Ukunikela Imibingelelo Eyamkelekileyo KuYehova

NGAXA lithile embalini, kwenzeka isiganeko esiphawulekayo kwisango elingasempuma kumyezo wase-Eden.a Kwakumi apho iikherubhi ezinamandla zilindile, indlela ezazibonakala zisoyikeka ngayo yayisenza kucace ukuba kwakungekho bani owayemele abe nobuganga bokugqitha. Ngokufanayo omnye umqobo yayiyincakuba yekrele enelangatye elijikajikayo, emele ukuba yayitshawuza umbane kufutshane nemithi eyayilapho ebusuku. (Genesis 3:​24) Nakuba oku kunokuba kwakubangela umdla, nabaphi na ababukeli babebukela bemgama.

Kusenokwenzeka ukuba uKayin noAbheli babesiya izihlandlo ezininzi kule ndawo. Ekubeni babezalelwe ngaphandle kwalo myezo nguAdam noEva, babenokuyithelekelela nje kuphela indlela ekwakuyiyo ukuhlala eParadesi, njengokuba abazali babo babekhe benjenjalo, kuloo ntabalala yeziqhamo nemifuno yayo eyayinkcenkceshelwe kakuhleOK for Xhosa, iluhlaza yaka. Ngoku ekuphela kwento eyayinokubonwa e-Eden ngokungathandabuzekiyo yindawo engalinywanga neyenileyo.

Ngokuqinisekileyo uAdam noEva babacacisela abantwana babo ngesizathu sokuba loo myezo unganyanyekelwa nesokuba bagxothwe kuwo. (Genesis 2:​17; 3:​6, 23) Bamele ukuba babedane ngeyona ndlela uKayin noAbheli! Babewubona lo myezo, kodwa bengenakungena kuwo. Babesondele kwiParadesi, sekunjalo bephila kwiimeko ezingafani kwaphela nayo. Ukungafezeki kwakubonakalisile, yaye kwakungekho nto ingako uKayin okanye uAbheli babenokuyenza.

Ulwalamano lwabazali babo ngokuqinisekileyo lwalungenakunceda nto. Xa wayedlulisela isigwebo kuEva, uThixo wathi: “Inkanuko yakho ibe sendodeni yakho, ikulawule yona.” (Genesis 3:​16) Eneneni ngokweso siprofeto, uAdam ngoku umele ukuba wayemlawula umfazi wakhe, mhlawumbi engasamphathi njengeqabane nomncedi. Yaye kukhangeleka ngathi uEva wayebonakalisa ukuxhomekeka ngamandla kule ndoda. Enye ingcaciso ide ithi xa iyichaza “inkanuko” yakhe “ngumnqweno ongathi sisifo.”

Ukuba imeko yaloo mtshato yayichaphazela ukusa kuwuphi umkhamo intlonelo yaloo makhwenkwe kubazali bawo, iBhayibhile ayisichazeli. Nangona kunjalo, kucacile ukuba uAdam noEva babamisela umzekelo ombi abantwana babo.

Ukukhetha Iindlela Ezahlukeneyo

Ekugqibeleni, uAbheli waba ngumalusi waza uKayin waba ngumlimi. (Genesis 4:⁠2) Njengoko wayesalusa imihlambi yakhe, ngokungathandabuzekiyo uAbheli wayenexesha elininzi lokucingisisa eso siprofeto sikhethekileyo saxelelwa abazali bakhe ngaphambi kokuba bagxothwe e-Eden, esithi: “Ndiya kumisa ubutshaba phakathi kwakho nomfazi, naphakathi kwembewu yakho nembewu yakhe; yona iya kukutyumza intloko, wena uya kuyityumza isithende.” (Genesis 3:​15) UAbheli umele ukuba wayemangalisiwe ukuba, ‘Elo dinga likaThixo liphathelele imbewu eyayiza kutyumza inyoka laliza kufezwa njani, yaye inyoka yayiza kusityumza njani isithende sembewu?’

Emva kwexesha elithile, xa babesele bebadala, ngamnye kubo uKayin noAbheli wenza umnikelo kuYehova. Ekubeni uAbheli wayengumalusi, akumangalisi ukuba abe wanikela “kumazibulo ezimvu zakhe, kwezinamanqatha.” Ngokwahlukileyo koko, uKayin wanikela “[ezithile, NW] eziqhameni zomhlaba.” UYehova wawamkela umbingelelo ka-Abheli, kodwa “akambheka uKayin nomnikelo wakhe.” (Genesis 4:​3-⁠5) Kwakutheni?

