‘Sivuya Sinemincili’ Ngenxa KaYehova

1-2. (a) Baziva njani abantu abaninzi kule mihla? (b) Yintoni esiza kuthetha ngayo kweli nqaku?

KWELI hlabathi, siphila nabantu abanokwenza nantoni na ukuze bonwabe. Sekunjalo, abade bonwabe. Abaninzi bakhathazekile, futhi baziva bengento yanto. Nabantu bakaYehova basenokuziva ngolo hlobo. Ngenxa yokuba siphila ‘kwimihla yokugqibela,’ sinokulindela ukuba kube ‘nzima ukunyamezela’ iimeko esiphila kuzo nendlela esiziva ngayo.​—2 Tim. 3:1.

² Kweli nqaku siza kuthetha ngezinto ezinokuluba uvuyo lwethu, nangento esinokuyenza ukuze siphinde silufumane. Kodwa makhe siqale sibone ukuba sinokulufumana phi ulonwabo novuyo lokwenene.

SINOKULUFUMANA PHI ULONWABO NOVUYO LOKWENENE?

3. Indalo isifundisa ntoni ngoYehova? (Jonga nemifanekiso.)

³ UYehova uhlala onwabile. Nathi ufuna sonwabe. Loo nto siyibona kwindlela ezisivuyisa ngayo izinto azidalileyo; umhlaba wethu omhle onemibala eyahlukeneyo, izilwanyana ezidlalayo, nokutya okuninzi okumnandi. UThixo usithanda nyhani futhi ufuna siphile kamnandi.

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (a) Yintoni eyenza uYehova ahlale onwabile ngoxa ebona izinto ezibuhlungu ezenzekayo emhlabeni? (b) Usinceda njani uYehova? (INdumiso 16:11)

⁴ Ngoxa uYehova ‘enguThixo owonwabileyo,’ uyazazi izinto ezibuhlungu ezenzekayo emhlabeni. (1 Tim. 1:11) Sekunjalo, akazivumeli zimenze angonwabi. Uyazi ukuba zonke izinto ezibuhlungu ezenzekayo zezokwexeshana. Ubeke usuku aza kuziphelisa ngalo, zingaphindi zibekho. Unyamezele ngomonde de kufike olo suku. Okwangoku, uyayiqonda indlela esiziva ngayo futhi ufuna ukusinceda. Usinceda njani? Ngokusenza sivuye. (Funda iNdumiso 16:11.) Makhe sibone indlela awamvuyisa ngayo uNyana wakhe, uYesu.

5-6. Ziintoni ezenza uYesu avuye?

⁵ Kuyo yonke indalo kaYehova, uYesu ngoyena wonwabileyo. Kutheni sisitsho? Nazi izizathu ezibini. (1) “Uneempawu ezifana nezikaThixo ongabonakaliyo.” Kuyo yonke into ayenzayo, ububonakalisa njengokuba bunjalo ubuntu bukaTata wakhe. (Kol. 1:15) (2) Ngoyena uhleli kakhulu noTata wakhe, olufumaneka kuye ulonwabo.

⁶ UYesu ebesoloko evuyiswa kukwenza nantoni na uTata wakhe athi makayenze. (IMize. 8:​30, 31; Yoh. 8:29) Ngenxa yokuthembeka kwakhe, uYehova uyavuyiswa nguye.​—Mat. 3:17.

7. Ziintoni ezinokusenza sonwabe nyhani?

⁷ Nathi sinokonwaba ngokwenene xa sisondela koyena Mntu luvela kuye ulonwabo, uYehova. Xa sizipha ixesha lokufunda ngaye size simlinganise, siza kuya sisonwaba. Enye into esenza sivuye, kukwenza izinto azithandayo nokwazi ukuba siyamvuyisa.a (INdu. 33:12) Kodwa siza kuthini ukuba sikhe singonwabi okanye sihlala singonwabanga? Ngaba loo nto ithetha ukuba uThixo akavuyiswa sithi? Akunjalo. Ngenxa yokuba sinesono, ngamanye amaxesha siba buhlungu okanye sikhathazeke kakhulu. UYehova uyayiqonda loo nto. (INdu. 103:14) Makhe sithethe ngezinto ezinokuluba uvuyo lwethu, nangokuba sinokwenza ntoni ukuze siphinde silufumane.

