Indlela Yokunceda Umhlobo Ogulayo

NGABA wakha wangayazi into ofanele uyithethe ukuze uthuthuzele umhlobo wakho? Qiniseka ukuba unako ukuyilungisa le ngxaki. Njani? Akukho mithetho ingqongqo ofanele uyilandele. Izithethe ziyohluka ngokweendawo. Nabantu banobuntu obungafaniyo. Ngoko ke into ethuthuzela omnye umntu ogulayo isenokungamthuthuzeli omnye. Neemeko kunye nendlela avakalelwa ngayo umntu isenokungafani yonke imihla.

Eyona nto ibalulekileyo kukuzibeka ezihlangwini zaloo mntu uze uzame ukuqonda eyona nto afuna umenzele yona. Ungayenza njani loo nto? Nanga amacebiso ambalwa asekelwe eBhayibhileni.

Phulaphula Ngenyameko

IMIGAQO YEBHAYIBHILE:

“Wonke umntu umele akhawuleze ukuva, acothe ukuthetha.”—YAKOBI 1:19.

“Kukho ixesha lokuthi cwaka nexesha lokuthetha.”—INTSHUMAYELI 3:1, 7.

◼ Xa utyelele umntu ogulayo phulaphula ngenyameko uze ube novelwano. Ungakhawulezi ucebise okanye ucinge ukuba ufanele usoloko usiza nesicombululo sazo zonke iingxaki zakhe. Ukuba ukhawuleza uthethe usenokuthetha into engafanelekanga. Umntu ogulayo akasoloko efuna iimpendulo kodwa ufuna umntu oza kumphulaphula.

Mvumele athethe. Ungambeth’ emlonyeni uze uyisingele phantsi imeko yakhe ngokuthetha izinto ezidla ngokuthethwa ngabanye abantu xa bethuthuzela. UEmílio uthi: “Ndahlaselwa sisifo esandenza ndayimfama.”a “Maxa wambi ndiziva ndiphantsi yaye abahlobo bam badla ngokundithuthuzela ngamazwi athi: ‘Asinguwe wedwa oneengxaki. Abanye abantu baneengxaki ezingaphezu lee kwezi zakho.’ Kodwa ke abayiqondi into yokuba ukuyenza ibonakale incinci ingxaki yam akundincedi. Kunoko, indenza ndizive ndiphelelwe lithemba.”

Mvumel’ umhlobo wakho aphalaz’ imbilini yakhe ngaphandle kokoyika ukuba uza kuhlatyw’ amadlala. Xa ekuxelela ukuba uyoyika, velana naye kunokuba umxelele ukuba angoyiki. UEliana onomhlaza uthi: “Ukukhala ngenxa yokuba ndisoyika imeko endikuyo akuthethi kuthi andisamthembi uThixo.” Zama ukuyibona imeko yomhlobo wakho njengokuba injalo kungekhona into wena ofuna ibe yiyo. Ukhumbule kwakhona ukuba imeko akuyo imenza abe buthathaka. Yiba nomonde. Phulaphula—enokuba usoloko ekuxelela into enye. (1 Kumkani 19:9, 10, 13, 14) Usenokuba ufuna ukuthetha nawe ngentlungu akuyo.

Yiba Novelwano Uze Umcingele

IMIGAQO YEBHAYIBHILE:

“Yibani nemihlali kunye nabantu abanemihlali; lilani kunye nabantu abalilayo.”—ROMA 12:15.

“Zonke izinto . . . enifuna abantu bazenze kuni, yenzani ngokunjalo nani kubo.”—MATEYU 7:12.

◼ Zibeke ezihlangwini zomhlobo wakho. Xa elungiselela ukuya kutyandwa okanye enyangwa isifo esithile naxa elinde iziphumo zoxilongo usenokungakhululeki aze abe nephuku. Zama ukuyiqonda lonto uze uqhubane naye ngobulumko. Eli isenokungabi loxesha lokubuza izinto ezininzi ngokukodwa ngokuphathelele imicimbi yakhe.

UAna Katalifós osisazi ngengqondo uthi: “Sivumele isigulane ukuba sithethe ngesigulo saso xa sifuna. Xa sikhululekile thetha ngayo nantoni na esifuna ukuthetha ngayo. Xa singakucacelanga ukuthetha unokuthula uze usibambe ngesandla. Ngamanye amaxesha uyakufumanisa ukuba umntu ogulayo ufuna nje umntu aza kuphalazel’ imbilini yakhe kuye.”

