Indlela UYesu Awabuphakamisa Ngayo Ubulungisa BukaThixo

“UThixo wambeka [uKristu] njengomnikelo wocamagushelo ngokholo olusegazini lakhe. Oku kwakungokokuze abonise ubulungisa bakhe.”—ROMA 3:25.

1, 2. (a) Ithini iBhayibhile ngemeko yabantu? (b) Yiyiphi imibuzo esiza kuyihlolisisa kweli nqaku?

AKAKHO umntu ongayaziyo ingxelo yeBhayibhile engemvukelo eyenzeka kumyezo wase-Eden. Sonke siyayiva imiphumo yesono sika-Adam echazwa ngala mazwi: “Isono sangena ngamntu mnye ehlabathini nokufa ngaso isono, ngaloo ndlela ukufa kwasasazeka kubo bonke abantu ngenxa yokuba bonke bonayo.” (Roma 5:12) Enoba sizama kangakanani ukwenza okulungileyo, senza iimpazamo yaye sifuna ukuba uThixo asixolele. Kwanompostile uPawulos wakhala wathi: “Okulungileyo endikunqwenelayo andikwenzi, kodwa okubi endingakunqweneliyo kuko endikuqheliselayo. Hayi usizana endilulo!”—Roma 7:19, 24.

² Ekubeni sizalwa sinesono, kusengqiqweni ke ngoko ukuzibuza le mibuzo ibalulekileyo: Kwenzeka njani ukuba uYesu waseNazarete azalwe engenasono yaye kwakutheni ukuze abhaptizwe? UYesu wabuphakamisa njani ubulungisa bukaYehova? Okubaluleke nangakumbi, yintoni eyaphunyezwa kukufa kukaKristu?

Ubulungisa BukaThixo Bacelw’ Umngeni

3. USathana wamkhohlisa njani uEva?

³ Abazali bethu bokuqala, uAdam noEva, benza ubudenge bokugatya ulongamo lukaThixo baza bavuma ukulawulwa ‘yinyoka yantlandlolo, leyo ibizwa ngokuba nguMtyholi.’ (ISityhi. 12:9) Phawula indlela okwenzeka ngayo oku. USathana wayithandabuza into yokuba uYehova uThixo ulawula ngendlela yobulungisa. Oko wakwenza ngokubuza uEva lo mbuzo: “Utshilo ngokwenene na uThixo ukuba nize ningadli kuyo yonke imithi yomyezo?” Eva wamphendula ngokuphinda achaze umyalelo kaThixo ocacileyo wokuba babengafanele batye kumthi othile kungenjalo babeya kufa. Emva koko uSathana wathi uThixo uyaxoka. UMtyholi wathi: “Ngokuqinisekileyo anisayi kufa.” Waqhubeka ekhohlisa uEva emenza akholelwe ukuba uThixo ubabandeza okulungileyo yaye ukuba angatya isiqhamo uya kufana noThixo, akwazi ukuzilawula.—Gen. 3:1-5.

4. Kwenzeka njani ukuze uluntu lube phantsi kolawulo lukaSathana?

⁴ USathana wayesithi abantu banokonwaba xa bengalawulwa nguThixo. Kunokuba aphakamise ulongamo lukaThixo lobulungisa, uAdam waphulaphula umfazi wakhe waza naye watya kumthi owalelweyo. Ngenxa yoko, uAdam waphulukana nokuba nolwalamano oluhle noYehova waza wasifaka kule ngcinezelo yesono nokufa. Uluntu lwaba phantsi kolawulo lukaSathana, “uthixo weli hlabathi.”—2 Kor. 4:4, ngokweKing James Version; Roma 7:14.

5. (a) UYehova wabambelela njani kwilizwi lakhe? (b) Liliphi ithemba uThixo awalinika inzala ka-Adam noEva?

