Qhubeka Usakha Ibandla
“Hlalani nithuthuzelana yaye nisakhana.”—1 TES. 5:11.
1. Ziziphi iintsikelelo ezifunyanwa ngabo bakwibandla lamaKristu, kodwa ziziphi iingxaki ezisenokubakho?
UKUBA lilungu lebandla lamaKristu yintsikelelo enkulu. Uba nolwalamano oluhle noYehova. Ukukhokelwa kwakho liLizwi lakhe kuyakukhusela kwimiphumo emibi ebangelwa kukuphila ngendlela engawafanelanga amaKristu. Ungqongwe ngabahlobo bokwenene abakunqwenelela izinto ezintle. Usikelelwe ngokwenene. Kodwa ke, amaKristu amaninzi aneengxaki ekufuneka ejamelene nazo. Amanye kusenokufuneka ancedwe ukuze aqonde izinto ezinzulu ezikwiLizwi likaThixo. Amanye ayagula okanye adandathekile, okanye kusenokwenzeka ukuba avuna imiphumo yezigqibo eziphosakeleyo awazenzayo. Sonke siphila kwihlabathi elahlukanisiweyo noThixo.
2. Sifanele senze ntoni xa abazalwana bethu bejamelene neengxaki yaye ngoba?
2 Akakho kuthi ongathanda ukubona amanye amaKristu ethwele nzima. Umpostile uPawulos wafanisa ibandla nomzimba yaye wathi “ukuba ilungu elinye liyabandezeleka, onke amanye amalungu abandezeleka kunye nalo.” (1 Kor. 12:12, 26) Kwiimeko ezinjalo, sifanele sizame ukubaxhasa abazalwana noodadewethu. Kukho iZibhalo ezininzi ezibonisa indlela amanye amalungu ebandla awayebanceda ngayo abanye. Njengoko siza kuhlolisisa ezi ngxelo, cinga ngendlela onokubanceda ngayo abanye. Unokubanceda njani abazalwana bakho kwizinto zokomoya uze wakhe ibandla likaYehova?
“Bamthabathela Kubo”
3, 4. UAkwila noPrisila bamnceda njani uApolo?
3 Ukufika kuka-Apolo e-Efese, wayesele engumvangeli ozimiseleyo. Ngokutsho kwengxelo ekwiZenzo, “njengoko wayevutha ngumoya, wayehamba ethetha kwaye efundisa ngokuchanileyo izinto ezingoYesu, kodwa eqhelene nobhaptizo lukaYohane kuphela.” Ukungazi kuka-Apolo ngokubhaptizwa “egameni loYise neloNyana nelomoya oyingcwele” kubonisa ukuba kusenokwenzeka ukuba washunyayezwa ngabafundi bakaYohane uMbhaptizi okanye ngabalandeli bakaYesu ngaphambi kwePentekoste yowama-33 C.E. Nangona uApolo wayezimisele, kwakukho izinto awayengekaziqondi kakuhle. Ukunxulumana namanye amaKristu kwamnceda njani?—IZe. 1:4, 5; 18:25; Mat. 28:19.
4 UAkwila noPrisila ababengamaKristu, beva uApolo ethetha ngesibindi kwindlu yesikhungu, bamthabathela kubo baza bamfundisa. (Funda iZenzo 18:24-26.) Oku kwabonisa uthando ababenalo. Kakade ke, uAkwila noPrisila kwakufuneka bamncede ngobuchule uApolo, balumkele ukumenza azive egxekwa. Into awayengayazi nje yimbali yebandla lamaKristu okuqala. Akuthandabuzeki ukuba uApolo wayenombulelo kwaba bahlobo bakhe batsha ngenxa yokuba bemfundise izinto ezibalulekileyo. Esebenzisa le nkcazelo ibalulekileyo, uApolo “wabanceda kakhulu” abazalwana bakhe baseAkhaya waza wanikela ubungqina.—IZe. 18:27, 28.
5. Luluphi uncedo olunikwa abantu ngamawakawaka abavakalisi boBukumkani yaye oko kuye kwaba nayiphi imiphumo?
5 Namhlanje abaninzi ebandleni lobuKristu banombulelo kwabo babancedayo ukuze baqonde iBhayibhile. Kuye kwabakho ubuhlobo bokwenene phakathi kwabafundi nabo babafundelayo. Amaxesha amaninzi, ukuze uncede abantu ukuba baqonde inyaniso, kufuneka uncokole nabo rhoqo kangangeenyanga eziliqela. Noko ke, abavakalisi boBukumkani bakulungele ukuzincama ngolo hlobo, kuba bayaqonda ukuba ubomi babantu buxhomekeke enyanisweni. (Yoh. 17:3) Kuvuyisa ngokwenene ukubona abantu beyiqonda inyaniso, bephila ngokuvisisana nayo yaye besenza ukuthanda kukaYehova!
