Ngaba Ubusazi?

Abavumisi ngeenkwenkwezi bamtyelela nini uYesu?

KwiVangeli kaMateyu sifunda ukuba “abavumisi ngeenkwenkwezi abavela kwimimandla yasempumalanga” batyelela uYesu bemphathele izipho. (Mateyu 2:1-12) Asazi ukuba babebangaphi aba bavumisi ngeenkwenkwezi ababetyelele uYesu olusana, akukho kwanto isiqinisekisa ukuba babebathathu njengokuba kudla ngokucingwa ngolo hlobo yaye akafumaneki naseBhayibhileni amagama abo.

INew International Version Study Bible inala magqabaza ngokuphathelele uMateyu 2:11: “Ngokwahlukileyo koko kwaziwa nguwonke wonke, abavumisi ngeenkwenkwezi abazange batyelele uYesu emkhumbini ngosuku awazalwa ngalo njengokuba benzayo abelusi. Bafika emva kweenyanga yaye babhekisa kuye ngokuthi ‘ngumntwana’ xa befika ‘kowabo.’” Oku kungqinwa nasisibakala sokuba uHerode, wafuna kubulawe abantwana abangamakhwenkwe abaneminyaka emibini nangaphantsi kuzo zonke izithili zaseBhetelehem. Wabala “ngokuvumelana nexesha awayeliqinisekise ngenyameko kubavumisi ngeenkwenkwezi.”—Mateyu 2:16.

Ukuba aba bavumisi ngeenkwenkwezi babefike ngobusuku bokuzalwa kukaYesu, bekungangenkankulu ukuba uMariya anikele ngamahobe amabini kuphela kwiintsuku ezingama-40 etempileni yaseYerusalem xa wayenikela ngoYesu. (Luka 2:22-24) Eli yayililungiselelo loMthetho elalenzelwe abantu abangathathi ntweni nababengenakukwazi ukunikela ngenkunzi yegusha. (Levitikus 12:6-8) Noko ke, ezi zipho zixabisekileyo kufanele ukuba zafika ngexesha yaye zasetyenziselwa ukuhlala kwentsapho yakuloYesu eYiputa.—Mateyu 2:13-15.

Kwakutheni ukuze uYesu athabathe iintsuku ezine ngaphambi kokuba afike kwingcwaba likaLazaro?

Kubonakala ngathi uYesu walungiselela ukuba izinto zibe njalo. Yintoni esenza siqiniseke ngaloo mba? Khawucinge ngengxelo ebhalwe kuYohane isahluko 11.

Xa uLazaro, ummi waseBhethani ongumhlobo kaYesu, wagulel’ ukufa oodade wabo bathumela umyalezo kuYesu ngesi sihelegu. (Indinyana 1-3) Ngelo xesha uYesu wayenokuthabatha iintsuku ezimbini ukusuka kwindawo awayekuyo ukuya eBhethani. (Yohane 10:40) Malunga nexesha lokufumana kukaYesu ezo ndaba uLazaro wayesele emnabele uqaqa. Wenza ntoni uYesu? “Wahlala iintsuku ezimbini kwindawo awayekuyo” waza wanduluka waya eBhethani. (Indinyana 6, 7) Kodwa ke, emva kokulinda iintsuku ezimbini aze ahambe iintsuku ezimbini ukuya eBhethani, wafika engcwabeni uLazaro sele eneentsuku ezine ekobandayo.—Indinyana 17.

Ngaphambi koko, uYesu wayesele evuse abantu ababini ekufeni—omnye kanye emva kokuba eswelekile kanti omnye kusenokwenzeka ukuba emva kweeyure ezimbalwa emva kokufa kwakhe. (Luka 7:11-17; 8:49-55) Ngaba bethu wayenokukwazi ukuvusa umntu oneentsuku ezine kwantsonga nyawana nosele enomzimba obolayo? (Indinyana 39) Okubangel’ umdla kukuba, enye intyilalwazi yeBhayibhile ithi, abathile kumaYuda babekholelwa ukuba “umntu ofe iintsuku ezine kwakungasekho themba lokuba angavuswa ekufeni; ngeloo xesha umzimba wawusele uqalisa ukubola, nomphefumlo ekwakukholelwa ukuba undanda ecaleni kwesidumbu emva kweentsuku ezintathu, wawusele umkile.”

Ukuba kukho nabaphi na ababenamathandabuzo kwababekufutshane nengcwaba, babeza kubona ubungqina bamandla kaYesu okoyisa ukufa. Emi kufutshane nengcwaba, uYesu wadanduluka wathi: “Lazaro, phuma!” Yaye “waphuma umntu lowo obefile.” (Indinyana 43, 44) Uvuko kuphela kwethemba eliqinisekileyo labafi kungekhona inkolelo yobuxoki yokuba umphefumlo womntu uyaphila emva kokufa.—Hezekile 18:4; Yohane 11:25.