UNGAVUMELI NANTONI NA IBE UVUYO LWAKHO

8. Yintoni enokwenzeka kuthi xa sineengxaki?

⁸ Isela Lokuqala: Iingxaki zobomi. Ngaba uneengxaki ezibangelwa kukutshutshiswa, iintlekele zemvelo, ukuhlupheka, ukugula okanye ukwaluphala? Kunokuba lula ukuba iingxaki ezinjengezi zilube uvuyo lwethu, ngokukodwa xa kungekho nto sinokuyenza ngazo. IBhayibhile ithi “intliziyo ebuhlungu iyadimaza.” (IMize. 15:13) UBabis ongumdala, nowaswelekelwa ngumntakwabo nabazali bakhe bobabini kwisithuba nje seminyaka emine, uthi: “Ndandiziva ndindodwa, ndicinga nokuba akukho mntu unokundinceda. Ndandikhe ndikhathazwe nakukuba ngenxa yokuxakeka, zange ndiziphe ixesha lokuba kunye nabazali nomntakwethu ngaphambi kokuba basweleke.” Zinokusitheza amandla nyhani iingxaki zobomi.

9. Yintoni enokusinceda siphinde sivuye? (Yeremiya 29:​4-7, 10)

⁹ Yintoni enokusinceda siphinde sivuye? Kukuyamkela imeko esikuyo nokuba nombulelo. Abantu abaninzi ehlabathini bacinga ukuba ukuze wonwabe, yonke into kufuneka ihambe kakuhle ebomini bakho. Bubuxoki obo. Ngokomzekelo, uYehova wayalela amaYuda awayethinjwe eBhabhiloni ukuba abamkele ubomi bawo bokuba ngabathinjwa, aze azame ngandlela zonke ukonwaba kwezo meko zazinzima. (Funda uYeremiya 29:​4-7, 10.) Yintoni esiyifundayo? Zama ukuyamkela imeko yakho, ube nombulelo nangezinto ezintle ezenzekayo kuwe. Sukulibala ukuba uYehova akasoze akushiye, uza kukunceda. (INdu. 63:7; 146:5) UEffie owafumana ingozi eyamshiya engakwazi ukuhamba uthi: “Ndancedwa kakhulu nguYehova, abantu basekhaya nalibandla. Ngoko ndavakalelwa kukuba ukunikezela kwakuza kubonisa ukuba andinambulelo. Ndifuna ukubonisa uYehova nabahlobo bam ukuba ndiyababulela ngezinto abandenzele zona, nabandenzela zona ngoku.”

10. Kutheni sinokuvuya naxa sineengxaki?

¹⁰ Nokuba thina okanye iintsapho zethu zehlelwa zizinto ezimbi, sinokuhlala sivuya.b (INdu. 126:5) Kutheni sisitsho? Kaloku uvuyo lwethu aluxhomekekanga kwiimeko esikuzo. Omnye uvulindlela onguMaria uthi: “Ukuhlala uvuya nokuba uneengxaki akuthethi kuthi uyayifihla indlela oziva ngayo. Kuthetha ukuba awuzilibalanga izinto esizithenjiswe nguYehova. UTata wethu uza kusinceda sihlale sivuya.” Khumbula, nokuba kunzima kangakanani ngoku, zonke iingxaki esinazo zezokwexeshana. Kungabanga xesha lide, uYehova uza kuziphelisa ibe ngathi zange zibekho.

