke, wonk’ umntu uyawunqwenela umsebenzi ohlawula umvuzo oncumisayo. Kodwa, ngaba umsebenzi owenzayo ukwenza ukwazi ukunyamekela intsapho yakho ngokomoya? Zihlole kakuhle iimeko zakho uze wenze izigqibo eziza komeleza ulwalamano lwakho noYehova.
Ukuba umsebenzi owenzayo ubangela ukuba ungenzi inkqubela ngokomoya, ufanele uhlengahlengise iimeko zakho. AmaKristu amaninzi aye enza iinguqulelo ezinkulu ukuze abe nexesha lezinto zokomoya. Omnye umzalwana wasePoland uthi: “Kwaye kwafuneka ukuba ndiyishiye inkampani endandisebenza kuyo kuba ndandisoloko ndisendleleni ngenxa yomsebenzi. Ndandingalifumani ithuba elaneleyo lokwenza izinto zokomoya nelokunyamekela intsapho yam.” Umsebenzi awenzayo ngoku awumtyeli xesha lininzi ibe awumqobi.
Fumana Uvuyo Ngokunceda Abanye
UYesu wathi “kunoyolo ngakumbi ukupha kunokwamkela.” (IZe. 20:35) AmaKristu avulekelwe ngamathuba amaninzi okupha. Oku asenokukwenza ngokuncuma nje, ukumbamba isandla umntu okanye ukumbulela ngokungazenzisiyo ngenxa yokuzibhokoxa kwakhe kwisabelo sobuthixo, nto leyo enokunenza nivuye nobabini.
Umpostile uPawulos wabongoza amanye amaKristu wathi: “Yithuthuzeleni imiphefumlo edandathekileyo, baxhaseni ababuthathaka.” (1 Tes. 5:14) Abantu abaxinezelekileyo basenokungabi nawo amandla okumelana neengxaki. Ngaba unokubanceda abantu abanjalo? Ukuba uphawula ukuba umzalwana wakho akasamkhonzi ngovuyo uYehova, zama ukumkhuthaza. Oko kuya kukunceda nawe. Ezinye iingxaki azisokuze zicombululeke. Kodwa unokubonisa uvelwano uze umkhuthaze umzalwana wakho, umqinisekise ukuba uYehova uya kumxhasa. Abo bathembele kuye abasoze badane.—INdu. 27:10; Isa. 59:1.
Kwakhona, usenokummema lo mzalwana ophelelwe luvuyo ukuba ahambe nawe entsimini. Xa uYesu wathumela abafundi bakhe abangama-70 ukuya kushumayela, bahamba “ngababini.” (Luka 10:1) Ngaba akuvumi ukuba uYesu wakwenza oku ngenjongo yokuba sikhuthazane? Ngaba nawe unokulisebenzisa eli thuba ukuze uncede abanye baphinde babe novuyo?
Zininzi izinto ezixhalabisayo ebomini. Sekunjalo, uPawulos uyasibongoza: “Hlalani ninemihlali eNkosini. Ndiyaphinda ndithi, Yibani nemihlali!” (Fil. 4:4) Kuba umthanda uThixo, umthobela yaye uwenza ngenkuthalo umsebenzi akunike wona, ubomi bakho bunenjongo. Oko kuyakuvuyisa. Ngaphezu koko, uYehova uyakunceda ukuba ukwazi ukujamelana neengcinezelo neengxaki onazo.—Roma 2:6, 7.
Sinokholo lokuba ihlabathi elitsha esilithenjiswe nguYehova lisemnyango. Zininzi ngokwenene iintsikelelo esiya kuzifumana yaye siya kuhlala sivuyile! (INdu. 37:34) Ngenxa yoko sinokuba novuyo, siqinisekile ukuba uYehova uyasisikelela kwanangoku. Ngoko ‘masikhonze uYehova sinemihlali.’—INdu. 100:2.
[Umzobo okwiphepha 8]
(Ukuba ufuna inkcazelo ehlahlelwe kakuhle, yiya kwimpapasho)
Kusenokufuneka wenze uhlengahlengiso kwindlela olisebenzisa ngayo ixesha lakho ukuze uhlale uvuya
UKUZIHLAZIYA NOKUZONWABISA
UKUNYAMEKELA IKHAYA NENTSAPHO
UMSEBENZI
IINTLANGANISO ZAMAKRISTU
UFUNDISISO LOBUQU
UBULUNGISELELI
[Imifanekiso ekwiphepha 10]
Ngaba ungakwazi ukunceda abanye babe novuyo kwakhona?