Bambi balatha kwisibakala sokuba umnikelo ka-Abheli wayewuthabathe “kumazibulo ezimvu zakhe,” ngoxa okaKayin ‘wawungoweziqhamo ezithile zomhlaba.’ Kodwa ingxaki yayingebobunjani bemveliso awayinikelayo uKayin, kuba ingxelo ithi “uYehova wambheka uAbheli nomnikelo wakhe,” yaye akambheka “uKayin nomnikelo wakhe.” Ngoko ke uYehova ngokuyintloko wakhangela imeko yentliziyo yomnquli lowo. Akwenjenjalo wafumanisa ntoni? EyamaHebhere 11:⁠4 isixelela ukuba “ngokholo” uAbheli wanikela umbingelelo wakhe. Ngoko kuyabonakala ukuba uKayin wayengenalo ukholo olwenza ukuba umbingelelo ka-Abheli wamkeleke.

Ngokuphathelele oku, kuyaphawuleka ukuba umnikelo ka-Abheli wawubandakanya ukuphalazwa kwegazi. Ngokuchanileyo usenokuba wagqiba ekubeni idinga likaThixo eliphathelele imbewu eyayiza kutyunyuzwa isithende laliza kufuna ukunikelwa kobomi. Ngoko ke umnikelo ka-Abheli wawuza kuba yindlela yokucamagusha, yaye wabonakalisa ukholo lokuba uThixo wayeza kunikela ngombingelelo ofanelekileyo wokuhlawulela izono ngexesha elifanelekileyo.

Ngokuchaseneyo noko, kuyacaca ukuba uKayin wawenza nje loo mnikelo ngokungakhathali. Omnye umphengululi weBhayibhile wenkulungwane ye-19 wathi: “Umnikelo wakhe yayikukuvuma nje uThixo njengomncedi. Wawubonisa ngokuphandle ukuba wayengaziboni exhomekeke nganto kuMdali wakhe, kungekho namfuneko yokuvuma izono zakhe okanye axhomekeke kucamagusho.”

Ukongezelela koko, njengezibulo, kusenokwenzeka ukuba uKayin wayezikhukhumalisa ecinga ukuba wayeyimbewu ethenjisiweyo eyayiza kutshabalalisa iNyoka, uSathana. KwanoEva umele ukuba wayenaloo mabhongo ngonyana wakhe olizibulo. (Genesis 4:⁠1) Kambe ke, ukuba oku koko uKayin noEva babekulindele, babewuphosile umhlola.

IBhayibhile ayisichazeli indlela uYehova awawamkela ngayo umbingelelo ka-Abheli. Bambi bacinga ukuba watshiswa ngumlilo ovela ezulwini. Nokuba kwakwenzeke ntoni, akuqonda ukuba umnikelo wakhe awamkelwanga, “waqumba kunene uKayin, basangana ubuso bakhe.” (Genesis 4:⁠5) UKayin wayekhasel’ emlilweni.

Isiluleko SikaYehova Nentsabelo KaKayin

UYehova waqiqa noKayin. Wambuza: “Yini na ukuba uqumbe, yini na ukuba busangane ubuso bakho?” Oku kwamnika ithuba elingakumbi uKayin lokuba aphonononge iimvakalelo neentshukumisa zakhe. Ehlabela mgama uYehova wathi: “[Ukuba uyaguquka wenze okulungileyo, NW] abuyi kuswabuluka ubuso yini na? Ukuba uthe akwalungisa, isono sibuthumile ngasesangweni, singxamele wena; ke wena, silawule.”​—⁠Genesis 4:​6, 7. (Bona ibhokisi kwiphepha 23.)

UKayin akazange aphulaphule. Kunoko, waqhubela uAbheli entsimini waza wambulala. Kamva, xa uYehova wayembuza ngoAbheli, uKayin wasandisa isono sakhe ngokuxoka. Waphendula wathi: “Andazi; ndingumgcini womninawa wam yini na?”​—⁠Genesis 4:​8, 9.

Ngaphambi nasemva kokuba abulale uAbheli, uKayin wala ‘ukuguquka enze okulungileyo.’ Wakhetha ukuvumela isono simlawule, yaye ngenxa yoko, uKayin wagxothwa kwindawo eyayihlala abantu. “Umqondiso,” mhlawumbi nje ngesifungo, wamiselwa ukuze kungabikho nabani na owayeza kuphindezela ukufa kuka-Abheli ngokubulala uKayin.​—⁠Genesis 4:⁠15.

