Ngaba Ubusazi?

Wayetheth’ ukuthini umpostile uPawulos xa wayesithi emzimbeni wakhe ‘wayeneempawu zomtshiso ezimfanisa nekhoboka likaYesu’?—Galati 6:17.

▪ Abantu benkulungwane yokuqala babenokuwaqonda ngeendlela ezahlukahlukeneyo amazwi kaPawulos. Ngokomzekelo, mandulo kwakusetyenziswa intsimbi etshisayo ukuze kuphawulwe amabanjwa emfazwe, abaphangi betempile namakhoboka aqhweshileyo. Kwakulihlazo ukuphawulwa komntu ngale ndlela.

Noko ke, ukuphawulwa kwakungasoloko kujongwa njengehlazo. Abantu bamandulo abaninzi babephawulwa ukuze babonise isizwe okanye unqulo lwabo. Ngokomzekelo, iTheological Dictionary of the New Testament ithi “amaSiriya ayezinikela kuthixo uHadadi noAtargatis ngokuziphawula esihlahleni okanye entanyeni . . . Abanquli bakaDionysus babeziphawula ngegqabi leivy.”

Abahlalutyi abaninzi banamhlanje bathi uPawulos wayebhekisela kwiziva awazifumana ngenxa yokubethwa ngoxa wayeshumayela. (2 Korinte 11:23-27) Kodwa ke kusenokwenzeka ukuba uPawulos wayengabhekiseli kwiziva zokoqobo, kodwa wayebhekisela kwindlela yakhe yobomi eyayimenza acace ukuba ungumKristu.

Ngaba imizi yokusabela yoSirayeli wamandulo yaba yimiqolomba yokubalekela izihange?

▪ Mandulo iitempile ezininzi zabahedeni zaziyimiqolomba yokubalekela izihange. Neecawa zeNgqobhoko zamaxesha aphakathi zafeza injongo efanayo. Kodwa ke imithetho eyayilawula izixeko zokusabela zakwaSirayeli wamandulo yayiqinisekisa ukuba ezo zixeko zazingabi ligwiba lezihange.

UMthetho kaMoses wawusithi ezo zixeko zazifanele zikhusele kuphela umntu obulele ngengozi. (Duteronomi 19:4, 5) Wayenokubalekela kwesona sixeko sokusabela sikufutshane ukuze angafunyanwa sisalamane sexhoba lakhe esiyindoda, esasinokuphindezela igazi lalo. Emva kukuchazela amadoda amakhulu esixeko oko kwakwenzekile, umbulali wayesisiwa kwisixeko esongamele indawo awayebulele kuyo. Apho wayenikwa ithuba lokuzithethelela. Amadoda amakhulu ayeye aphande enoba kwakungekho ntiyo kusini na phakathi kombulali nomfi.—Numeri 35:20-24; Duteronomi 19:6, 7; Yoshuwa 20:4, 5.

Xa efunyaniswe engenatyala, umbulali wayebuyela kumzi wokusabela ukuze ahlale ngaphakathi kuwo. Loo mizi yayingezontolongo. Umntu osabele apho wayesebenza ukuze ancede abahlali beso sixeko. Bonke abantu abasabele kwimizi yokusabela babebuyela emakhayeni abo esakufa umbingeleli omkhulu.—Numeri 35:6, 25-28.

[Imaphu ekwiphepha 15]

(Ukuba ufuna inkcazelo ehlahlelwe kakuhle, yiya kwimpapasho)

IMIZI YOKUSABELA

1 IKHEDESHI

2 IGOLANI

3 IRAMOTI-GILIYADI

4 ISHEKEM

5 IBHEZERI

6 IHEBRON

UMlambo IYordan