Kulumkele ukuzithi pahaha iingxaki zomhlobo wakho. Umbhali uRosanne Kalick owasinda kumhlaza izihlandlo ezibini ubhala athi: “Njengoko uzama ukunceda umhlobo wakho yithathe njengeyimfihlo yonke into akuxelela yona. Ngaphandle kokuba uceliwe ukuba uthethe egameni lentsapho musa ukudiza amahlebo. Buza kulo mntu ugulayo ukuba yintoni afuna ixelelwe abanye abantu.” UEdson owasinda kumhlaza uthi: “Omnye umhlobo wahamb’ exelela abantu ukuba ndandinomhlaza yaye ndandiza kufa kungekudala. Ungalibali ukuba ngelo xesha ndandisandula ukwenziwa utyando. Ndandisazi ukuba ndandinomhlaza, kodwa ndandisalinde iziphumo zoxilongo. Ngelo xesha wawungekasasazeki kuwo wonke umzimba. Kodwa ndandisele ndenzakele. Zamenzakalisa kakhulu umfazi wam izinto ezazithethwa nezazibuzwa ngabantu ababethetha nje bengacinganga.”

Ukuba umhlobo wakho uzama ukwenza isigqibo ngohlobo lonyango oluthile musa ukumchazela ukuba yintoni obuya kuyenza ukuba ubunguye. Umbhali uLori Hope owayenomhlaza uthi: “Ngaphambi kokuba uthumele amanqaku okanye iindaba ezithile kumntu onomhlaza okanye obenawo, kuhle ukuqala ubuze ukuba loo mntu uyafuna na ukufunda ngezinto ezinjalo. Kungenjalo usenokuthi ungaqondanga umenze buhlungu umhlobo wakho.” Asinguye wonke umntu ofuna ukuchazelwa ngeentlobo zonyango ezahlukahlukeneyo.

Nokuba ungumhlobo wakhe osenyongweni musa ukuhlala ixesha elide xa uze kumbona. Bubalulekile kakhulu ubukho bakho, kodwa umhlobo wakho usenokuba akafuni kuchitha xesha lininzi kunye nawe. Usenokuba udiniwe yaye akanawo amandla okuthetha okanye ukuphulaphula ixesha elide. Kwangaxeshanye musa ukubonakala ngathi uxhinile. Umhlobo wakho kufuneka abone ukuba unenkathalo.

Ukuba novelwano kuquka ukulungelelana nokukwazi ukubona ukuba yintoni ofanele uyenze. Ngokomzekelo, ngaphambi kokuba uphekele umhlobo wakho ogulayo okanye umphathele iintyatyambo usenokumbuza ngohlobo lokutya okanye ezinye izinto ezimgulisayo. Ukuba wena uyagula okanye mhlawumbi unomkhuhlane kunokuba kuhle ukuba uqale uchache ngaphambi kokuba utyelele umhlobo wakho.

Mkhuthaze

IMIGAQO YEBHAYIBHILE:

“Ulwimi lezilumko luyaphilisa.”—IMIZEKELISO 12:18.

“Amazwi enu makasoloko ekholekile, enongwe ngetyuwa.”—KOLOSE 4:6.

◼ Ukuba unesimo sengqondo esifanelekileyo ngomhlobo wakho ogulayo, amazwi nezenzo zakho ziya kuyibonisa lonto. Jonga umhlobo wakho ngala ndlela wawumjonga ngayo ngaphambi kokuba agule. Musa ukuvumela ukugula kwakhe kuphazamise ubuhlobo benu. Ukuba uthetha nomhlobo wakho ngokungathi uthetha nosizana lomntu olungenakuzinceda naye usenokuqalisa ukuzibona ngolo hlobo. URoberta onesifo samathambo, uthi: “Ndiphathe njengomntu oqhelekileyo. Ewe kona ndinesiphene kodwa ke ndingumntu nam. Musa ukundisizela yaye ungathethi nam ngokungathi andibhadlanga.”

Ukhumbule ukuba eyona nto ibalulekileyo asiyiyo le uyithethayo kodwa yindlela oyithetha ngayo. Kwanelizwi lakho linokuba negalelo. Emva kokuba kufunyaniswe ukuba unomhlaza, uErnesto wafowunelwa ngumhlobo wakhe owayephesheya waza wathi: “Andikholelwa ukuba wena unomhlaza!” UErnesto uthi: “Indlela awathetha ngayo yandenza ndahanjelwa ngumzimba.”

Umbhali uLori Hope uchaza omnye umzekelo esithi: “Ukubuza ukuba ‘Unjani?’ kunokuthetha izinto ezininzi kumntu ogulayo. Indlela obuzwa ngayo lo mbuzo, izimbo zomzimba nexesha obuzwe ngalo inokuyithomalalisa intlungu okanye imenze oyike lowo ugulayo.”

Umntu ogulayo usenokuba ufuna ukuziva ekhathalelwe, iqondwa imeko yakhe yaye ehlonelwa. Ngoko mqinisekise ukuba ubalulekile kuwe yaye ukulungele ukumnceda. URosemary owayenomhlaza wengqondo uthi: “Eyona nto yandikhuthazayo yayikukuva abahlobo bam besithi bayandithanda yaye bakulungele ukundinceda enoba kwenzeka ntoni.”—IMizekeliso 15:23; 25:11.