Kamva uKayin wakha isixeko, awasibiza ngonyana wakhe. Akumangalisi ukuba, inzala yakhe yaziwe ngogonyamelo. Ekugqibeleni, umnombo kaKayin waphela xa uNogumbe womhla kaNowa watshayela bonke abantu ababengengomalungisa.​—⁠Genesis 4:​17-24; 7:​21-⁠24.

Ingxelo yeBhayibhile engoKayin noAbheli yayingagcinelwanga nje ukwenza ukufunda kube myoli. Kunoko, ‘yabhalelwa uyalelo lwethu’ yaye ‘iyingenelo ekufundiseni, ekohlwayeni.’ (Roma 15:⁠4; 2 Timoti 3:​16) Yintoni esinokuyifunda kule ngxelo?

Oko Sikufundayo

NjengoKayin noAbheli, amaKristu namhlanje ayalelwa ukuba anikele imibingelelo kuThixo​—⁠kungekhona iminikelo yokoqobo etshiswayo, kodwa “umbingelelo wendumiso, oko kukuthi, isiqhamo semilebe eyenza uvakaliso lwasesidlangalaleni kwigama lakhe.” (Hebhere 13:​15) Oku kwenziwa ehlabathini lonke, njengoko amaNgqina kaYehova eshumayela iindaba ezilungileyo zoBukumkani bukaThixo kumazwe angaphezu kwama-230. (Mateyu 24:​14) Ngaba unesabelo kuloo msebenzi? Ngoko ke unokuqiniseka ukuba “uThixo akanantswela-bulungisa ukuba angawulibala umsebenzi wenu nothando enalubonisayo ngegama lakhe.”​—⁠Hebhere 6:⁠10.

Njengokuba kwakunjalo ngeminikelo kaKayin noAbheli, imibingelelo yakho ayigwetywa ngokwembonakalo yayo yangaphandle​—⁠ngokomzekelo, inani nje leeyure ozichitha kubulungiseleli. UYehova ukhangela okungaphezu koko. UYeremiya 17:​10 uthi ‘ugocagoca intliziyo’ aze ‘acikide izintso’​—⁠ezona ngcinga zinzulu, iimvakalelo neentshukumisa zikabani. Ngoko ke, oyena ndoqo ziintshukumisa kungekhona ubungakanani. Eneneni, nokuba mkhulu okanye mncinane, umbingelelo ubalulekile kuThixo xa unikelwa ngokusuka kwintliziyo eshukunyiswe luthando.​—⁠Thelekisa uMarko 12:​41-44 nese–14:​3-⁠9.

Kwangaxeshanye, simele siyiqonde into yokuba uYehova akayi kuyamkela imibingelelo eqhwalelayo, kanye njengokuba engazange awamkele umnikelo ongenziwa ngentliziyo epheleleyo kaKayin. (Malaki 1:​8, 13) UYehova ufuna ukuba umnike okona kubhetele unako, oko kukumkhonza ngentliziyo, umphefumlo, ingqondo namandla akho ephela. (Marko 12:​30) Ngaba uyakwenza oko? Ukuba kunjalo unesizathu sokwaneliseka ngemibingelelo yakho. UPawulos wabhala: “Ngamnye makangqine oko ukuko umsebenzi wakhe, yaye uya kwandula ke abe nonobangela wokugcoba ngokubhekisele kuye yedwa, ibe kungekhona ngokuzithelekisa nomnye umntu.”​—⁠Galati 6:⁠4.

UKayin noAbheli bakhuliswa ngendlela efanayo. Kodwa ixesha neemeko zanika ngamnye ithuba lokuvelisa iimpawu ezingafaniyo. Isimo sengqondo sikaKayin saqhubeka sisonakaliswa likhwele, usukuzwano nomsindo weqaqa.

Ngokwahlukileyo koko, uAbheli ukhunjulwa nguThixo njengendoda elilungisa. (Mateyu 23:​35) Ukuzimisela kwakhe ukukholisa uThixo phantsi kwazo naziphi na iimeko kwamenza uAbheli wanomahluko ohlaziyayo kowentsapho yakowabo engenambulelo​—⁠uAdam, uEva noKayin. IBhayibhile isixelela ukuba nangona uAbheli wafayo, “usathetha.” Inkonzo yakhe yokuthembeka kuThixo yinxalenye yengxelo yembali ehlala ikho equlethwe yiBhayibhile. Ngamana singaxelisa umzekelo ka-Abheli ngokuqhubeka sinikela imibingelelo eyamkelekileyo kuThixo.​—⁠Hebhere 11:⁠4.

[Imibhalo esemazantsi]