⁵ UYehova wawisa isigwebo sokufa kuAdam noEva kanye njengokuba wayetshilo. (Gen. 3:16-19) Kodwa oku kwakungathethi ukuba injongo kaThixo isilele. Kunokuba isilele, kwenzeka okwahlukileyo koko. Xa uYehova wayewisa isigwebo kuAdam noEva, wanika inzala yabo ikamva eliqaqambileyo. Wenza oko ngokuchaza injongo yakhe yokuvelisa ‘imbewu’ eyayiza kutyunyuzwa isithende nguSathana. Noko ke, emva kokuba le Mbewu ithenjisiweyo ityunyuzwe isithende, yayiza kuchacha ize yona ‘ityumze intloko kaSathana.’ (Gen. 3:15) Ibhekisela kuYesu Kristu, iBhayibhile ihlabela mgama ithi: “Wabonakaliselwa le njongo uNyana kaThixo, yokuba ayichithe imisebenzi kaMtyholi.” (1 Yoh. 3:8) Indlela uYesu awayeziphethe ngayo nokufa kwakhe, kwabuphakamisa njani ubulungisa bukaThixo?

Intsingiselo Yobhaptizo LukaYesu

6. Sazi njani ukuba uYesu akazange azalwe enesono sika-Adam?

⁶ Xa sele ekhulile, uYesu kwakuza kufuneka alingane ngqo noAdam owayefezekile. (Roma 5:14; 1 Kor. 15:45) Loo nto ithetha ukuba uYesu kwakuza kufuneka azalwe efezekile. Kwakuza kwenzeka njani oku? Ingelosi egama linguGabriyeli yamchazela ngokucacileyo uMariya unina kaYesu, yathi: “Umoya oyingcwele uya kukufikela, namandla Oyena Uphakamileyo aya kukusibekela. Ngenxa yeso sizathu kwanoko kuzalwayo kuya kubizwa ngokuba kungcwele, uNyana kaThixo.” (Luka 1:35) Kuyabonakala ukuba xa uYesu wayeselula, uMariya wamxelela ngezinye zezinto ezenzekayo ekuzalweni kwakhe. Ngoko, ngesinye isihlandlo xa uMariya noYosefu, uyise owamkhulisayo, bafumana uYesu etempileni kaThixo, lo mntwana uselula wababuza: “Beningazi na ukuba ndimele ndibe sendlwini kaBawo?” (Luka 2:49) Kucacile ukuba uYesu wazazi eselula ukuba unguNyana kaThixo. Ngoko ke, eyona nto yayibalulekile kuye yayikukuphakamisa ubulungisa bukaThixo.

7. Ziziphi izinto ezixabisekileyo awayenazo uYesu?

⁷ UYesu wabonakalisa umdla ngezinto zokomoya ngokuya rhoqo kwiintlanganiso zonqulo. Ekubeni wayefezekile, kumele ukuba kwakulula ngaye ukuqonda zonke izinto awayeziva nawayezifunda kwiZibhalo zesiHebhere. (Luka 4:16) Wayenayo nenye into exabisekileyo—umzimba ofezekileyo awayenokunikela ngawo ukuze kukhululwe uluntu. Xa wayebhaptizwa, uYesu wathandaza yaye kusenokuba wayecinga ngesiprofeto esikwiNdumiso 40:6-8.—Luka 3:21; funda amaHebhere 10:5-10.a

8. Kwakutheni ukuze uYohane uMbhaptizi angavumi ukubhaptiza uYesu?

⁸ Ekuqaleni uYohane uMbhaptizi akazange avume ukubhaptiza uYesu. Ngoba? Ngenxa yokuba ukubhaptizwa kwamaYuda nguYohane kwakubonisa ukuba aguqukile kwizono ezazichasene noMthetho. Ekubeni wayesisalamane sikaYesu esisondeleyo, uYohane kumele ukuba wayesazi ukuba uYesu ulilungisa yaye akukho mfuneko yokuba aguquke. UYesu wamqinisekisa uYohane ukuba kufanelekile ukuba abhaptizwe. UYesu wathi: “Kufanelekile ngathi ukuphumeza konke oko kububulungisa.”—Mat. 3:15.

