Oko Sikufunda KuYesu

Indlela Yokulandela UKristu

UYesu wayedla ngokuthi kubantu ababekholwa kuye: “Yiba ngumlandeli wam.” (Mateyu 9:9; 19:21) Kuthetha ntoni ukuba ngumlandeli kaYesu okanye ukuba ngumKristu? Makhe siphendule le mibuzo mithathu ibalulekileyo.

Ufanele ubaphathe njani abanye abantu?

▪ Umfundi kaYesu ufanele aphathe abanye ngendlela awathi uYesu mabaphathwe ngayo. Ngokomzekelo, uYesu wathi: “Zonke izinto, ngoko, enifuna abantu bazenze kuni, yenzani ngokunjalo nani kubo.” Kuthekani ukuba umntu othile uyakuxakanisa? UYesu wathi: “Lungisana ngokukhawuleza nalowo ukumangaleleyo.” Kwakhona wathi kubalandeli bakhe: “Ukuba anibaxoleli abantu izigqitho zabo, noYihlo akayi kunixolela ezenu izigqitho.”—Mateyu 5:25; 6:15; 7:12.

UYesu wathi kubantu abatshatileyo: “Nivile ukuba kwathiwa, ‘Uze ungakrexezi.’ Kodwa mna ndithi kuni wonk’ ubani oqhubeka ekhangela umfazi ngokokude amkhanuke sele emkrexezile entliziyweni yakhe.” UmKristu wokwenene uphila ngokuvisisana neemfundiso zikaYesu.—Mateyu 5:27, 28.

AmaKristu okwenene ancama ubomi obutofotofo ukuze ancede abanye. NoYesu wayenjalo. Ngokomzekelo, ngenye imini uYesu nabafundi bakhe bashumayela kangangokuba bade ababi nalo nexesha eli lokutya. Ngenxa yoko uYesu wahamba nabafundi bakhe ukuze baye kuphumla kwindawo ababengazukuphazanyiswa kuyo. Kodwa ke abantu beva ukuba wayesiya phi baza babaleka baya kufika kuqala kunaye. IBhayibhile ibalisa ithi: “Akuphuma, wabona isihlwele esikhulu, kodwa wasisizela, ngenxa yokuba sasinjengezimvu ezingenamalusi. Yaye wasifundisa izinto ezininzi.” (Marko 6:30-34) Nawe unokumxelisa uYesu ngokwenza izinto athi uThixo zenze, nangona kusenokuba nzima ngamanye amaxesha.

Kutheni ufanele ushumayeze abanye iindaba ezilungileyo?

▪ UYesu wafundisa abalandeli bakhe ukushumayela iindaba ezilungileyo. Wathi kubapostile bakhe: “Njengoko nihamba, shumayelani, nithi, ‘Ubukumkani bamazulu busondele.’” (Mateyu 10:7) Abalandeli bakaYesu banesigidimi esibalulekileyo. UYesu wathi xa wayethandaza: “Oku kuthetha ubomi obungunaphakade, ukungenisa kwabo ulwazi ngawe, wena ukuphela koThixo oyinyaniso.”—Yohane 17:3.

UYesu wathetha ngomsebenzi owawuza kwenziwa zizigidi zabalandeli bakhe, esithi: “Kwaye ezi ndaba zilungileyo zobukumkani ziya kushunyayelwa kuwo wonke umhlaba omiweyo kube bubungqina kuzo zonke iintlanga.” (Mateyu 24:14) Ukuba ufundile ngoBukumkani bukaThixo yaye uyayikholelwa into ethethwa yiBhayibhile ufanele nakanjani ushumayeze abanye. Abalandeli abaninzi bakaYesu badla ngokuqala bathethe nezalamane zabo ngoBukumkani bukaThixo.—Yohane 1:40, 41.

Kutheni ufanele ubhaptizwe?

▪ UYesu ufanele ukuba wathandaza wathi xa wayebhaptizwa kumlambo iYordan: “Ndiyeza ukuza kwenza intando yakho, Thixo.” (Hebhere 10:7) Nawe ufanele ubhaptizwe ukuba ufuna ukwenza ukuthanda kukaThixo. UYesu wathi: ‘Benzeni abafundi abantu beentlanga zonke, nize nibabhaptize.’—Mateyu 28:19.

Kufuneka enze ntoni umntu obhaptiziweyo yaye ufumana ntoni ngaloo nto? Abalandeli bakaYesu ababhaptiziweyo bakhonza uThixo ngomphefumlo wabo wonke. UYesu wacaphula uMthetho kaThixo othi: “Uze umthande uYehova uThixo wakho ngentliziyo yakho iphela nangomphefumlo wakho uphela nangengqondo yakho iphela.” (Mateyu 22:37) Waphinda wathi: “Ukuba nabani na ufuna ukundilandela, makazincame.” (Mateyu 16:24) Xa umntu ebhaptizwa ubonisa ukuba uyazincama ukuze abe ngokaThixo. Abantu abanobu buhlobo naye banokucela uThixo ukuba abaphe isazela esicocekileyo.—1 Petros 3:21.

Ukuze ufumane inkcazelo engakumbi, funda isahluko 18 sencwadi ethi, Yintoni Ngokwenene Efundiswa YiBhayibhile?, epapashwe ngamaNgqina kaYehova.