Unqulo Lokwenyaniso Lubonakala Ngomanyano
“Ndiya kubabeka bemanyene, njengomhlambi ebuhlanti.”—MIKA 2:12.
1. Ubulumko bukaThixo bubonakala njani kwindalo?
UMDUMISI wathi: “Hayi indlela emininzi ngayo imisebenzi yakho, Yehova! Yonke uyenze ngobulumko. Uzele umhlaba yimveliso yakho.” (INdu. 104:24) Ubulumko bukaThixo bubonakala kwindlela ezithungelana ngayo izigidi zezinto ezahlukahlukeneyo eziphila kulo mhlaba, izityalo, izinambuzane, izilwanyana neentsholongwane. Nomzimba wakho unamalungu amaninzi neeseli ezahlukahlukeneyo ezisebenzisanayo ukuze ube ngulo mntu unguye usempilweni.
2. Njengoko kuboniswe kwiphepha 13 kutheni kunokuthiwa ukumanyana kwamaKristu kwakumangalisa?
2 UYehova wadala abantu ngendlela yokuba kubekho intsebenziswano phakathi kwabo. Abantu abafani ngembonakalo, ngeempawu nobuchule. Ngaphezulu, wanika abantu bokuqala iimpawu ezifana nezakhe ezaziya kubenza basebenzisane yaye omnye axhomekeke komnye. (Gen. 1:27; 2:18) Sekunjalo, abantu ngokubanzi bahlukanisiwe noThixo yaye abazange bakhe bamanyane bonke. (1 Yoh. 5:19) Ngoko ke, ifanele ukuba yayimangalisa into yokuba amaKristu enkulungwane yokuqala amanyane ekubeni ayebunjwa ngabantu abahlukahlukeneyo, amakhoboka ase-Efese, amabhinqa angamaGrike awayedumile, amadoda angamaYuda awayezizifundiswa nabantu ababefudula benqula izithixo ngaphambili.—IZe. 13:1; 17:4; 1 Tes. 1:9; 1 Tim. 6:1.
3. IBhayibhile iluchaza njani umanyano lwamaKristu yaye yintoni esiza kuyihlolisisa kwesi sifundo?
3 Unqulo lokwenyaniso lwenza abantu basebenzisane njengamalungu emizimba yethu. (Funda eyoku-1 yabaseKorinte 12:12, 13.) Nazi ezinye zezinto esiza kuzihlola kweli nqaku: Unqulo lokwenyaniso lubamanyanisa njani abantu? Kutheni inguYehova kuphela onokumanyanisa izigidi zabantu beentlanga zonke? Ziziphi izinto eziyimiqobo kumanyano, uYehova asinceda sizoyise? Ngokuphathelele umanyano, ubuKristu bokwenyaniso bahluke njani kwiNgqobhoko?
Unqulo Lokwenyaniso Lubamanyanisa Njani Abantu?
4. Unqulo lokwenyaniso lubamanyanisa njani abantu?
4 Abantu abakunqulo lokwenyaniso bayayiqonda into yokuba uYehova wadala zonke izinto yaye ngenxa yoko uyakufanelekela ukuba nguMongami wendalo yonke. (ISityhi. 4:11) Ngoko, nangona amaKristu okwenyaniso ehlala kwiindawo ezahlukahlukeneyo yaye ephila phantsi kweemeko ezingafaniyo, onke athobela imithetho kaThixo efanayo yaye aphila ngemigaqo efanayo yeBhayibhile. Bonke abanquli bokwenyaniso babiza uYehova ngokuba ‘nguBawo.’ (Isa. 64:8; Mat. 6:9) Ngenxa yoko, bonke bangabazalwana yaye indlela abamanyene ngayo yile ichazwa ngumdumisi: “Khangela! Hayi indlela ekulunge nekuthandeka ngayo ukuba abazalwana bahlale ndawonye ngomanyano!”—INdu. 133:1.
5. Luluphi uphawu olumanyanisa abanquli bokwenyaniso?
5 Nangona amaKristu okwenyaniso engafezekanga, asebenzisana ngomanyano kuba aye afunda ukuthandana. UYehova uwafundisa ukuba athandane ngokunyanisekileyo. (Funda eyoku-1 kaYohane 4:7, 8.) ILizwi lakhe lithi: “Yambathani umsa wemfesane, ububele, ukuthobeka kwengqondo, ubulali, nokuzeka kade umsindo. Qhubekani ninyamezelana yaye nixolelana ngesisa ukuba nabani na unesizathu sokukhalazela omnye. Kanye njengoko uYehova wanixolela ngesisa, yenzani njalo nani. Ke, phezu kwazo zonke ezi zinto, yambathani uthando, kuba lungumxokelelwane ogqibeleleyo womanyano.” (Kol. 3:12-14) Lo mxokelelwane ogqibeleleyo womanyano—uthando—luphawu aziwa ngalo amaKristu okwenyaniso. Ngaba nawe uye waphawula ukuba abantu abakunqulo lokwenyaniso bamanyane?—Yoh. 13:35.