11. Zikufundisa ntoni izinto ezenzeka kumpostile uPawulos?

¹¹ Siza kuthini xa sibona ngathi iingxaki esinazo zibonisa ukuba asisamvuyisi uYehova? Kungasinceda ukucinga ngabanye abakhonzi bakaYehova ababethembekile nababeneengxaki ezinzima kakhulu. Khawucinge ngompostile uPawulos. Wakhethwa nguYesu ngokwakhe ukuba ase inyaniso “kwiintlanga, kookumkani nakoonyana bakaSirayeli.” (IZe. 9:15) Yayiyinyhweba nyhani ke leyo. Sekunjalo, uPawulos waba neengxaki ezininzi. (2 Kor. 11:​23-27) Ngaba ukuba neengxaki ezazibonakala zingapheli kwakubonisa ukuba uYehova akasavuyiswa nguye? Kwakungabonisi loo nto. Eyona nto yayiboniswa kukunyamezela kwakhe yayikukuba uYehova uyamsikelela. (Roma 5:​3-5) Ngoku khawucinge ngeyakho imeko. Unyamezele zonke iingxaki onazo uthembekile kuYehova. Ngoko unokuqiniseka ukuba nawe uyamvuyisa.

12. Xa zingenzeki izinto ebesizimisele ukuzenza, sinokuziva njani?

¹² Isela Lesibini: Ukungakwazi ukukhonza uYehova ngendlela obungathanda ngayo. (IMize. 13:12) Ukumthanda nokumbulela kwethu uYehova kusenza sibe nezinto esizimisele ukumenzela zona. Kodwa ukuba sizimisela ukumenzela izinto ezingavumelaniyo neemeko zethu, sisenokutyhafa. (IMize. 17:22) UHolly onguvulindlela uthi: “Ndandifuna ukuya kwiSikolo Sabavangeli BoBukumkani, ukuya kukhonza kwelinye ilizwe, okanye ukuncedisa kumsebenzi wokwakha eRamapo. Kodwa iimeko zam zatshintsha, andakwazi ukwenza ezo zinto ndandizimisele ukuzenza. Ndandiphoxekile. Kukhathaza nyhani ukungakwazi ukwenza izinto obufuna ukuzenza.” Baninzi abakhonzi bakaThixo abaziva ngale ndlela.

13. Xa iimeko zakho zingakuvumeli ukuba wenze izinto obungathanda ukuzenza, ziintoni onokuzimisela ukuzenza?

¹³ Yintoni enokusinceda siphinde sivuye? Khumbula ukuba uYehova akafuni senze izinto ezingaphaya kwamandla ethu. Ukusixabisa kwakhe akuxhomekekanga ekubeni zininzi kangakanani izinto esikwaziyo ukumenzela zona. UYehova ufuna sithobeke, futhi sithembeke. (Mika 6:8; 1 Kor. 4:2) Uhoye kakhulu umntu esinguye ngaphakathi kunezinto esizenzayo. Ngenxa yaloo nto, akukho ngqiqweni ukufuna ukwenza izinto ezingaphezu kwezo uYehova azilindeleyo kuthi.c Ngoko, ukuba iimeko zakho azikuvumeli ukuba wenze izinto obunokuthanda ukumenzela zona uYehova, zama ukwenza ezo unamandla okuzenza. Ngokomzekelo, ngaba unokunceda ekuqeqesheni abantu abasebatsha okanye ekukhuthazeni abazalwana noodade abakhulileyo? Ngaba unokuzimisela ukuya kukhuthaza umntu, ukumkhuthaza ngefowuni, okanye ngokumthumelela umyalezo? UYehova uza kukusikelela ngokukwenza uvuye njengoko usebenzela ukwenza izinto onamandla okuzenza. Mayingaphumi engqondweni yakho into yokuba kungabanga xesha lide, kwihlabathi elitsha likaYehova siza kusoloko sinamathuba okumkhonza ngeendlela esingazange sazicinga. UHolly ekukhe kwathethwa ngaye uthi: “Ndiye ndizikhumbuze ukuba ndiza kuphila ngonaphakade. UYehova uza kundinceda ndizenze ezinye izinto endifuna ukuzenza kwihlabathi elitsha.”

