Imibono Evela Kwelemimoya
ENOBA ungondela kangakanani esibhakabhakeni, awusoze umbone umntu wokomoya. Nokuba ungaphulaphula awunakuze ubeve bethetha. Kodwa unokuqiniseka ukuba bakho. Bakrelekrele, banamagama yaye baneempawu ezahlukeneyo. Abanye basenzela izinto ezintle kodwa abanye bafuna ukusenzakalisa. Bonke banomdla kuthi.
UThixo wokwenyaniso ngokwakhe unguMoya. (Yohane 4:24) Unegama elikhethekileyo elimahlula kubo bonke oothixo bobuxoki. Igama lakhe nguYehova. (INdumiso 83:18) Umdumisi wabhala wathi: “Mkhulu uYehova yaye ngowokudunyiswa kakhulu. Uyoyikeka ngaphezu kwabo bonke abanye oothixo. Kuba bonke oothixo bezizwana bangoothixo abangenaxabiso; Kodwa yena uYehova, wenze wona kanye amazulu. Isidima nobungangamsha buphambi kwakhe. Amandla nobuhle busengcweleni yakhe.”—INdumiso 96:4-6.
Imibono YoThixo Wokwenyaniso
IBhayibhile isixelela ukuba, “akukho mntu umbonileyo uThixo nangaliphi na ixesha.” (Yohane 1:18) Imbonakalo nozuko lwakhe asinakuze siziqonde kanye njengokuba imfama ingayazi imibala. Kanye njengokuba utitshala echazela abafundi izinto ezintsonkothileyo ngezinto abazaziyo, noThixo usebenzisa iLizwi lakhe iBhayibhile ukuze achaze izinto esingenakuzibona esebenzisa ezo sizibonayo. UYehova wasebenzisa imibono ephefumlelweyo awayinika abakhonzi bakhe bamandulo ukuze asincede sibone iinkundla zasezulwini nokuze siqonde indlela abasiphembelela ngayo abo bahlala apho.
Ngokomzekelo, umbono owanikwa umprofeti uHezekile wanxulumanisa uzuko lukaYehova nomlilo, ubuqaqawuli, ilitye lesafire nomnyama. Komnye umbono umpostile uYohane ubona uYehova ehleli etroneni yaye uthi “ngembonakalo, unjengelitye leyaspisi nelitye elimbala ubomvu elixabisekileyo,” aze ongezelele ngokuthi “itrone ijikelezwe ngumnyama onjenge-emeraldi ngembonakalo.” Ezi nkcazelo ziyasinceda sibone ukuba uYehova uhlala kwindawo emakhazi-khazi, enoxolo nezolileyo.—ISityhilelo 4:2, 3; Hezekile 1:26-28.
Nomprofeti uDaniyeli wabona uYehova embonweni, ephahlwe ‘lishumi lamawaka eliphindwe ngeshumi lamawaka eengelosi elalimi kanye phambi kukaYehova.’ (Daniyeli 7:10) Lo mbono umele ukuba wawuchukumisa ngokwenene! Ukubona nje ingelosi enye embonweni kumel’ ukuba kwakusoyikeka, ngoko khawube nomfanekiso ngqondweni wamawakawaka ezigidi zeengelosi ezifezekileyo!
Iingelosi kuthethwa ngazo phantse izihlandlo ezingama-400 eBhayibhileni yaye ziquka iiserafi neekerubhi. Amagama esiGrike nawesiHebhere aguqulelwe ngokuthi “ingelosi” omabini eBhayibhileni athetha “umthunywa.” Iingelosi ziyakwazi ukunxibelelana yaye kumaxesha angaphambili zazinxibelelana nabantu. Iingelosi asingobantu abakha baphila emhlabeni. UYehova wadala ezi zidalwa zomoya ngaphambi kokuba adale umntu.—Yobhi 38:4-7.
Kumbono kaDaniyeli, inyambalala yeengelosi yayihlanganisene ukuze ibone isiganeko esibalulekileyo. UDaniyeli wabona “uthile onjengonyana womntu” esondela etroneni kaYehova ukuze anikwe “ulawulo nesidima nobukumkani, ukuze zonke izizwana neentlanga neelwimi zimkhonze.” (Daniyeli 7:13, 14) Lo ‘nyana womntu’ oyimbalasane kulo mmandla wokomoya nguYesu Kristu ovusiweyo onegunya lokulawula umhlaba wonke. Ulawulo lwakhe luza kuthabathel’ indawo bonke oorhulumente babantu luze luphelise ukugula, usizi, ingcinezelo, ubuhlwempu kwanokufa.—Daniyeli 2:44.
Ukubekwa etroneni kukaYesu kwayivuyisa kakhulu inginginya yeengelosi ezithembekileyo nezinqwenelela abantu okuhle. Okubuhlungu kukuba, asizizo zonke iingelosi ezavuyayo.