6. Ithemba loBukumkani lisinceda njani ukuba siqhubeke simanyene?
6 Enye into emanyanisa abanquli bokwenyaniso kukuba bathembele kuBukumkani bukaThixo njengekuphela kwethemba loluntu. Bayazi ukuba kungekudala, uBukumkani bukaThixo buya kuthabatha indawo yoorhulumente babantu buze busikelele abantu abathobelayo ngoxolo lukanaphakade. (Isa. 11:4-9; Dan. 2:44) Ngaloo ndlela, amaKristu ayawathobela amazwi awathethwa nguYesu ngabalandeli bakhe: “Abayonxalenye yehlabathi, kanye njengoko nam ndingeyonxalenye yehlabathi.” (Yoh. 17:16) AmaKristu okwenyaniso akathabathi cala kwiimfazwe zehlabathi; ngenxa yoko, naxa kusiliwa kwindawo ahlala kuyo aqhubeka emanyene.
Ekuphela Komthombo Wemfundo Yokomoya
7, 8. Imfundo esekelwe eBhayibhileni inegalelo njani ekumanyaneni kwethu?
7 AmaKristu enkulungwane yokuqala ayemanyene kuba onke ayefumana ukhuthazo oluphuma kumthombo ofanayo. Ayeqonda ukuba uYesu usebenzisa iqumrhu elilawulayo elalibunjwa ngabapostile namadoda amakhulu awayeseYerusalem ukuze afundise yaye alathise ibandla. Izigqibo ezazisenziwa ngala madoda azinikeleyo zazisekelwe kwiLizwi likaThixo yaye ayesebenzisa abaveleli abahambahambayo ukuze badlulisele imiyalelo kumabandla akumazwe amaninzi. Ibhekisela kwabanye babo baveleli, iBhayibhile ithi: “Njengoko babehamba betyhutyha izixeko babeye banikele kwabo balapho imimiselo ukuba bayigcine leyo kwakugqitywe kuyo ngabapostile namadoda amakhulu awayeseYerusalem.”—IZe. 15:6, 19-22; 16:4.
8 Nanamhlanje, iQumrhu Elilawulayo elibunjwa ngamaKristu athanjiswe ngomoya linegalelo kumanyano olukumabandla asehlabathini lonke. IQumrhu Elilawulayo lipapasha inkcazelo ekhuthazayo ngokomoya ngeelwimi ezininzi. Oku kutya kokomoya kusekelwe kwiLizwi likaThixo. Ngenxa yoko, oko likufundisayo akuveli bantwini kodwa kuvela kuYehova.—Isa. 54:13.
9. Umsebenzi wethu esiwunikwe nguThixo usinceda njani ukuba simanyane?
9 Nabaveleli abangamaKristu bafak’ isandla kumanyano, ngokukhokela kumsebenzi wokushumayela. Abo basebenza kunye enkonzweni kaThixo banolwalamano olomeleleyo ngokungafaniyo nabantu behlabathi abangenalo ulwalamano olomeleleyo nangona bechitha ixesha kunye. Ibandla lamaKristu lasekwa kungekhona ngenjongo yokuba libe yindawo yembutho, kodwa ngenjongo yokuzukisa uYehova nokwenza umsebenzi wakhe—umsebenzi wokushumayela iindaba ezilungileyo, wokwenza abafundi nokwakha ibandla. (Roma 1:11, 12; 1 Tes. 5:11; Heb. 10:24, 25) Kungenxa yoko le nto umpostile uPawulos wathi ngamaKristu: “Nimi niqinile moyeni mnye, nizama kunye ngamphefumlo mnye ngenxa yokholo kwiindaba ezilungileyo.”—Fil. 1:27.
10. Ziziphi ezinye zeendlela esimanyene ngazo njengabantu bakaThixo?
10 Ngenxa yoko, njengabantu bakaYehova, simanyene kuba samkela ulongamo lukaYehova, siyabathanda abazalwana bethu, sinethemba loBukumkani bukaThixo yaye siyabahlonela abo uThixo abasebenzisayo ukuba basikhokele. UYehova uyasinceda ukuba soyise utyekelo lwengqondo olubangelwa kukungafezeki, olunokuphazamisa umanyano lwethu.—Roma 12:2.
