Imfihlelo 4

Bakhethe Ngobulumko Abahlobo Bakho

IFUNDISA NTONI IBHAYIBHILE? “Ohamba nezilumko uya kuba sisilumko naye.”—IMizekeliso 13:20.

YINTONI INGXAKI? Abahlobo bethu banokusenza sonwabe okanye singonwabi. Izimo zabo zengqondo nezinto abancokola ngazo zinegalelo kwindlela esibujonga ngayo ubomi.—1 Korinte 15:33.

Ngokomzekelo, khawucinge ngebali leBhayibhile lamadoda ali-12 awaya kuhlola ilizwe lakwaKanan. Inkoliso yawo ‘yaqhubeka edlulisela ingxelo embi koonyana bakaSirayeli ngelo lizwe ayelihlolile.’ Nakuba kwakunjalo, amabini kuwo athetha ngendlela ekhuthazayo ngeKanan, esithi “lilizwe elihle kunene.” Kodwa isimo sengqondo seentlola ezilishumi sabaphembelela abantu. Eli bali lihlabela mgama lisithi ‘yonke indibano yaliphakamisa ilizwi layo yaye bonke oonyana bakaSirayeli bambombozela.’—Numeri 13:30–14:9.

Nanamhlanje abantu abanzi ‘bayambombozela yaye bayakhalaza.’ (Yude 16) Kunzima ukuhlala wanelisekile xa uhlala nabahlobo abasoloko bekhalaza.

YINTONI ONOKUYENZA? Hlalutya izinto oncokola ngazo nabahlobo bakho. Ngaba bathanda ukuqhayisa ngezinto abanazo okanye basoloko bekhalazela izinto abangenazo? Wena, ungumhlobo onjani? Ngaba usoloko uzama ukubenza bakumonele abahlobo bakho, okanye ubakhuthaza ukuba banele zizinto abanazo?

Khawucinge ngomzekelo kaDavide owayeza kuba ngukumkani, kunye noYonatan unyana kaKumkani uSawule. UDavide wayeyimbacu. UKumkani uSawule owayesoyikela ukuba uDavide uza kuthabatha isikhundla sakhe wayefuna ukumbulala. Nangona wayenokuba ngukumkani, uYonatan waba ngomnye wabahlobo bakaDavide abasenyongweni. Wayeqonda ukuba uThixo umisele uDavide ukuba abe ngukumkani olandelayo kwaye wayeza kukuvuyela ukuxhasa umhlobo wakhe.—1 Samuweli 19:1, 2; 20:30-33; 23:14-18.

Kufuneka ube nabahlobo abanjalo, abazabalazela ukwaneliseka nabafuna uphumelele. (IMizekeliso 17:17) Kodwa ke, ukuze ube nabahlobo abanjalo kufuneka nawe ube nezo mpawu.—Filipi 2:3, 4.

[Umfanekiso okwiphepha 7]

Ngaba abahlobo bakho bakwenza wonwabe okanye bakwenza ungonwabi?