9. Lwalufuzisela ntoni ubhaptizo lukaYesu?

⁹ Ekubeni uYesu wayefezekile, wayesenokucinga ukuba ngokufanayo noAdam, wayenokukwazi ukuba nguyise wenzala efezekileyo. Noko ke, uYesu akazange akunqwenele oko kuba leyo yayingeyonjongo kaYehova. UThixo wathumela uYesu emhlabeni ukuze azalisekise injongo yeMbewu ethenjisiweyo okanye uMesiya. Oku kwakuquka ukunikela kukaYesu ngobomi bakhe obufezekileyo. (Funda uIsaya 53:5, 6, 12.) Kakade ke, ubhaptizo lukaYesu lwalungafani nolwethu. Kwakungeyomfuneko ukuba uYesu azahlulele kuYehova, kuba wayesele eyinxalenye yohlanga lwakwaSirayeli oluzinikele kuThixo. Ngoko, ubhaptizo lukaYesu lwalufuzisela ukuzinikela kwakhe ekwenzeni ukuthanda kukaThixo ngendlela ekwakuchazwe ukuba uMesiya uya kwenza ngayo eZibhalweni.

10. Ukwenza ukuthanda kukaThixo njengoMesiya kwakuquka ntoni yaye uYesu wayevakalelwa njani ngako?

¹⁰ Injongo kaYehova ngoYesu yayiquka ukushumayela iindaba ezilungileyo zoBukumkani bukaThixo, ukwenza abafundi nokubaxhobisela umsebenzi ababeza kuwenza, wokwenza abafundi. Ukuzinikela kukaYesu kwakuquka ukulungela kwakhe ukunyamezela intshutshiso nokubulawa kabuhlungu nto leyo yayibonisa ukuba uxhasa ulongamo lukaYehova uThixo lobulungisa. Ekubeni uYesu wayemthanda ngokunyanisekileyo uYise wasezulwini, wayekuthanda ukwenza ukuthanda kukaThixo yaye wayekuvuyela ukunikela ngomzimba wakhe njengedini. (Yoh. 14:31) Kwamvuyisa nokwazi ukuba ixabiso lobomi bakhe obufezekileyo linokunikelwa kuThixo njengentlawulelo yokusikhulula kubukhoboka besono nokufa. Ngaba uThixo wakholiswa kukuzinikela kukaYesu ukuze aphumeze ezi mbopheleleko? Ewe!

11. UYehova wabonisa njani ukuba uyakholiswa nguYesu njengoMesiya othenjisiweyo okanye uKristu?

¹¹ Bonke ababhali beeVangeli ezine bayangqinelana ngamazwi acacileyo awathethwa nguYehova uThixo xa uYesu wayephuma kuMlambo weYordan abonisa ukuba uyakholiswa nguye. UYohane uMbhaptizi wathi: “Ndawubona umoya usihla njengehobe uphuma ezulwini, waza wahlala phezu [kukaYesu] . . . Kwaye ndiwubonile, ndaza ndangqina ukuba lo nguye uNyana kaThixo.” (Yoh. 1:32-34) Kwakhona, ngeso sihlandlo uYehova wathi: “Lo nguNyana wam, oyintanda, endikholisiweyo nguye.”—Mat. 3:17; Marko 1:11; Luka 3:22.

Wathembeka De Wafa

12. Yintoni eyenziwa nguYesu kwiminyaka emithathu enesiqingatha emva kokubhaptizwa kwakhe?

¹² Kangangeminyaka emithathu enesiqingatha, uYesu wazibhokoxa ekufundiseni abantu ngoYise nangokulunga kolongamo lukaThixo. Ukuhambahamba ngeenyawo kwiLizwe Lesithembiso kwakumdinisa, kodwa akazange avumele nto ukuba imthintele ekungqineleni inyaniso ngokucokisekileyo. (Yoh. 4:6, 34; 18:37) UYesu wayefundisa abanye ngoBukumkani bukaThixo. Ngokuphilisa ngokungummangaliso abagulayo, ngokondla izihlwele nangokuvusa abafileyo, wabonisa oko uBukumkani buya kukwenzela abantu.—Mat. 11:4, 5.

