Ubomi Namaxesha AmaKristu Enkulungwane Yokuqala

Iindawo Awayephila Kuyo

‘Andizange ndinifihlele nto . . . ndanifundisa esidlangalaleni nakwizindlu ngezindlu.’—IZENZO 20:20.

YIBA nomfanekiso wakho ungena kwisango elikhulu lesixeko senkulungwane yokuqala. Esi sixeko sakhiwe phezu kwenduli njengezinye. Ngasentla kukho iqolo ekubonakala kulo amantla esixeko. Kukwakho nothotho lwamapomakazi ezindlu ezineegadi ezibiyelwe ngeendonga ezinde. Apha kuhlala izinhanha. Kumazantsi enduli kukho ezinye izindlu, ezingalinganiyo ngobukhulu nezakhiwe ngeendlela ezahlukahlukeneyo. Ezi zindlu zinkulu zakhiwe ngamatye nezinemigangatho eliqela zihlala abanye abantu abatyebileyo nangona bengezizo ezingawothiyo umlilo, njengabarhwebi nabanye abantu abanemihlaba. Enyeleni yenduli kuhlala amahlwempu. Izindlu zawo zincinane yaye zakhiwe kwizitrato ezixineneyo okanye zingqumbene ndawonye.

Njengoko uhamba kwezo zitrato zixineneyo uva amavumba ahlukahlukeneyo. Abafazi baphekile yaye ivumba lokutya kwabo livakala kuyo yonke indawo. Uva izandi zezilwanyana nabantwana abadlalayo. Amadoda asebenza nzima kwiindawo ezinengxolo nezinukayo.

Iintsapho zamaKristu zazihlala kwezi zindlu. Ubomi bawo bemihla ngemihla babuqala apha, efunda ngoThixo aze anqulele kuzo.

Izindlu Ezincinane Njengoko kusenjalo nanamhlanje, imizi yabantu yayisahluka ngokwendawo eyakhiwe kuyo kunye nemali eyayinayo intsapho. Ezona zindlu zincinane zasisiba (1) negumbi elinye eyayihlala kulo yonke intsapho. Izindlu ezininzi ezincinane zazakhiwe ngezitena zodaka. Ezinye zazakhiwe ngamatye angaqingqwanga. Zombini ezi ntlobo zezindlu zazidla ngokwakhiwa phezu kwesiseko samatye.

Ngaphakathi, iindonga kunye nomgangatho zazisanyentwa yaye zazifuna ukulungiswa rhoqo. Eluphahleni okanye eludongeni kwakuvulwa umngxuma wokukhupha umsi xa kubasiwe. Kwakungabikho mpahla yendlu ingako ngaphandle nje kwezinto eziyimfuneko.

Izindlu zakhona zazifulelwa ngodaka luze uphahla olwenziwe ngeenkuni neengcongolo luxhaswe ngeentsika. Olo daka lodongwe lwaluye lusanyentwe ukuze amanzi angangeni. Eluphahleni kwakusiyiwa ngeleli eyayibekwa ngaphandle.

Nakwiimeko ezinjalo, izindlu zamaKristu zaziyindawo yokuhlala efanelekayo, kuzo nkqu neentsapho zamahlwempu zazikwazi ukuba zizityebi ngokomoya yaye zonwabe.

Izityebi Ezikudidi Oluphakathi Izindlu zamatye ezinemigangatho emibini (2) zezityebi ezikudidi oluphakathi zazisiba negumbi leendwendwe. (Marko 14:13-16; IZenzo 1:13, 14) Kweli gumbi kwakunokuqhutywa iintlanganiso yaye lalidla ngokusetyenziswa nangamaxesha emithendeleko. (IZenzo 2:1-4) Ezi zindlu nezinye ezinkudlwana kunazo (3) zabarhwebi nabantu ababenemihlaba zazisakhiwa ngezitena zekalika. Ngaphakathi, umgangatho nodonga lwalusanyentwa kuze ngaphandle kukalikwe mhlophe.