“Kwakunikelwa Ingxelo Entle Ngaye”
6, 7. (a) Kwakutheni ukuze uPawulos akhethe uTimoti ukuba ahambe naye? (b) UTimoti wancedwa ukuba enze yiphi inkqubela?
6 Xa umpostile uPawulos noSilas batyelela eListra ebudeni bohambo lwabo lobuvangeli lwesibini, badibana nomfana ogama linguTimoti, ekusenokwenzeka ukuba wayekwishumi elivisayo okanye engaphezulwana kweminyaka engama-20 ubudala. “Kwakunikelwa ingxelo entle ngaye ngabazalwana eListra naseIkoniyo.” Unina kaTimoti, uYunike noninakhulu uLoyisi babengamaKristu azahluleleyo, kodwa uyise wayengenguye umKristu. (2 Tim. 1:5) Kusenokwenzeka ukuba uPawulos wadibana nale ntsapho kwiminyaka embalwa ngaphambili, kutyelelo lwakhe lokuqala. Kodwa ngoku lo mpostile waba nomdla okhethekileyo kuTimoti kuba wayebonakala eyindoda eqolileyo. Ngoko emva kokuba efumene imvume kubadala balapho, uTimoti wahamba noPawulos kuhambo lwakhe lobuvangeli.—Funda iZenzo 16:1-3.
7 Zazininzi izinto ekwakufuneka uTimoti ezifundile kule ndoda inamava. Kodwa wazimisela, kangangokuba emva kwexesha elithile, uPawulos wayekwazi ukuthuma uTimoti ukuba aye kutyelela amabandla njengommeli wakhe. Kwiminyaka emalunga ne-15 uTimoti ekunye noPawulos, lo mfana owayengenamava nowayeneentloni waba ngumveleli obalaseleyo.—Fil. 2:19-22; 1 Tim. 1:3.
8, 9. Amalungu ebandla anokubakhuthaza njani abaselula? Zekelisa.
8 Kuninzi okunokwenziwa ngabafana namabhinqa aselula ebandleni lamaKristu namhlanje. Ukuba nje banokukhuthazwa kuze kubonakaliswe inkathalo kubo, aba baselula banokuzabalazela amalungelo ongezelelekileyo phakathi kwabantu bakaYehova. Jonga kwelakho ibandla! Ngaba bakho abaselula abanokuxelisa uTimoti? Unokubanceda uze ubakhuthaze ukuba babe ngoovulindlela, bakhonze eBheteli, babe ngabathunywa bevangeli okanye abaveleli abahambahambayo. Yintoni onokuyenza ukuze ubancede bazibekele olo sukelo?
9 UMartin, osele eneminyaka engama-20 elilungu lentsapho laseBheteli, uyikhumbula kakuhle indlela omnye umveleli wesiphaluka awabonisa umdla ngayo kuye kwiminyaka engama-30 eyadlulayo xa babesebenza kunye entsimini. Lo mveleli walichaza ngomdla ixesha yena awayekhonza ngalo eBheteli esengumfana. Wakhuthaza uMartin ukuba acingisise ngokuzenza asebenziseke ngendlela efanayo kwintlangano kaYehova. UMartin uvakalelwa kukuba le ncoko angenakuyilibala yaba nempembelelo enkulu kwizigqibo awazenzayo kamva. Mhlawumbi nawe unokubanceda abahlobo bakho abaselula ngokuthetha nabo ngokuzibekela usukelo lokomoya.
“Yithuthuzeleni Imiphefumlo Edandathekileyo”
10. Wavakalelwa njani uEpafrodito yaye ngoba?
10 UEpafrodito wathabatha uhambo olude noludinisayo esuka eFilipi esiya eRoma ukuya kutyelela uPawulos, owayesentolongweni ngenxa yokholo lwakhe. Le ndoda yaba ngumthunywa wabazalwana baseFilipi. Wayengaphathanga izipho aza kuzinika umpostile uPawulos kuphela kodwa wayecebe ukuhlala naye ukuze enze nantoni na esemandleni akhe ukuze amncede kwimeko yakhe eyayinzima. Kodwa ke, xa wayeseRoma, uEpafrodito ‘wagulela ukufa.’ UEpafrodito wavakalelwa kukuba akawenzanga umsebenzi wakhe waza wadandatheka.—Fil. 2:25-27.