14. Yeyiphi enye into enokusenza siyeke ukuvuya?

¹⁴ Isela Lesithathu: Ukwanelisa isiqu sakho. Abanye abantu basebenzisa iiwebhsayithi zokuncokola ukuze bakhuthaze abanye ukuba ukuze bonwabe nyhani, kufuneka benze izinto eziza kwanelisa iziqu zabo. Bakhuthaza ukuba ukuze wonwabe nyhani kufuneka wenze izinto ozithandayo, uthenge izinto ozifunayo, uzule neendawo. Akukho rongo ukwenza ezo zinto. UYehova usidale ngendlela yokuba sizithande izinto ezintle. Sekunjalo, abantu abaninzi bafumanise ukuba izinto abebecinga ukuba ziza kubavuyisa, zezona zibenza bangavuyi. UEva onguvulindlela uthi, “Xa uphilela nje ukwanelisa isiqu sakho, awude wanele.” Xa sihlala sifuna ukwanelisa iziqu zethu, ekugqibeleni sinokuphoxeka size sibe buhlungu.

15. Yintoni esinokuyifunda kuKumkani uSolomon?

¹⁵ Imiphumo ebuhlungu yokwanelisa iziqu zethu sinokuyifunda kuKumkani uSolomon. Wazama ukufumana ulonwabo ngokwenza izinto azinqwenelayo, njengokutya ukutya okumnandi, ukumamela umculo omnandi, nokuthenga zonke izinto ezintle ezazinokuthengwa ngemali ngexesha lakhe. Kodwa zonke ezo zinto zange zimenze onwabe. Wathi: “Ilihlo alaneli kukubona; nendlebe ayigcwali kukuva.” (INtshu. 1:8; 2:​1-11) Abanye abantu bacinga ukuba xa benemali, bekwazi ukwenza nantoni na abafuna ukuyenza baza konwaba. Bayaziqhatha, kuba ezo zinto soze zimenze onwabe nyhani umntu.

16. Ukwenzela abanye abantu izinto kunokusinceda njani siphinde sivuye? (Jonga nemifanekiso.)

¹⁶ Yintoni enokusinceda siphinde sivuye? UYesu wasifundisa ukuba “kuvuyisa kakhulu ukupha kunokuphiwa.” (IZe. 20:35) UAlekos ongumdala uthi: “Ndiye ndizimisele ukubanceda ngeendlela ezilula abantu. Xa ndisipha, andicingi kakhulu ngesiqu sam. Iyandivuyisa ke loo nto.” Ziintoni wena onokuzenzela abantu? Xa ubona umntu esengxakini, zama ukumkhuthaza. Usenokungakwazi ukuyilungisa ingxaki yakhe, kodwa unokumthuthuzela ngokummamela kakuhle, ngokumvela, nangokumkhumbuza ukuba awuphosele kuYehova umthwalo wakhe. (INdu. 55:22; 68:19) Unokumnceda aqiniseke ukuba uYehova akamlahlanga. (INdu. 37:28; Isa. 59:1) Unokude ucele ukumenzela ezinye izinto, njengokumphekela okanye ukuphuma naye nibethwe ngumoya. Mcele ukuba aye kushumayela nawe, kuba loo nto inokumkhuthaza. Vuma ukusetyenziswa nguYehova. Ukuhoya kakhulu abanye abantu kuneziqu zethu kuza kusenza sonwabe nyhani.​—IMize. 11:25.

17. Yintoni esimele siyenze ukuba sifuna ukonwaba nyhani? (INdumiso 43:4)

¹⁷ Ukuba siqhubeka sisondela kuTata wethu osezulwini, sinokonwaba nyhani. IBhayibhile isiqinisekisa ukuba ‘sinokuvuya sinemincili’ ngoYehova. (Funda iNdumiso 43:4.) Ngoko nokuba kwenzeka ntoni ebomini bethu, sinokuziva sikhuselekile. Masihlale sicinga ngoYehova, oyena Mntu luvela kuye uvuyo olungasoze luphele.​—INdu. 144:15.