Ukoyisa Ikratshi Nomona
11. Kutheni sinokuthi ikratshi liyabahlukanisa abantu yaye uYehova usinceda njani ukuba siloyise?
11 Ikratshi liyabahlukanisa abantu. Umntu onekratshi uyathanda ukuzenza obalulekileyo kunabanye yaye uyakuthanda ukuqhayisa. Kodwa oku kudla ngokuphazamisa umanyano; abantu abaphulaphule umntu oqhayisayo basenokuba nomona. Umfundi uYakobi utsho ngeliphandle, uthi: “Konke ukuqhayisa okunjalo kungendawo.” (Yak. 4:16) Ukubajongela phantsi abanye asikokuba nothando. UYehova ungumzekelo obalaseleyo wokuthobeka kuba usebenzisana nathi nakuba singafezekanga. UDavide wathi: “Yintobeko yakho [Thixo] endenza ndibe mkhulu.” (2 Sam. 22:36) ILizwi likaThixo liyasinceda ukuba soyise ikratshi ngokusifundisa ukuba siqiqe ngendlela efanelekileyo. UPawulos waphefumlelwa ukuba abuze athi: “Ngubani na okwenza wahluke komnye? Eneneni, yintoni na onayo ongayamkeliswanga? Ukuba, eneneni wamkelisiwe, uqhayiselani ngokungathi akwamkeliswanga?”—1 Kor. 4:7.
12, 13. (a) Kutheni kulula ukuba nomona? (b) Unokuba yintoni umphumo xa sijonga abanye ngendlela uYehova abajonga ngayo?
12 Enye into ebangela ukungamanyani ngumona. Ngenxa yokungafezeki esakuzuz’ ilifa, sonke ‘sinotyekelo lokuba nomona,’ kwanabo banethuba elide bengamaKristu maxa wambi baba nomona ngenxa yendlela abanye abaphila ngayo, izinto abanazo, amalungelo abawafumanayo okanye ubuchule abanabo. (Yak. 4:5, ngokweNew World Translation) Ngokomzekelo, umzalwana otshatileyo nonabantwana unokuba nomona xa ebona umzalwana okwinkonzo yexesha elizeleyo enandipha amalungelo athile, engayiqondi into yokuba kusenokwenzeka ukuba umzalwana okwinkonzo yexesha elizeleyo uba nomona xa ebona lo mzalwana ekunye nabantwana bakhe. Singawuthintela njani umona onjalo ekuphazamiseni umanyano lwethu?
13 Ukuze siphephe ukuba nomona, masikhumbule ukuba iBhayibhile ifanisa amalungu athanjisiweyo ebandla lamaKristu namalungu omzimba womntu. (Funda eyoku-1 yabaseKorinte 12:14-18.) Ngokomzekelo, iliso lakho likwindawo ebonakalayo ngoxa intliziyo ingabonakali, kodwa zixabisekile zombini. Ngokufanayo, uYehova uyawaxabisa onke amalungu ebandla nangona abanye besenokubalasela kunabanye ngandlel’ ithile. Ngoko masijonge abazalwana bethu ngendlela uYehova abajonga ngayo. Kunokuba sibamonele abanye, sinokubonakalisa inkxalabo ngabo yaye sibe nomdla kubo. Ngokwenjenjalo, sinokuwenza ucace umahluko phakathi kwamaKristu okwenyaniso neecawa zeNgqobhoko.
INgqobhoko Yahlulelene
14, 15. Kwabakho njani ukwahlukana phakathi kobuKristu?
14 Ngoxa kukho umanyano phakathi kwamaKristu okwenyaniso, kwiicawa zeNgqobhoko kukho usukuzwano. Ngenkulungwane yesine, uwexuko lwasasazeka kakhulu kangangokude lwamkelwe nangumlawuli waseRoma owayengumhedeni nto leyo yabangela ukusasazeka kweNgqobhoko. Ngenxa yoko, oorhulumente abaninzi bazahlula kwiRoma baza bazenzela iicawa zaMazwe abo.
15 Kangangeenkulungwane kwabakho usukuzwano phakathi kwabo rhulumente. Ebudeni benkulungwane ye-17 neye-18, abantu baseBritani, eFransi naseUnited States babekhuthaza ukuba umntu azinikele kwiLizwe lakhe, kangangokuba ukuthand’ isizwe kwaba lunqulo. Ngenkulungwane ye-19 neyama-20, abantu abaninzi bathi phithi kukuthand’ isizwe. Ekugqibeleni, iicawa zeNgqobhoko zaba ngamahlelo awahlukahlukeneyo, yaye umoya wokuthand’ isizwe wamkelekile kuninzi lwezi cawa. Abantu abahamba icawa bayaya emfazweni baye kulwa nabantu abahlala kwelinye ilizwe abakhonza kwakwicawa yabo. Namhlanje iNgqobhoko yahlukaniswe ziinkolelo nabubuzwe.