Yiba Luncedo

UMGAQO WEBHAYIBHILE:

“Masingathandi ngazwi nangamlomo, kodwa ngezenzo nangenyaniso.”—1 YOHANE 3:18.

◼ Iintswelo zomhlobo wakho ziya kutshintsha njengoko isifo sakhe sinyangwa. Kodwa usenokufuna uncedo ngalo lonke elo xesha. Zama ukuchaza izinto oza kumnceda ngazo kunokusuka nje uthi “undibize xa kukho nantoni na oyifunayo.” Ezinye zezinto onokumenzela zona ukuze umbonise ukuba uyakhathala ziquka ukupheka, ukucoca, ukuhlamba impahla, ukuayina, ukumyela evenkileni nokumsa ngemoto yakho esibhedlele xa sibala nje ezimbalwa. Thembeka uze ubambe ixesha. Qiniseka ukuba uyazenza izinto obumthembise zona.—Mateyu 5:37.

Umbhali uRosanne Kalick uthi: “Nantoni na esiyenzela abantu abagulayo enoba incinane okanye inkulu kangakanani, iluncedo.” USílvia owahlaselwa ngumhlaza izihlandlo ezibini naye uyavuma esithi: “Kwakundithuthuzela gqitha ukukhatshwa ngabahlobo bam abahlukahlukeneyo xa ndisiya kunyangwa kwenye idolophu. Endleleni sasidla ngokuthetha ngezinto ezahlukahlukeneyo size xa sibuya sikhe simise ukuze sifumane into eselwayo. Loo nto yayindenza ndizive kungekho nto itshintshileyo kubomi bam.”

Kodwa ungaze ucinge ukuba uyayazi eyona nto ifunwa ngumhlobo wakho. UKalick uthi: “Mbuze, umbuze de umbuzisise.” Wolek’ umsundulo esithi: “Njengoko umnceda musa ukufuna ukumenzela yonke into. Loo nto inokubangela ingxaki. Ukuba awundivumeli ndizenzele izinto ndisenokucinga ukuba andinto yanto. Kuhle xa ndiziva ndikwazi ukuzimela. Andifuni kuzibona ngathi ndilixhoba. Ngoko ke ndincede ndenze oko ndinokukwenza.”

Kusenokwenzeka ukuba umhlobo wakho ufuna ukuziva esakwazi ukuzenzela izinto. UAdilson, onesifo sikaGawulayo uthi: “Xa ugula akufuni kuziva ulikheswa ngokungathi ungungantweni. Usafuna ukuncedisa nokuba mhlawumbi zincinane izinto onokuzenza. Kuba mnandi xa ubona ukuba zikho izinto osakwaziyo ukuzenza. Loo nto ikwenza ube nomnqweno wokuphila. Ndifuna abantu bandivumele ndizenzele izigqibo baze bazihlonele ezo zigqibo. Ukugula akuthethi ukuba asisakwazi ukuba ngootata, oomama okanye nayo nantoni na enye.”

Hlala Usondele Kuye

UMGAQO WEBHAYIBHILE:

“Iqabane lokwenyaniso lithanda ngamaxesha onke, yaye lingumzalwana ozalelwe ixesha lokubandezeleka.”—IMIZEKELISO 17:17.

◼ Ukuba awukwazi ukutyelela umhlobo wakho ngenxa yokuba ehlala kude kakhulu kunawe okanye ngenxa yezinye iimeko unokumfowunela okanye umbhalele. Yintoni onokuyibhala kwileta eya kuye? UAlan D. Wolfelt, onceda abantu abasezintlungwini uthi: “Mkhumbuze ngamaxesha amnandi enakhe nanawo. Mchazele ukuba uza kuphinda ubhale . . .kungekudala, uze uqiniseke ukuba uyasigcina eso sithembiso.”

Ungoyiki ukumkhuthaza umhlobo wakho ogulayo kuba usonqena ukuthetha izinto ezingafanelekanga. Ubukhulu becala eyona nto ibalulekileyo bubukho bakho. ULori Hope uthi kwincwadi yakhe: “Sonke sikhe sizithethe izinto ezinokungaqondwa kakuhle ngabanye size ngaloo ndlela sibakhubekise singaqondanga. Asiyongxaki loo nto. Ingxaki ivela xa ukoyika ukwenza impazamo kukwenza ucezele kude kumntu okufuna uncedo lwakho.”

Umhlobo olele ngandletyananye usenokuba ukufuna kakhulu kunangaphambili. Yiba ‘liqabane lokwenyaniso.’ Usenokungayiphelisi intlungu akuyo umhlobo wakho kodwa unokumenza akwazi ukunyamezela.

[Umbhalo osemazantsi]