Ngaba Ubusazi?

Yayingoobani abavumisi ngeenkwenkwezi abeza kubona uYesu xa wayelusana?

▪ Ngokutsho kwengxelo yokuzalwa kukaYesu ekwincwadi yeVangeli kaMateyu, abantu ababesuka “ngasempumalanga” nababebona inkwenkwezi yokumkani omtsha bampha izipho uYesu. Yintoni esiyaziyo ngabo?

Inkcazelo yokuqala ekhoyo ngabavumisi ngeenkwenkwezi ngumbhali mbali ongumGrike uHerodotus. UHerodotus owayephila ngenkulungwane yesihlanu Ngaphambi Kwexesha Eliqhelekileyo, wathi abavumisi ngeenkwenkwezi babephuma kubabingeleli basePersi ababevumisa ngeenkwenkwezi, belawula amaphupha yaye bengamagqwirha. Ngexesha likaHerodotus, unqulo lwamaPersi lwalubizwa ngokuba yiZoroastrian. Ngenxa yoko abavumisi ngeenkwenkwezi awayethetha ngabo kusenokwenzeka ukuba babengababingeleli beli hlelo. IThe International Standard Bible Encyclopedia ithi: “Ngokuqhelekileyo, kumaGrike umvumisi ngeenkwenkwezi wayenobugqi maxa wambi wayesenza nemilingo.”

Abaphengululi abaninzi “bamaKristu” abanjengoJustin Martyr, uOrigen noTertullian, bathi amadoda awatyelela uYesu xa wayelusana ayengabavumisi ngeenkwenkwezi. Ngokomzekelo uTertullian wathi kwincwadi yakhe ethi On Idolatry: “Siyazi ukuba umlingo nokuvumisa ngeenkwenkwezi ngamaphuth’ ahlathinye. Abavumisi ngeenkwenkwezi, baba ngabantu bokuqala . . . ukupha [uYesu] ‘izipho.’” Ngenxa yoko, abaguquleli beBhayibhile abaninzi bathi la madoda “ayengabavumisi ngeenkwenkwezi.”

Kwakutheni ukuze uMateyu abhekise amazwi akwincwadi kaZekariya kumprofeti uYeremiya?

▪ Le ngxelo ifumaneka kuMateyu 27:9, 10, apho umbhali wale ncwadi yeVangeli athetha ngemali eyanikwa uYudas Iskariyot owangcatsha uYesu. Ezi vesi zithi: “Ngoko kwazaliseka oko kwathethwa ngoYeremiya umprofeti, esithi: ‘Yaye bathabatha amaqhosha esilivere angamashumi amathathu, ixabiso awayexabisa lona umntu, . . . kwaye bawanikela ngenxa yentsimi yombumbi.’” Umprofeti wokuqala ukuthetha ngamaqhosha esilivere angama-30 nguZekariya, kungekhona uYeremiya.—Zekariya 11:12, 13.

Kuyabonakala ukuba uYeremiya, kungekhona uIsaya maxa wambi wayeba ngowokuqala kwiincwadi ‘zabaprofeti.’ (Mateyu 22:40) Ngaloo ndlela xa uMateyu wayethetha “ngoYeremiya,” wayebhekisela kwinxalenye yeZibhalo ezazibizwa ngencwadi yazo yokuqala. Le nxalenye yeZibhalo yayiquka incwadi kaZekariya.

Ngendlela efanayo, iincwadi zeBhayibhile ezazisaziwa ngokuba yiMibhalo uYesu wazibiza ngokuba ‘ziiNdumiso.’ Ngoko, xa wayesithi izinto ezibhalwe ngaye “emthethweni kaMoses nakubaProfeti nakwiiNdumiso” zimele zizaliseke, wayebhekisela kwiziprofeto ezikwiZibhalo zesiHebhere.—Luka 24:44.