16. Ziziphi izinto ezibangela ukwahlukana phakathi kwamalungu eNgqobhoko?
16 Ngenkulungwane yama-20, amanye amahlelo eNgqobhoko angamakhulukhulu, aqalisa iphulo lokuzama ukumanyana. Kodwa emva kokuzama kangangamashumi ngamashumi eminyaka, zimbalwa iicawa eziye zamanyana yaye phakathi kwamalungu ecawa kusekho ukuphikisana ngemibandela efana nendaleko, ukuqhomfa, ubufanasini nokumiselwa kwamabhinqa njengabefundisi. Kweminye imimandla yeNgqobhoko, iinkokeli zecawa zizama ukumanyanisa abantu bamahlelo awahlukahlukeneyo ngokugxeka iimfundiso ezibangela ukwahlukana. Noko ke, ukugxeka iimfundiso kwenza abantu baphelelwe lukholo yaye ngokuqinisekileyo akubangeli manyano kwiicawa zeNgqobhoko.
Ukoyisa Ubuzwe
17. Unqulo lokwenyaniso kwathiwa lwaluya kubamanyanisa njani abantu “ekupheleni kwemihla”?
17 Nangona abantu bahlukene kakhulu ngoku, abanquli bokwenyaniso baqhubeka bemanyene. Umprofeti kaThixo uMika waxela kwangaphambili wathi: “Ndiya kubabeka bemanyene, njengomhlambi ebuhlanti.” (Mika 2:12) UMika waxela kwangaphambili ukuba unqulo lokwenyaniso lwaluya kuphakama kunazo zonke ezinye iintlobo zonqulo, enoba kukunqulwa koothixo bobuxoki okanye ukunqulwa kweLizwe. Wathi: “Kuya kuthi ke ekupheleni kwemihla intaba yendlu kaYehova imiselwe ngokuqinileyo encotsheni yeentaba, yaye ngokuqinisekileyo iya kuphakanyiswa ngaphezu kweenduli; kwaye zonke izizwana zimele zibe ngumsinga ukuya kuyo. Kuba zonke izizwana ziya kuhamba ngasinye egameni lothixo waso; kodwa thina siya kuhamba egameni likaYehova uThixo wethu.”—Mika 4:1, 5.
18. Unqulo lokwenyaniso luye lwasinceda ukuba senze ziphi iinguqulelo?
18 UMika wachaza nendlela unqulo lokwenyaniso olwaluya kumanyanisa ngayo abantu ababeziintshaba ngaphambili. ‘Abantu beentlanga ezininzi baya kuhamba baze bathi: “Yizani, masinyuke siye entabeni kaYehova nasendlwini kaThixo kaYakobi; yaye uya kusiyalela ngeendlela zakhe, kwaye siza kuhamba emendweni wakhe.” Yaye baya kukhanda amakrele abo abe ngamakhuba nemikhonto yabo ibe zizikere zokuthena imithi. Uhlanga aluyi kuphakamisela uhlanga ikrele, bengayi kuphinda bafunde nemfazwe kwakhona.’ (Mika 4:2, 3) Abo baphumayo kunqulo loothixo abenziwe ngabantu okanye lobuzwe baze banqule uYehova bamanyene emhlabeni wonke. UThixo ubafundisa ngothando.
19. Ukumanyana kwezigidi zabantu abakunqulo lokwenyaniso bubungqina bantoni?
19 Ukumanyana kwamaKristu okwenyaniso asehlabathini lonke namhlanje bubungqina obucacileyo bokuba uYehova uyaqhubeka ebakhokela abantu bakhe ngomoya wakhe. Abantu beentlanga zonke bamanyene ngendlela engazange ibonwe ngaphambili. Oku kuzalisekisa oko kuchazwe kwiSityhilelo 7:9, 14, yaye kubonisa ukuba kungekudala iingelosi zikaThixo ziya kukhulula “imimoya” eya kutshabalalisa le nkqubo ingendawo yezinto. (Funda iSityhilelo 7:9, 14, 1-4, 9, 10, 14.) Ngaba asilolungelo ukumanyana nabazalwana abasehlabathini lonke? Sinokuba negalelo njani kolu manyano njengabantu ngabanye? Oku kuza kuxutyushwa kwinqaku elilandelayo.
Ubuya Kuphendula Uthini?
• Unqulo lokwenyaniso lubamanyanisa njani abantu?
• Sinokuwuthintela njani umona ekuphazamiseni umanyano lwethu?
• Kutheni abanquli bokwenyaniso bengahlukaniswa bubuzwe?
[Umfanekiso okwiphepha 13]
AmaKristu enkulungwane yokuqala ayeneemvelaphi ezahlukahlukeneyo
[Imifanekiso ekwiphepha 15]
Ukuncedisa kwakho kumsebenzi owenziwa kwiiHolo zoBukumkani kunegalelo njani kumanyano?