11. (a) Kutheni singafanele sothuke xa abanye ebandleni bedandathekile? (b) UPawulos wakhuthaza ukuba ancedwe njani uEpafrodito?
11 Namhlanje, zininzi izinto ezibangela ukuba abantu badandatheke. Ingxelo evela kwiWorld Health Organization ithi umntu omnye kwabahlanu unokudandatheka ebomini. Oku kuyabachaphazela nabantu bakaYehova. Ukuba nzima kokondla intsapho, impilo enkenenkene, ukudana ngenxa yeempazamo zethu nezinye iingxaki kunokwenza umntu adimazeke. Yintoni eyayinokwenziwa ngabaseFilipi ukuze bancede uEpafrodito? UPawulos wabhala wathi: “Mamkeleni ngovuyo ngokwaseNkosini; yaye hlalani nibaphatha ngembeko abantu abanjalo, kuba ngenxa yomsebenzi weNkosi wajika ekufeni, ewubeka esichengeni umphefumlo wakhe, khon’ ukuze akwenzelele ngokupheleleyo ukungabikho kwenu apha ukuze ninikele inkonzo yobuqu kum.”—Fil. 2:29, 30.
12. Yintoni enokuthuthuzela abo badandathekileyo?
12 Nathi sifanele sibakhuthaze abazalwana abadimazekileyo nabadandathekileyo. Ngokungathandabuzekiyo zininzi izinto abazenzayo enkonzweni kaYehova esinokubancoma ngazo. Mhlawumbi benze iinguqulelo ezinkulu ebomini babo ukuze babe ngamaKristu okanye babe kwinkonzo yexesha elizeleyo. Siyayixabisa imigudu yabo, yaye sifanele sibaqinisekise ukuba noYehova uyayixabisa. Ukuba ukwaluphala okanye impilo enkenenkene yenza kube nzima ukuba abanye abathembekileyo benze oko babekade bekwenza, sifanele sibonakalise intlonelo kubo ngenxa yeminyaka emininzi abayichitha bekhonza uThixo. Enoba bakwimeko enjani, uYehova uthi kubantu bakhe abathembekileyo: “Yithuthuzeleni imiphefumlo edandathekileyo, baxhaseni ababuthathaka, nizeke kade umsindo kubo bonke.”—1 Tes. 5:14.
“Nimxolele Ngobubele Nize Nimthuthuzele”
13, 14. (a) Sisiphi isigqibo esenziwa libandla laseKorinte, yaye ngoba? (b) Ukususwa kwale ndoda kwaba nawuphi umphumo?
13 Ngenkulungwane yokuqala kwakukho indoda eyayingumhenyuzi ongaguqukiyo ebandleni laseKorinte. Ihambo yayo yayilingcolisa ibandla yaye yayisothusa nabantu abangakholwayo. Ngoko uPawulos wayefanele ukuyalela ukuba le ndoda isuswe ebandleni.—1 Kor. 5:1, 7, 11-13.
14 Le ngqeqesho yaba nemiphumo emihle. Ibandla lakhuseleka kwimpembelelo eyonakalisayo yaye lo moni wabuyela ezingqondweni waza waguquka. Ngenxa yezenzo zale ndoda ezazibonisa ukuba iguqukile, kwileta yakhe yesibini eyayisiya kwelo bandla, uPawulos wathi le ndoda mayibuyiselwe. Kodwa ke kwakungafanelanga kuphelele apho. UPawulos waphinda wathi ibandla lifanele ‘liyixolele ngobubele lize liyithuthuzele, ukuze ingadliwa kukuba buhlungu kwayo ngokugqithiseleyo.’—Funda eyesi-2 yabaseKorinte 2:5-8.
15. Sifanele sibajonge njani aboni abaye babuyiselwa ebandleni?
15 Yintoni esiyifundayo kule ngxelo? Siba buhlungu xa umntu esuswa kubudlelane. Kusenokwenzeka ukuba loo mntu uye wazisa ugculelo egameni likaThixo nasebandleni. Kusenokwenzeka ukuba wone wena ngokungqalileyo. Sekunjalo, xa abadala ababelwe ukuba bagwebe begqibe kwelokuba, ngokuvisisana nolwalathiso lukaYehova, lo moni uguqukileyo abuyiselwe ebandleni, oku kubonisa ukuba uxolelwe nguYehova. (Mat. 18:17-20) Ngaba asifanele simxelise? Ukuthetha rhabaxa nokungamxoleli bekuya kuthetha ukuba silwisana noYehova. Ukuze ibandla likaThixo libe noxolo nomanyano lize lamkeleke kuYehova, ngaba asifanele ‘sibonakalise uthando’ kuboni abaye baguquka baza babuyiselwa?—Mat. 6:14, 15; Luka 15:7.
