Imibuzo Yabafundi . . .

UKayin Wamfumana Phi Umfazi?

▪ “Ukuba uAdam noEva babenoonyana ababini, uKayin noAbheli, uKayin wamfumana phi umfazi?” Nangona lo mbuzo udla ngokubuzwa ngabantu abaphikisa iBhayibhile, yona iBhayibhile inayo impendulo ecacileyo yawo.

KwiGenesis isahluko 3 nese-4 kuthiwa: (1) UEva ‘wayengunina wabo bonke abaphilayo.’ (2) Kwadlula ixesha elithile phakathi kokuzalwa kukaKayin nokwenza kwakhe umnikelo ongazange wamkelwe nguThixo. (3) Emva kokugxothwa kwakhe ukuze aye kuba “sisibhadubhadu nembacu emhlabeni,” uKayin wayenexhala lokuba ‘nabani na omfumanayo’ wayenokuzama ukumbulala. (4) UThixo wamisela umqondiso wokukhusela uKayin nto leyo ebonisa ukuba uKayin wayesengozini yokubulawa zezinye zezalamane zakhe. (5) “Emva koko” uKayin walala nomfazi wakhe “kwilizwe leeMbacu.”—Genesis 3:20; 4:3, 12, 14-17.

Ezi zibakala zingasentla zisenza sifikelele kwisigqibo sokuba umfazi kaKayin wayeyinzala kaEva nangona lingachazwanga ixesha lokuzalwa kwakhe. IGenesis 5:4 ithi kwiminyaka engama-930 awadla ngayo amazimba, uAdam “wazala oonyana neentombi.” Noko ke iBhayibhile ayitsho ukuba umfazi kaKayin wayeyintombi kaEva. Ukukhankanywa kwakhe emva kokugxothwa kukaKayin kubonisa ukuba kwakusele kudlule ixesha elide yaye kusenokwenzeka ukuba wayengomnye wabazukulwana baka-Adam noEva. Ngenxa yoko, iThe Amplified Old Testament ithi umfazi kaKayin “wayengomnye wabantwana baka-Adam.”

Umbhali mbali wenkulungwane ye-19 uAdam Clarke ucingela ukuba uThixo wamisela umqondiso wokumkhusela kuba uKayin wayesoyika ukubulawa ngabanye abantwana baka-Adam kuba ngelo xesha babesele bebaninzi kangangokuba babesele “bakhe neelali eziliqela.”

Kwabanye abantu iyalumeza into yokuba uKayin atshate nodade wabo okanye omnye wabazukulwana baka-Adam. Loo nto ibangelwa kukoyika inyala nokuzala abantwana abaneziphene. Noko ke, kwincwadi ethi The Narrated Bible in Chronological Order uF. LaGard uthi: “Kusenokwenzeka ukuba abantwana bokuqala babetshatana nangona loo nto yayingenakuvunyelwa kwizizukulwana zamva.” Kwakhona sifanele singalibali ukuba ukwabelana ngesondo kwabantwana bomntu omnye kwaqalisa ukwalelwa xa uThixo wanika uSirayeli umthetho.—Levitikus 18:9, 17, 24.

Sele kudlule amawaka eminyaka abantu bengafezekanga. Abantu ababefezekile babengenakufumana imiphumo efana nesiyifumanayo thina xa sitshata abantu esizalana nabo. Ukongezelela koko, imiphumo yophando lwakutshanje njengolo lupapashwe kwiJournal of Genetic Counseling, ibonisa ukuba xa umntu etshata nesalamane sakhe esisondeleyo ingozi yokuzala abantwana abaneziphene ayikho nkulu njengoko kucingelwa. Kusengqiqweni ukuthi zazingekho iingxaki ezinjalo ngexesha lika-Adam ukuya kumhla kaNowa. Ngaloo ndlela sinokugqiba ngelithi uKayin watshata nesalamane sakhe.