Kumagumbi aphezulu naseluphahleni kwakusiyiwa ngezinyuko. Uphahla lwalusenzelwa ungqameko ukuze abantu bangawi. (Duteronomi 22:8) Xa ilanga ligqats’ ubhobhoyi, kwakusenziwa umthunzi eluphahleni owawusiba yindawo efanelekileyo yokufunda, ukucamngca, ukuthandaza okanye ukuphumla.—IZenzo 10:9.

Ngoxa iintsapho zazikwazi ukuhlala nezalamane zazo, ezi zindlu ezinamagumbi amakhulu zazisiba namagumbi amaninzi, kuquka amagumbi okulala, ikhitshi eliphangaleleyo kunye nendawo yokutyela.

Amakhaya Atofotofo Izindlu ezazakhiwe njengezamaRoma (4) zazingalingani ngobukhulu yaye zazakhiwe ngendlela engafaniyo. Igumbi lokutyela elikhulu eyayisenzela kulo izinto ezininzi intsapho lalijikelezwa ngamanye amagumbi amakhulu nawo. Ezinye izindlu zazinemigangatho emibini okanye emithathu (5) okanye zihonjiswe ngeegadi ezibiyelwe ngeendonga.

Imizi yabantu abafumileyo yayisiba nefanitshala yexabiso, enye yayo yayide yenziwe ngophondo lwendlovu negolide. Ezinye zezi zindlu zazisiba namanzi ngaphakathi neendawo zokuhlambela. Kusenokwenzeka ukuba eminye imigangatho yayisenziwa ngamaplanga okanye ngebhastile elimibalabala yaye mhlawumbi iindonga zazihonjiswa ngemisedare. Kwakubaswa iimbawula zamalahle xa kubanda. Iifestile zazisogqunywa ngamaplanga ukuze kungaqhekezwa yaye kwakubekwa imidiyadiya.—IZenzo 20:9, 10.

Enokuba yayingakanani okanye yakhiwe njani imizi yawo, amaKristu enkulungwane yokuqala ayenobubele. Kwakungekho nzima ngabaveleli abahambahambayo ukufumana intsapho enobubele ababenokuhlala nayo de bagqibe utyelelo lwabo kweso sixeko okanye loo dolophu.—Mateyu 10:11; IZenzo 16:14, 15.

“Ikhaya LikaSimon NoAndreya” UYesu wamkelwa ngezandla ezishushu “ekhayeni likaSimon noAndreya.” (Marko 1:29-31) Indlu yaba balobi beentlanzi ifanele ukuba yayakhiwe phakathi kwezindlu ezixineneyo (6) ezazisakhiwa zibe ninzi endaweni enye.

Iminyango neefestile zezo zindlu zazijonga ebaleni apho yayisenzelwa khona imisebenzi emininzi njengokupheka, ukubhaka, ukuguba, ukuncokola nokutya.

Izindlu zaseKapernahum ezinomgangatho omnye zazisakhiwa ngamatye angaqingqwanga. Kwakusibakho izinyuko eziya kuphahla olwenziwe ngodongwe olwalubekwa phezu kwamaplanga. (Marko 2:1-5) Umgangatho wawurhidwa kuze kwandlalwe ukhuko.

Kwakusibakho izitrato phakathi kwezindlu ezazingakunxweme loLwandle lwaseGalili. IKapernahum yayiyindawo yokuhlala efanelekileyo kubantu ababephila ngokuloba.

“Kwindlu Ngendlu” Lilonke, izindlu zamaKristu enkulungwane yokuqala zazingafani—ezinye zazinegumbi nje elinye elenziwe ngomhlaba ezinye zinkulu yaye zitofotofo.

Ezo zindlu zazingeyondawo yokufihla intloko nje kuphela. Ikhaya laliyindawo yokufunda ngoThixo apho intsapho yayinqulela khona kunye. AmaKristu ayedibana emakhayeni amanye ukuze afunde iZibhalo aze ancokole. Izinto awayezifunda emakhayeni awo ayezisebenzisa njengoko ayesenza umsebenzi obalulekileyo wokushumayela nokufundisa “kwindlu ngendlu” kuwo wonke ummandla owawuphantsi kweRoma.—IZenzo 20:20.