13. Wafundisa ntoni uYesu ngokuphathelele umthandazo?

¹³ Kunokuba afune ukuzukiswa ngenxa yeemfundiso nemisebenzi yakhe yokuphilisa, uYesu wamisela umzekelo omhle wokuthobeka ngokunika uYehova lonke uzuko. (Yoh. 5:19; 11:41-44) UYesu wazisa abantu nangezona zinto zibalulekileyo abafanele bazithandazele. Xa sithandaza sifanele sicele ukuba igama likaThixo, uYehova ‘lingcwaliswe,’ nokuba ulongamo lukaThixo lobulungisa luthabathel’ indawo ulawulo lukaSathana lobungendawo kuze ‘kwenzeke ukuthanda kwakhe nasemhlabeni, njengasezulwini.’ (Mat. 6:9, 10) UYesu wasibongoza nokuba senze ngokuvisisana nemithandazo yethu ‘ngokufuna kuqala ubukumkani nobulungisa bukaThixo.’—Mat. 6:33.

14. Nangona uYesu wayefezekile, kutheni kwakungekho lula ukuphumeza indima yakhe kwinjongo kaThixo?

¹⁴ Njengoko ukufa kwakhe okulidini kwakusondela, uYesu waqonda ukuba wayenembopheleleko enkulu. Kwafuneka uYesu anyamezele ukutyholwa nokubulawa ngenkohlakalo ukuze kuzaliseke injongo kaYise kuze kungcwaliswe negama lakhe. Kwiintsuku ezintlanu ngaphambi kokuba abulawe, uYesu wathandaza wathi: “Umphefumlo wam ukhathazekile, yaye ndiya kuthini na? Bawo, ndisindise kweli lixa. Noko ke, kungenxa yoku le nto ndifikile kweli lixa.” Emva kokuvakalisa la mazwi abuhlungu, uYesu wanikela ingqalelo kweyona nto ibaluleke kakhulu waza wathandaza wathi: “Bawo, lizukise igama lakho.” UYehova waphendula ngoko nangoko wathi: “Ndilizukisile yaye ndiza kulizukisa kwakhona.” (Yoh. 12:27, 28) UYesu wayekulungele ukutyhubela olona vavanyo lunzima lokugcina ingqibelelo ekungekho mntu wumbi owakha watyhubela kulo. Kodwa ngokuqinisekileyo xa weva amazwi kaYise wasezulwini, uYesu womelela waza waqonda ukuba uya kuphumelela ekuzukiseni nasekuthetheleleni ulongamo lukaYehova. Ngokwenene waphumelela!

Oko Kwaphunyezwa Kukufa KukaYesu

15. Ngaphambi nje kokuba afe, kwakutheni ukuze uYesu athi: “Kufeziwe”?

¹⁵ Njengoko uYesu wayephefumla okokugqibela exhonywe kwisibonda sentuthumbo, wathi: “Kufeziwe!” (Yoh. 19:30) Ngoncedo lukaThixo, uYesu waphumeza izinto ezinkulu kwiminyaka emithathu enesiqingatha ukususela ekubhaptizweni kwakhe de kuse ekufeni kwakhe! Ekufeni kukaYesu, kwabakho inyikima enkulu, yaye igosa lomkhosi elingumRoma elalilapho lathi: “Ngokuqinisekileyo lo ibinguNyana kaThixo.” (Mat. 27:54) Kusenokwenzeka ukuba elo gosa lalikho ngokuya uYesu wayegculelwa kuba ethe unguNyana kaThixo. Nakuba wabandezeleka ngaloo ndlela, uYesu wagcina ingqibelelo yakhe waza wangqina uSathana elixoki. Ebhekisela kubo bonke abantu abaxhasa ulongamo lukaThixo, uSathana wathi: “Umntu angancama yonke into anayo ngenxa yobomi bakhe.” (Yobhi 2:4, iBhayibhile yesiXhosa yowe-1996) Ngokuthembeka kwakhe, uYesu wabonisa ukuba uAdam noEva ngebabekwazile ukumelana nolwabo uvavanyo olwalungekho nzima kangako. Eyona nto ibaluleke kunazo zonke kukuba, ubomi nokufa kukaYesu kwaphakamisa ulongamo lukaYehova lobulungisa. (Funda iMizekeliso 27:11.) Ngaba ikho enye into eyaphunyezwa kukufa kukaYesu? Ewe ikho.