“Uyandinceda”
16. UMarko wenza ntoni eyabangela ukuba uPawulos adane?
16 Enye ingxelo eseZibhalweni ibonisa ukuba asifanele sibajonge kakubi abo baye basidanisa. Ngokomzekelo, uYohane Marko wamdanisa gqitha umpostile uPawulos. Njani? Kuhambo lwabo lokuqala lobuvangeli uPawulos noBharnabhas bahamba noMarko ukuze abancedise. Kodwa ebudeni bolo hambo, ngasizathu sithile esingachazwanga, uYohane Marko wabashiya waza wabuyela kowabo. Esi sigqibo samdanisa uPawulos kangangokuba xa babeceba ukuthabatha uhambo lwesibini, yena noBharnabhas baphikisana ngokuhamba noMarko. Ngenxa yale nto yayenzekile, uPawulos wayengafuni ukuba uMarko ahambe nabo.—Funda iZenzo 13:1-5, 13; 15:37, 38.
17, 18. Sazi njani ukuba impikiswano eyayiphakathi kukaPawulos noMarko yalungiswa yaye sinokufunda ntoni koku?
17 Kubonakala ukuba uMarko akazange avumele ukugatywa nguPawulos kumthez’ amandla, kuba wahamba noBharnabhas kuhambo lwakhe lobuvangeli komnye ummandla. (IZe. 15:39) Into eyabhalwa nguPawulos ngaye kwiminyaka kamva ibonisa ukuba wayethembekile. UPawulos, ngoku owayelibanjwa eRoma, wabhalela uTimoti ileta embiza. Kwakule leta, uPawulos wathi: “Thabatha uMarko uze naye, kuba uyandinceda emsebenzini wobulungiseleli.” (2 Tim. 4:11) UPawulos wabona ukuba uMarko ukhulile.
18 Nalapha kukho nto ithile esinokuyifunda. UMarko waba ngumthunywa wevangeli ophumelelayo. Akazange akhutyekiswe kukugatywa nguPawulos. Yena noPawulos babekhulile ngokomoya yaye akuzange kubekho butshaba phakathi kwabo. Kunoko, uPawulos wagqala uMarko njengomntu oluncedo noxabisekileyo. Ngoko xa abazalwana belungise ukungavisisani okuphakathi kwabo eyona nto ilungileyo iya kuba kukulibala ngaloo nto baze bancede abanye ukuba benze inkqubela ngokomoya. Xa sijonga iimpawu ezintle kwabanye, ibandla liya kwakheka.
Ibandla Kunye Nawe
19. Amalungu ebandla lamaKristu anokubanceda njani abanye?
19 Kula ‘maxesha amanqam ekunzima ukujamelana nawo,’ uyalufuna uncedo lwabazalwana noodadewenu abasebandleni yaye nabo bayalufuna uncedo lwakho. (2 Tim. 3:1) Amanye amaKristu asenokungayazi eyona ndlela afanele ajamelane ngayo neemeko zawo, kodwa uYehova yena uyayazi. Unokusebenzisa amalungu ebandla awahlukahlukeneyo—nkqu nawe—ukuze ancede abanye. (Isa. 30:20, 21; 32:1, 2) Ngoko ke, nceda wamkele isibongozo sikaPawulos! “Hlalani nithuthuzelana yaye nisakhana, kanye njengokuba enyanisweni nisenza.”—1 Tes. 5:11.
Ubuya Kuphendula Uthini?
• Kutheni amalungu ebandla lamaKristu efanele akhane?
• Ziziphi iimeko ezinzima onokunceda abanye ukuba bajamelane nazo?
• Kutheni silufuna uncedo lwabanye abasebandleni?
[Umfanekiso okwiphepha 11]
Xa omnye umKristu ejamelene nemeko enzima, sinokumxhasa
[Umfanekiso okwiphepha 12]
Kuninzi okunokwenziwa ngabafana namabhinqa aselula namhlanje ebandleni lamaKristu