Iintshaba ZikaThixo Noluntu
Zisuka nje kwimbali yabantu, enye yeengelosi ifuna ukunqulwa yavukela uYehova yazenza uSathana, gama elo elithetha “umxhathisi.” USathana osisimntwiso sobungendawo, usukuzana noYehova osisimntwiso sothando. Ezinye iingelosi zathelela uSathana kwimvukelo yakhe. IBhayibhile izibiza ngokuba ziidemon. NjengoSathana, iidemon ziye zajika zaba ziintshaba zabantu ezikhohlakeleyo. Izinto ezininzi ezivisa abantu ubuhlungu emhlabeni njengokungekho sikweni, ukugula, ubuhlwempu neemfazwe zibangelwa yimpembelelo yazo.
Nangona kungasathethwa kangako ngoSathana kwiicawa zeNgqobhoko, ezininzi incwadi kaYobhi iyasikrobisa kubuntu nakwiintshukumisa zale ngelosi inemvukelo. Ithi: “Ngoku kwaba yimini oonyana boThixo oyinyaniso abangena ngayo ukuze beme ezindaweni zabo phambi koYehova, kwanoSathana wangena phakathi kwabo.” Kumazwi akhe alandelayo, uSathana watyhola uYobhi esithi ukhonza uThixo ngenxa nje yezinto awayezifumana. Ezama ukuvelisa ubungqina besityholo sakhe, uSathana wamzisela imbandezelo enkulu uYobhi, ebulala imfuyo yakhe nabo bonke abantwana bakhe abalishumi. Emva koko wabetha uYobhi ngamathumba abuhlungu emzimbeni wakhe wonke. Zonke ezi nzame zikaSathana azizange zizingqine ziyinyaniso izityholo zakhe.—Yobhi 1:6-19; 2:7.
Kukho izizathu ezivakalayo ezibangela ukuba uYehova amnyamezele uSathana, kodwa akasoze amnyamezele ngonaphakade. Kungekudala uMtyholi uza kutshatyalaliswa. Sele enziwe amalungiselelo yaye achazwa kwincwadi yeSityhilelo, apho sichazelwa ngesiganeko esibalulekileyo esenzeka kummandla wemimoya esasingenakuze sisibone. Sifunda oku: “Kwabakho imfazwe ezulwini: UMikayeli neengelosi zakhe balwa idabi nenamba, yazilwela nayo inamba kunye neengelosi zayo kodwa ayizange yoyise, azabi safunyanelwa ndawo ezulwini. Ngoko yaphoswa phantsi inamba enkulu, inyoka yantlandlolo, leyo ibizwa ngokuba nguMtyholi, noSathana, lowo ulahlekisa umhlaba omiweyo uphela; waphoswa phantsi emhlabeni, neengelosi zakhe zaphoswa phantsi kunye naye.”—ISityhilelo 12:7-9.
Phawula ukuba kuthiwa uSathana “ulahlekisa umhlaba omiweyo uphela.” Ulahlekisa abantu esebenzisa unqulo ukuze abantu batyeshele uYehova neLizwi lakhe. Obunye ubuxoki obunamandla bobokuba bonke abantu abafileyo baya ezulwini. Kukho izimvo ezahlukahlukeneyo ngale ngcamango. Ngokomzekelo, eAfrika naseAsiya, abaninzi bakholelwa ukuba abantu abafileyo bazizinyanya. Imfundiso yokuhlanjululwa kwemiphefumlo nesihogo isekelwe ekubeni abantu bayaqhubeka bephila emva kokufa.
Ngaba Abantu Abafileyo Baya Ezulwini?
Kuthekani ngenkolelo egqugqisileyo ehlabathini ngokubanzi yokuba abantu abalungileyo baya ezulwini? Liyinyaniso elokuba abanye abantu abalungileyo bayaya ezulwini kodwa inani labo lincinane xa lithelekiswa neebhiliyoni zabantu abaye bafa. IBhayibhile ithi abantu abali-144 000 “abathengwe emhlabeni” baya kuba ‘ngababingeleli’ ‘nookumkani phezu komhlaba.’ (ISityhilelo 5:9, 10; 14:1, 3) Bekunye nonyana womntu, uYesu Kristu baya kubumba urhulumente wasezulwini, obuBukumkani bukaThixo. Loo rhulumente uya kutshabalalisa uSathana needemon zakhe yaye uza kwenza umhlaba ube yiparadesi. Inkoliso yabantu abafileyo iza kubuyiselwa ebomini ivulelwe ithuba lokuphila ngonaphakade kumhlaba oyiParadesi.—Luka 23:43.
Xa sishwankathela, kukho inginginya yabantu abahlala kwelemimoya. Oyena mntu uphakamileyo kwaba bantu bokomoya nguYehova uThixo, uMdali wobomi. Kukho izigidi ngezigidi zeengelosi ezimkhonza ngokuthembeka. Ezinye iingelosi ezazikhokelwa nguSathana, zamvukela uYehova yaye ngoku zilahlekisa abantu. Ukongezelela koko kukho iqaqobana labantu “abathengwe,” okanye abakhethwe emhlabeni ukuze bayokwenza umsebenzi obalulekileyo ezulwini. Makhe sibone ukuba ngoobani esinokuqhagamshelana nabo kwelemimoya yaye sinokuqhagamshelana njani nabo.