16, 17. (a) Kwenzeka njani ukuba amangqina kaYehova awayephila ngaphambi kwexesha lobuKristu abe nolwalamano oluhle noYehova? (b) UYehova wamvuza njani uNyana wakhe ngokuthembeka kwakhe, yaye yintoni iNkosi uYesu Kristu eqhubeka iyenza?

¹⁶ Baninzi abakhonzi bakaYehova ababephila ngaphambi kokuba uYesu eze emhlabeni. Babenolwalamano oluhle noThixo yaye wabathembisa ngovuko. (Isa. 25:8; Dan. 12:13) Yintoni eyayinokubangela ukuba uThixo oyingcwele, uYehova asikelele uluntu olunesono ngaloo ndlela? IBhayibhile ithi: “UThixo wambeka [uYesu Kristu] njengomnikelo wocamagushelo ngokholo olusegazini lakhe. Oku kwakungokokuze abonise ubulungisa bakhe, ngenxa yokuba wayexolela izono ezenzeka kwixesha elidluleyo ngoxa uThixo wayenyamezele; ukuze abonise ubulungisa bakhe ngeli xesha langoku, ukuze abe lilungisa kwanaxa emvakalisa elilungisa umntu okholwayo kuYesu.”—Roma 3:25, 26.b

¹⁷ UYehova wavuza uYesu ngokumvusela kwisikhundla esiphakamileyo kuneso wayenaso ngaphambi kokuza emhlabeni. UYesu ngoku usisidalwa somoya esizukileyo esingenakuze sife. (Heb. 1:3) NjengoMbingeleli Omkhulu noKumkani, iNkosi uYesu Kristu iqhubeka inceda abalandeli bayo baphakamise ubulungisa bukaThixo. Sinombulelo omkhulu kuba uBawo wethu wasezulwini, uYehova, unguMvuzi wabo bonke abamkhonza ngokunyaniseka bexelisa uNyana wakhe!—Funda iNdumiso 34:3; namaHebhere 11:6.

18. Yintoni eza kuxutyushwa kwinqaku elilandelayo?

¹⁸ Ukususela kuAbheli, bonke abantu abathembekileyo babenolwalamano oluhle noYehova kuba babonakalisa ukholo kuye yaye babenethemba kwiMbewu ethenjisiweyo. UYehova wayesazi ukuba uNyana wakhe uya kugcina ingqibelelo nokuba ukufa kwakhe kwakuza kusigubungela ngokupheleleyo “isono sehlabathi.” (Yoh. 1:29) Nabantu abaphila namhlanje bayangenelwa ekufeni kukaYesu. (Roma 3:26) Ngoko, ziziphi iintsikelelo onokuzifumana ngenxa yentlawulelo kaKristu? Oko siza kukuxubusha kwinqaku elilandelayo.

[Imibhalo esemazantsi]

Ubuya Kuphendula Uthini?

• Ubulungisa bukaThixo bacelw’ umngeni njani?

• Lwalufuzisela ntoni ubhaptizo lukaYesu?

• Yintoni eyaphunyezwa kukufa kukaYesu?

[Umfanekiso okwiphepha 9]

Ngaba uyazi ukuba lwalufuzisela ntoni ubhaptizo lukaYesu?