Umanyano Lokwenene LwamaKristu—Njani?
1 Yintoni enokumanyanisa abantu abangaphezu kwezigidi ezithandathu abaphuma kumazwe angama-234 nabathetha iilwimi ezimalunga nama-380? Kukunqula uYehova uThixo kuphela. (Mika 2:12; 4:1-3) AmaNgqina kaYehova azi ngokusuka kumava obuqu ukuba namhlanje umanyano lokwenene lwamaKristu aluyontsomi nje. ‘Njengomhlambi omnye’ ophantsi ‘komalusi omnye,’ sizimisele ukulwa nomoya weli hlabathi obangela iyantlukwano.—Yoh. 10:16; Efe. 2:2.
2 Injongo kaThixo engasayi kuze isilele kukuba izidalwa zakhe ezikrelekrele zimanyane kunqulo lokwenyaniso. (ISityhi. 5:13) Eyazi indlela okubaluleke ngayo oku, ngenzondelelo uYesu wathandazela ukuba abalandeli bakhe bamanyane. (Yoh. 17:20, 21) Ngamnye wethu unokusifaka njani isandla kumanyano lwebandla lamaKristu?
3 Lubakho Njani Umanyano: Ngaphandle kweLizwi likaThixo nomoya wakhe, amaKristu ebengasoze amanyane. Ukusebenzisa kwethu izinto esizifunde eBhayibhileni kubangela ukuba umoya kaThixo usebenze ebomini bethu ungathintelwa nto. Oku kubangela ukuba ‘sigcine ubunye bomoya kumxokelelwane omanyanisayo woxolo.’ (Efe. 4:3) Kusiqhubela ekubeni sinyamezelane ngothando. (Kol. 3:13, 14; 1 Pet. 4:8) Ngaba ukhuthaza uxolo ngokucamngca ngeLizwi likaThixo yonke imihla?
4 Simanyaniswa nangumsebenzi wethu wokushumayela nokwenza abafundi. Xa sishumayela nabanye entsimini, ‘sizama kunye ngamphefumlo mnye ngenxa yokholo kwiindaba ezilungileyo,’ siba ‘ngabasebenzi abangamadlelane kuyo inyaniso.’ (Fil. 1:27; 3 Yoh. 8) Xa sisenjenjalo, amaqhina othando asimanyanisayo ebandleni ayomelela. Kutheni ungaceli omnye ogqibele kudala ukusebenza naye ukuba ahambe nawe entsimini kule veki?
5 Hayi indlela esisikeleleke ngayo ngokuba yinxalenye yokuphela kobuzalwana benyaniso bezizwe ngezizwe emhlabeni namhlanje! (1 Pet. 5:9) Kutshanje, izigidi zabantu ziye zanandipha olu manyano lwehlabathi lonke kwiiNdibano Zezizwe Ngezizwe ‘Zokuzukisa UThixo.’ Ngamana ngamnye wethu angafak’ isandla kolu manyano luxabisekileyo ngokufunda iLizwi likaThixo yonke imihla, ngokulungisa ukungavisisani ngothando nangokushumayela iindaba ezilungileyo “ngamxhelo mnye.”—Roma 15:6.